ਸੁਚੇਤ ਰਹੋ ਵੋਟਰੋ….ਆਪਣੇ ਪਿੰਡ ਦੀ ਵੋਟਰ ਸੂਚੀ 3 ਸਤੰਬਰ ਤੱਕ ਠੀਕ ਕਰਵਾਓ…!
ਬਰਨਾਲਾ, 30 ਅਗਸਤ, (ਨਿਰਮਲ ਸਿੰਘ ਪੰਡੋਰੀ)-
–ਪੰਜਾਬ ਸਰਕਾਰ ਵੱਲੋਂ ਸੂਬੇ ‘ਚ ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ ਦਾ ਐਲਾਨ ਕਰ ਦਿੱਤਾ ਗਿਆ ਜਿਸ ਦੀਆਂ ਤਿਆਰੀਆਂ ਪ੍ਰਸ਼ਾਸਨਿਕ ਪੱਧਰ ‘ਤੇ ਸ਼ੁਰੂ ਹਨ। ਚੋਣ ਕਮਿਸ਼ਨ ਵੱਲੋਂ ਇਹਨਾਂ ਚੋਣਾਂ ਲਈ ਵੋਟਰ ਸੂਚੀਆਂ ਨੂੰ ਅੰਤਿਮ ਰੂਪ ਦਿੱਤਾ ਜਾ ਰਿਹਾ ਹੈ। ਚੋਣ ਕਮਿਸ਼ਨ ਨੇ ਵੋਟਰ ਸੂਚੀਆਂ ਦੀ ਸੁਧਾਈ ਦੌਰਾਨ ਦਾਅਵੇ ਅਤੇ ਇਤਰਾਜ਼ਾਂ ਦੀ ਪਹਿਲਾਂ 27 ਅਗਸਤ ਤਾਰੀਕ ਰੱਖੀ ਸੀ ਪ੍ਰੰਤੂ ਹੁਣ ਇਸ ਨੂੰ ਵਧਾ ਕੇ 3 ਸਤੰਬਰ ਤੱਕ ਕਰ ਦਿੱਤਾ ਗਿਆ ਹੈ। ਭਾਵ ਕਿ ਕੋਈ ਵੀ ਵੋਟਰ ਸੂਚੀਆਂ ਵਿੱਚ ਦਾਅਵਾ ਅਤੇ ਇਤਰਾਜ਼ ਲਿਖਤੀ ਤੌਰ ‘ਤੇ ਸਬੰਧਿਤ ਅਧਿਕਾਰੀ ਕੋਲ 3 ਸਤੰਬਰ ਤੱਕ ਦੇ ਸਕਦਾ ਹੈ ਉਸ ਤੋਂ ਬਾਅਦ 8 ਸਤੰਬਰ ਤੱਕ ਦਾਅਵੇ ਅਤੇ ਇਤਰਾਜਾਂ ਦਾ ਨਿਪਟਾਰਾ ਕੀਤਾ ਜਾਵੇਗਾ। ਇਹ ਵੀ ਜਾਣਕਾਰੀ ਸਾਹਮਣੇ ਆ ਰਹੀ ਹੈ ਕਿ ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪਰਿਸ਼ਦ ਦੀਆਂ ਚੋਣਾਂ, ਗ੍ਰਾਮ ਪੰਚਾਇਤਾਂ ਦੀਆਂ ਚੋਣਾਂ ਵਾਲੀਆਂ ਸੂਚੀਆਂ ਅਨੁਸਾਰ ਹੀ ਹੋਣਗੀਆਂ ਜਿਨਾਂ ਵਿੱਚ ਬਹੁਤ ਸਾਰੀਆਂ ਗਲਤੀਆਂ ਸਨ। ਉੰਝ ਤਾਂ ਭਾਵੇਂ ਇਹਨਾਂ ਵੋਟਰ ਸੂਚੀਆਂ ਉੱਪਰ ਸਾਲ 2023 ਲਿਖਿਆ ਹੋਇਆ ਹੈ ਪ੍ਰੰਤੂ ਇਹ ਵੋਟਰ ਸੂਚੀਆਂ ਪਿਛਲੇ 7-8 ਸਾਲ ਪੁਰਾਣੀਆਂ ਹਨ ਅਤੇ ਇਨਾਂ 7-8 ਸਾਲਾਂ ਵਿੱਚ ਕਈ ਵਾਰ ਸੁਧਾਈ ਹੋਣ ਦੇ ਬਾਵਜੂਦ ਵੀ ਇਹਨਾਂ ਵੋਟਰ ਸੂਚੀਆਂ ਵਿੱਚ ਦਰਜ ਹੋਈਆਂ ਗ਼ਲਤ ਵੋਟਾਂ ਕੱਟੀਆਂ ਨਹੀਂ ਗਈਆਂ।
ਜ਼ਿਕਰਯੋਗ ਹੈ ਕਿ ਗ੍ਰਾਮ ਪੰਚਾਇਤਾਂ ਦੀਆਂ ਚੋਣਾਂ ਮੌਕੇ ਵਰਤੀਆਂ ਗਈਆਂ ਵੋਟਰ ਸੂਚੀਆਂ ਵਿੱਚ ਕਈ ਕਈ ਵਰ੍ਹਿਆਂ ਤੋਂ ਮਰ ਚੁੱਕੇ ਵੋਟਰ ਅਤੇ ਕਈ ਕਈ ਵਰ੍ਹਿਆਂ ਤੋਂ ਵਿਆਹੀਆਂ ਜਾ ਚੁੱਕੀਆਂ ਕੁੜੀਆਂ ਦੀਆਂ ਵੋਟਾਂ ਵੀ ਦਰਜ ਸਨ। ਇਹ ਵੀ ਸਾਹਮਣੇ ਆਇਆ ਸੀ ਕਿ ਕੁਝ ਕੁੜੀਆਂ ਨੇ 10-15 ਸਾਲ ਵਿਆਹ ਹੋਣ ਦੇ ਬਾਵਜੂਦ ਵੀ ਸਹੁਰੇ ਪਿੰਡ ਤੋਂ ਆ ਕੇ ਪੇਕੇ ਪਿੰਡ ਸਰਪੰਚੀ ਪੰਚੀ ਦੀ ਵੋਟ ਪਾਈ, ਜੋ ਕਿ ਪੜ੍ਹਤਾਲ ਦਾ ਵਿਸ਼ਾ ਹੈ ਕਿਉਂਕਿ ਐਨਾ ਲੰਮਾ ਸਮਾਂ ਵਿਆਹ ਹੋਣ ਦੇ ਬਾਵਜੂਦ ਇਹ ਮੰਨਿਆ ਨਹੀਂ ਜਾ ਸਕਦਾ ਕਿ ਕੁੜੀ ਦੀ ਵੋਟ ਉਸ ਦੇ ਸਹੁਰੇ ਪਰਿਵਾਰ ਵਿੱਚ ਨਾ ਬਣੀ ਹੋਵੇ ਜਦ ਕਿ ਨਿਯਮਾਂ ਅਨੁਸਾਰ ਇੱਕ ਵੋਟਰ ਹੈ ਇੱਕੋ ਜਗ੍ਹਾ ਹੀ ਵੋਟ ਬਣਾ ਸਕਦਾ ਹੈ ਅਤੇ ਜੇਕਰ ਕਿਸੇ ਦੂਜੇ ਜਗ੍ਹਾ ਉਸ ਦੀ ਵੋਟ ਬਣੀ ਹੈ ਤਾਂ ਸੰਬੰਧਤ ਅਧਿਕਾਰੀ ਨੂੰ ਜਾਣਕਾਰੀ ਦੇ ਕੇ ਵੋਟ ਕਟਵਾਉਣਾ ਉਸ ਦੀ ਆਪਣੀ ਜ਼ਿੰਮੇਵਾਰੀ ਹੈ ਪ੍ਰੰਤੂ ਗ੍ਰਾਮ ਪੰਚਾਇਤ ਚੋਣਾਂ ਵਿੱਚ ਵੇਖਿਆ ਗਿਆ ਕਿ ਕਈ ਕਈ ਸਾਲਾਂ ਤੋਂ ਵਿਆਹੀਆਂ ਜਾ ਚੁੱਕੀਆਂ ਕੁੜੀਆਂ ਅਤੇ ਕਈ ਵਰ੍ਹਿਆਂ ਤੋਂ ਮਰ ਚੁੱਕੇ ਵੋਟਰਾਂ ਦੀਆਂ ਵੋਟਾਂ ਬਣੀਆਂ ਹੋਈਆਂ ਹਨ। ਹੁਣ ਇਹੀ ਵੋਟਰ ਸੂਚੀਆਂ ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ ਲਈ ਵਰਤੀਆਂ ਜਾ ਰਹੀਆਂ ਹਨ।
ਇਹ ਪ੍ਰਕਿਰਿਆ ਚੋਣ ਕਮਿਸ਼ਨ ਦੀ ਸੁਧਾਈ ‘ਤੇ ਵੀ ਵੱਡੇ ਸਵਾਲ ਖੜੇ ਕਰਦੀ ਹੈ ਕਿਉਂਕਿ ਪੁਰਾਣੀਆਂ ਵੋਟਰ ਸੂਚੀਆਂ ਦੀ ਵਰਤੋ ਨਾਲ ਵੋਟ ਫੀਸਦੀ ਦੇ ਅੰਕੜੇ ਵੀ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੁੰਦੇ ਹਨ ਜਿਵੇਂ ਕਿ ਜੇਕਰ 1500 ਵੋਟ ਪਿੱਛੇ 100 ਵੋਟ ਵੀ ਕੱਟੀ ਜਾਵੇ ਤਾਂ ਪਿੰਡ ਦੇ ਵੋਟ ਫੀਸਦੀ ਅੰਕੜੇ ਪੂਰੀ ਤਰ੍ਹਾਂ ਬਦਲ ਜਾਣਗੇ ਪ੍ਰੰਤੂ ਜੇਕਰ ਸੁਧਾਈ ਦੌਰਾਨ ਇਹ ਵੋਟਾਂ ਨਾ ਕੱਟੀਆਂ ਜਾਣ ਤਾਂ ਵੋਟ ਪੋਲ ਫੀਸਦੀ ਅੰਕੜੇ ਹੋਰ ਹੋਣਗੇ। ਕੁਝ ਪਿੰਡਾਂ ਦੀਆਂ ਵੋਟਰ ਸੂਚੀਆਂ ਵਿੱਚ ਅਜਿਹਾ ਵੀ ਹੈ ਕਿ ਕਿਸੇ ਪਰਿਵਾਰ ਦੇ ਇੱਕ ਮੈਂਬਰ ਦੀ ਵੋਟ ਪਿੰਡ ਦੇ ਦੂਜੇ ਵਾਰਡ ਵਿੱਚ ਕਿਸੇ ਹੋਰ ਪਰਿਵਾਰ ਦੀਆਂ ਵੋਟਾਂ ਵਿੱਚ ਦਰਜ ਹੋਈ ਹੈ। ਕਈ ਸਾਲਾਂ ਤੋਂ ਇੱਕੋ ਵਾਰਡ ਵਿੱਚ ਰਹਿ ਰਹੇ ਇੱਕ ਪਰਿਵਾਰ ਦੀਆਂ ਸਾਰੀਆਂ ਵੋਟਾਂ ਦੂਜੇ ਵਾਰਡ ਵਿੱਚ ਆਪਣੇ ਆਪ ਹੀ ਤਬਦੀਲ ਹੋ ਗਈਆਂ ਹਨ, ਜਦ ਕਿ ਸਬੰਧਤ ਪਰਿਵਾਰਾਂ ਨੇ ਆਪਣੀਆਂ ਵੋਟਾਂ ਤਬਦੀਲ ਕਰਨ ਸਬੰਧੀ ਕੋਈ ਅਰਜ਼ੀ ਵਗੈਰਾ ਨਹੀਂ ਦਿੱਤੀ। ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ ਲਈ ਵਰਤੀਆਂ ਜਾਣ ਵਾਲੀਆਂ ਵੋਟਾਂ ‘ਚ ਅਜਿਹੀਆਂ ਗਲਤੀਆਂ ਪੜ੍ਹਤਾਲ ਦਾ ਵਿਸ਼ਾ ਹਨ।
