ਚੰਡੀਗੜ੍ਹ,18 ਅਕਤੂਬਰ, (ਨਿਰਮਲ ਸਿੰਘ ਪੰਡੋਰੀ)-
-CBI ਵੱਲੋਂ ਰਿਸ਼ਵਤ ਦੇ ਮਾਮਲੇ ‘ਚ ਗ੍ਰਿਫ਼ਤਾਰ ਕੀਤੇ ਗਏ ਪੰਜਾਬ ਪੁਲਿਸ ਦੇ ਡੀਆਈਜੀ ਰੈਂਕ ਦੇ ਅਧਿਕਾਰੀ ਹਰਚਰਨ ਸਿੰਘ ਭੁੱਲਰ ਦਾ ਸੀਬੀਆਈ ਵੱਲੋਂ ਰਿਮਾਂਡ ਨਾ ਮੰਗੇ ਜਾਣ ਤੋਂ ਬਾਅਦ ਭਾਵੇਂ ਕੁਝ ਵੱਡੇ ਸਿਆਸੀ ਨੇਤਾਵਾਂ ਨੇ ਅਤੇ ਵੱਡੇ ਬਾਬੂਆਂ ਨੇ ਸੁੱਖ ਦਾ ਸਾਹ ਲਿਆ ਹੋਵੇ ਪ੍ਰੰਤੂ ਇਸ ਮਾਮਲੇ ਨੇ ਪੰਜਾਬ ਦੀ ਵੱਡੀ ਅਫਸਰਸ਼ਾਹੀ ਨੂੰ ਸੁੱਕਣੇ ਪਾ ਰੱਖਿਆ ਹੈ। ਡੀਆਈਜੀ ਭੁੱਲਰ ਦੇ ਮਾਮਲੇ ਨੇ ਪੰਜਾਬ ਪੁਲਿਸ ਦੇ ਕੁਝ ਵੱਡੇ ਅਧਿਕਾਰੀਆਂ ਤੇ ਅਫਸਰਾਂ ‘ਚ ਤਰਥੱਲੀ ਮਚਾਈ ਹੋਈ ਹੈ। ਪੰਜਾਬ ਵਿੱਚ ਸ਼ਾਇਦ ਇਹ ਪਹਿਲਾ ਮਾਮਲਾ ਹੈ ਜਦੋਂ ਇਸ ਪੱਧਰ ਦੇ ਕਿਸੇ ਅਧਿਕਾਰੀ ‘ਤੇ ਇਸ ਤਰ੍ਹਾਂ ਦੀ ਕਾਰਵਾਈ ਹੋਈ ਹੋਵੇ। ਇਸ ਮਾਮਲੇ ਨੇ ਇੱਕ ਤਰੀਕੇ ਨਾਲ ਪੂਰੇ ਪ੍ਰਸ਼ਾਸਨਿਕ ਢਾਂਚੇ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ ਉਤੇ ਦੂਜੇ ਪਾਸੇ ਅਫਸਰਸ਼ਾਹੀ ਸਹਿਮ ਦੇ ਮਾਹੌਲ ਵਿੱਚ ਹੈ। ਡੀਆਈਜੀ ਭੁੱਲਰ ਦੀ ਰਿਸ਼ਵਤ ਮਾਮਲੇ ਦਾ ਅਸਰ ਅਫ਼ਸਰਾਂ ‘ਤੇ ਇੱਥੋਂ ਤੱਕ ਪਿਆ ਹੈ ਕਿ ਦੀਵਾਲੀ ਮੌਕੇ ਮਹਿੰਗੇ ਤੋਹਫ਼ਿਆਂ ਨਾਲ ਆਪਣੇ ਘਰ ਭਰਨ ਵਾਲੇ ਇਹ ਅਫ਼ਸਰ ਇਸ ਵਾਰ ਦੀਵਾਲੀ ‘ਤੇ ਮਿਲਣ ਵਾਲੇ ਤੋਹਫ਼ਿਆਂ ਤੋ ਇਸ ਤਰ੍ਹਾਂ ਦੂਰ ਰਹਿਣਾ ਚਾਹੁੰਦੇ ਹਨ ਜਿਵੇਂ ਕੋਈ ਰੇਲਵੇ ਸਟੇਸ਼ਨ ਜਾਂ ਬੱਸ ਸਟੈਂਡ ‘ਤੇ ਪਈ ਕਿਸੇ ਲਾਵਾਰਿਸ ਵਸਤੂ ਤੋਂ ਦੂਰ ਰਹਿੰਦਾ ਹੈ। ਇਸ ਵਾਰ ਉਨ੍ਹਾਂ ਨੇ ਘਰਾਂ ਦੇ ਦਰਵਾਜ਼ੇ ਬੰਦ ਕਰ ਕੇ ਚੌਕਸੀ ਚੌਕਸੀ ਵਧਾ ਦਿੱਤੀ ਹੈ।
ਸੂਤਰਾਂ ਅਨੁਸਾਰ ਕਈ ਉੱਚ ਅਧਿਕਾਰੀਆਂ ਨੇ ਆਪਣੇ ਅਰਦਲੀਆਂ ਅਤੇ ਸੁਰੱਖਿਆ ਕਰਮੀਆਂ ਨੂੰ ਸਖ਼ਤ ਹਦਾਇਤਾਂ ਜਾਰੀ ਕੀਤੀਆਂ ਹਨ ਕਿ ਕਿਸੇ ਵੀ ਵਿਅਕਤੀ ਨੂੰ, ਚਾਹੇ ਉਹ ਕਿੰਨਾ ਹੀ ਜਾਣ-ਪਛਾਣ ਵਾਲਾ ਕਿਉਂ ਨਾ ਹੋਵੇ, ਦੀਵਾਲੀ ਦਾ ਤੋਹਫ਼ਾ ਲੈ ਕੇ ਅੰਦਰ ਦਾਖ਼ਲ ਨਾ ਹੋਣ ਦਿੱਤਾ ਜਾਵੇ। ਕਈ ਥਾਵਾਂ ’ਤੇ ਤਾਂ ਅਫਸਰਾਂ ਨੇ ਆਪਣੇ ਦਫ਼ਤਰਾਂ ਵਿੱਚ ਵੀ ਮਹਿਮਾਨਾਂ ਲਈ ਪਹਿਲਾਂ ਤਸਦੀਕ ਦਾ ਪ੍ਰਬੰਧ ਕਰਵਾ ਦਿੱਤਾ ਹੈ ਕਿ ਕੋਈ ਸ਼ੱਕੀ ਵਿਅਕਤੀ ਮਿਲਣ ਆਵੇ ਤਾਂ ਪਹਿਲਾਂ ਉਸਦੀ ਪੂਰੀ ਜਾਂਚ ਪੜ੍ਹਤਾਲ ਕਰਨ ਤੋਂ ਬਾਅਦ ਹੀ ਮਿਲਣ ਦੀ ਇਜਾਜ਼ਤ ਦਿੱਤੀ ਜਾ ਰਹੀ ਹੈ। ਇਸ ਸਾਰੇ ਮਾਹੌਲ ਵਿਚ ਦਿਲਚਸਪੀ ਦੀ ਗੱਲ ਇਹ ਹੈ ਕਿ ਜਦੋਂ ਆਮ ਲੋਕਾਂ ਲਈ ਦੀਵਾਲੀ ਖੁਸ਼ੀ ਤੇ ਮਿਲਣ-ਮਿਲਾਪ ਦਾ ਤਿਉਹਾਰ ਹੁੰਦੀ ਹੈ, ਇਸ ਵਾਰ ਅਫ਼ਸਰਾਂ ਲਈ ਇਹ ਸਾਵਧਾਨੀ ਤੇ ਸਹਿਮ ਦਾ ਤਿਉਹਾਰ ਬਣ ਗਈ ਹੈ।ਇੱਕ ਸੀਨੀਅਰ ਅਧਿਕਾਰੀ ਨੇ ਅਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਦੱਸਿਆ ਕਿ ਹਰ ਸਾਲ ਦੀਵਾਲੀ ’ਤੇ ਅਸੀਂ ਲੋਕਾਂ ਦੇ ਗਿਫਟਾਂ ਨੂੰ ਰੁਟੀਨ ਵਜੋਂ ਕਬੂਲ ਕਰਦੇ ਸੀ, ਪਰ ਇਸ ਵਾਰ ਮਾਹੌਲ ਹੀ ਕੁਝ ਹੋਰ ਹੈ,ਕੋਈ ਨਹੀਂ ਚਾਹੁੰਦਾ ਕਿ ਉਸਦਾ ਨਾਮ ਕਿਸੇ ਗ਼ਲਤ ਸੰਦਰਭ ਵਿੱਚ ਆਵੇ। ਬਰਨਾਲਾ ਦੇ ਇੱਕ ਥਾਣੇ ਵਿੱਚ ਤਾਇਨਾਤ ਇੱਕ ਮਜ਼ਾਹੀਆ ਸੁਭਾਅ ਦੇ ਏਐਸਆਈ ਨੂੰ ਜਦ ਰੂਟੀਨ ‘ਚ ਪੁੱਛਿਆ ਕਿ “ਕੀ ਕਹਿੰਦੀ ਆਂ ਇਸ ਵਾਰ ਦੀਵਾਲੀ” ਤਾਂ ਉਸਨੇ ਆਪਣੇ ਸੁਭਾਅ ਅਨੁਸਾਰ ਹੀ ਜਵਾਬ ਦਿੱਤਾ ਕਿ “ਸੀਬੀਆਈ ਨੇ ਸਾਡੇ ਤਾਂ ਪਹਿਲਾਂ ਹੀ ਪਟਾਖ਼ੇ ਚਲਾ ਦਿੱਤੇ ਹਨ, ਇਸ ਵਾਰ ਦੀਵਾਲੀ ਫ਼ਿੱਕੀ ਰਹੇਗੀ”।
ਡੀਆਈਜੀ ਭੁੱਲਰ ਦੇ ਨਾਲ ਉਨਾਂ ਦੇ ਇੱਕ ਵਿਚੋਲੇ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਅਫ਼ਸਰਾਂ ਦੇ ਵਿਚੋਲੇ ਵੀ ਰੂਪੋਸ਼ ਹੋ ਗਏ ਹਨ। ਬਹਿਰਹਾਲ ! ਡੀਆਈਜੀ ਭੁੱਲਰ ਦਾ ਰਿਸ਼ਵਤ ਮਾਮਲਾ ਪੰਜਾਬ ਪੁਲਿਸ ਦੇ ਇੱਕ ਵੱਡੇ ਅਫ਼ਸਰ ਨਾਲ ਹੀ ਜੁੜਿਆ ਹੋਇਆ ਨਹੀਂ ਹੈ ਸਗੋਂ ਇਸਨੇ ਪੰਜਾਬ ਦੀ ਅਫ਼ਸਰਸ਼ਾਹੀ ਦੇ ਚਿਹਰੇ ਤੋਂ ਇੱਕ ਮਖੌਟਾ ਉਤਾਰ ਦਿੱਤਾ ਹੈ, ਜਿਸ ਤੋਂ ਬਾਅਦ ਲੋਕ ਆਪਣੇ ਆਪ ਨੂੰ ਸਮਾਜ ਸੇਵਕ ਅਤੇ ਇਮਾਨਦਾਰ ਅਫ਼ਸਰ ਵਜੋਂ ਪੇਸ਼ ਕਰਨ ਵਾਲੇ ਕਿਸੇ ਵੀ ਅਧਿਕਾਰੀ ‘ਤੇ ਯਕੀਨ ਕਰਨਾ ਬੰਦ ਕਰ ਦੇਣਗੇ।
