ਚੰਡੀਗੜ੍ਹ, 30 ਅਕਤੂਬਰ, Gee98 news service-
-ਅਮਰੀਕਾ ਨੇ ਦੇਸ਼ ਵਿੱਚ ਕੰਮ ਕਰ ਰਹੇ ਲੱਖਾਂ ਪ੍ਰਵਾਸੀ ਕਾਮਿਆਂ (migrant workers) ਨੂੰ ਵੱਡਾ ਝਟਕਾ ਦਿੱਤਾ ਹੈ। ਟਰੰਪ ਪ੍ਰਸ਼ਾਸਨ ਨੇ ਪਿਛਲੀ ਬਾਈਡਨ ਸਰਕਾਰ ਦੇ ਉਸ ਮਹੱਤਵਪੂਰਨ ਨਿਯਮ ਨੂੰ ਬਦਲ ਦਿੱਤਾ ਹੈ, ਜੋ ਵਰਕ ਪਰਮਿਟ (Work Permit) ਦੀ ਸਮਾਂ-ਸੀਮਾ ਖਤਮ ਹੋਣ ਤੋਂ ਬਾਅਦ ਵੀ ਪ੍ਰਵਾਸੀਆਂ ਨੂੰ ਕੰਮ ਕਰਦੇ ਰਹਿਣ ਦੀ ਇਜਾਜ਼ਤ ਦਿੰਦਾ ਸੀ। ਅਮਰੀਕੀ ਗ੍ਰਹਿ ਸੁਰੱਖਿਆ ਵਿਭਾਗ ਨੇ ਇੱਕ ਬਿਆਨ ਵਿੱਚ ਪੁਸ਼ਟੀ ਕੀਤੀ ਹੈ ਕਿ 30 ਅਕਤੂਬਰ, 2025 ਜਾਂ ਇਸ ਤੋਂ ਬਾਅਦ, ਰੁਜ਼ਗਾਰ ਅਧਿਕਾਰ ਦਸਤਾਵੇਜ਼ਾਂ (Employment Authorization Documents – EAD) ਦੇ ਨਵੀਨੀਕਰਨ (renewal) ਲਈ ਅਰਜ਼ੀ ਦੇਣ ਵਾਲਿਆਂ ਨੂੰ ਹੁਣ ਆਟੋਮੈਟਿਕ ਵਾਧੇ ਦਾ ਲਾਭ ਨਹੀਂ ਮਿਲੇਗਾ। ਅਮਰੀਕਾ ਦੇ ਇਸ ਫੈਸਲੇ ਨਾਲ ਉਨ੍ਹਾਂ ਹਜ਼ਾਰਾਂ ਵਿਦੇਸ਼ੀ ਕਰਮਚਾਰੀਆਂ, ਵਿਸ਼ੇਸ਼ ਕਰਕੇ ਭਾਰਤੀਆਂ ‘ਤੇ ਸਿੱਧਾ ਅਸਰ ਪੈਣ ਦਾ ਖਦਸ਼ਾ ਹੈ, ਜੋ H4 ਵੀਜ਼ਾ (H-1B/ਗ੍ਰੀਨ ਕਾਰਡ ਧਾਰਕਾਂ ਦੇ ਜੀਵਨ ਸਾਥੀ) ਜਾਂ F-1 (OPT) ਵੀਜ਼ਾ ‘ਤੇ ਕੰਮ ਕਰ ਰਹੇ ਹਨ।
ਕੀ ਸੀ ਪੁਰਾਣਾ ਨਿਯਮ,ਜੋ ਟਰੰਪ ਨੇ ਹੁਣ ਬਦਲ ਦਿੱਤਾ
ਬਾਈਡਨ ਪ੍ਰਸ਼ਾਸਨ ਦੇ ਨਿਯਮ ਤਹਿਤ, ਜੇਕਰ ਕੋਈ ਪ੍ਰਵਾਸੀ ਕਰਮਚਾਰੀ ਆਪਣੇ EAD (ਵਰਕ ਪਰਮਿਟ) ਦੇ ਖਤਮ ਹੋਣ ਤੋਂ ਪਹਿਲਾਂ ਉਸਦੇ ਨਵੀਨੀਕਰਨ (renewal) ਲਈ ਸਮੇਂ ‘ਤੇ ਅਰਜ਼ੀ ਦੇ ਦਿੰਦਾ ਸੀ, ਤਾਂ ਉਸਨੂੰ 540 ਦਿਨਾਂ ਤੱਕ ਦਾ ਆਟੋਮੈਟਿਕ ਵਾਧਾ ਮਿਲ ਜਾਂਦਾ ਸੀ। ਇਸਦਾ ਮਤਲਬ ਸੀ ਕਿ ਜੇਕਰ ਉਨ੍ਹਾਂ ਦੀ ਅਰਜ਼ੀ ਪੈਡਿੰਗ ਵੀ ਹੈ, ਤਦ ਵੀ ਉਹ ਕਾਨੂੰਨੀ ਰੂਪ ਨਾਲ ਕੰਮ ਕਰਨਾ ਜਾਰੀ ਰੱਖ ਸਕਦੇ ਸਨ। 30 ਅਕਤੂਬਰ, 2025 ਤੋਂ ਇਹ 540 ਦਿਨਾਂ ਦਾ (ਜਾਂ ਪਹਿਲਾਂ ਦਾ 180 ਦਿਨਾਂ ਦਾ) ਆਟੋਮੈਟਿਕ ਵਾਧਾ ਪੂਰੀ ਤਰ੍ਹਾਂ ਖ਼ਤਮ ਕਰ ਦਿੱਤਾ ਗਿਆ ਹੈ। ਹੁਣ ਹਰ ਵਾਰ ਵਰਕ ਪਰਮਿਟ ਵਧਾਉਣ ਤੋਂ ਪਹਿਲਾਂ, ਪ੍ਰਵਾਸੀ ਨੂੰ ਨਵੀਂ ਸੁਰੱਖਿਆ ਜਾਂਚ ਅਤੇ ਉਡੀਕ ਪ੍ਰਕਿਰਿਆ ‘ਚੋਂ ਲੰਘਣਾ ਹੋਵੇਗਾ। ਧਿਆਨ ਰਹੇ ਕਿ ਪਹਿਲਾਂ ਤੋਂ ਮਿਲੇ ਵਾਧੇ ਸੁਰੱਖਿਅਤ: ਜਿਨ੍ਹਾਂ ਲੋਕਾਂ ਦੇ ਵਰਕ ਪਰਮਿਟ 30 ਅਕਤੂਬਰ ਤੋਂ ਪਹਿਲਾਂ ਹੀ ਆਟੋਮੈਟਿਕ ਤੌਰ ‘ਤੇ ਵਧ ਚੁੱਕੇ ਹਨ, ਉਨ੍ਹਾਂ ‘ਤੇ ਇਹ ਨਵਾਂ ਨਿਯਮ ਲਾਗੂ ਨਹੀਂ ਹੋਵੇਗਾ। ਟਰੰਪ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ “ਅਮਰੀਕਾ ਵਿੱਚ ਕੰਮ ਕਰਨਾ ਇੱਕ ਅਧਿਕਾਰ ਨਹੀਂ, ਸਗੋਂ ਇੱਕ ਵਿਸ਼ੇਸ਼ ਅਧਿਕਾਰ ਹੈ। ਇਹ ਯਕੀਨੀ ਬਣਾਇਆ ਜਾਣਾ ਚਾਹੀਦਾ ਹੈ ਕਿ ਕਿਸੇ ਵਿਦੇਸ਼ੀ ਦਾ ਵਰਕ ਪਰਮਿਟ ਵਧਾਉਣ ਤੋਂ ਪਹਿਲਾਂ ਉਸਦੀ ਪੂਰੀ ਜਾਂਚ ਹੋ ਚੁੱਕੀ ਹੋਵੇ।” ਸਥਾਈ ਨਿਵਾਸੀਆਂ (Green Card holders) ਅਤੇ H-1B, L-1, ਜਾਂ O-1 ਵੀਜ਼ਾ ‘ਤੇ ਕੰਮ ਕਰ ਰਹੇ ਲੋਕਾਂ ਨੂੰ EAD ਦੀ ਲੋੜ ਨਹੀਂ ਹੁੰਦੀ, ਕਿਉਂਕਿ ਉਨ੍ਹਾਂ ਦਾ ਵੀਜ਼ਾ ਸਟੇਟਸ (visa status) ਹੀ ਵਰਕ ਪਰਮਿਟ ਦਾ ਸਬੂਤ ਹੁੰਦਾ ਹੈ । ਅਮਰੀਕਾ ਦੇ ਨਵੇਂ ਨਿਯਮਾਂ ਤਹਿਤ ਕਿਸੇ ਪ੍ਰੇਸ਼ਾਨੀ ਤੋਂ ਬਚਣ ਲਈ USCIS ਨੇ ਚੇਤਾਵਨੀ ਦਿੱਤੀ ਹੈ ਕਿ ਪ੍ਰਵਾਸੀ ਆਪਣੇ EAD ਦੇ ਨਵੀਨੀਕਰਨ (renewal) ਵਿੱਚ ਜਿੰਨਾ ਵੱਧ ਸਮਾਂ ਲਗਾਉਣਗੇ, ਉਨ੍ਹਾਂ ਦੇ ਰੁਜ਼ਗਾਰ ਅਧਿਕਾਰ (employment authorization) ਵਿੱਚ ਆਰਜ਼ੀ ਕਮੀ (temporary lapse) ਜਾਂ ਵਕਫ਼ਾ (gap) ਆਉਣ ਦਾ ਖਦਸ਼ਾ ਓਨਾ ਹੀ ਵੱਧ ਹੋਵੇਗਾ। ਏਜੰਸੀ ਨੇ ਪ੍ਰਵਾਸੀਆਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਆਪਣੇ ਵਰਕ ਪਰਮਿਟ ਦੀ ਮਿਆਦ ਪੁੱਗਣ (expiration) ਤੋਂ 180 ਦਿਨ (6 ਮਹੀਨੇ) ਪਹਿਲਾਂ ਹੀ ਨਵੀਨੀਕਰਨ (renewal) ਲਈ ਅਪਲਾਈ (file) ਕਰ ਦੇਣ, ਤਾਂ ਜੋ ਉਨ੍ਹਾਂ ਦੇ ਕੰਮ ਵਿੱਚ ਕੋਈ ਰੁਕਾਵਟ ਨਾ ਆਵੇ।
