ਬਰਨਾਲਾ,9 ਫਰਵਰੀ,2026, Gee98 news service-
-ਪਿੰਡ ਵਿੱਚ ਰਹਿ ਰਹੇ ਮੁਸਲਿਮ ਪਰਿਵਾਰਾਂ ਨੂੰ ਨਮਾਜ਼ ਪੜ੍ਹਨ ਲਈ ਦੂਜੇ ਪਿੰਡ ਜਾਣਾ ਪੈਂਦਾ ਸੀ ਕਿਉਂਕਿ ਪਿੰਡ ਵਿੱਚ ਮਸਜਿਦ ਨਹੀਂ ਸੀ। ਪਿੰਡ ਦੇ ਮੁਸਲਿਮ ਪਰਿਵਾਰਾਂ ਦੀ ਇਸ ਸਮੱਸਿਆ ਨੂੰ ਪਿੰਡ ਵਿੱਚ ਰਹਿਣ ਵਾਲੇ ਦੋ ਪੰਡਿਤ ਭਰਾਵਾਂ ਨੇ ਮਹਿਸੂਸ ਕੀਤਾ ਅਤੇ ਆਪਣੀ ਜ਼ਮੀਨ ਵਿੱਚੋਂ ਕੁਝ ਜਗ੍ਹਾ ਮਸਜਿਦ ਬਣਾਉਣ ਲਈ ਦਾਨ ਵਜੋਂ ਦਿੱਤੀ, ਫਿਰ ਕੁਝ ਹੀ ਦਿਨਾਂ ਵਿੱਚ ਪਿੰਡ ਵਾਲਿਆਂ ਨੇ ਪੈਸੇ ਇਕੱਠੇ ਕਰਕੇ ਉਸ ਜਗ੍ਹਾ ਉੱਪਰ ਮਸਜਿਦ ਦੀ ਇੱਕ ਸ਼ਾਨਦਾਰ ਇਮਾਰਤ ਤਿਆਰ ਕੀਤੀ ਜਿਸ ਦਾ ਉਦਘਾਟਨ ਪੰਜਾਬ ਦੇ ਸ਼ਾਹੀ ਇਮਾਮ ਨੇ ਕੀਤਾ। ਭਾਈਚਾਰਕ ਏਕਤਾ ਦੀ ਇਹ ਸ਼ਾਨਦਾਰ ਕਹਾਣੀ ਸੰਗਰੂਰ ਜ਼ਿਲ੍ਹੇ ਦੇ ਵਿਧਾਨ ਸਭਾ ਹਲਕਾ ਧੂਰੀ ਦੇ ਪਿੰਡ ਪੁੰਨਾਵਾਲ ਦੀ ਹੈ। ਦੱਸ ਦੇਈਏ ਕਿ ਪਿੰਡ ਵਿੱਚ 30 ਦੇ ਕਰੀਬ ਮੁਸਲਿਮ ਪਰਿਵਾਰ ਰਹਿੰਦੇ ਹਨ ਜਿਨਾਂ ਨੂੰ ਨਮਾਜ਼ ਪੜ੍ਨ ਲਈ ਦੂਜੇ ਪਿੰਡ ਜਾਣਾ ਪੈਂਦਾ ਸੀ ਕਿਉਂਕਿ ਪਿੰਡ ਵਿੱਚ ਮਸਜਿਦ ਨਹੀਂ ਸੀ। ਪਿੰਡ ਦੇ ਮੁਸਲਮਾਨਾਂ ਨੇ ਆਪਣੀ ਇਹ ਸਮੱਸਿਆ ਪੰਚਾਇਤ ਕੋਲ ਰੱਖੀ ਤਾਂ ਪਿੰਡ ਦੇ ਦੋ ਪੰਡਿਤ ਭਰਾਵਾਂ ਜਸਪਾਲ ਰਾਮ ਅਤੇ ਪੰਡਿਤ ਵਿਜੇ ਕੁਮਾਰ ਕੋਲ ਗੱਲ ਪੁੱਜੀ ਜਿਨਾਂ ਨੇ ਆਪਣੀ ਜ਼ਮੀਨ ਵਿੱਚੋਂ ਪੰਜ ਮਰਲੇ ਜਗ੍ਹਾ ਮਸਜਿਦ ਬਣਾਉਣ ਲਈ ਦਾਨ ਵਜੋਂ ਦੇ ਦਿੱਤੀ। ਪਿੰਡ ਦੇ ਹਿੰਦੂ ਪਰਿਵਾਰ ਜਸਪਾਲ ਰਾਮ ਅਤੇ ਪੰਡਿਤ ਵਿਜੇ ਕੁਮਾਰ ਨੇ ਸਿਰਫ਼ ਜਗ੍ਹਾ ਹੀ ਦਾਨ ਨਹੀਂ ਦਿੱਤੀ ਸਗੋਂ ਪਿੰਡ ਵਾਲਿਆਂ ਦੇ ਸਹਿਯੋਗ ਨਾਲ ਪੈਸੇ ਇਕੱਠੇ ਕਰਕੇ ਮਸਜਿਦ ਦੀ ਸ਼ਾਨਦਾਰ ਇਮਾਰਤ ਵੀ ਤਿਆਰ ਕੀਤੀ। ਪੰਜਾਬ ਦੇ ਸ਼ਾਹੀ ਇਮਾਮ ਮੌਲਾਨਾ ਮੁਹੰਮਦ ਉਸਮਾਨ ਰਹਿਮਾਨੀ ਲੁਧਿਆਣਵੀ ਨੇ ਉਚੇਚੇ ਤੌਰ ‘ਤੇ ਪੁੱਜ ਕੇ ਮਸਜਿਦ ਦਾ ਉਦਘਾਟਨ ਕੀਤਾ। ਉਦਘਾਟਨ ਤੋਂ ਬਾਅਦ ਨਵੀਂ ਮਸਜਿਦ ਦੀ ਇਮਾਰਤ ਵਿੱਚ ਪਿੰਡ ਦੇ ਮੁਸਲਿਮ ਭਰਾਵਾਂ ਨੇ ਨਮਾਜ਼ ਵੀ ਅਦਾ ਕੀਤੀ। ਇਸ ਮੌਕੇ ਸ਼ਾਹੀ ਇਮਾਮ ਨੇ ਕਿਹਾ ਕਿ “ਦੇਸ਼ ਮੁਹੱਬਤ ਨਾਲ ਜਿਉਣਾ ਪੰਜਾਬ ਤੋਂ ਸਿੱਖੇ,ਪੰਜਾਬ ਦੀ ਧਰਤੀ ‘ਤੇ ਨਫ਼ਰਤ ਲਈ ਕੋਈ ਜਗ੍ਹਾ ਨਹੀਂ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਸਮੇਂ ਤੋਂ ਲੈ ਕੇ ਇੱਥੇ ਹਿੰਦੂ, ਮੁਸਲਿਮ, ਸਿੱਖ ਮਿਲ ਜੁਲ ਕੇ ਰਹਿੰਦੇ ਹਨ,ਦੇਸ਼ ਨੂੰ ਪੰਜਾਬ ਤੋਂ ਸਿੱਖਣਾ ਚਾਹੀਦਾ ਹੈ”। ਇਸ ਮੌਕੇ ਮਸਜਿਦ ਲਈ ਜਗ੍ਹਾ ਦਾਨ ਦੇਣ ਵਾਲੇ ਬ੍ਰਾਹਮਣ ਪਰਿਵਾਰ ਦਾ ਸ਼ਾਹੀ ਇਮਾਮ ਨੇ ਵਿਸ਼ੇਸ਼ ਤੌਰ ‘ਤੇ ਸਨਮਾਨ ਕੀਤਾ ਅਤੇ ਪਿੰਡ ਵੱਲੋਂ ਸਰਪੰਚ ਗੋਬਿੰਦ ਸਿੰਘ ਖੰਗੂੜਾ ਨੇ ਅਤੇ ਪਿੰਡ ਵਾਲਿਆਂ ਨੇ ਸ਼ਾਹੀ ਇਮਾਮ ਦਾ ਵੀ ਸ਼ਾਨਦਾਰ ਸਵਾਗਤ ਕੀਤਾ।
ਫੋਟੋ ਕੈਪਸ਼ਨ-ਮਸਜਿਦ ਦੇ ਉਦਘਾਟਨ ਸਮੇਂ ਦੀਆਂ ਤਸਵੀਰਾਂ
