ਚੰਡੀਗੜ੍ਹ 28 ਮਾਰਚ Gee98 News service-
-ਇੱਕ ਸਪਾ ਸੈਂਟਰ ‘ਚ ਜਿਸਮ ਫਰੋਸ਼ੀ ਦੇ ਧੰਦੇ ਦੀ ਸੂਚਨਾ ਤੋਂ ਬਾਅਦ ਰੇਡ ਕਰਨ ਪਹੁੰਚੀ ਪੁਲਿਸ ਪਾਰਟੀ ਨੂੰ ਸਪਾ ਦਾ ਸ਼ਟਰ ਮਾਲਕ ਸੁੱਟ ਕੇ ਬਾਹਰੋਂ ਜ਼ਿੰਦਾ ਲਾ ਕੇ ਫਰਾਰ ਹੋ ਗਿਆ ਤੇ ਪੁਲਿਸ ਪਾਰਟੀ ਅੰਦਰ ਫਸ ਗਈ।। ਇਹ ਮਾਮਲਾ ਜਲੰਧਰ ਸ਼ਹਿਰ ਦਾ ਹੈ ਜਿੱਥੇ ‘ਪਿਮਸ’ ਹਸਪਤਾਲ ਦੇ ਨੇੜੇ ਕ੍ਰਿਸਟਲ ਸਪਾ ਸੈਂਟਰ ‘ਤੇ ਰੇਡ ਕਰਨ ਗਈ ਪੁਲਿਸ ਟੀਮ ਨਾਲ ਸਪਾ ਸੈਂਟਰ ਦਾ ਮਾਲਕ ਜੱਗੋਂ ਤੇਰਵੀਂ ਕਰ ਗਿਆ ਅਤੇ ਇੱਕ ਮਹਿਲਾ ਪੁਲਿਸ ਕਰਮਚਾਰੀ ਸਮੇਤ ਚਾਰ ਪੁਲਿਸ ਮੁਲਾਜ਼ਮਾਂ ਨੂੰ ਸਪਾਹਮ ਸੈਂਟਰ ਦੇ ਅੰਦਰ ਬੰਦ ਕਰਕੇ ਫਰਾਰ ਹੋ ਗਿਆ। ਜਿਸ ਤੋਂ ਬਾਅਦ ਲੱਗਭੱਗ ਡੇਢ ਘੰਟਾ ਪੁਲਿਸ ਟੀਮ ਸਪਾ ਸੈਂਟਰ ਦੇ ਉੱਪਰਲੀ ਇਮਾਰਤ ਵਿੱਚ ਫਸੀ ਰਹੀ ਅਤੇ ਇੱਕ ਲੰਮੀ ਪੌੜੀ ਦਾ ਪ੍ਰਬੰਧ ਕਰਕੇ ਪੁਲਿਸ ਟੀਮ ਨੂੰ ਬਾਹਰ ਕੱਢਿਆ ਗਿਆ। ਪੁਲਿਸ ਥਾਣਾ ਨੰਬਰ 7 ਦੀ ਪੁਲਿਸ ਪਾਰਟੀ ਦਾ ਕਹਿਣਾ ਹੈ ਕਿ ਸਪਾ ਸੈਂਟਰ ਵਿੱਚ ਸੈਕਸ ਰੈਕੇਟ ਦੀ ਸੂਚਨਾ ਮਿਲਣ ਤੋਂ ਬਾਅਦ ਟੀਮ ਰੇਡ ਕਰਨ ਪੁੱਜੀ ਸੀ ਜਿੱਥੇ ਸੈਂਟਰ ਦੇ ਮਾਲਿਕ ਅਤੇ ਹੋਰ ਕਰਮਚਾਰੀਆਂ ਨੇ ਪੁਲਿਸ ਟੀਮ ਨਾਲ ਗੈਰ ਕਾਨੂੰਨੀ ਹਰਕਤਾਂ ਕੀਤੀਆਂ। ਦਰਅਸਲ ਸਪਾ ਸੈਂਟਰ ਦੇ ਮਾਲਕ ਨੂੰ ਪੁਲਿਸ ਦੇ ਆਉਣ ਦੀ ਭਿਣਕ ਪਹਿਲਾਂ ਹੀ ਲੱਗ ਚੁੱਕੀ ਸੀ ਜਿਸ ਨੇ ਪੁਲਿਸ ਦੇ ਅੰਦਰ ਦਾਖਲ ਹੋਣ ਤੋਂ ਪਹਿਲਾਂ ਹੀ ਸਪਾ ਸੈਂਟਰ ਦਾ ਮੁੱਖ ਦਰਵਾਜ਼ਾ ਬਾਹਰ ਤੋਂ ਬੰਦ ਕਰ ਦਿੱਤਾ ਤੇ ਜਿੰਦਰਾ ਲਗਾ ਦਿੱਤਾ। ਪੁਲਿਸ ਟੀਮ ਨੇ ਜਦ ਦੇਖਿਆ ਕਿ ਸਪਾ ਸੈਂਟਰ ਦਾ ਮੁੱਖ ਦਰਵਾਜ਼ਾ ਬਾਹਰੋਂ ਬੰਦ ਹੈ ਤਾਂ ਉਹਨਾਂ ਨੇੜੇ ਦੀ ਇਮਾਰਤ ਦੇ ਰਸਤੇ ਵਿੱਚੋਂ ਸਪਾ ਸੈਂਟਰ ਦੀ ਉੱਪਰਲੀ ਇਮਾਰਤ ਵਿੱਚ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ ਜਦ ਪੁਲਿਸ ਪਾਰਟੀ ਨੇੜੇ ਦੀ ਇਮਾਰਤ ਰਾਹੀਂ ਸਪਾ ਸੈਂਟਰ ਦੀ ਉੱਪਰਲੀ ਇਮਾਰਤ ਵਿੱਚ ਦਾਖਲ ਹੋ ਗਈ ਤਾਂ ਸਪਾ ਸੈਂਟਰ ‘ਚ ਮੌਜੂਦ ਕੁਝ ਕਰਮਚਾਰੀ ਚਲਾਕੀ ਦਿਖਾਉਂਦੇ ਹੋਏ ਪਿਛਲੇ ਗੁਪਤ ਦਰਵਾਜ਼ੇ ਰਾਹੀਂ ਫਰਾਰ ਹੋ ਗਏ ਅਤੇ ਪਿਛਲਾ ਦਰਵਾਜ਼ਾ ਵੀ ਬੰਦ ਕਰ ਗਏ ਜਿਸ ਕਾਰਨ ਪੁਲਿਸ ਪਾਰਟੀ ਅੰਦਰ ਹੀ ਫਸ ਗਈ। ਪੰਜਾਬ ਪੁਲਿਸ ਦੀ ਇੱਕ ਮਹਿਲਾ ਮੁਲਾਜ਼ਮ ਸਮੇਤ ਤਿੰਨ ਹੋਰ ਪੁਲਿਸ ਮੁਲਾਜ਼ਮ ਲੱਗਭੱਗ ਡੇਢ ਘੰਟਾ ਸਪਾ ਸੈਂਟਰ ਦੀ ਉੱਪਰਲੀ ਇਮਾਰਤ ਵਿੱਚ ਫਸੇ ਰਹੇ ਜਿਨਾਂ ਨੂੰ ਇੱਕ ਲੰਮੀ ਪੌੜੀ ਮੰਗਾ ਕੇ ਬਾਹਰ ਕੱਢਿਆ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਨੂੰ ਆਪਣੇ ਕਬਜ਼ੇ ਵਿੱਚ ਲਿਆ ਹੈ ਜਿਨਾਂ ਦੀ ਜਾਂਚ ਦੇ ਅਧਾਰ ‘ਤੇ ਸਪਾ ਸੈਂਟਰ ਦੇ ਮਾਲਕ ਅਤੇ ਹੋਰ ਕਰਮਚਾਰੀਆਂ ਨੂੰ ਦਬੋਚਿਆ ਜਾਵੇਗਾ ਅਤੇ ਉਹਨਾਂ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਫੋਟੋ ਕੈਪਸ਼ਨ- ਲੰਮੀ ਪੌੜੀ ਰਾਹੀਂ ਸਪਾ ਸੈਂਟਰ ਦੀ ਉੱਪਰਲੀ ਮੰਜ਼ਿਲ ਤੋਂ ਹੇਠਾਂ ਉਤਰਦੇ ਪੁਲਿਸ ਮੁਲਾਜ਼ਮ
