ਚੰਡੀਗੜ੍ਹ ,10 ਅਪ੍ਰੈਲ , Gee98 news service
-ਕੇਂਦਰੀ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ CBSE ਨੇ ਸਕੂਲ ਸਿੱਖਿਆ ਦੀ ਗੁਣਵੱਤਾ ਵਧਾਉਣ ਦੇ ਮਕਸਦ ਅਤੇ ਵਿਦਿਆਰਥੀਆਂ ਦੇ ਸੰਪੂਰਨ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਦੇ ਉਦੇਸ਼ ਨਾਲ ਬੋਰਡ ਦੀ ਦਸਵੀਂ ਕਲਾਸ ਪਾਸ ਕਰਨ ਦੇ ਮਾਪਦੰਡਾਂ ਵਿੱਚ ਇੱਕ ਵੱਡੀ ਤਬਦੀਲੀ ਕਰਕੇ ਨਵੇਂ ਨਿਯਮ ਲਾਗੂ ਕੀਤੇ ਹਨ। ਸੀਬੀਐਸਈ ਵੱਲੋਂ ਲਾਗੂ ਕੀਤੇ ਇਹ ਨਵੇਂ ਨਿਯਮ ਅਕਾਦਮਿਕ ਸੈਸ਼ਨ 2026-27 ਤੋਂ ਹੀ ਲਾਗੂ ਹੋਣਗੇ। ਦਸਵੀਂ ਕਲਾਸ ਪਾਸ ਕਰਨ ਸਬੰਧੀ ਨਵੇਂ ਮਾਪਦੰਡਾਂ ਤਹਿਤ ਹੁਣ ਸੀਬੀਐਸਈ ਦੇ ਵਿਦਿਆਰਥੀਆਂ ਨੂੰ ਥਿਊਰੀ ਪ੍ਰੀਖਿਆਵਾਂ ਅਤੇ ਅੰਦਰੂਨੀ ਮੁੱਲਅੰਕਣ ਪ੍ਰੀਖਿਆਵਾਂ, ਦੋਵਾਂ ਵਿੱਚੋਂ ਵੱਖਰੇ ਵੱਖਰੇ ਤੌਰ ‘ਤੇ ਪਾਸ ਹੋਣਾ ਪਵੇਗਾ। ਧਿਆਨ ਰਹੇ ਕਿ ਪਹਿਲਾਂ ਸੀਬੀਐਸਈ ਦੀ ਦਸਵੀਂ ਦੀ ਕਲਾਸ ਵਿੱਚ ਵਿਦਿਆਰਥੀਆਂ ਨੂੰ ਪਾਸ ਹੋਣ ਲਈ ਥਿਊਰੀ ਅਤੇ ਪ੍ਰੈਕਟੀਕਲ ਦੋਵਾਂ ਦੇ ਮਿਲਾ ਕੇ 33 ਫੀਸਦੀ ਅੰਕ ਲੈਣੇ ਪੈਂਦੇ ਸਨ ਪ੍ਰੰਤੂ ਹੁਣ ਬੋਰਡ ਨੇ ਇਹਨਾਂ 33 ਫੀਸਦੀ ਅੰਕਾਂ ਨੂੰ 2 ਲਾਜ਼ਮੀ ਹਿੱਸਿਆ ਵਿੱਚ ਵੰਡ ਕੇ ਥਿਊਰੀ ਅਤੇ ਪ੍ਰੈਕਟੀਕਲ ਦੇ 33-33 ਫੀਸਦੀ ਅੰਕ ਲੈਣੇ ਲਾਜ਼ਮੀ ਕਰ ਦਿੱਤੇ ਹਨ ਭਾਵ ਕਿ ਲਿਖਤੀ ਪ੍ਰੀਖਿਆ ਵਿੱਚ ਘੱਟੋ ਘੱਟ 33 ਫੀਸਦੀ ਅੰਕ ਪ੍ਰਾਪਤ ਕਰਨੇ ਲਾਜ਼ਮੀ ਹੋਣਗੇ ਅਤੇ ਇਸੇ ਤਰ੍ਹਾਂ ਅੰਦਰੂਨੀ ਮੁੱਲ ਅੰਕਣ ਜਿਸ ਵਿੱਚ ਪ੍ਰੋਜੈਕਟ, ਪ੍ਰੈਕਟੀਕਲ ਅਤੇ ਅਸਾਈਨਮੈਂਟ ਸ਼ਾਮਿਲ ਹਨ, ਵਿੱਚੋਂ ਵੀ ਘੱਟੋ ਘੱਟ 33 ਫੀਸਦੀ ਅੰਕ ਲਿਖਤੀ ਪ੍ਰੀਖਿਆ ਤੋਂ ਵੱਖਰੇ ਤੌਰ ‘ਤੇ ਪ੍ਰਾਪਤ ਕਰਨੇ ਹੋਣਗੇ। ਸੀਬੀਐਸਈ ਦੇ ਇਹਨਾਂ ਨਵੇਂ ਨਿਯਮਾਂ ਦਾ ਸਿੱਧਾ ਅਰਥ ਹੈ ਕਿ ਜੇਕਰ ਕੋਈ ਵਿਦਿਆਰਥੀ ਆਪਣੇ ਅੰਦਰੂਨੀ ਮੁਲਾਂਕਣ ਵਿੱਚ ਸ਼ਾਨਦਾਰ ਅੰਕ ਪ੍ਰਾਪਤ ਕਰਦਾ ਹੈ ਪਰ ਲਿਖਤੀ ਪ੍ਰੀਖਿਆ ਵਿੱਚ 33 ਫੀਸਦੀ ਤੋਂ ਘੱਟ ਰਹਿੰਦਾ ਹੈ ਤਾਂ ਉਸਨੂੰ ਪਾਸ ਨਹੀਂ ਮੰਨਿਆ ਜਾਵੇਗਾ, ਇਸੇ ਤਰ੍ਹਾਂ ਜੇਕਰ ਕੋਈ ਵਿਅਕਤੀ ਲਿਖਤੀ ਪ੍ਰੀਖਿਆ ਵਿੱਚ 33 ਫੀਸਦੀ ਅੰਕ ਪ੍ਰਾਪਤ ਕਰਦਾ ਹੈ ਪ੍ਰੰਤੂ ਪ੍ਰੈਕਟੀਕਲੀ 33 ਫੀਸਦੀ ਤੋਂ ਘੱਟ ਅੰਕ ਪ੍ਰਾਪਤ ਕਰਦਾ ਹੈ ਤਾਂ ਉਸਨੂੰ ਵੀ ਪਾਸ ਨਹੀਂ ਮੰਨਿਆ ਜਾਵੇਗਾ।
