ਚੰਡੀਗੜ੍ਹ, 25 ਅਪ੍ਰੈਲ, Gee98 News service-
-ਆਮ ਆਦਮੀ ਪਾਰਟੀ ਨੇ ਆਪਣੇ ਬਾਗ਼ੀ ਹੋਏ ਰਾਜ ਸਭਾ ਮੈਂਬਰਾਂ ਦੇ ਖ਼ਿਲਾਫ਼ ਦਲ ਬਦਲੀ ਤਹਿਤ ਕਾਰਵਾਈ ਕਰਵਾਉਣ ਲਈ ਸਭਾ ਦੇ ਚੇਅਰਮੈਨ ਨੂੰ ਸ਼ਿਕਾਇਤ ਕਰਨ ਦਾ ਫੈਸਲਾ ਕੀਤਾ ਹੈ। ਸੂਤਰਾਂ ਅਨੁਸਾਰ ਆਮ ਆਦਮੀ ਪਾਰਟੀ ਜਲਦੀ ਹੀ ਰਾਜਸਭਾ ਦੇ ਚੇਅਰਮੈਨ ਨੂੰ ਲਿਖ਼ਤੀ ਪੱਤਰ ਦੇਵੇਗੀ ਅਤੇ ਰਾਘਵ ਚੱਢਾ,ਸੰਦੀਪ ਪਾਠਕ ਅਤੇ ਅਸ਼ੋਕ ਮਿੱਤਲ ਦੀ ਮੈਂਬਰੀ ਖ਼ਤਮ ਕਰਨ ਦੀ ਮੰਗ ਕਰੇਗੀ। ਪਾਰਟੀ ਦਾ ਦਾਅਵਾ ਹੈ ਕਿ ਉਹਨਾਂ ਦੇ ਸਿਰਫ਼ ਤਿੰਨ ਰਾਜਸਭਾ ਮੈਂਬਰ ਹੀ ਭਾਜਪਾ ਵਿੱਚ ਗਏ ਹਨ ਜਦਕਿ ਬਾਕੀ ਚਾਰ ਮੈਂਬਰ ਅਜੇ ਵੀ ਉਹਨਾਂ ਦੀ ਪਾਰਟੀ ਵਿੱਚ ਹੀ ਹਨ, ਇਸ ਲਈ ਰਾਘਵ ਚੱਢਾ,ਸੰਦੀਪ ਪਾਠਕ ਅਤੇ ਅਸ਼ੋਕ ਮਿੱਤਲ ‘ਤੇ ਦਲ ਬਦਲੀ ਕਾਨੂੰਨ ਲਾਗੂ ਹੁੰਦਾ ਹੈ। ਕੱਲ੍ਹ ਪ੍ਰੈੱਸ ਕਾਨਫਰੰਸ ਦੌਰਾਨ ਰਾਘਵ ਚੱਡਾ ਨੇ ਦਾਅਵਾ ਕੀਤਾ ਸੀ ਕਿ ਉਹਨਾਂ ਦੀ ਪਾਰਟੀ ਦੇ ਕੁੱਲ 10 ਰਾਜਸਭਾ ਮੈਂਬਰਾਂ ਵਿੱਚੋਂ 7 ਰਾਜ ਸਭਾ ਮੈਂਬਰ ਆਮ ਆਦਮੀ ਪਾਰਟੀ ਛੱਡ ਰਹੇ ਹਨ, ਇਸ ਤੋਂ ਤੁਰੰਤ ਬਾਅਦ ਰਾਘਵ ਚੱਢਾ,ਸੰਦੀਪ ਪਾਠਕ ਅਤੇ ਅਸੋਕ ਮਿੱਤਲ ਨੇ ਭਾਜਪਾ ਜੁਆਇਨ ਵੀ ਕਰ ਲਈ ਸੀ ਪ੍ਰੰਤੂ ਹਰਭਜਨ ਸਿੰਘ, ਬਿਕਰਮਜੀਤ ਸਿੰਘ ਸਾਹਨੀ, ਸਵਾਤੀ ਮਾਲੀਵਾਲ ਅਤੇ ਰਜਿੰਦਰ ਗੁਪਤਾ ਨੇ ਅਜੇ ਤੱਕ ਭਾਜਪਾ ਜੁਆਇਨ ਨਹੀਂ ਕੀਤੀ। ਜ਼ਿਕਰਯੋਗ ਹੈ ਕਿ ਰਾਜ ਸਭਾ ਮੈਂਬਰ ਰਜਿੰਦਰ ਗੁਪਤਾ ਆਪਣੀ ਸਿਹਤ ਸਮੱਸਿਆ ਦੇ ਕਾਰਨ ਵਿਦੇਸ਼ ਵਿੱਚ ਹਨ ਜਦਕਿ ਸਵਾਤੀ ਮਾਲੀਵਾਲ ਕੱਲ ਪ੍ਰੈਸ ਕਾਨਫਰੰਸ ਸਮੇਂ ਈਟਾਨਗਰ ਵਿੱਚ ਸੀ। ਦੂਜੇ ਪਾਸੇ ਹਰਭਜਨ ਸਿੰਘ IPL ਨਾਲ ਆਪਣੇ ਸਮਝੌਤੇ ਦੇ ਕਾਰਨ ਨਹੀਂ ਆ ਸਕੇ ਜਦਕਿ ਬਿਕਰਮਜੀਤ ਸਿੰਘ ਸਾਹਨੀ ਵੀ ਸਿਹਤ ਸਮੱਸਿਆ ਦੇ ਕਾਰਨ ਮੀਡੀਆ ਸਾਹਮਣੇ ਨਹੀਂ ਆਏ। ਆਪ ਆਗੂਆਂ ਦੇ ਇਹ ਵੀ ਦੋਸ਼ ਹਨ ਕਿ ਪੱਤਰ ਉੱਪਰ ਰਜਿੰਦਰ ਗੁਪਤਾ ਅਤੇ ਸਵਾਤੀ ਮਾਲੀਵਾਲ ਦੇ ਦਸਤਖ਼ਤ ਜਾਅਲੀ ਕੀਤੇ ਗਏ ਹਨ
ਇਸ ਦੌਰਾਨ ਇੱਕ ਹੋਰ ਅਹਿਮ ਜਾਣਕਾਰੀ ਸਾਹਮਣੇ ਆ ਰਹੀ ਹੈ ਕਿ ਪਾਰਟੀ ਛੱਡਣ ਤੋਂ ਪਹਿਲਾਂ ਤਿੰਨ ਰਾਜ ਸਭਾ ਮੈਂਬਰ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੂੰ ਵੀ ਮਿਲੇ ਸਨ ਇਹਨਾਂ ਵਿੱਚ ਅਸ਼ੋਕ ਮਿੱਤਲ 19 ਅਪ੍ਰੈਲ ਨੂੰ, ਬਿਕਰਮਜੀਤ ਸਾਹਨੀ 22 ਅਪ੍ਰੈਲ ਨੂੰ ਅਤੇ ਸੰਦੀਪ ਪਾਠਕ 23 ਅਪ੍ਰੈਲ ਨੂੰ ਕੇਜਰੀਵਾਲ ਨੂੰ ਮਿਲੇ ਸਨ। ਸੂਤਰਾਂ ਅਨੁਸਾਰ ਅਸ਼ੋਕ ਮਿੱਤਲ ਨੇ ਤਾਂ ਲੰਮਾ ਸਮਾਂ ਅਰਵਿੰਦ ਕੇਜਰੀਵਾਲ ਨਾਲ ਗੱਲ ਵੀ ਕੀਤੀ ਸੀ। ਪਾਰਟੀ ਦੇ ਸੱਤ ਰਾਜ ਸਭਾ ਮੈਂਬਰਾਂ ਵੱਲੋਂ ਪਾਰਟੀ ਛੱਡਣ ਤੋਂ ਬਾਅਦ ਆਮ ਆਦਮੀ ਪਾਰਟੀ ਦੀ ਸਾਰੀ ਲੀਡਰਸ਼ਿਪ “ਡੈਮੇਜ ਕੰਟਰੋਲ” ‘ਤੇ ਲੱਗੀ ਹੋਈ ਹੈ। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਕੱਲ੍ਹ ਤੋਂ ਹੀ ਮੈਦਾਨ ਵਿੱਚ ਉਤਰੇ ਹੋਏ ਹਨ ਅਤੇ ਉਹਨਾਂ ਵੱਲੋਂ ਪਾਰਟੀ ਛੱਡਣ ਵਾਲੇ ਰਾਜਸਭਾ ਮੈਂਬਰਾਂ ‘ਤੇ ਵੱਖ-ਵੱਖ ਟਿੱਪਣੀਆਂ ਕੀਤੀਆਂ ਜਾ ਰਹੀਆਂ ਹਨ। ਰਾਘਵ ਚੱਢਾ ਤੇ ਛੇ ਹੋਰ ਐਮਪੀਜ਼ ਵੱਲੋਂ ਪਾਰਟੀ ਛੱਡਣ ਸਬੰਧੀ ਭਗਵੰਤ ਮਾਨ ਵੱਲੋਂ ਇਹਨਾਂ ਆਗੂਆਂ ਨੂੰ ਗਦਾਰੀ ਦੇ ਸਰਟੀਫਿਕੇਟ ਵੰਡਣ ਸੰਬੰਧੀ ਸੋਸ਼ਲ ਵੀਡੀਓ ‘ਤੇ ਪੋਸਟਾਂ ਵਾਇਰਲ ਹੋ ਰਹੀਆਂ ਹਨ ਜਿਹਨਾਂ ‘ਤੇ ਆਮ ਲੋਕਾਂ ਵੱਲੋਂ ਭਗਵੰਤ ਮਾਨ ਦੇ ਖ਼ਿਲਾਫ਼ ਹੀ ਟਿੱਪਣੀਆਂ ਕੀਤੀਆਂ ਜਾ ਰਹੀਆਂ ਹਨ ਕਿ ਜਦੋਂ ਇਹਨਾਂ ਨੂੰ ਪੰਜਾਬ ਦੇ ਕੋਟੇ ਵਿੱਚੋਂ ਰਾਜ ਸਭਾ ਦੀਆਂ ਸੀਟਾਂ ਦਿੱਤੀਆਂ ਉਸ ਵੇਲੇ ਕਿਹੜਾ ਇਹ ਪੰਜਾਬ ਦੇ ‘ਸਰਦਾਰ’ ਸਨ। ਇੱਥੇ ਇਹ ਵੀ ਧਿਆਨ ਰਹੇ ਕਿ ਜਿੰਨਾਂ ਸਮਾਂ ਰਾਜਿੰਦਰ ਗੁਪਤਾ, ਬਿਕਰਮਜੀਤ ਸਿੰਘ ਸਾਹਨੀ, ਸਵਾਤੀ ਮਾਲੀਵਾਲ ਅਤੇ ਹਰਭਜਨ ਸਿੰਘ ਭਾਜਪਾ ਵਿੱਚ ਸ਼ਾਮਲ ਨਹੀਂ ਹੁੰਦੇ ਉਸ ਵੇਲੇ ਤੱਕ ਰਾਘਵ ਚੱਢਾ, ਅਸ਼ੋਕ ਮਿੱਤਲ ਅਤੇ ਸੰਦੀਪ ਪਾਠਕ ‘ਤੇ ਦਲ ਬਦਲੀ ਕਾਨੂੰਨ ਦੀ ਤਲਵਾਰ ਲਟਕਦੀ ਰਹੇਗੀ।
