ਬਰਨਾਲਾ, 31 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਬਰਨਾਲਾ ਹਲਕੇ ਤੋਂ ਟਿਕਟ ਦੇ ਮਜ਼ਬੂਤ ਦਾਅਵੇਦਾਰ ਕੇਵਲ ਸਿੰਘ ਢਿੱਲੋਂ ਨੇ ਟਿਕਟ ਨਾ ਮਿਲਣ ਤੋਂ ਬਾਅਦ ਆਪਣੀ ਰਿਹਾਇਸ਼ ’ਤੇ ਆਪਣੇ ਸਮਰਥਕਾਂ ਦਾ ਇਕੱਠ ਕਰਕੇ ਭਵਿੱਖ ਦੇ ਕਦਮ ਲਈ ਆਪਣੇ ਵਰਕਰਾਂ ਦੀ ਨਬਜ਼ ਟੋਹੀ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਬੁਲਾਰਿਆਂ ਨੇ ਢਿੱਲੋਂ ਨੂੰ ਆਜ਼ਾਦ ਚੋਣ ਲੜਨ ਦੀ ਹੱਲਾਸ਼ੇਰੀ ਦਿੱਤੀ। ਕੇਵਲ ਸਿੰਘ ਢਿੱਲੋਂ ਨੇ ਸਾਰੇ ਬੁਲਾਰਿਆਂ ਦੀ ਰਾਏ ਸੁਣਨ ਤੋਂ ਬਾਅਦ ਆਪਣੇ ਸੰਬੋਧਨ ਦੌਰਾਨ ਚੋਣ ਲੜਨ ਜਾਂ ਨਾ ਲੜਨ ਸੰਬੰਧੀ ਆਪਣੇ ਪੱਤੇ ਨਹੀਂ ਖੋਲੇ ਪੰ੍ਰਤੂ ਢਿੱਲੋਂ ਨੇ ਇਹ ਜ਼ਰੂਰ ਕਿਹਾ ਕਿ ਉਹ ਆਪਣੇ ਪਰਿਵਾਰ ਅਤੇ ਦਿਨ ਰਾਤ ਨਾਲ ਖੜਨ ਵਾਲੇ ਆਗੂਆਂ ਵਰਕਰਾਂ ਨਾਲ ਸਲਾਹ ਕਰਕੇ ਅਗਲਾ ਕਦਮ ਚੁੱਕਣਗੇ। ਭਾਵੇਂ ਕੇਵਲ ਸਿੰਘ ਢਿੱਲੋਂ ਨੇ ਸਪੱਸ਼ਟ ਆਖਿਆ ਕਿ ਉਹ ਆਪਣੇ ਵਰਕਰਾਂ ਦੀ ਰਾਏ ਅਨੁਸਾਰ ਹੀ ਫ਼ੈਸਲਾ ਲੈਣਗੇ ਪਰ ਢਿੱਲੋਂ ਦੇ ਭਾਸ਼ਣ ਦੌਰਾਨ ਉਨਾਂ ਵੱਲੋਂ ਵਰਤੇ ਗਏ ਲਹਿਜ਼ੇ ਤੋਂ ਇਹ ਲੱਗ ਰਿਹਾ ਸੀ ਕਿ ਕੇਵਲ ਸਿੰਘ ਢਿੱਲੋਂ ਆਜ਼ਦ ਚੋਣ ਨਹੀਂ ਲੜਨਗੇ। ਰਾਜਨੀਤੀ ਵਿੱਚ ਦਿਲਚਪਸੀ ਰੱਖਣ ਵਾਲਿਆਂ ਦੀਆਂ ਨਜ਼ਰਾਂ ਢਿੱਲੋਂ ਵੱਲ ਟਿਕੀਆਂ ਹੋਈਆਂ ਹਨ, ਕਿਉਂਕਿ ਢਿੱਲੋਂ ਚੋਣ ਲੜਨ ਜਾਂ ਨਾ ਲੜਨ ਪ੍ਰੰਤੂ ਇਹ ਗੱਲ ਪੱਕੀ ਹੈ ਕਿ ਬਰਨਾਲਾ ਹਲਕੇ ’ਚ ਢਿੱਲੋਂ ਵੱਲੋਂ ਨਿਭਾਈ ਭੂਮਿਕਾ ਜਿੱਤ ਹਾਰ ਦਾ ਫ਼ੈਸਲਾ ਤੈਅ ਕਰੇਗੀ। ਇਹ ਵੱਖਰੀ ਗੱਲ ਹੈ ਕਿ ਢਿੱਲੋਂ ਦਾ ਫ਼ੈਸਲਾ ਪਰਦੇ ਦੇ ਪਿਛਲੀ ਭੂਮਿਕਾ ਵਾਲਾ ਹੋਵੇਗਾ ਜਾਂ ਫਿਰ ਢਿੱਲੋਂ ਦੀ ਰਾਜਨੀਤੀ ਸ਼ਰੇਬਜ਼ਾਰ ਨੱਚੇਗੀ।
Menu
