–ਦੇਸ਼ ਦੇ ਗ੍ਰਹਿ ਵਿਭਾਗ ਵੱਲੋਂ ਦਿੱਤਾ ਗਿਆ ਸਰਟੀਫਿਕੇਟ ਆੱਫ ਐਕਸੀਲੈਸਸ
–ਮਨਦੀਪ ਸਿੰਘ ਸਿੱਧੂ ਐਸਐਸਪੀ ਨੇ ਡੀਜੀਪੀ ਪੰਜਾਬ ਤੋਂ ਪ੍ਰਾਪਤ ਕੀਤਾ ਸਰਟੀਫਿਕੇਟ
ਬਰਨਾਲਾ, 25 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) :
ਸੰਗਰੂਰ ਜ਼ਿਲ੍ਹੇ ਦੇ ਪੁਲਿਸ ਥਾਣਾ ਛਾਜਲੀ ਨੂੰ ਪੰਜਾਬ ਦਾ ਸਰਵੋਤਮ ਪੁਲਿਸ ਸਟੇਸ਼ਨ ਚੁਣਿਆ ਗਿਆ ਹੈ। ਸੰਗਰੂਰ ਪੁਲਿਸ ਦੀ ਇਸ ਪ੍ਰਾਪਤੀ ’ਤੇ ਭਾਰਤ ਸਰਕਾਰ ਦੇ ਗ੍ਰਹਿ ਵਿਭਾਗ ਵੱਲੋਂ ‘ਸਰਟੀਫਿਕੇਟ ਆੱਫ ਐਕਸੀਲੈਸਸ’ ਸੰਗਰੂਰ ਪੁਲਿਸ ਨੂੰ ਦਿੱਤਾ ਗਿਆ। ਇਹ ਸਰਟੀਫਿਕੇਟ ਸੰਗਰੂਰ ਪੁਲਿਸ ਵੱਲੋਂ ਐਸਐਸਪੀ ਮਨਦੀਪ ਸਿੰਘ ਸਿੱਧੂ ਨੇ ਡੀਜੀਪੀ ਪੰਜਾਬ ਸ੍ਰੀ ਵੀ ਕੇ ਭਾਵਰਾ ਆਈਪੀਐਸ ਤੋਂ ਪ੍ਰਾਪਤ ਕੀਤਾ। ਇਸ ਮੌਕੇ ਏਡੀਜੀਪੀ (ਐਚਆਰਡੀ) ਮੈਡਮ ਸ਼ਸ਼ੀ ਪ੍ਰਭਾ ਆਈਪੀਐਸ ਵੀ ਹਾਜ਼ਰ ਸਨ। ਦੱਸਣਯੋਗ ਹੈ ਕਿ ਭਾਰਤ ਸਰਕਾਰ ਦਾ ਗ੍ਰਹਿ ਵਿਭਾਗ ਦੇਸ਼ ਦੇ ਸਰਵੋਤਮ ਪੁਲਿਸ ਥਾਣਿਆਂ ਦੀ ਚੋਣ ਕਰਨ ਲਈ ਪੁਲਿਸ ਸਟੇਸ਼ਨਾਂ ਦੇ ਮੁੱਲਅੰਕਣ ਲਈ ਇੱਕ ਸਲਾਨਾ ਸਰਵੇਖਣ ਕਰਵਾਉਂਦਾ ਹੈ ਜਿਸ ਤੋਂ ਬਾਅਦ ਦੇਸ਼ ਦੇ ਚੋਟੀ ਦੇ 10 ਪੁਲਿਸ ਸਟੇਸ਼ਨਾਂ ਦੀ ਚੋਣ ਕੀਤੀ ਜਾਂਦੀ ਹੈ। ਇਨ੍ਹਾਂ ਚੁਣੇ ਗਏ ਪੁਲਿਸ ਸਟੇਸ਼ਨਾਂ ਨੂੰ ‘ਸਰਟੀਫਿਕੇਟ ਆੱਫ ਐਕਸੀਲੈਸਸ’ ਨਾਲ ਸਨਮਾਨਿਤ ਕੀਤਾ ਜਾਂਦਾ ਹੈ। ਸਾਲ 2021 ਲਈ ਇਹ ਸਰਵੇਖਣ ਮੈਸਰਜ਼ ਟਰਾਂਸ ਰੂਰਲ ਐਗਰੀ ਕੰਸਲਟਿੰਗ ਸਰਵਿਸਿਜ਼ ਪ੍ਰਾਈਵੇਟ ਦੁਆਰਾ ਕਰਵਾਇਆ ਗਿਆ ਸੀ। ਜਿਸ ਦੇ ਅਧਾਰ ’ਤੇ ਸਭ ਤੋਂ ਪਹਿਲਾਂ ਦੇਸ਼ ਦੇ 75 ਪੁਲਿਸ ਸਟੇਸ਼ਨਾਂ ਨੂੰ ਸ਼ਾਰਟਲਿਸਟ ਕੀਤਾ ਗਿਆ ਅਤੇ ਫਿਰ ਇਨ੍ਹਾਂ ਵਿੱਚੋ ਚੋਟੀ ਦੇ 10 ਪੁਲਿਸ ਸਟੇਸ਼ਨ ਚੁਣੇ ਗਏ ਜਿਨਾਂ ਵਿੱਚ ਸੰਗਰੂਰ ਜ਼ਿਲ੍ਹੇ ਦਾ ਪੁਿਲਸ ਸਟੇਸ਼ਨ ਛਾਜਲੀ ਵੀ ਸ਼ਾਮਲ ਹੈ।
