-ਐਸਐਸਪੀ ਦੀ ਭੂਮਿਕਾ ਸੰਬੰਧੀ ਨਜ਼ਰਾਂ ਮੁੱਖ ਮੰਤਰੀ ’ਤੇ ਟਿਕੀਆਂ
ਬਰਨਾਲਾ, 27 ਮਈ (ਨਿਰਮਲ ਸਿੰਘ ਪੰਡੋਰੀ) :-
ਸੰਗਰੂਰ ਵਿਖੇ ਤਾਇਨਾਤ ਪੰਜਾਬ ਪੁਲਿਸ ਦੇ ਐਸਪੀ ਕਰਨਵੀਰ ਸਿੰਘ ਦੇ ਖ਼ਿਲਾਫ਼ ਦਰਜ ਹੋਇਆ ਰਿਸ਼ਵਤ ਕੇਸ ਨਵਾਂ ਮੋੜ ਲੈ ਰਿਹਾ ਹੈ। ਇੱਥੇ ਇਹ ਦੱਸ ਦੇਈਏ ਕਿ ਜ਼ਿਲੇ ਦੇ ਪੁਲਿਸ ਮੁਖੀ ਮਨਦੀਪ ਸਿੰਘ ਸਿੱਧੂ ਨੇ ਪਿਛਲੇ ਦਿਨੀ ਕਰਨਵੀਰ ਸਿੰਘ ਐਸਪੀ ਅਤੇ ਉਸ ਦੇ ਰੀਡਰ ਦੇ ਖ਼ਿਲਾਫ਼ ਰਿਸ਼ਵਤ ਲੈਣ ਦਾ ਮੁਕੱਦਮਾ ਦਰਜ ਕਰਨ ਦੇ ਹੁਕਮ ਦਿੱਤੇ ਸਨ ਅਤੇ ਮੁਕੱਦਮਾ ਦਰਜ ਹੋਣ ਤੋਂ ਬਾਅਦ ਰੀਡਰ ਤੋਂ ਰਿਸ਼ਵਤ ਦੀ ਰਕਮ ਬਰਾਮਦ ਦੱਸ ਕੇ ਉਸ ਦੀ ਗਿ੍ਫਤਾਰੀ ਵੀ ਕੀਤੀ ਗਈ। ਹੁਣ ਉਸ ਵੇਲੇ ਇਸ ਮੁਕੱਦਮੇ ਸੰਬੰਧੀ ਨਵੇਂ ਤੱਥ ਸਾਹਮਣੇ ਆਏ ਹਨ ਜਦ ਉਕਤ ਰਿਸ਼ਵਤ ਕਾਂਡ ਦੀ ਮੁਦਈ ਧਿਰ ਨੇ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਵਿੱਚ ਪੁੱਜ ਕੇ ਇਹ ਖ਼ੁਲਾਸਾ ਕੀਤਾ ਹੈ ਕਿ ਉਨਾਂ ਕੋਲੋ ਐਸਪੀ ਕਰਨਵੀਰ ਸਿੰਘ ਜਾਂ ਉਸ ਦੇ ਰੀਡਰ ਨੇ ਰਿਸ਼ਵਤ ਦਾ ਕੋਈ ਪੈਸਾ ਨਹੀਂ ਲਿਆ। ਮੁਦਈ ਧਿਰ ਨੇ ਕੋਰਟ ਵਿੱਚ ਇਹ ਵੀ ਕਿਹਾ ਹੈ ਕਿ ‘‘ ਉਨ੍ਹਾਂ ਕੋਲੋ ਸੀਆਈਏ ਸਟਾਫ਼ ਲੱਡਾ ਕੋਠੀ ਲਿਜਾ ਕੇ ਡਰਾ-ਧਮਕਾ ਕੇ ਖਾਲੀ ਪੇਪਰਾਂ ਉੱਪਰ ਦਖ਼ਸਖਤ ਕਰਵਾਏ, ਜਦਕਿ ਉਨ੍ਹਾਂ ਨੇ ਐਸਪੀ ਜਾਂ ਰੀਡਰ ਨੂੰ ਰਿਸ਼ਵਤ ਦੇਣ ਸੰਬੰਧੀ ਕੋਈ ਬਿਆਨ ਨਹੀਂ ਲਿਖਵਾਇਆ’’।
ਮੁਦਈ ਧਿਰ ਦੇ ਵਕੀਲ ਸੁਮਿਤ ਜੈਨ ਨੇ ਦੱਸਿਆ ਕਿ ‘‘ਮੁਦਈ ਧਿਰ ਨੇ 164 ਤਹਿਤ ਆਪਣੇ ਬਿਆਨ ਦਰਜ ਕਰਵਾਏ ਹਨ’’। ਮੁਦਈ ਧਿਰ ਦੇ ਇਸ ਰੁੱਖ ਤੋਂ ਬਾਅਦ ਐਸਐਸਪੀ ਸੰਗਰੂਰ ਮਨਦੀਪ ਸਿੰਘ ਸਿੱਧੂ ਦੀ ਐਸਪੀ ਕਰਨਵੀਰ ਸਿੰਘ ਅਤੇ ਉਸ ਦੇ ਰੀਡਰ ਦੇ ਖ਼ਿਲਾਫ਼ ਕੀਤੀ ਕਾਰਵਾਈ ਸ਼ੱਕ ਦੇ ਘੇਰੇ ਵਿੱਚ ਆ ਗਈ ਹੈ। ਇਸ ਪੂਰੇ ਮਾਮਲੇ ਸੰਬੰਧੀ ਪੰਜਾਬ ਪੁਲਿਸ ਪਰਿਵਾਰ ਐਸੋਸੀਏਸ਼ਨ ਦੇ ਸੂਬਾ ਪ੍ਰਧਾਨ ਭੁਪਿੰਦਰ ਸਿੰਘ ਨੇ ਮੰਗ ਕੀਤੀ ਕਿ ਐਸਪੀ ਕਰਨਵੀਰ ਸਿੰਘ ਤੇ ਉਸ ਦੇ ਰੀਡਰ ਖ਼ਿਲਾਫ਼ ਦਰਜ ਹੋਏ ਮੁਕੱਦਮੇ ਦੀ ਪੜਤਾਲ ਕੀਤੀ ਜਾਣੀ ਚਾਹੀਦੀ ਹੈ। ਭੁਪਿੰਦਰ ਸਿੰਘ ਨੇ ਤਾਂ ਜ਼ਿਲ੍ਹੇ ਦੇ ਐਸਐਸਪੀ ਉੱਪਰ ਇੱਥੋ ਤੱਕ ਦੋਸ਼ ਲਗਾਏ ਕਿ ਐਸਐਸਪੀ ਨੇ ਲੋਕ ਸਭਾ ਸੰਗਰੂੁਰ ਦੀ ਜ਼ਿਮਨੀ ਚੋਣ ਦੇ ਮੱਦੇਨਜ਼ਰ ਮੁੱਖ ਮੰਤਰੀ ਦੀ ਨਜ਼ਰ ’ਚ ਆਪਣੀ ਕਥਿਤ ਇਮਾਨਦਾਰੀ ਦੀ ਮਿਸਾਲ ਪੇਸ਼ ਕਰਨ ਲਈ ਉਕਤ ਮੁਕੱਦਮੇ ਦਾ ਤਾਣਾ-ਬਾਣਾ ਬੁਣਿਆ। ਬਹਰਹਾਲ ! ਮੁਦਈ ਧਿਰ ਵੱਲੋਂ ਅਦਾਲਤ ਵਿੱਚ ਦਿੱਤੇ ਤਾਜ਼ਾ ਬਿਆਨ ਐਸਐਸਪੀ ਉੱਪਰ ਸਿੱਧੀ ਉਂਗਲ ਉਠਾਉਦੇ ਹਨ ਅਤੇ ਹੁਣ ਉਕਤ ਮਾਮਲੇ ਸੰਬੰਧੀ ਆਮ ਲੋਕਾਂ ਦੀਆਂ ਨਜ਼ਰਾਂ ਸਵੇਰ ਤੋਂ ਸ਼ਾਮ ਤੱਕ ਆਪਣੀ ਸਰਕਾਰ ਦੇ ਇਮਾਨਦਾਰ ਅਕਸ ਦੀ ਦਲੀਲ ਦੇਣ ਵਾਲੇ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲ ਟਿਕੀਆਂ ਹੋਈਆਂ ਹਨ ।
