-ਵਜੀਫ਼ਾ ਫ਼ੰਡ ਦੇ ਕਰੋੜਾਂ ਰੁਪਏ ਦੇ ਦੋਸ਼ੀ ਹਨ ਬਰਨਾਲਾ ਦੇ 5-6 ਕਾਲਜ
ਬਰਨਾਲਾ,14 ਜੁਲਾਈ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਪੋਸਟ ਮ੍ਰੈਟਿਕ ਸਕਾਲਰਸ਼ਿਪ ਘੁਟਾਲੇ ਦੀ ਜਾਂਚ ਦੇ ਹੁਕਮ ਦੇਣ ਤੋਂ ਬਾਅਦ ਪ੍ਰਾਈਵੇਟ ਵਿੱਦਿਅਕ ਅਦਾਰਿਆਂ ’ਚ ਖਲਬਲੀ ਮੱਚ ਗਈ ਹੈ। ਜੇਕਰ ਮੁੱਖ ਮੰਤਰੀ ਨੇ ਆਪਣੇ ਬਿਆਨ ਨੂੰ ਅਮਲੀ ਜਾਮਾ ਪਹਿਨਾਉਂਦੇ ਹੋਏ ਇੱਛਾ ਸ਼ਕਤੀ ਦਿਖਾਈ ਤਾਂ ਵਜੀਫ਼ੇ ਦੇ ਨਾਂ ’ਤੇ ਆਰਥਿਕ ਤੌਰ ’ਤੇ ਗਰੀਬ ਵਿਦਿਆਰਥੀਆਂ ਦਾ ਹੱਕ ਦੱਬਣ ਵਾਲੇ ਪ੍ਰਾਈਵੇਟ ਕਾਲਜਾਂ ਦੀ ਪੋਲ ਖੁੱਲੇਗੀ। ਇਹ ਹੁਕਮ ਪਿਛਲੀ ਕਾਂਗਰਸ ਸਰਕਾਰ ਵੇਲੇ ਵੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਦਿੱਤੇ ਸਨ, ਜਿਸ ਤੋਂ ਬਾਅਦ ਕਾਲਜਾਂ ਦਾ ਆਡਿਟ ਵੀ ਹੋਇਆ ਅਤੇ ਕਈ ਕਾਲਜਾਂ ਵੱਲ ਵਜੀਫ਼ੇ ਦੇ ਕਰੋੜਾਂ ਰੁਪਏ ਬਕਾਇਆ ਵੀ ਨਿਕਲੇ, ਪੜਤਾਲ ਦੌਰਾਨ ਕਾਲਜਾਂ ਦੀ ਇਹ ਬੇਈਮਾਨੀ ਵੀ ਸਾਹਮਣੇ ਆਈ ਕਿ ਇੱਕ ਬੱਚੇ ਨੂੰ ਦੋ -ਦੋ ਕੋਰਸਾਂ ਵਿੱਚ ਦਾਖਲ ਕਰਕੇ ਫੰੰਡ ਵਸੂਲੇ ਗਏ। ਕੈਪਟਨ ਸਰਕਾਰ ਮੌਕੇ ਸਿਆਸੀ ਦਬਾਅ ਤਹਿਤ ਇਨਾਂ ਡਿਫਾਲਟਰ ਕਾਲਜਾਂ ਤੋਂ ਰਕਮ ਵਸੂਲੀ ਦੀ ਕਾਰਵਾਈ ਨਾ ਹੋ ਸਕੀ , ਕਿਉਂਕਿ ਇਨਾਂ ਡਿਫਾਲਟਰ ਅਦਾਰਿਆਂ ’ਚ ਕੁਝ ਵੱਡੇ ਵਿੱਦਿਅਕ ਅਦਾਰੇ ਸਿਆਸੀ ਘਰਾਣਿਆਂ ਦੇ ਹਨ ਅਤੇ ਕੁਝ ਉੱਪਰ ਸਿਆਸੀ ਆਗੂਆਂ ਦੀ ਮਿਹਰਬਾਨੀ ਹੈ। ਭਗਵੰਤ ਮਾਨ ਸਰਕਾਰ ਲਈ ਵੀ ਇਨਾਂ ਡਿਫਾਲਟਰ ਕਾਲਜਾਂ ਤੋਂ ਵਜੀਫ਼ੇ ਦੇ ਫ਼ੰਡ ਵਾਪਸ ਕਰਵਾਉਣੇ ਸੌਖਾ ਕੰਮ ਨਹੀਂ ਹੋਵੇਗਾ ਕਿਉਂਕਿ ਬਹੁਤੇ ਡਿਫਾਲਟਰ ਕਾਲਜਾਂ ਦੇ ਮਾਲਕ ਹੁਣ ਆਮ ਆਦਮੀ ਪਾਰਟੀ ਦੀ ਛਤਰ ਛਾਇਆ ਹੇਠ ਹਨ।
ਇੱਕ ਵੱਡੇ ਸਿੱਖਿਆ ਸਾਸ਼ਤਰੀ ਨੂੰ ਤਾਂ ‘ਆਪ’ ਨੇ ਰਾਜ ਸਭਾ ਦਾ ਮੈਂਬਰ ਵੀ ਬਣਾ ਦਿੱਤਾ ਹੈ ਜਿਸ ਵੱਲ ਕਰੋੜਾਂ ਰੁਪਏ ਕੈਪਟਨ ਦੀ ਸਰਕਾਰ ਨੇ ਵਜੀਫ਼ਾ ਘੁਟਾਲੇ ਦੇ ਕੱਢੇ ਸਨ, ਹੁਣ ਦੇਖਣਯੋਗ ਹੋਵੇਗਾ ਕਿ ਮਾਨ ਸਰਕਾਰ ‘‘ਆਪਣੀਆਂ ਕੱਛ ’ਚ ਅਤੇ ਲੋਕਾਂ ਦੀਆਂ ਹੱਥ ’ਚ’’ ਰੱਖੇਗੀ ਜਾਂ ਫਿਰ ਬਿਨਾਂ ਸਿਆਸੀ ਪੱਖਪਾਤ ਤੋਂ ਦੋਸ਼ੀਆਂ ਖਿਲਾਫ਼ ਕਾਰਵਾਈ ਕਰੇਗੀ। ਚਰਚਾ ਇਹ ਵੀ ਹੈ ਕਿ ਮਾਨ ਸਰਕਾਰ ਵੱਲੋਂ ਵਜੀਫ਼ਾ ਘੁਟਾਲੇ ਵਿੱਚ ਕੀਤੀ ਜਾਣ ਵਾਲੀ ਕਾਰਵਾਈ ਸਾਬਕਾ ਮੰਤਰੀ ਸਾਧੂ ਸਿੰਘ ਧਰਮਸੋਤ ਤੱਕ ਸੀਮਤ ਹੋ ਕੇ ਕਾਂਗਰਸ ਨੂੰ ਬਦਨਾਮ ਕਰਨ ਦੀ ਹੀ ਹੋਵੇਗੀ। ਜਾਣਕਾਰੀ ਮੁਤਾਬਿਕ ਬਰਨਾਲਾ ਜ਼ਿਲੇ ਵਿੱਚ ਵੀ ਪੰਜ ਤੋਂ ਛੇ ਕਾਲਜ ਵਜੀਫ਼ੇ ਘੁਟਾਲੇ ਦੇ ਦੋਸ਼ੀ ਹਨ। ਜਿਨਾਂ ਦੇ ਮਾਲਕਾਂ ਨੇ ਬਰਨਾਲਾ ਨਾਲ ਸੰਬੰਧਿਤ ਕੈਬਨਿਟ ਮੰਤਰੀ ਦੇ ਇਰਦ ਗਿਰਦ ਰਹਿਣ ਵਾਲਿਆਂ ਦੀ ਚੌਂਕੀ ਭਰਨੀ ਸ਼ੁਰੂੁ ਕਰ ਦਿੱਤੀ ਹੈ। ਇਹ ਵੀ ਦੇਖਣਯੋਗ ਹੋਵੇਗਾ ਕਿ ਇਹ ਚੌਂਕੀਆਂ ਭਰਨ ਨਾਲ ਗਰੀਬ ਵਿਦਿਆਰਥੀਆਂ ਦੇ ਡਿਫਾਲਟਰਾਂ ’ਤੇ ਸਿਆਸੀ ਕਿ੍ਪਾ ਹੋਵੇਗੀ ਜਾਂ ਕਾਰਵਾਈ ਹੋਵੇਗੀ। ਬਰਨਾਲੇ ਦੀ ਰਾਜਨੀਤੀ ਦੀ ਮੌਜੂਦਾ ਦਿਸ਼ਾ ਤੇ ਦਸ਼ਾ ਅਨੁਸਾਰ ਇਨਾਂ ਡਿਫਾਲਟਰਾਂ ’ਤੇ ਸਿਆਸੀ ਕਿ੍ਪਾ ਹੋਣ ਦੇ ਵਧੇਰੇ ਆਸਾਰ ਹਨ, ਜਿਸ ਦੇ ਰੂਪ ’ਚ ਇਨਾਂ ਡਿਫਾਲਟਰਾਂ ਦੀ ਰਕਮ ਘੱਟ ਕਰ ਦਿੱਤੀ ਜਾਵੇਗੀ। ਜੇਕਰ ਅਜਿਹਾ ਹੁੰਦਾ ਹੈ ਤਾਂ ਆਮ ਆਦਮੀ ਪਾਰਟੀ ਨੂੰ ਲੋਕਾਂ ਦੇ ਸਵਾਲਾਂ ਦਾ ਸਾਹਮਣਾ ਕਰਨਾ ਪਵੇਗਾ ਕਿਉਂਕਿ ਆਪਣੇ ਚਹੇਤੇ ਕਾਲਜ ਡਿਫਾਲਟਰਾਂ ਨੂੰ ਕੈਪਟਨ ਸਰਕਾਰ ਨੇ ਵੀ ਇਸ ਸਿਆਸੀ ਕਿ੍ਪਾ ਨਾਲ ਨਿਵਾਜਿਆ ਸੀ ਪ੍ਰੰਤੂ ਲੋਕ ਮਾਨ ਸਰਕਾਰ ਤੋਂ ਵਜੀਫ਼ਾ ਘੁਟਾਲੇ ਦੇ ਮਾਮਲੇ ’ਚ ਪੁੰਨਿਆ ਦੀ ਰਾਤ ਵਰਗੀ ਕਾਰਵਾਈ ਚਾਹੁੰਦੇ ਹਨ।
