ਬਰਨਾਲਾ,24 ਜੁਲਾਈ (ਨਿਰਮਲ ਸਿੰਘ ਪੰਡੋਰੀ) :-
ਸੰਗਰੂਰ ਦੀ ਜ਼ਿਮਨੀ ਚੋਣ ਜਿੱਤ ਕੇ ਮੈਂਬਰ ਪਾਰਲੀਮੈਟ ਸਿਮਰਨਜੀਤ ਸਿੰਘ ਮਾਨ ਵੱਲੋਂ ਆਪਣੇ ਤੇਵਰ ਤਿੱਖੇ ਕਰ ਲਏ ਹਨ। ਮਾਨ ਵੱਲੋਂ ਰੋਜ਼ਾਨਾ ਕੋਈ ਨਾ ਕੋਈ ਅਜਿਹਾ ਬਿਆਨ ਦਿੱਤਾ ਜਾ ਰਿਹਾ ਹੈ, ਜਿਹੜਾ ਵਿਵਾਦ ਦਾ ਕਾਰਨ ਬਣ ਜਾਂਦਾ ਹੈ। ਪਿਛਲੇ ਕੁਝ ਦਿਨਾਂ ਤੋਂ ਸਿਮਰਨਜੀਤ ਸਿੰਘ ਮਾਨ ਦੇ ਹਮਾਇਤੀਆਂ ਅਤੇ ਵਿਰੋਧੀਆਂ ਵੱਲੋਂ ਸੋਸ਼ਲ ਮੀਡੀਆ ਪਲੇਟਫਾਰਮ ’ਤੇ ਵੀ ਵਿਚਾਰਾਂ ਦੀ ਬਹਿਸ ਤਿੱਖੀ ਹੁੰਦੀ ਜਾ ਰਹੀ ਹੈ। ਸ਼ਹੀਦ ਭਗਤ ਸਿੰਘ ਨੂੰ ਅੱਤਵਾਦੀ ਕਹਿਣ, ਬਲਿਊ ਸਟਾਰ ਰੋਕਣ ਲਈ ਇੰਦਰਾ ਗਾਂਧੀ ਨੂੰ ਸਿਰੋਪਾ ਦੇਣ ਦੀ ਸਲਾਹ ਦੇਣ ਅਤੇ ਹੁਣ ਹਿੰਦੂਤਵ ਨੂੰ ਸਿੱਖ ਕੌਮ ਲਈ ਵੱਡੇ ਖ਼ਤਰੇ ਵਾਲਾ ਬਿਆਨ ਦੇ ਕੇ ਸ. ਮਾਨ ਨੇ ਦੇਸ਼ ਵਿਦੇਸ਼ ਵਿੱਚ ਵੱਖਰੀ ਬਹਿਸ ਛੇੜ ਦਿੱਤੀ ਹੈ। ਮੈਂਬਰ ਪਾਰਲੀਮੈਟ ਬਣਨ ਤੋਂ ਬਅਦ ਸਿਮਰਨਜੀਤ ਸਿੰਘ ਦੇ ਬਿਆਨਾਂ ਨੂੰ ਦੇਖਦੇ ਹੋਏ ਭਾਜਪਾ ਨੇ ਵੀ ਆਪਣੇ ਗਰਮ ਖਿਆਲੀ ਆਗੂਆਂ ਦੀਆਂ ਲਗਾਮਾਂ ਖੋਲ ਦਿੱਤੀਆਂ ਹਨ। ਭਾਜਪਾ ਆਗੂ ਟੀਨਾ ਕਪੂਰ ਸ਼ਰਮਾ ਨੇ ਮਾਨ ਦੇ ਖਿਲਾਫ਼ ਪੁਲਿਸ ਸ਼ਿਕਾਇਤ ਵੀ ਦਰਜ ਕਰਵਾਈ ਹੈ। ਟੀਨਾ ਕਪੂਰ ਸ਼ਰਮਾ ਜਿਸ ਦਾ ਪਿਛੋਕੜ ਪੰਜਾਬ ਤੋਂ ਹੈ, ਨੇ ਪੰਜਾਬ ’ਚ ਮਾਨ ਦੇ ਖਿਲਾਫ਼ ਯੋਜਨਾਬੱਧ ਤਰੀਕੇ ਨਾਲ ਮੁਹਿੰਮ ਸ਼ੁਰੂ ਕੀਤੀ ਹੈ ਜਿਸ ਦੌਰਾਨ ਕੱਟੜ ਹਿੰਦੂਤਵੀ ਚਿਹਰਿਆਂ ਨੂੰ ਨਾਲ ਜੋੜਿਆ ਜਾ ਰਿਹਾ ਹੈ। ਪੰਜਾਬ ਦੀਆਂ ਸਿਆਸੀ ਪਾਰਟੀਆਂ ਵੀ ਸਿਮਰਨਜੀਤ ਸਿੰਘ ਮਾਨ ਦੇ ਬਿਆਨਾਂ ਦੀ ਨਿੰਦਾ ਕਰ ਰਹੀਆਂ ਹਨ। ਸਮੁੱਚਾ ਇਲੈਟ੍ਰੋਨਿਕ ਮੀਡੀਆ ਮਾਨ ਦੇ ਬਿਆਨਾਂ ’ਤੇ ਹੀ ਕੇਂਦਰਿਤ ਹੈ ।
ਸਿਮਰਨਜੀਤ ਮਾਨ ਨਾਲ ਕਈ ਵਰਿਆਂ ਤੋਂ ਕੰਮ ਕਰ ਰਹੇ ਕੁਝ ਆਗੂ ਭਾਵੇਂ ਕਿ ਮਾਨ ਦੇ ਬਿਆਨਾਂ ਦੀ ਹਮਾਇਤ ਕਰ ਰਹੇ ਹਨ ਪ੍ਰੰਤੂ ਆਪਣਾ ਨਾਮ ਨਾ ਛਾਪਣ ਦੀ ਸ਼ਰਤ ’ਤੇ ਇਹ ਆਗੂ ਪੰਜਾਬ ਦੇ ਚਿਰਾਂ ਤੋਂ ਲਟਕਦੇ ਮੁੱਦਿਆਂ ਨੂੰ ਲੋਕ ਸਭਾ ਦੇ ਪਲੇਟਫਾਰਮ ’ਤੇ ਉਠਾਉਣ ਦੇ ਹਾਮੀ ਹਨ। ਕਦੇ -ਕਦੇ ਇੰਝ ਪ੍ਰਤੀਤ ਹੁੰਦਾ ਹੈ ਕਿ ਪੰਜਾਬ ’ਚ ਸਿਆਸੀ ਪਾਰਟੀਆਂ ਵੱਲੋਂ ਇੱਕ ਅਜਿਹੀ ਖੇਡ-ਖੇਡੀ ਜਾ ਰਹੀ ਹੈ ਜਿਸ ਦੇ ਮਾੜੇ ਨਤੀਜੇ ਪੰਜਾਬ ਭੁਗਤ ਚੁੱਕਾ ਹੈ। ਸ਼ੋਮਣੀ ਅਕਾਲੀ ਦਲ ਵੱਲੋਂ ਬੰਦੀ ਸਿੰਘਾਂ ਦੀ ਰਿਹਾਈ ਦਾ ਮੁੱਦਾ ਚੁੱਕਣਾ, ਅਕਾਲ ਤਖ਼ਤ ਦੇ ਜਥੇਦਾਰ ਵੱਲੋਂ ਸ਼ੋਮਣੀ ਕਮੇਟੀ ਦੀ ਕਮਜ਼ੋਰੀ ਨੂੰ ਸ਼ਰੇਆਮ ਪ੍ਰਚਾਰਨਾ, ਸਿਮਰਨਜੀਤ ਸਿੰਘ ਮਾਨ ਵੱਲੋਂ ਪੰਜਾਬ ਦੇ ਰਵਾਇਤੀ ਮੁੱਦਿਆਂ ਤੋਂ ਹਟ ਕੇ ਇੱਕ ਵਰਗ ਵਿਸੇਸ਼ ਨਾਲ ਟਕਰਾਅ ਦੀਆਂ ਗੱਲਾਂ ਕਰਨਾ, ਭਾਜਪਾ ਵੱਲੋਂ ਆਪਣੇ ਸਿੱਖ ਚਿਹਰਿਆਂ ਨੂੰ ਪੰਜਾਬ ਦੀ ਰਾਜਨੀਤੀ ’ਚ ਪ੍ਰਮੋਟ ਕਰਨਾ, ਕੁਝ ਅਜਿਹੇ ਮੁੱਦੇ ਹਨ ਜਿਹੜੇ ਅਚਾਨਕ ਪੈਦਾ ਨਹੀਂ ਹੋਏ ਸਗੋਂ ਪੰਜਾਬ ਦੇ ਮੌਜੂਦਾ ਰਾਜਨੀਤਿਕ ਹਾਲਾਤਾਂ ਅਨੁਸਾਰ ਇਨ੍ਹਾਂ ਜ਼ਹਿਰੀ ਸੱਪਾਂ ਨੂੰ ਸਿਆਸੀ ਯੋਗੀਆਂ ਵੱਲੋਂ ਪਟਾਰੀ ’ਚੋਂ ਕੱਢਿਆ ਗਿਆ ਹੈ ਅਤੇ ਇਨਾਂ ਸੱਪਾਂ ਦੇ ਡੰਗ ਦਾ ਨਿਸ਼ਾਨਾ ਪੰਜਾਬ ਦਾ ਭਾਈਚਾਰਾ ਹੀ ਹੈ ਕਿਉਂਕਿ ਜਿਨਾਂ ਚਿਰ ਪੰਜਾਬ ’ਚ ਵੱਖ-ਵੱਖ ਵਰਗਾਂ ਦਾ ਭਾਈਚਾਰਾ ਕਾਇਮ ਹੈ ਉਨਾ ਚਿਰ ਇਨਾਂ ਸਿਆਸੀ ਯੋਗੀਆਂ ਦੀਆਂ ਫਿਰਕੂ ਬੀਨਾਂ ਦੀਆਂ ਧੁਨਾਂ ਸੂਬੇ ਦੇ ਆਮ ਲੋਕਾਂ ਨੂੰ ਨਹੀਂ ਕੀਲ ਸਕਣਗੀਆਂ। ਪੰਜਾਬ ’ਚ ਜਿਹੜੇ ਹਾਲਾਤ ਪੈਦਾ ਕੀਤੇ ਜਾ ਰਹੇ ਹਨ, ਅਜਿਹੇ ਹਾਲਾਤਾਂ ਨੂੰ ਸੂਬੇ ਦੇ ਆਮ ਲੋਕਾਂ ਨੂੰ ਸੁਚੇਤ ਰਹਿਣਾ ਪਵੇਗਾ।
