-ਮੁੱਖ ਮੰਤਰੀ ਨੇ ਦਿੱਤੀਆਂ ਸਫਾਈਆਂ, ਉੱਚ ਪੁਲਿਸ ਅਧਿਕਾਰੀ ਪਹੁੰਚੇ ਘਰ
ਬਰਨਾਲਾ, 01 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ ) :
ਪੰਜਾਬੀ ਗਾਇਕ ਮਰਹੂਮ ਸਿੱਧੂ ਮੂਸੇਵਾਲਾ ਦੇ ਪਰਿਵਾਰ ਵੱਲੋਂ ਇਨਸਾਫ਼ ਨਾਲ ਮਿਲਣ ਦੀ ਸੂਰਤ ਵਿੱਚ ਦੇਸ਼ ਛੱਡ ਜਾਣ ਦੀ ਧਮਕੀ ਨਾਲ ਸਰਕਾਰ ਹਿੱਲ ਗਈ ਹੈ। ਸੂਬੇ ਦੇ ਮੁੱਖ ਮੰਤਰੀ ਨੂੰ ਬਕਾਇਦਾ ਸਿੱਧੂ ਮੂਸੇਵਾਲਾ ਦੇ ਪਿਤਾ ਤੇ ਮਾਤਾ ਵੱਲੋਂ ਕੀਤੀਆਂ ਗੱਲਾਂ ਦਾ ਜਵਾਬ ਪੱਤਰਕਾਰਾਂ ਸਾਹਮਣੇ ਸਫਾਈ ਦੇ ਰੂਪ ਵਿੱਚ ਦੇਣਾ ਪਿਆ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਿਹਾ ਕਿ ਸਿੱਧੂ ਮੂਸੇਵਾਲਾ ਦਾ ਕਤਲ ਬਹੁਤ ਹੀ ਸੰਗੀਨ ਵਾਰਦਾਤ ਹੈ ਅਤੇ ਇਸ ਦੇ ਦੋਸ਼ੀਆਂ ਨੂੰ ਮਿਸਾਲੀ ਸਜ਼ਾ ਦਿਵਾਉਣ ਲਈ ਸਰਕਾਰ ਵਚਨਬੱਧ ਹੈ। ਪਰਿਵਾਰ ਦੀ ਧਮਕੀ ਦਾ ਸਰਕਾਰ ਅਤੇ ਪੰਜਾਬ ਪੁਲਿਸ ’ਤੇ ਅਜਿਹਾ ਅਸਰ ਹੋਇਆ ਕਿ ਪੁਲਿਸ ਦੇ ਆਈਜੀ ਜਸਕਰਨ ਸਿੰਘ, ਸਿੱਧੂ ਮੂਸੇਵਾਲੇ ਦੇ ਘਰ ਉਸ ਦੇ ਮਾਤਾ ਪਿਤਾ ਨੂੰ ਮਿਲਣ ਗਏ ਅਤੇ ਕਰੀਬ 6 ਘੰਟੇ ਉਸ ਦੇ ਘਰ ਪਿਤਾ ਬਲਕੌਰ ਸਿੰਘ ਦੀ ਜਾਂਚ ਸੰਬੰਧੀ ਤਸੱਲੀ ਕਰਵਾਉਂਦੇ ਰਹੇ। ਅਸਲ ਵਿੱਚ ਬਲਕੌਰ ਸਿੰਘ ਨੂੰ ਕਤਲ ਕਾਂਡ ਦੇ ਮਾਸਟਰਮਾਈਂਡ ਗੋਲਡੀ ਬਰਾੜ ਤੱਕ ਪੁੱਜਣ ਲਈ ਪੁਲਿਸ ਵੱਲੋਂ ਕੋਈ ਤਸੱਲੀਬਖ਼ਸ ਚਾਰਾਜੋਈ ਨਾ ਕੀਤੇ ਜਾਣ ’ਤੇ ਇਤਰਾਜ਼ ਹੈ ਅਤੇ ਉਹ ਇਸ ਮਾਮਲੇ ਸੰਬੰਧੀ ਅਕਸਰ ਖੁੱਲ ਕੇ ਬੋਲਦੇ ਵੀ ਰਹਿੰਦੇ ਹਨ। ਬਲਕੌਰ ਸਿੰਘ ਨੂੰ ਗੈਂਗਸਟਰ ਲਾਰੈਸ ਬਿਸ਼ਨੋਈ ਨੂੰ ਵੀਆਈਪੀ ਟਰੀਟਮੈਂਟ ਦੇਣ ਦੀਆਂ ਖ਼ਬਰਾਂ ਵੀ ਪ੍ਰੇਸ਼ਾਨ ਕਰਦੀਆ ਹਨ।
ਸਿੱਧੂ ਮੂਸੇਵਾਲੇ ਦੇ ਪਰਿਵਾਰ ਵੱਲੋਂ ਦਿੱਤੀ ਧਮਕੀ ਦਾ ਇੱਕ ਕਾਰਨ ਇਹ ਵੀ ਹੈ ਕਿ ਅਜੇ ਤੱਕ ਸਰਕਾਰ ਨੇ ਮਾਨਸਾ ਜ਼ਿਲੇ ਦੇ ਐਸਐਸਪੀ ਦੀ ਬਦਲੀ ਕਰਨ ਬਾਰੇ ਤੱਕ ਨਹੀਂ ਸੋਚਿਆ। ਇਹ ਵੱਡਾ ਸਵਾਲ ਹੈ ਕਿ ਜਿਹੜੇ ਪੁਲਿਸ ਮੁਖੀ ਦਾ ਸੀਆਈਏ ਇੰਚਾਰਜ ਦੋਸ਼ੀਆਂ ਦੀ ਪੁਸ਼ਤਪਨਾਹੀ ਕਰਦਾ ਰਿਹਾ ਹੋਵੇ ਅਤੇ ਇਸ ਬਾਰੇ ਜ਼ਿਲਾ ਪੁਲਿਸ ਮੁਖੀ ਨੂੰ ਭਿਣਕ ਤੱਕ ਵੀ ਨਾ ਲੱਗ ਰਹੀ ਹੋਵੇ ਤਾਂ ਫਿਰ ਇਹ ਕਿਵੇਂ ਮੰਨਿਆ ਜਾ ਸਕਦਾ ਹੈ ਕਿ ਜ਼ਿਲਾ ਪੁਲਿਸ ਮੁਖੀ ਮੂਸੇਵਾਲਾ ਕਤਲ ਕਾਂਡ ਦੀ ਸਾਰੀ ਕਾਰਵਾਈ ਨਾਲ ਨੇੜੇ ਤੋਂ ਜੁੜਿਆ ਹੋਇਆ ਹੈ। ਜਿਸ ਪੁਲਿਸ ਅਫ਼ਸਰ ਦੇ ਜ਼ਿਲੇ ਵਿੱਚ ਕਈ ਮਹੀਨੇ ਤੱਕ ਏ-ਸ਼੍ਰੇਣੀ ਦੇ ਗੈਂਗਸਟਰ ਸਿੱਧੂ ਮੂਸੇਵਾਲੇ ਦੀ ਰੇਕੀ ਕਰਦੇ ਰਹੇ ਹੋਣ ਅਤੇ ਪੁਲਿਸ ਨੂੰ ਉਨਾ ਦੀਆਂ ਗਤੀਵਿਧੀਆਂ ਦੀ ਭਿਣਕ ਨਾ ਲੱਗੀ ਹੋਵੇ ਤਾਂ ਜ਼ਿਲਾ ਪੁਲਿਸ ਮੁਖੀ ਦੀ ਪਕੜ ਦਾ ਬਾਖ਼ੂਬੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ। ਇਹ ਚਰਚਾ ਅਕਸਰ ਹੁੰਦੀ ਰਹਿੰਦੀ ਹੈ ਕਿ ਮਾਨਸਾ ਦੇ ਜ਼ਿਲਾ ਪੁਲਿਸ ਮੁਖੀ ਦੀ ਪ੍ਰਸ਼ਾਸਨਿਕ ਕਮਜ਼ੋਰੀ ਵੱਲ ਪੁਲਿਸ ਦੇ ਉੱਚ ਅਧਿਕਾਰੀਆਂ ਅਤੇ ਸਰਕਾਰ ਦਾ ਧਿਆਨ ਕਿਉਂ ਨਹੀਂ ਜਾ ਰਿਹਾ। ਸਿੱਧੂ ਮੂਸੇਵਾਲਾ ਦੇ ਪਰਿਵਾਰ ਨੂੰ ਇਸ ਗੱਲ ਦੀ ਵੀ ਨਾਰਾਜ਼ਗੀ ਹੈ ਕਿ ਪੁਲਿਸ ਸਿੱਧੂ ਦੇ ਕਤਲ ਨੂੰ ਗੈਂਗਵਾਰ ਦਾ ਰੂਪ ਦੇਣਾ ਚਾਹੁੰਦੀ ਹੈ। ਪਰਿਵਾਰ ਦੇ ਹੱਕ ’ਚ ਖੁੱਲ ਕੇ ਖੜਨ ਵਾਲੀ ਗਾਇਕਾ ਅਫਸਾਨਾ ਖਾਨ ਦੀ ਪੁੱਛਗਿੱਛ ਨੇ ਵੀ ਮੂਸੇਵਾਲਾ ਦੇ ਮਾਤਾ-ਪਿਤਾ ਨੂੰ ਪ੍ਰੇਸ਼ਾਨ ਕੀਤਾ ਹੈ, ਜਿਸ ਦੀ ਚਰਚਾ ਪਰਿਵਾਰ ਸਟੇਜਾਂ ਉੱਪਰ ਕਰਦਾ ਰਹਿੰਦਾ ਹੈ। ਅਸਲ ਵਿੱਚ ਮੁਲਕ ਛੱਡਣ ਦੀ ਧਮਕੀ ਮੂਸੇਵਾਲਾ ਦੇ ਪਿਤਾ ਦੀ ਜ਼ੁਬਾਨ ਵਿੱਚੋਂ ਨਿਕਲੀ ਕੋਈ ਆਮ ਜਿਹੀ ਗੱਲ ਨਹੀਂ ਹੈ। ਇਸੇ ਲਈ ਮੁੱਖ ਮੰਤਰੀ ਤੱਕ ਨੂੰ ਆਪ ਸਫਾਈਆਂ ਦੇਣੀਆਂ ਪੈ ਰਹੀਆਂ ਹਨ ਅਤੇ ਆਈਜੀ ਰੈਂਕ ਦਾ ਅਧਿਕਾਰੀ ਪਰਿਵਾਰ ’ਚ ਘੰਟਿਆਂਬੱਧੀ ਬੈਠਾ ਰਹਿੰਦਾ ਹੈ। ਫਿਰ ਵੀ ਕੁਝ ਵੱਡੇ ਸਵਾਲ ਸਰਕਾਰ ਅਤੇ ਪੁਲਿਸ ਸਾਹਮਣੇ ਖੜੇ ਹਨ ਜਿਹੜੇ ਮੂਸੇਵਾਲਾ ਦੇ ਮਾਤਾ-ਪਿਤਾ ਵੱਲੋਂ ਅਕਸਰ ਉਠਾਏ ਜਾਂਦੇ ਹਨ, ਜਿਨਾਂ ਦਾ ਜਵਾਬ ਦੇਣ ਤੋਂ ਚੁੱਪ ਵੱਟੀ ਜਾ ਰਹੀ ਹੈ।
