ਚੰਡੀਗੜ, 02 ਜੁਲਾਈ (ਨਿਰਮਲ ਸਿੰਘ ਪੰਡੋਰੀ) : ਅਕਸਰ ਕਿਹਾ ਜਾਂਦਾ ਹੈ ਕਿ ਗੁਆਂਢ ਚੰਦਰਾ ਅਤੇ ਸਲਾਹਕਾਰ ਮਾੜਾ ਨਾ ਹੋਵੇ ਕਿਉਂਕਿ ਚੰਦਰਾ ਗੁਆਂਢ ਕੋਈ ਨਾ ਕੋਈ ਨਵਾਂ ਸਿਆਪਾ ਖੜਾ ਰੱਖਦਾ ਹੈ ਅਤੇ ਮਾੜਾ ਸਲਾਹਕਾਰ ਹਮੇਸ਼ਾ ਪੁੱਠੇ ਰਾਹ ਤੋਰੀ ਰੱਖਦਾ ਹੈ । ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨਾਲ ਅਜਿਹੀ ਘਟਨਾ ਹੀ ਵਾਪਰੀ, ਜਦ ਪ੍ਰਧਾਨ ਸਾਹਿਬ ਪਿਛਲੇ ਦਿਨੀਂ ਬਿਆਸ ਦਰਿਆ ਵਿੱਚ ਮਾਇਨਿੰਗ ਦੀਆਂ ਖੱਡਾਂ ’ਤੇ ਰੇਡ ਕਰਨ ਪੁੱਜੇ । ਸੁਖਬੀਰ ਸਿੰਘ ਬਾਦਲ ਨੇ ਆਪਣੀ ਪਾਰਟੀ ਦੇ ਹੋਰ ਸੀਨੀਅਰ ਆਗੂਆਂ ਨਾਲ ਆਪਣੀ ਛਾਪਾਮਾਰੀ ਦੀ ਵੀਡੀਓ ਵਾਇਰਲ ਕਰਕੇ ਨਾਜਾਇਜ਼ ਮਾਇਨਿੰਗ ਦੇ ਦੋਸ਼ ਲਾਏ। ਸ਼੍ਰੋਮਣੀ ਅਕਾਲੀ ਦਲ ਦੇ ਆਈਟੀ ਵਿੰਗ ਨੇ ਇਹ ਵੀਡੀਓ ਕਲਿੱਪ ਵਾਇਰਲ ਕਰਨ ਲਈ ਸਾਰਾ ਜ਼ੋਰ ਲਗਾ ਦਿੱਤਾ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਸੂਬੇ ਦਾ ਮਾਇਨਿੰਗ ਵਿਭਾਗ ਵੀ ਹਰਕਤ ਵਿੱਚ ਆ ਗਿਆ ਅਤੇ ਜਿਸ ਰੇਤੇ ਦੀ ਖੱਡ ’ਤੇ ਸੁਖਬੀਰ ਸਿੰਘ ਬਾਦਲ ਖੜੇ ਹੋਏ ਸਨ ਉਸ ਖੱਡ ਦੇ ਠੇਕੇਦਾਰ ਨੇ ਵੀ ਛੋਟੇ ਬਾਦਲ ਦੀ ਵੀਡੀਓ ਕਲਿੱਪ ’ਤੇ ਟਿੱਪਣੀ ਕਰਦੇ ਹੋਏ ਕਿਹਾ ਕਿ ਸਬੰਧਿਤ ਰੇਤੇ ਦੀ ਖੱਡ ’ਤੇ ਚੱਲ ਰਿਹਾ ਕੰਮ ਕਾਨੂੰਨੀ ਹੈ, ਜਿਸ ਤੋਂ ਬਾਅਦ ਛੋਟੇ ਬਾਦਲ ਦੇ ਮਾੜੇ ਸਲਾਹਕਾਰਾਂ ਦੀ ਦਿੱਤੀ ਸਲਾਹ ਕਾਰਨ ਸ਼੍ਰੋਮਣੀ ਅਕਲੀ ਦਲ ਦੇ ਆਈਟੀ ਵਿੰਗ ਦੀ ਬੋਲਤੀ ਬੰਦ ਹੋ ਗਈ। ਸਬੰਧਿਤ ਠੇਕੇਦਾਰ ਨੇ ਮਾਮਲੇ ਨੂੰ ਰਾਜਨੀਤਿਕ ਧੱਕਾ ਲਗਾ ਕੇ ਬਿਆਸ ਥਾਣੇ ’ਚ ਵਾੜ ਦਿੱਤਾ, ਜਿੱਥੇ ਸਬੰਧਿਤ ਮਾਇਨਿੰਗ ਸਾਈਟ ਦੇ ਠੇਕੇਦਾਰ ਦੀ ਸ਼ਿਕਾਇਤ ਉੱਪਰ ਸੁਖਬੀਰ ਸਿੰਘ ਬਾਦਲ ,ਵਿਰਸਾ ਸਿੰਘ ਵਲਟੋਹਾ, ਅਮਰਪਾਲ ਸਿੰਘ ਬੋਨੀ ਖ਼ਿਲਾਫ਼ ਸਖ਼ਤ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਇਸ ਮਾਮਲੇ ਸਬੰਧੀ ਅਕਾਲੀ ਵਿਰੋਧੀ ਪਾਰਟੀਆਂ ਨੇ ਤਾਂ ਸੁਖਬੀਰ ਸਿੰਘ ਬਾਦਲ ਦੀ ਛਾਪਾਮਾਰੀ ’ਤੇ ਤਨਜ਼ ਕਸਣੇ ਹੀ ਸਨ ਪ੍ਰੰਤੂ ਅਕਾਲੀ ਦਲ ਦੇ ਅੰਦਰ ਵੀ ਘੁਸਰ-ਫੁਸਰ ਹੋ ਰਹੀ ਹੈ ਕਿ ‘ਮਾੜੇ ਸਲਾਹਕਾਰਾਂ ਨੇ ਦਰਿਆ ਦੇ ਰੇਤੇ ’ਚ ਫਸਾ ਦਿੱਤੇ’।
Menu
