ਚੰਡੀਗੜ੍ਹ-ਪੰਜਾਬ ਦੇ ਇਕ ਵੱਡੇ ਭਾਜਪਾ ਨੇਤਾ ਦੇ ਖਿਲਾਫ CBI ਨੇ ਰਿਸ਼ਵਤ ਦੇ ਮਾਮਲੇ ‘ਚ FIR ਦਰਜ ਕੀਤੀ ਹੈ । ਸੀਬੀਆਈ ਨੇ ਅਰਵਿੰਦ ਖੰਨਾ ਦੇ ਖ਼ਿਲਾਫ਼ FIR ਦਰਜ ਕੀਤੀ ਹੈ। ਦਿੱਲੀ ਤੋਂ ਪ੍ਰਕਾਸ਼ਿਤ “ਦਿ ਟ੍ਰਿਬਿਊਨ” ਦੀ ਖ਼ਬਰ ਅਨੁਸਾਰ ਖੰਨਾ ਤੋ ਇਲਾਵਾ ਐਫਆਈਆਰ ਵਿੱਚ ਐਡਵੋਕੇਟ ਗੌਤਮ ਖੇਤਾਨ, ਕਾਰੋਬਾਰੀ ਅਨੂਪ ਗੁਪਤਾ ਅਤੇ NRI ਕਾਰੋਬਾਰੀ ਵਿਪਿਨ ਖੰਨਾ ਦੇ ਨਾਮ ਵੀ ਦਰਜ ਹਨ ਪਰ ਵਿਪਿਨ ਖੰਨਾ ਦੀ ਮੌਤ ਤੋਂ ਬਾਅਦ ਉਸਦੇ ਖਿਲਾਫ਼ ਕਾਰਵਾਈ ਰੋਕ ਦਿੱਤੀ ਗਈ ਸੀ। ਸੀਬੀਆਈ ਨੇ ਅਰਵਿੰਦ ਖੰਨਾ ਤੇ ਉਸਦੇ ਸਾਥੀਆਂ ਦੇ ਖ਼ਿਲਾਫ਼ ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ (DRDO) ਨਾਲ ਤਿੰਨ ਜ਼ਹਾਜ਼ਾਂ ਦੇ ਸੌਦੇ ਨੂੰ ਬਰਾਜ਼ੀਲ ਦੀ ਇਕ ਫਰਮ ਦੇ ਹੱਕ ਵਿੱਚ ਬਦਲਣ ਸਬੰਧੀ 5.76 ਮਿਲੀਅਨ ਡਾਲਰ ਦੀ ਰਿਸ਼ਵਤ ਲੈਣ-ਦੇਣ ਸੰਬੰਧੀ ਮਾਮਲਾ ਦਰਜ ਕੀਤਾ ਹੈ । ਸੀਬੀਆਈ ਦੇ ਬੁਲਾਰੇ ਅਨੁਸਾਰ ਅਰਵਿੰਦ ਖੰਨਾ, ਗੌਤਮ ਖੇਤਾਨ ਅਤੇ ਅਨੂਪ ਗੁਪਤਾ ਦੇ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ 120-B (ਅਪਰਾਧਿਕ ਸਾਜ਼ਿਸ਼), ਭ੍ਰਿਸ਼ਟਾਚਾਰ ਰੋਕੂ ਐਕਟ ਤਹਿਤ ਚਾਰਜਸ਼ੀਟ ਦਾਇਰ ਕੀਤੀ ਗਈ ਹੈ । ਵੇਰਵੇ ਅਨੁਸਾਰ ਹਵਾ ਨਾਲ ਚੱਲਣ ਵਾਲੇ ਰਾਡਾਰ ਸਿਸਟਮ ਨੂੰ ਸਥਾਪਤ ਕਰਨ ਲਈ ਤਿੰਨ ਜਹਾਜ਼ਾਂ ਦਾ ਸੌਦਾ 3 ਜੁਲਾਈ 2008 ਨੂੰ ਬਰਾਜ਼ੀਲ ਦੀ ਇੱਕ ਫਰਮ ਨਾਲ ਹੋਇਆ ਸੀ । ਸੀਬੀਆਈ ਨੇ ਦੋਸ਼ ਲਗਾਇਆ ਕਿ 5.76 ਮਿਲੀਅਨ ਡਾਲਰ ਦੀ “ਕਿੱਕਬੈਕ” ਕਥਿਤ ਤੌਰ ‘ਤੇ ਫਰਮ ਦੀਆਂ ਸਹਾਇਕ ਕੰਪਨੀਆਂ ਤੋਂ ਵਿਪਿਨ ਖੰਨਾ ਨੂੰ ਸਿੰਗਾਪੁਰ ਸਥਿਤ INTERDEV ਰਾਹੀਂ DRDO ਅਧਿਕਾਰੀਆਂ ਨੂੰ ਪ੍ਰਭਾਵਿਤ ਕਰਨ ਲਈ ਵਰਤੀ ਗਈ ਸੀ । ਚਾਰਜਸ਼ੀਟ ਵਿੱਚ ਸੀਬੀਆਈ ਨੇ ਤਿੰਨ ਜਹਾਜ਼ਾਂ ਦੇ ਸੌਦੇ ਵਿੱਚ ਕਥਿਤ ਭ੍ਰਿਸ਼ਟਾਚਾਰ ਦੇ ਸਿਲਸਿਲੇ ਵਿੱਚ ਬਰਾਜ਼ੀਲ ਫਰਮ ਅਤੇ ਸਿੰਗਾਪੁਰ ਸਥਿਤ INTERDEV ਨੂੰ ਵੀ ਦਰਜ ਕੀਤਾ ਹੈ । ਜ਼ਿਕਰਯੋਗ ਹੈ ਕਿ ਸਤੰਬਰ 2016 ਵਿੱਚ ਬਰਾਜ਼ੀਲ ਦੇ ਇੱਕ ਅਖ਼ਬਾਰ ਵਿੱਚ ਉਕਤ ਮਾਮਲੇ ਸਬੰਧੀ ਰਿਪੋਰਟ ਪ੍ਰਕਾਸ਼ਿਤ ਹੋਣ ਤੋਂ ਬਾਅਦ ਸੀਬੀਆਈ ਨੇ ਜਾਂਚ ਸ਼ੁਰੂ ਕੀਤੀ ਸੀ । ਸੀਬੀਆਈ ਦਾ ਕਹਿਣਾ ਹੈ ਕਿ ਖੰਨਾ ਦੀ ਕਥਿਤ ਵਿਚੋਲਗਿਰੀ ਕਾਰਨ DRDO ਅਧਿਕਾਰੀਆਂ ਨੇ ਬ੍ਰਾਜ਼ੀਲ ਫਰਮ ਤੋਂ ਸਿੰਗਲ-ਵੈਂਡਰ ਅਧਾਰ ‘ਤੇ ਜ਼ਹਾਜ਼ ਖ੍ਰੀਦਣ ਦਾ ਪ੍ਰਸਤਾਵ ਪੇਸ਼ ਕੀਤਾ । ਸੀਬੀਆਈ ਦਾ ਇਹ ਵੀ ਦੋਸ਼ ਹੈ ਕਿ ਬਰਾਜ਼ੀਲ ਅਧਾਰਿਤ ਫਾਰਮ ਅਤੇ DRDO ( ਭਾਰਤ) ਦੇ ਵਿਚਕਾਰ ਸਮਝੌਤੇ/ਸੌਦੇ ਅਹੁਦੇ ਦੀ ਸਹੂਲਤ ਦੇਣ ਬਦਲੇ ਫਰਮ ਨੇ 2009 ਵਿੱਚ ਸਿੰਗਾਪੁਰ ਅਧਾਰਿਤ ਕੰਪਨੀ ਦੁਆਰਾ ਵਿਚੋਲੇ ਖੰਨਾ ਨੂੰ 5.76 ਮਿਲੀਅਨ ਡਾਲਰ ਦੀ ਰਕਮ ਦਿੱਤੀ । ਜ਼ਿਕਰਯੋਗ ਹੈ ਕਿ ਪੰਜਾਬ ‘ਚ ਸੱਤਾ ਤਬਦੀਲੀ ਤੋਂ ਬਾਅਦ ਕੁਝ ਵੱਡੇ ਅਕਾਲੀ ਅਤੇ ਕਾਂਗਰਸੀ ਆਗੂਆਂ ਨੇ ਭਾਜਪਾ ਜੁਆਇਨ ਕਰ ਲਈ ਸੀ, ਇਨ੍ਹਾਂ ਆਗੂਆਂ ਦੀ ਦਲਬਦਲੀ ਦੀ ਇਸ ਪ੍ਰਕਿਰਿਆ ਨੂੰ ਪੰਜਾਬ ਦੀ ਮੌਜੂਦਾ ਸਰਕਾਰ ਵੱਲੋਂ ਭ੍ਰਿਸ਼ਟਾਚਾਰ ਵਿਰੋਧੀ ਮੁਹਿੰਮ ਤਹਿਤ ਵਿਜੀਲੈਂਸ ਦੀ ਸਰਗਰਮੀ ਦੇ ਮੱਦੇਨਜ਼ਰ ਵੇਖਿਆ ਜਾ ਰਿਹਾ ਹੈ ਪ੍ਰੰਤੂ ਕਾਂਗਰਸ ਛੱਡ ਕੇ ਭਾਜਪਾ ‘ਚ ਸ਼ਾਮਲ ਹੋਣ ਵਾਲੇ ਇੱਕ ਵੱਡੇ ਆਗੂ ਖਿਲਾਫ਼ ਕੇਂਦਰੀ ਏਜੰਸੀ ਵੱਲੋਂ ਕੀਤੀ ਕਾਰਵਾਈ ਸਬੰਧੀ ਸੂਬੇ ਦੇ ਸਿਆਸੀ ਗਲਿਆਰਿਆ ‘ਚ ਘੁਸਰ-ਮੁਸਰ ਹੋਣੀ ਸ਼ੁਰੂ ਹੋ ਗਈ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇੱਕ ਕੇਂਦਰੀ ਏਜੰਸੀ ਵੱਲੋਂ ਸੂਬੇ ਦੇ ਭਾਜਪਾ ਆਗੂ ਖਿਲਾਫ਼ ਕੀਤੀ ਕਾਰਵਾਈ ਤੋਂ ਬਾਅਦ ਕਾਂਗਰਸ ਛੱਡ ਕੇ ਭਾਜਪਾ ‘ਚ ਸ਼ਾਮਲ ਹੋਣ ਵਾਲੇ ਪੰਜਾਬ ਦੇ ਉਨ੍ਹਾਂ ਆਗੂਆਂ ਦੀਆਂ ਚਿੰਤਾਵਾਂ ਵੱਧ ਗਈਆਂ ਹਨ ਜਿਨ੍ਹਾਂ ਦੀ “ਕਾਰਜਪੱਤਰੀ” ਪੰਜਾਬ ਵਿਜੀਲੈਂਸ ਬਿਊਰੋ ਨੇ ਖੋਲ੍ਹੀ ਹੋਈ ਹੈ।
