ਬਰਨਾਲਾ,16 ਜੂਨ ( ਨਿਰਮਲ ਸਿੰਘ ਪੰਡੋਰੀ )-
ਜ਼ਿਲ੍ਹੇ ਦੇ ਸਿਵਲ ਸਰਜਨ ਡਾ.ਜਸਵੀਰ ਸਿੰਘ ਔਲਖ ਅਕਸਰ ਆਪਣੀ ਕਾਰਗੁਜ਼ਾਰੀ ਅਤੇ ਸਮਰਪਣ ਦੀ ਭਾਵਨਾ ਸਦਕਾ ਚਰਚਾ ਵਿੱਚ ਰਹਿੰਦੇ ਹਨ । ਡਾਕਟਰ ਔਲਖ ਦੀ ਰਹਿਨੁਮਾਈ ਹੇਠ ਬਰਨਾਲਾ ਜ਼ਿਲ੍ਹੇ ਨੇ ਸਿਹਤ ਸੇਵਾਵਾਂ ਦੇ ਖੇਤਰ ਵਿੱਚ ਸੂਬਾ ਪੱਧਰੀ ਮਾਣਮੱਤੀਆਂ ਪ੍ਰਾਪਤੀਆਂ ਕੀਤੀਆਂ ਹਨ । ਮਰੀਜ਼ਾਂ ਦੀ ਸਿਹਤ ਹੀ ਨਹੀਂ ਬਲਕਿ ਮਰੀਜ਼ਾਂ ਅਤੇ ਉਨ੍ਹਾਂ ਦੇ ਵਾਰਿਸਾਂ ਨੂੰ ਹਸਪਤਾਲ ਦੀ ਹਦੂਦ ਅੰਦਰ ਪੇਸ਼ ਆਉਣ ਵਾਲੀਆਂ ਮੁਸ਼ਕਲਾਂ ਦੇ ਹੱਲ ਲਈ ਡਾਕਟਰ ਔਲਖ ਨੇ ਹਸਪਤਾਲ ਅੰਦਰ ਵਹੀਕਲਾਂ ਦੀ ਪਾਰਕਿੰਗ ਦਾ ਵੱਖਰੇ ਤਰੀਕੇ ਨਾਲ ਨਿਰੀਖਣ ਕੀਤਾ।ਸਿਵਲ ਸਰਜਨ ਡਾਕਟਰ ਜਸਵੀਰ ਸਿੰਘ ਔਲਖ ਇੱਕਦਿਨ ਸ਼ਾਮ ਦੇ ਸਮੇਂ ਭੇਸ ਬਦਲ ਕੇ ਹਸਪਤਾਲ ਦੀ ਪਾਰਕਿੰਗ ਵਿੱਚ ਆਏ, ਜਿੱਥੇ ਪਾਰਕਿੰਗ ਦੇ ਸਟਾਫ ਨੇ ਸਿਵਲ ਸਰਜਨ ਦੀ ਮਿਥੇ ਰੇਟ ਤੋਂ ਜ਼ਿਆਦਾ ਪਰਚੀ ਕੱਟ ਦਿੱਤੀ । ਬਦਲੇ ਹੋਏ ਭੇਸ ਕਾਰਨ ਪਾਰਕਿੰਗ ਦਾ ਸਟਾਫ ਸਿਵਲ ਸਰਜਨ ਨੂੰ ਪਹਿਚਾਣ ਨਾ ਸਕਿਆ । ਤੈਅ ਰੇਟ ਤੋਂ ਵੱਧ ਪਰਚੀ ਕੱਟਣ ਕਰਕੇ ਸਿਵਲ ਸਰਜਨ ਨੇ ਸੀਨੀਅਰ ਮੈਡੀਕਲ ਅਫਸਰ ਨੂੰ ਪਾਰਕਿੰਗ ਠੇਕੇਦਾਰ ਵਿਰੁੱਧ ਕਾਰਵਾਈ ਲਈ ਪੱਤਰ ਜਾਰੀ ਕਰ ਦਿੱਤਾ । ਜ਼ਿਕਰਯੋਗ ਹੈ ਕਿ ਲੋਕਾਂ ਵੱਲੋਂ ਅਕਸਰ ਸ਼ਿਕਾਇਤਾਂ ਕੀਤੀਆਂ ਜਾਂਦੀਆਂ ਸਨ ਉਥੇ ਪਾਰਕਿੰਗ ਦੇ ਠੇਕੇਦਾਰ ਵੱਲੋਂ ਮਿਥੇ ਰੇਟ ਤੋਂ ਵੱਧ ਪਰਚੀ ਕੱਟੀ ਜਾਂਦੀ ਹੈ, ਇਨ੍ਹਾਂ ਸ਼ਿਕਾਇਤਾਂ ਦੀ ਪੜ੍ਹਤਾਲ ਸਿਵਲ ਸਰਜਨ ਨੇ ਆਪਣੇ ਹੀ ਤਰੀਕੇ ਨਾਲ ਕੀਤੀ ਅਤੇ ਗਲਤ ਪਾਏ ਜਾਣ ‘ਤੇ ਠੇਕੇਦਾਰ ਖ਼ਿਲਾਫ਼ ਕਾਰਵਾਈ ਲਈ ਲਿਖਿਆ ।
