-ਨਿਰਮਲ ਸਿੰਘ ਪੰਡੋਰੀ, ਬਰਨਾਲਾ,12 ਅਕਤੂਬਰ
ਸੱਤਾਧਾਰੀਆਂ ਲਈ ਨਗਰ ਕੌਂਸਲ ਬਰਨਾਲਾ ਦੇ ਖੱਟੇ ਅੰਗੂਰ ਮਿੱਠੇ ਹੁੰਦੇ ਜਾਪਦੇ ਨੇ,ਸਰਕਾਰ ਨੇ ਨਗਰ ਕੌਂਸਲ ਰੂਪੀ ਬਾਗ਼ ਦੇ ਮਾਲੀ ਨੂੰ ਘਰੇ ਤੋਰ ਦਿੱਤਾ.. ਇੱਧਰ ਝਾੜੂ ਉੱਚਾ ਕਰਕੇ ਕੌਣ ਗਾ ਰਿਹੈ “ਸੁੱਖਾਂ ਸੁੱਖਦੀ ਨੂੰ ਆਹ ਦਿਨ ਆਏ..ਮੁੰਡੇ ਦੀ ਮਾਂ ਨੱਚਦੀ ਫਿਰੇ”..ਮੌਜਾਂ ਲੱਗਣਗੀਆਂ, ਖਿੱਚ ਲਓ ਤਿਆਰੀਆਂ…ਕੱਸ ਲਵੋ ਲੰਗੋਟ, ਹਾਂ ਸੱਚ ! ਕੌਂਸਲਰਾਂ ਦੀ ਬਰਾਤ ਦਾ ਨਵਾਂ ਲਾੜਾ ਕੌਣ ਹੋਵੇਗਾ.. ਪਤਾ ਕਿਸੇ ਨੁੰ… ਲੈ ! ਪਤਾ ਵਾਲੀ ਕਿਹੜੀ ਗੱਲ ਆਂ,ਜੇ ਟਕਸਾਲੀਆਂ ਨੇ ਅੱਖਾਂ ਨਾ ਕੱਢੀਆਂ ਤਾਂ ਕੇਵਲ ਢਿੱਲੋਂ ਦੇ ਸੱਜੇ ਖੱਬਿਆਂ ਦੇ ਸਿਰ ‘ਤੇ ਸਿਹਰਾ ਸੱਜ ਸਕਦਾ ਹੈ,ਕੀ ਗੱਲਾਂ ਕਰਦੇ ਪਏ ਓ…ਟਕਸਾਲੀ ਅੱਖਾਂ ਕਿਉਂ ਨਾ ਕੱਢਣ, 2013 ਤੋਂ ਲੈ ਕੇ ਝਾੜੂ ਮਾਰਦੇ ਅਸੀਂ ਥੱਕ ਗਏ, ਘਰੇ ਜਵਾਕਾਂ ਦੀ ਮਾਂ ਨੂੰ ਕਦੇ ਝਾੜੂ ਮੁੱਲ ਲਿਆ ਕੇ ਵੀ ਨਹੀਂ ਦਿੱਤਾ, ਨਾ ਨਾ ਨਾ…ਆਟਾ ਗੁੰਨਣਾ ਤਾਂ ਦੂਰ ਕਦੇ ਆਟੇ ਨੂੰ ਹੱਥ ਤੱਕ ਵੀ ਨੀ ਲਾਇਆ, ਮੀਤ ਹੇਅਰ ਦੇ ਪੋਸਟਰ ਲਾਉਂਦਿਆਂ ਲੇਟੀ ਨਾਲ ਹੱਥ ਤਾਂ ਕੀ… ਝੱਗੇ ਵੀ ਲਿਬੇੜੇ ਆਂ, ਦੇਖਿਓ ! ਕਿਤੇ ਭਗਵੇਂ ਵਾਲੇ ਮੁੰਡੇ ਦੀ ਮਾਂ ਨੂੰ ਨੱਚਣੋਂ ਨਾ ਹਟਾ ਦੇਣ…ਲੋਕ ਸਭਾ ਦੀ ਚੋਣ ਪੰਗਾ ਨਾ ਪਾ ਦੇਵੇ ਕਿ “ਨੇਤਾ ਜੀ” ਸੋਚਣ ਲੱਗ ਪੈਣ, ਲੋਕ ਸਭਾ ਦੀ ਚੋਣ ਦਾ ਕੀ ਮਤਲਬ…ਮਤਲਬ ਕਿਉਂ ਨਹੀਂ…ਮਾਰਕੀਟ ਕਮੇਟੀ ਦੀ ਚੇਅਰਮੈਨੀ ਕਿਉਂ ਅੜੀ ਪਈ ਆਂ.. ਪਰ ਅਜੇ ਧਿਆਨ ਰੱਖਿਓ ਬਾਗ ਦਾ ਮਾਲੀ ਕਹਿੰਦਾ ਮੈਂ ਹਾਈਕੋਰਟ ਤੋਂ ਪਟੀਸ਼ਨ ਵਾਲੀ ਕੀਟਨਾਸ਼ਕ ਲੈ ਕੇ ਆਉਣਾ, ਅਸੀਂ ਆਪੇ ਦੇਖਾਂਗੇ ਕਿਹੜੇ ਫਲ ‘ਤੇ ਕਿੰਨੀ ਕੁ ਕਰਨੀ ਆ, ਨਾਲੇ ਐ ਕਿਵੇਂ ਬਣ ਜਾਣਗੇ ਉਜੜੇ ਬਾਗਾਂ ਦੇ ਗਾਲੜ ਪਟਵਾਰੀ, ਕਾਕੇ ਦੀ ਮਾਂ ਨੂੰ ਕਹੋ ਅਜੇ ਲੱਡੂ ਥਾਲੀ ਵਿੱਚ ਨਾ ਪਾਵੇ, ਲੰਗੋਟ ਦੀਆਂ ਲੜੀਆਂ ਢਿੱਲੀਆਂ ਰੱਖਿਓ, ਪੁਰਾਣੇ ਕਪਤਾਨ ਦੀ ਸਲਾਹ ਵੀ ਲੈ ਲਿਓ, ਜੇ ਸਮਾਗਮ ਵੱਡਾ ਹੋਵੇ ਸਿਆਣਿਆਂ ਦੀ ਸਲਾਹ ਲੈ ਲੈਣੀ ਚਾਹੀਦੀ ਆਂ, ਜੇ ਪੁਰਾਣਾ ਕਪਤਾਨ ਨਾ ਮੰਨੇ ਤਾਂ ਕੇਵਲ ਢਿੱਲੋਂ ਨੂੰ ਪੁੱਛ ਲਿਓ, ਹਰਜ਼ ਵੀ ਕੀ ਆਂ, ਬਾਗ ਸਾਡਾ ਅੰਗੂਰ ਸਾਡੇ, ਸੱਤਾ ਕਾਬਜੀ ਤੋਂ ਲੈ ਕੇ ਹੁਣ ਤੱਕ ਖੱਟੇ ਹੀ ਲੱਗੇ ਨੇ, ਮਿੱਠੇ ਕਰੋ ਜਿਵੇਂ ਮਰਜ਼ੀ ਕਰੋ, ਜੇ ਲਾਠੀ ਸਾਡੀ ਤਾਂ ਮੱਝ ਕਿਸੇ ਦੀ ਹੋਰ ਕਿਉਂ ਹੋਵੇ, ਕਹਾਵਤਾਂ ਭਲਾ ਕਦੇ ਝੂਠੀਆਂ ਹੋਈਆਂ ਨੇ, ਹਾਂ ਸੱਚ ! ਜਾਂਦਾ-ਜਾਂਦਾ ਬਿਨ ਮੰਗਿਆ ਸਲਾਹ ਦੇ ਜਾਵਾਂ, ਬੋਚ ਬੋਚ ਪੱਬ ਰੱਖਿਓ..ਕਿਤੇ ਝਾਂਜਰਾਂ ਨਾ ਟੁੱਟ ਜਾਣ,ਫੇਰ ਖਿਲਰੇ ਹੋਏ ਘੁੰਗਰੂ ਟਕਸਾਲੀਆਂ ਤੇ ਦਲ ਬਦਲੂਆਂ ‘ਚ ਕਿਵੇਂ ਵੰਡੋਗੇ…ਚੰਡੀਗੜ੍ਹ ਵਾਲੀ ਕੀਟਨਾਸ਼ਕ ਵੇਖ ਲਿਓ, ਕਿਹੜੀ ਕੰਪਨੀ ਦੀ ਆਂ..ਅੰਗੂਰ ਮਿੱਠੇ ਕਰਦੇ ਕਰਦੇ ਖ਼ਰਾਬ ਹੀ ਨਾ ਕਰ ਲਿਓ….!
