ਚੰਡੀਗੜ੍ਹ,6 ਜਨਵਰੀ-ਪੰਜਾਬ ਸਕੂਲ ਸਿੱਖਿਆ ਬੋਰਡ ਨੇ ਨਵੇਂ ਅਕਾਦਮਿਕ ਸਾਲ ਤੋਂ ਪ੍ਰੀਖਿਆਰਥੀਆਂ ਨੂੰ ਦਿੱਤੀ ਜਾਂਦੀ ਮੁੜ ਮੁਲਾਂਕਣ ਸਹੂਲਤ ਬੰਦ ਕਰ ਦਿੱਤੀ ਹੈ। ਇਹ ਫ਼ੈਸਲਾ ਚੇਅਰਪਰਸਨ ਸਤਬੀਰ ਕੌਰ ਬੇਦੀ ਦੀ ਅਗਵਾਈ ਵਾਲੇ ਬੋਰਡ ਆਫ ਡਾਇਰੈਕਟਰਜ਼ ਦੀ ਬੈਠਕ ‘ਚ ਲਿਆ ਗਿਆ ਹੈ। ਬੋਰਡ ਅਧਿਕਾਰੀਆਂ ਦੀ ਦਲੀਲ ਹੈ ਕਿ ਇਸ ਨਾਲ ਨਤੀਜਾ ਐਲਾਨਣ ‘ਚ ਦੇਰੀ ਹੁੰਦੀ ਹੈ। ਇਸਦੇ ਨਾਲ ਹੀ ਉੱਤਰ ਪੱਤਰੀ ਦੀ ਮੁੜ-ਚੈਕਿੰਗ ਦੀ ਸਹੂਲਤ ਪਹਿਲਾਂ ਵਾਂਗ ਚਾਲੂ ਰਹੇਗੀ। ਦੱਸਣਯੋਗ ਹੈ ਕਿ ਪ੍ਰੀਖਿਆਰਥੀ ਵੱਲੋਂ ਬੇਨਤੀ ਕੀਤੇ ਜਾਣ ’ਤੇ ਮੁੜ ਮੁਲਾਂਕਣ ’ਚ ਪ੍ਰੀਖਿਆਰਥੀ ਦੀ ਉੱਤਰ-ਪੱਤਰੀ ਦੀ ਕਿਸੇ ਹੋਰ ਪ੍ਰੀਖਿਅਕ ਕੋਲੋਂ ਦੁਬਾਰਾ ਮਾਰਕਿੰਗ ਕਰਵਾਈ ਜਾਂਦੀ ਸੀ। ਦੂਜੇ ਪ੍ਰੀਖਿਅਕ ਨੂੰ ਉੱਤਰ ਕਾਪੀ ਦੇਣ ਤੋਂ ਪਹਿਲਾਂ ਇਸ ’ਤੇ ਪਹਿਲਾਂ ਦਿੱਤੇ ਗਏ ਨੰਬਰ ਟੇਪ ਲਗਾ ਕੇ ਲੁਕਾ ਦਿੱਤੇ ਜਾਂਦੇ ਹਨ। ਜਦਕਿ ਰੀ-ਚੈਕਿੰਗ ’ਚ ਸਿਰਫ਼ ਨੰਬਰਾਂ ਦਾ ਕੁੱਲ ਜੋੜ ਹੀ ਜਾਂਚਿਆਂ ਜਾਂਦਾ ਹੈ। ਬੋਰਡ ਨੇ ਆਪਣੇ ਅਧੀਨ ਚੱਲਦੇ 11 ਆਦਰਸ਼ ਸੀਨੀਅਰ ਸੈਕੰਡਰੀ ਸਕੂਲਾਂ ਦੀਆਂ ਸਰਗਰਮੀਆਂ, ਬੁਨਿਆਦੀ ਢਾਂਚੇ, ਵਿੱਤੀ ਸੁਧਾਰ ਤੇ ਟੀਚਰ ਟ੍ਰੇਨਿੰਗ ਆਦਿ ਸਬੰਧੀ ਫੈਸਲਾ ਕੀਤਾ ਹੈ ਕਿ ਇਨ੍ਹਾਂ ਸਕੂਲਾਂ ਦੀ ਕਾਰਜ ਪ੍ਰਣਾਲੀ ’ਚ ਇਕਸਾਰਤਾ ਲਿਆਉਣ ਦੇ ਉਦੇਸ਼ ਨਾਲ ਸਕੂਲਾਂ ’ਚ ਪੜ੍ਹਦੇ ਵਿਦਿਆਰਥੀਆਂ ਦੀਆਂ ਵਰਦੀਆਂ, ਸਵੇਰ ਦੀ ਅਸੈਂਬਲੀ ’ਚ ਕੀਤੀ ਜਾਣ ਵਾਲੀ ਪ੍ਰਾਰਥਨਾ, ਸਕੂਲ ਗੀਤ ਤੇ ਲੋਗੋ ਅਤੇ ਸਮਾਂ ਸਾਰਣੀ ’ਚ ਸਮਾਨਤਾ ਲਿਆਂਦੀ ਜਾਵੇਗੀ। ਇਸ ਤੋਂ ਇਲਾਵਾ ਇਨ੍ਹਾਂ ਸਕੂਲਾਂ ਦੀ ਵੱਖਰੀ ਵੈੱਬਸਾਈਟ ਹੋਵੇਗੀ ਜਿਹੜੀ ਬੋਰਡ ਦੀ ਵੈੱਬਸਾਈਟ ਨਾਲ ਲਿੰਕ ਹੋਵੇਗੀ।