ਚੰਡੀਗੜ੍ਹ,9 ਜਨਵਰੀ-ਅਕਸਰ ਰਾਜਨੀਤਿਕ ਪਾਰਟੀਆਂ ਸੱਤਾ ਦੇ ਸਰੂਰ ਵਿੱਚ ਕਾਨੂੰਨ ਨੂੰ ਟਿੱਚ ਕਰਕੇ ਜਾਣਦੀਆਂ ਨੇ ਪਰ ਲੋਕਾਂ ਦੀ ਅਦਾਲਤ ਰਾਜਨੀਤਿਕ ਪਾਰਟੀਆਂ ਨੂੰ ਟਿਕਾਣੇ ਲਿਆ ਕੇ ਰੱਖਦੀ ਹੈ। ਕੇਂਦਰ ਵਿੱਚ ਸੱਤਾ ‘ਤੇ ਕਾਬਜ਼ ਭਾਰਤੀ ਜਨਤਾ ਪਾਰਟੀ ਨੂੰ ਰਾਜਸਥਾਨ ਦੇ ਲੋਕਾਂ ਨੇ ਅਜਿਹਾ ਸਬਕ ਸਿਖਾਇਆ ਕਿ ਹੋਰ ਰਾਜਨੀਤਿਕ ਪਾਰਟੀਆਂ ਵੀ ਭਵਿੱਖ ਦੇ ਵਿੱਚ ਸ਼ਾਇਦ ਹੀ ਅਜਿਹੀ ਗਲਤੀ ਕਰਨਗੀਆਂ ਜਿਹੜੀ ਭਾਜਪਾ ਨੇ ਸੱਤਾ ਦੇ ਸਰੂਰ ਵਿੱਚ ਰਾਜਸਥਾਨ ਵਿੱਚ ਕੀਤੀ। ਰਾਜਸਥਾਨ ਦੇ ਸ਼੍ਰੀਕਰਨਪੁਰ ਵਿਧਾਨ ਸਭਾ ਹਲਕੇ ਦੇ ਲੋਕਾਂ ਨੇ ਭਾਜਪਾ ਦੇ ਉਮੀਦਵਾਰ ਸੁਰਿੰਦਰਪਾਲ ਸਿੰਘ ਟੀਟੀ ਨੂੰ 11000 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਭਾਜਪਾ ਉਮੀਦਵਾਰ ਸੁਰਿੰਦਰਪਾਲ ਸਿੰਘ ਟੀਟੀ ਨੂੰ ਕਾਂਗਰਸ ਦੇ ਰੁਪਿੰਦਰ ਸਿੰਘ ਨੇ ਹਰਾਇਆ। ਦਰਅਸਲ ਪਿਛਲੇ ਮਹੀਨੇ ‘ਚ ਹੋਈਆਂ ਚੋਣਾਂ ਵਿੱਚ ਭਾਜਪਾ ਨੇ ਰਾਜਸਥਾਨ ਵਿੱਚ ਬਹੁਮਤ ਨਾਲ ਸਰਕਾਰ ਬਣਾਈ ਅਤੇ ਸੁਰਿੰਦਰਪਾਲ ਸਿੰਘ ਨੂੰ ਮੰਤਰੀ ਮੰਡਲ ਵਿੱਚ ਮੰਤਰੀ ਬਣਾ ਦਿੱਤਾ ਜਦਕਿ ਉਹ ਵਿਧਾਇਕ ਵੀ ਨਹੀਂ ਸਨ, ਸੁਰਿੰਦਰਪਾਲ ਸਿੰਘ ਨੂੰ 8 ਕੁ ਦਿਨ ਹੀ ਮੰਤਰੀ ਬਣੇ ਹੋਏ ਸਨ ਤੇ ਉਹਨਾਂ ਨੇ ਆਪਣਾ ਕਾਰਜਭਾਰ ਵੀ ਨਹੀਂ ਸੰਭਾਲਿਆ ਸੀ ਪਰ ਸ੍ਰੀ ਕਰਨਪੁਰ ਵਿਧਾਨ ਸਭਾ ਹਲਕੇ ਦੇ ਲੋਕਾਂ ਨੇ ਉਹਨਾਂ ਦੀ ਕਾਰ ਤੋਂ ਝੰਡੀ ਉਤਾਰ ਦਿੱਤੀ। ਰਾਜਸਥਾਨ ‘ਚ ਭਾਜਪਾ ਵੱਲੋਂ ਮੰਤਰੀ ਮੰਡਲ ਦੇ ਗਠਨ ਸਮੇਂ ਸੁਰਿੰਦਰਪਾਲ ਸਿੰਘ ਨੂੰ ਮੰਤਰੀ ਬਣਾਉਣ ਸਮੇਂ ਪਾਰਟੀ ਦੇ ਅੰਦਰ ਅਤੇ ਬਾਹਰ ਚਰਚਾ ਹੋਈ ਸੀ, ਸ਼ਾਇਦ ਇਸੇ ਚਰਚਾ ਨੇ ਸ਼੍ਰੀਕਰਨਪੁਰ ਵਿਧਾਨ ਸਭਾ ਹਲਕੇ ਦੇ ਲੋਕਾਂ ਨੂੰ ਮਾਨਸਿਕ ਤੌਰ ‘ਤੇ ਤਿਆਰ ਕੀਤਾ ਕਿ ਉਹ ਰਾਜਨੀਤਿਕ ਪਾਰਟੀਆਂ ਨੂੰ ਇਹ ਦੱਸਣ ਕਿ ਸੱਤਾ ਦੀ ਤਾਕਤ ਤੋਂ ਜ਼ਿਆਦਾ ਲੋਕਾਂ ਦੀ ਤਾਕਤ ਮਾਇਨੇ ਰੱਖਦੀ ਹੈ। ਭਾਜਪਾ ਵੱਲੋਂ ਬਿਨਾਂ ਵਿਧਾਇਕੀ ਤੋਂ ਕਿਸੇ ਵਿਧਾਇਕ ਨੂੰ ਮੰਤਰੀ ਬਣਾਏ ਜਾਣ ‘ਤੇ ਸ੍ਰੀਕਰਨਪੁਰ ਵਿਧਾਨ ਸਭਾ ਹਲਕੇ ਦੇ ਲੋਕਾਂ ਨੇ ਇੱਕ ਚੈਲਿੰਜ ਵਜੋਂ ਲਿਆ । ਦਰਅਸਲ ਰਾਜਸਥਾਨ ‘ਚ ਵਿਧਾਨ ਸਭਾ ਚੋਣਾਂ ਸਮੇਂ ਸ੍ਰੀਕਰਨਪੁਰ ਵਿਧਾਨ ਸਭਾ ਹਲਕੇ ਤੋਂ ਕਾਂਗਰਸ ਦੇ ਉਮੀਦਵਾਰ ਦੀ ਮੌਤ ਹੋ ਜਾਣ ਕਾਰਨ ਚੋਣ ਰੱਦ ਹੋ ਗਈ ਸੀ। ਭਾਜਪਾ ਨੇ ਸੋਚਿਆ ਕਿ ਇਸ ਹਲਕੇ ਤੋਂ ਸੁਰਿੰਦਰਪਾਲ ਸਿੰਘ ਨੂੰ ਜਿਤਾ ਲਿਆ ਜਾਵੇਗਾ, ਪ੍ਰੰਤੂ ਲੋਕਾਂ ਨੇ ਭਾਜਪਾ ਦੀ ਇਹ ਸੋਚ ਬਦਲ ਦਿੱਤੀ ਤੇ ਭਾਜਪਾ ਨੂੰ ਰਾਜਸਥਾਨ ਵਿੱਚ ਸਰਕਾਰ ਬਣਾਉਣ ਦੀ ਜਿੱਤ ਦੇ ਸਰੂਰ ਤੋਂ ਬਾਅਦ ਇੱਕ ਵੱਡੀ ਸਿਆਸੀ ਕਿਰਕਰੀ ਦਾ ਸਾਹਮਣਾ ਕਰਨਾ ਪਿਆ।