- ਵਿਸ਼ੇਸ਼ ਰਿਪੋਰਟ
ਮਹਿਲ ਕਲਾਂ 30 ਜਨਵਰੀ ( ਜਸਵੰਤ ਸਿੰਘ ਲਾਲੀ )- ਜੇਕਰ ਇਨਸਾਨ ਵਿੱਚ ਕੁਝ ਕਰਨ ਦਾ ਜਜ਼ਬਾ ਹੋਵੇ ਤਾਂ ਔਖੀ ਤੋਂ ਔਖੀ ਮੰਜ਼ਿਲ ਵੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਸਮਾਜ ਵਿੱਚ ਬਹੁਤ ਸਾਰੀਆਂ ਅਜਿਹੀਆਂ ਪ੍ਰਾਪਤੀਆਂ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ ਜਿਹੜੀਆਂ ਇਸ ਕਹਾਵਤ ਨੂੰ ਬਾਖ਼ੂਬੀ ਸਿੱਧ ਕਰਦੀਆਂ ਨੇ ਕਿ ਬੇਹਿੰਮਤੇ ਲੋਕ ਹੀ ਆਪਣੇ ਮੁਕੱਦਰਾਂ ਨਾਲ ਸ਼ਿਕਵਾ ਕਰਦੇ ਰਹਿੰਦੇ ਨੇ ਪਰੰਤੂ ਜਿਨਾਂ ਵਿੱਚ ਕੁਝ ਕਰਨ ਦਾ ਜੋਸ਼ ਹੋਵੇ ਉਹ ਪੱਥਰਾਂ ਦੀ ਹਿਕ ਚੀਰ ਕੇ ਵੀ ਉੱਗ ਪੈਂਦੇ ਹਨ। ਅਜਿਹੀ ਇੱਕ ਮਿਸਾਲ ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਲਤਾਲਾ ਦੀ ਵਸਨੀਕ ਜਗਦੇਵ ਕੌਰ ਨੇ ਪੈਦਾ ਕੀਤੀ ਹੈ। ਜਗਦੇਵ ਕੌਰ ਨੇ 47 ਸਾਲ ਦੀ ਉਮਰ ਵਿੱਚ ਡਬਲ ਐਮਏ ਤੱਕ ਪੜ੍ਹਾਈ ਕਰਕੇ ਜਿੱਥੇ ਵਿਆਹ ਤੋਂ ਪਹਿਲਾਂ ਪੜ੍ਹਾਈ ਕਰਨ ਦਾ ਆਪਣਾ ਅਧੂਰਾ ਸੁਪਨਾ ਪੂਰਾ ਕੀਤਾ ਉਥੇ ਹੀ ਇਸ ਧਾਰਨਾ ਨੂੰ ਹੋਰ ਵੀ ਪ੍ਰਤੱਖ ਕੀਤਾ ਹੈ ਕਿ ਪੜ੍ਨ ਲਿਖਣ ਸਿੱਖਣ ਦੀ ਕੋਈ ਉਮਰ ਨਹੀਂ ਹੁੰਦੀ। ਸਾਲ 1975 ਨੂੰ ਸੂਬੇਦਾਰ ਜਰਨੈਲ ਸਿੰਘ ਦੇ ਘਰ ਮਾਤਾ ਹਰਭਜਨ ਕੌਰ ਦੀ ਕੁੱਖੋਂ ਪਿੰਡ ਖੰਡੂਰ ( ਲੁਧਿਆਣਾ ) ਵਿਖੇ ਜਨਮੀ ਜਗਦੇਵ ਕੌਰ ਨੇ ਦੱਸਿਆ ਕਿ ਤਿੰਨ ਭੈਣ ਭਰਾਵਾਂ ਵਿੱਚੋਂ ਸਭ ਤੋਂ ਵੱਡੀ ਹੋਣ ਕਰਕੇ ਉਹ ਆਪਣੀ ਪੜ੍ਹਾਈ ਦਾ ਸੁਪਨਾ ਘਰੇਲੂ ਜ਼ਿੰਮੇਵਾਰੀਆਂ ਕਾਰਨ ਪੂਰਾ ਨਾ ਕਰ ਸਕੀ। ਸਾਲ 1994 ਵਿੱਚ ਉਸਦਾ ਵਿਆਹ ਸਹਾਇਕ ਥਾਣੇਦਾਰ ਕੁਲਵੰਤ ਸਿੰਘ ਲਤਾਲਾ ਨਾਲ ਹੋਇਆ ਅਤੇ ਉਸਦੇ ਘਰ ਦੋ ਪੁੱਤਰਾਂ ਲਵਦੀਪ ਸਿੰਘ ਅਤੇ ਹਰਦੀਪ ਸਿੰਘ ਨੇ ਜਨਮ ਲਿਆ। ਜਗਦੇਵ ਕੌਰ ਦੀ ਉੱਚ ਵਿੱਦਿਆ ਪ੍ਰਾਪਤ ਕਰਨ ਦੀ ਅਧੂਰੀ ਖਾਹਿਸ਼ ਦਾ ਉਸਦੇ ਪ੍ਰਤੀ ਕੁਲਵੰਤ ਸਿੰਘ ਨੂੰ ਵੀ ਵਿਆਹ ਤੋਂ ਬਾਅਦ ਪਤਾ ਲੱਗ ਚੁੱਕਿਆ ਸੀ ਅਤੇ ਹੌਲੀ ਹੌਲੀ ਇਹ ਖਾਹਿਸ਼ ਉਸਦੇ ਪੁੱਤਰਾਂ ਦੇ ਕੰਨਾਂ ਤੱਕ ਵੀ ਜਾ ਪੁੱਜੀ। ਪਤੀ ਨੇ ਆਪਣੀ ਹਮਸਫ਼ਰ ਅਤੇ ਪੁੱਤਰਾਂ ਨੇ ਆਪਣੀ ਮਾਤਾ ਨੂੰ ਉੱਚ ਵਿਦਿਆ ਪ੍ਰਾਪਤ ਕਰਨ ਦਾ ਸੁਪਨਾ ਪੂਰਾ ਕਰਨ ਲਈ ਪ੍ਰੇਰਿਤ ਕੀਤਾ ਜਿਸ ਤੋਂ ਬਾਅਦ ਜਗਦੇਵ ਕੌਰ ਨੇ ਆਪਣੇ ਬੇਟੇ ਹਰਦੀਪ ਸਿੰਘ ਦੇ ਨਾਲ 2013 ਵਿੱਚ ਦਸਵੀਂ ਦੀ ਪ੍ਰੀਖਿਆ ਦਿੱਤੀ ਅਤੇ ਚੰਗੇ ਅੰਕਾਂ ਨਾਲ ਪਾਸ ਵੀ ਕੀਤੀ, ਉਸ ਤੋਂ ਬਾਅਦ ਜਗਦੇਵ ਕੌਰ ਦੇ ਹੌਂਸਲੇ ਨੂੰ ਖੰਭ ਲੱਗੇ ਅਤੇ ਉਸਨੇ ਬਾਰਵੀਂ ਦੀ ਪ੍ਰੀਖਿਆ ਵੀ ਚੰਗੇ ਅੰਕਾਂ ਨਾਲ ਪਾਸ ਕਰਕੇ ਗ੍ਰੈਜੂਏਸ਼ਨ ਵੀ ਪਾਸ ਕਰ ਲਈ। ਵਿੱਦਿਆ ਦੇ ਖੇਤਰ ‘ਚ ਪ੍ਰਾਪਤੀਆਂ ਤੋਂ ਉਤਸ਼ਾਹਿਤ ਹੋ ਕੇ ਜਗਦੇਵ ਕੌਰ ਨੇ ਐਮਏ ਹਿਸਟਰੀ ਅਤੇ ਐਮਏ ਸੋਸੋਲੌਜੀ ਦੀਆਂ ਡਿਗਰੀਆਂ ਵੀ ਆਪਣੇ ਹੱਥਾਂ ਵਿੱਚ ਕਰ ਲਈਆਂ। ਆਪਣੀ ਇਸ ਪ੍ਰਾਪਤੀ ‘ਤੇ ਬਾਗੋਬਾਗ ਜਗਦੇਵ ਕੌਰ ਨੇ ਘਰੇਲੂ ਜਿੰਮੇਵਾਰੀਆਂ ਦੇ ਭਾਰ ਹੇਠਾਂ ਸੁਪਨਿਆਂ ਨੂੰ ਦੱਬਣ ਵਾਲੀਆਂ ਮਹਿਲਾਵਾਂ ਨੂੰ ਕਿਹਾ ਕਿ ਹਿੰਮਤ ਨਾਲ ਵੱਡੇ ਤੋਂ ਵੱਡੇ ਅਧੂਰੇ ਸੁਪਨੇ ਵੀ ਪੂਰੇ ਕੀਤੇ ਜਾ ਸਕਦੇ ਹਨ। ਜਗਦੇਵ ਕੌਰ ਨੇ ਉੱਚ ਵਿੱਦਿਆ ਪ੍ਰਾਪਤ ਕਰਨ ਦੇ ਆਪਣੇ ਸੁਪਨੇ ਦੀ ਪੂਰਤੀ ਦਾ ਸਿਹਰਾ ਆਪਣੇ ਪਤੀ ਕੁਲਵੰਤ ਸਿੰਘ ਅਤੇ ਬੇਟੇ ਲਵਦੀਪ ਸਿੰਘ ਅਤੇ ਐਡਵੋਕੇਟ ਹਰਦੀਪ ਸਿੰਘ ਨੂੰ ਦਿੱਤਾ ਜਿਨਾਂ ਦੀ ਹੱਲਾਸ਼ੇਰੀ ਨੇ ਉਸ ਦੀ ਅੱਖਰਾਂ ਵਿੱਚ ਰੁਚੀ ਪੈਦਾ ਕੀਤੀ।
Menu
