ਬਰਨਾਲਾ,5 ਫਰਵਰੀ, ਨਿਰਮਲ ਸਿੰਘ ਪੰਡੋਰੀ
ਨਗਰ ਕੌਸਲ ਬਰਨਾਲਾ ਵੱਲੋਂ ਹੰਡਿਆਇਆ ਵਿਖੇ ਤਜਵੀਜ਼ਤ ਸਰਕਾਰੀ ਸੁਪਰ ਮਲਟੀਸਪੈਸ਼ਲਿਟੀ ਹਸਪਤਾਲ ਐਂਡ ਟਰਾਮਾ ਸੈਂਟਰ ਦਾ ਮੰਤਵ ਬਦਲੇ ਜਾਣ ਦੀ ਚਰਚਾ ਨੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਵੱਲੋਂ ਲੋਕਾਂ ਨੂੰ ਉੱਚ ਕੋਟੀ ਦੀਆਂ ਸਿਹਤ ਸਹੂਲਤਾਂ ਦੇਣ ਦੇ ਦਾਅਵਿਆਂ ਦੀ ਫੂਕ ਕੱਢ ਦਿੱਤੀ। ਨਗਰ ਕੌਂਸਲ ਵੱਲੋਂ ਇਸ ਹਸਪਤਾਲ ਲਈ ਰਾਖਵੀਂ ਰੱਖੀ ਜਗ੍ਹਾ ਨੂੰ ਖੇਡ ਸਟੇਡੀਅਮ ਵਾਸਤੇ ਤਬਦੀਲ ਕਰਨ ਦੇ ਯਤਨ ਸ਼ੁਰੂ ਕਰ ਦਿੱਤੇ ਗਏ ਹਨ। ਹੈਰਾਨੀ ਇਸ ਗੱਲ ਦੀ ਹੈ ਕਿ ਇਹ ਲੋਕ ਵਿਰੋਧੀ ਯਤਨ ਨੇਤਾ ਜੀ ਦੀ ਪਹਿਲ ‘ਤੇ ਸ਼ੁਰੂ ਕੀਤੇ ਗਏ ਹਨ। ਦਰਅਸਲ ! ਨੇਤਾ ਜੀ ਇਸ ਜਗ੍ਹਾ ‘ਤੇ ਚੰਗੀਆਂ ਸਹੂਲਤਾਂ ਵਾਲਾ ਖੇਡ ਸਟੇਡੀਅਮ ਬਣਾਉਣਾ ਚਾਹੁੰਦੇ ਹਨ ਅਤੇ ਇਸ ਮਾਮਲੇ ਵਿੱਚ ਡਿਪਟੀ ਕਮਿਸ਼ਨਰ ਨੂੰ ਹੁਕਮ ਦਿੱਤਾ ਅਤੇ ਡਿਪਟੀ ਕਮਿਸ਼ਨਰ ਨੇ ਸਿਹਤ ਵਿਭਾਗ ਤੋਂ ਹਸਪਤਾਲ ਬਣਾਉਣ ਸਬੰਧੀ ਸਟੇਟਸ ਰਿਪੋਰਟ ਪ੍ਰਾਪਤ ਕਰਕੇ ਨਗਰ ਕੌਂਸਲ ਨੂੰ ਇਸ ਜਗ੍ਹਾ ਦਾ ਮੰਤਵ ਚੇਂਜ ਕਰਨ ਸਬੰਧੀ ਮੀਟਿੰਗ ਵਿੱਚ ਵਿਚਾਰ ਕਰਨ ਦੇ ਹੁਕਮ ਵੀ ਦੇ ਦਿੱਤੇ। ਹੈਰਾਨੀ ਇਸ ਗੱਲ ਦੀ ਹੈ ਕਿ ਇਹ ਸਾਰੀ ਕਾਰਵਾਈ ਇੱਕੋ ਦਿਨ 1 ਫਰਵਰੀ 2024 ਨੂੰ ਹੀ ਮੁਕੰਮਲ ਕੀਤੀ ਗਈ ਭਾਵ ਕਿ 1 ਫਰਵਰੀ ਨੂੰ ਡੀਸੀ ਦਫਤਰ ਬਰਨਾਲਾ ਨੇ ਸਿਹਤ ਵਿਭਾਗ ਤੋਂ ਉਕਤ ਹਸਪਤਾਲ ਬਣਾਉਣ ਸਬੰਧੀ ਸਟੇਟਸ ਰਿਪੋਰਟ ਮੰਗੀ ਅਤੇ 1 ਫਰਵਰੀ ਨੂੰ ਹੀ ਸਿਹਤ ਵਿਭਾਗ ਨੇ ਡੀਸੀ ਦਫਤਰ ਬਰਨਾਲਾ ਨੂੰ ਸਟੇਟਸ ਰਿਪੋਰਟ ਦੇ ਦਿੱਤੀ ਅਤੇ ਫਿਰ 1 ਫਰਵਰੀ ਨੂੰ ਹੀ ਡੀਸੀ ਦਫਤਰ ਬਰਨਾਲਾ ਨੇ ਨਗਰ ਕੌਂਸਲ ਬਰਨਾਲਾ ਨੂੰ ਉਕਤ ਹਸਪਤਾਲ ਵਾਲੀ ਜ਼ਮੀਨ ਉੱਪਰ ਖੇਡ ਸਟੇਡੀਅਮ ਬਣਾਉਣ ਲਈ ਇਹ ਜ਼ਮੀਨ ਵਾਪਸ ਲੈਣ ਸਬੰਧੀ ਨਗਰ ਕੌਂਸਲ ਦੀ ਮੀਟਿੰਗ ਵਿੱਚ ਮਤਾ ਪਾਸ ਕਰਵਾਉਣ ਸਬੰਧੀ ਹੁਕਮ ਦੇ ਦਿੱਤੇ ਗਏ। ਹੁਣ 5 ਫਰਵਰੀ ਨਗਰ ਕੌਂਸਲ ਦੇ ਹਾਊਸ ਦੀ ਮੀਟਿੰਗ ਵਿੱਚ ਇਹ ਏਜੰਡਾ ਮੁੱਖ ਤੌਰ ‘ਤੇ ਰੱਖਿਆ ਗਿਆ ਹੈ ਕਿ ਹੰਡਿਆਇਆ ਦੀ ਉਕਤ ਜ਼ਮੀਨ ‘ਤੇ ਹਸਪਤਾਲ ਦੀ ਜਗ੍ਹਾ ਖੇਡ ਸਟੇਡੀਅਮ ਬਣਾਇਆ ਜਾਵੇ। ਇਹ ਸਮਝ ਤੋਂ ਪਰ੍ਹੇ ਹੈ ਕਿ ਲੋਕਾਂ ਦੀ ਸਿਹਤ ਨਾਲ ਸਿੱਧੇ ਤੌਰ ‘ਤੇ ਜੁੜੇ ਇਸ ਮੁੱਦੇ ਨੂੰ ਜੜ੍ਹੋਂ ਹੀ ਖਤਮ ਕਿਉਂ ਕੀਤਾ ਜਾ ਰਿਹਾ ਹੈ ਕਿਉਂਕਿ ਜੇਕਰ ਜ਼ਮੀਨ ਸਿਹਤ ਵਿਭਾਗ ਦੇ ਨਾਮ ਰਹੇਗੀ ਤਾਂ ਆਉਣ ਵਾਲੇ ਸਮੇਂ ਵਿੱਚ ਕਿਸੇ ਵੇਲੇ ਵੀ ਹਸਪਤਾਲ ਬਣਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਜਾ ਸਕਦੀ ਹੈ ਪ੍ਰੰਤੂ “ਨਾ ਰਹੇਗਾ ਬਾਂਸ ਨਾ ਵੱਜੇਗੀ ਬੰਸਰੀ” ਦੀ ਕਹਾਵਤ ਅਨੁਸਾਰ ਜੇਕਰ ਉਕਤ ਜ਼ਮੀਨ ਸਿਹਤ ਵਿਭਾਗ ਤੋਂ ਵਾਪਸ ਲੈ ਕੇ ਖੇਡ ਵਿਭਾਗ ਨੂੰ ਦੇ ਦਿੱਤੀ ਗਈ ਤਾਂ ਆਉਣ ਵਾਲੇ ਸਮੇਂ ‘ਚ ਬਰਨਾਲਾ ਵਿਖੇ ਉੱਚ ਕੋਟੀ ਦੀ ਸਿਹਤ ਸੰਸਥਾ ਬਨਣ ਦਾ ਮੁੱਦਾ ਬਿਲਕੁਲ ਖਤਮ ਹੋ ਜਾਵੇਗਾ । ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਸਥਾਨਕ ਸੱਤਾਧਾਰੀ ਆਗੂ ਇਹ ਬਾਖ਼ੂਬੀ ਜਾਣਦੇ ਹਨ ਕਿ ਬਰਨਾਲਾ ਦਾ ਸਿਵਲ ਹਸਪਤਾਲ ਰੈਫਰਲ ਹਸਪਤਾਲ ਬਣ ਚੁੱਕਿਆ ਹੈ ਜਿੱਥੇ ਸਿਹਤ ਸਹੂਲਤਾਂ ਨਾਮਾਤਰ ਹਨ, ਫਿਰ ਇੱਕ ਉੱਚ ਕੋਟੀ ਦੀ ਸਿਹਤ ਸੰਸਥਾ ਦੀ ਸਥਾਪਨਾ ਕਰਨ ਦੀ ਬਜਾਏ ਉਸ ਨਾਲ ਜੁੜਿਆ ਮੁੱਦਾ ਹੀ ਖਤਮ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ। ਹਾਲਾਂਕਿ ਇਹ ਹਰ ਕੋਈ ਜਾਣਦਾ ਹੈ ਕਿ ਖੇਡ ਸਟੇਡੀਅਮ ਵਿੱਚ ਵੀ ਬੰਦਾ ਫੇਰ ਹੀ ਜਾਵੇਗਾ ਜੇਕਰ ਉਸਦੀ ਸਿਹਤ ਇਜਾਜ਼ਤ ਦੇਵੇਗੀ, ਖੇਡਾਂ ਖੇਡਣ ਲਈ ਤੰਦਰੁਸਤੀ ਜ਼ਰੂਰੀ ਹੈ ਤੇ ਤੰਦਰੁਸਤੀ ਦੇ ਲਈ ਚੰਗੀ ਸਿਹਤ ਜ਼ਰੂਰੀ ਹੈ, ਚੰਗੀ ਸਿਹਤ ਲਈ ਹਰ ਇੱਕ ਵਿਅਕਤੀ ਨੂੰ ਘਰ ਦੇ ਨੇੜੇ ਚੰਗੀਆਂ ਸਿਹਤ ਸਹੂਲਤਾਂ ਮਿਲਣੀਆਂ ਜ਼ਰੂਰੀ ਹਨ। ਇੱਥੇ ਇਹ ਵੀ ਦੱਸਣਯੋਗ ਹੈ ਕਿ ਅਜੇ ਕੁਝ ਦਿਨ ਪਹਿਲਾਂ ਸੰਘੇੜਾ ਵਿਖੇ 45 ਲੱਖ ਦੀ ਲਾਗਤ ਨਾਲ ਉੱਚ ਕੋਟੀ ਦੀ ਖੇਡ ਸੰਸਥਾ ਬਣਾਉਣ ਦਾ ਆਗਾਜ਼ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ ਸ਼ਹਿਰ ਵਿੱਚ ਪਹਿਲਾਂ ਹੀ ਬਾਬਾ ਕਾਲਾ ਮਹਿਰ ਸਟੇਡੀਅਮ ਬਣਿਆ ਹੋਇਆ ਹੈ ਜਿਸ ਨੂੰ ਹੋਰ ਉੱਚ ਪੱਧਰ ਤੱਕ ਵੀ ਅਪਗ੍ਰੇਡ ਕੀਤਾ ਜਾ ਸਕਦਾ ਹੈ ਫਿਰ ਵੀ ਸਮਝ ਤੋਂ ਪਰ੍ਹੇ ਹੈ ਕਿ ਗਰੀਬ ਅਤੇ ਲੋੜਵੰਦ ਲੋਕਾਂ ਲਈ ਇੱਕ ਉੱਚ ਕੋਟੀ ਦੀ ਸਿਹਤ ਸੰਸਥਾ ਦੀ ਸਥਾਪਨਾ ਦੇ ਸੁਪਨੇ ਨੂੰ ਮੂਲੋਂ ਹੀ ਖਤਮ ਕੀਤਾ ਜਾ ਰਿਹਾ ਹੈ। ਇਸ ਮਾਮਲੇ ਵਿੱਚ ਲੋਕਾਂ ਦੀਆਂ ਨਜ਼ਰਾਂ ਬਰਨਾਲਾ ਦੇ ਕੌਂਸਲਰਾਂ ਵੱਲ ਵੀ ਟਿਕ ਗਈਆਂ ਹਨ, ਭਾਵੇਂ ਕਿ ਨਗਰ ਕੌਂਸਲ ਦੀ ਅੱਜ ਦੀ ਮੀਟਿੰਗ ਵਿੱਚ ਇਹ ਏਜੰਡਾ ਉਪਰਲੇ ਹੁਕਮਾਂ ਤਹਿਤ ਹੀ ਲਿਆਂਦਾ ਜਾ ਰਿਹਾ ਪ੍ਰੰਤੂ ਜੇਕਰ ਹਸਪਤਾਲ ਦੀ ਜਗ੍ਹਾ ਖੇਡ ਵਿਭਾਗ ਨੂੰ ਤਬਦੀਲ ਕਰਨ ਸਬੰਧੀ ਮਤਾ ਪਾਸ ਕੀਤਾ ਜਾਂਦਾ ਹੈ ਤਾਂ ਇਸ ਦੀ ਕਵਾਇਦ ਕੌਂਸਲਰਾਂ ਤੋਂ ਹੀ ਸ਼ੁਰੂ ਹੋਵੇਗੀ ਅਤੇ ਕੌਂਸਲਰਾਂ ਨੂੰ ਇਸ ਗੱਲ ਦਾ ਜਵਾਬ ਲੋਕਾਂ ਨੂੰ ਦੇਣਾ ਪਵੇਗਾ ਕਿ ਗਰੀਬ ਲੋਕਾਂ ਲਈ ਇੱਕ ਉੱਚ ਕੋਟੀ ਦੀ ਸਿਹਤ ਸੰਸਥਾ ਦੀ ਸਥਾਪਨਾ ਨੂੰ ਜੜ੍ਹ ਤੋਂ ਹੀ ਕਿਉਂ ਖਤਮ ਕੀਤਾ ਗਿਆ। ਇਸ ਮਾਮਲੇ ਵਿੱਚ ਇਹ ਤਰਕ ਵੀ ਹਾਸੋਹੀਣਾ ਲੱਗਦਾ ਹੈ ਕਿ ਹੁਣ ਤੱਕ ਸਬੰਧਿਤ ਜਗ੍ਹਾ ਉੱਪਰ ਹਸਪਤਾਲ ਬਣਾਉਣ ਲਈ ਕੋਈ ਗਰਾਂਟ ਜਾਰੀ ਨਹੀਂ ਕੀਤੀ ਗਈ ਅਤੇ ਲੋੜੀਂਦੇ ਯਤਨ ਵੀ ਨਹੀਂ ਕੀਤੇ ਗਏ। ਹੈਰਾਨੀ ਇਸ ਗੱਲ ਦੀ ਹੈ ਕਿ ਹਸਪਤਾਲ ਬਣਾਉਣ ਦੇ ਯਤਨ ਕਰਨ ਦੇ “ਜ਼ਿੰਮੇਵਾਰ ਸੱਜਣਾਂ” ਵੱਲੋਂ ਹੀ ਇਹ ਤਰਕ ਦਿੱਤੇ ਜਾ ਰਹੇ ਹਨ।
