ਜਠਾਣੀਆਂ-ਦਰਾਣੀਆਂ ਵਾਂਗੂੰ ਕੀਤੇ ਜਾ ਰਹੇ ਨੇ ਦਾਅਵੇ
ਬਰਨਾਲਾ,5 ਅਗਸਤ ( ਨਿਰਮਲ ਸਿੰਘ ਪੰਡੋਰੀ)-
-ਬਰਨਾਲਾ ਦੇ ਸੇਖਾਂ ਚੌਂਕ ‘ਚ ਲੱਗੀਆਂ ਟਰੈਫਿਕ ਲਾਈਟਾਂ ਚਾਲੂ ਹੋਣ ਤੋਂ ਪਹਿਲਾਂ ਹੀ ਚਰਚਾ ਦਾ ਵਿਸ਼ਾ ਬਣੀਆਂ ਹੋਈਆਂ ਹਨ। ਇਹ ਲਾਈਟਾਂ ਲਗਵਾਉਣ ਦਾ ਸਿਹਰਾ ਲੈਣ ਲਈ ਸੱਤਾਧਾਰੀ ਅਤੇ ਕਾਂਗਰਸ ਪਾਰਟੀ ਦੇ ਸਥਾਨਕ ਆਗੂਆਂ ਵਿੱਚ ਇੱਕ ਤਰ੍ਹਾਂ ਦੀ ਹੋੜ ਲੱਗੀ ਹੋਈ ਹੈ। ਦੋਵੇਂ ਪਾਰਟੀਆਂ ਦੇ ਆਗੂਆਂ ਵੱਲੋਂ ਸੇਖਾ ਚੌਂਕ ‘ਚ ਟਰੈਫਿਕ ਲਾਈਟਾਂ ਲਗਵਾਉਣ ਸਬੰਧੀ ਆਪਣੀ ਪਿੱਠ ਥਾਪੜੀ ਜਾ ਰਹੀ ਹੈ। ਦੋਵੇਂ ਪਾਰਟੀਆਂ ਦੇ ਆਗੂਆਂ ਵੱਲੋਂ ਆਪਣੇ-ਆਪਣੇ ਦਾਅਵਿਆਂ ਸਬੰਧੀ ਸੋਸ਼ਲ ਮੀਡੀਆ ‘ਤੇ ਦਿਲਚਸਪ ਪੋਸਟਾਂ ਪੜ੍ਹਨ ਨੂੰ ਮਿਲ ਰਹੀਆਂ ਹਨ। ਦਰਅਸਲ ਇਹ ਟਰੈਫਿਕ ਲਾਈਟਾਂ ਲੱਗਣ ਸਬੰਧੀ ਕੌਂਸਲਰਾਂ ਵਿਚਕਾਰ ਸ਼ਬਦੀਜੰਗ ਇੱਕ ਕੌਂਸਲਰ ਜੁਗਰਾਜ ਸਿੰਘ ਪੰਡੋਰੀ ਵੱਲੋਂ ਸ਼ੋਸ਼ਲ ਮੀਡੀਆ ‘ਤੇ ਪਾਈ ਪੋਸਟ ਤੋਂ ਬਾਅਦ ਸ਼ੁਰੂ ਹੋਈ ਜਿਸ ਵਿੱਚ ਪੰਡੋਰੀ ਨੇ ਲਾਈਟਾਂ ਲੱਗਣ ਦੇ ਮਾਮਲੇ ‘ਚ ਗੁਰਮੀਤ ਸਿੰਘ ਮੀਤ ਹੇਅਰ ਦਾ ਧੰਨਵਾਦ ਕੀਤਾ ਸੀ, ਭਾਵੇਂ ਕਿ ਜੁਗਰਾਜ ਪੰਡੋਰੀ ਨੇ ਬਾਅਦ ਵਿੱਚ ਆਪਣੇ ਫੇਸਬੁੱਕ ਅਕਾਊਂਟ ਤੋਂ ਇਹ ਪੋਸਟ ਡਿਲੀਟ ਵੀ ਕਰ ਦਿੱਤੀ ਪ੍ਰੰਤੂ ਇਹ ਪੋਸਟ ਵਾਇਰਲ ਹੋਣ ਤੋਂ ਬਾਅਦ ਵਾਰਡ ਨੰਬਰ 19 ਤੋਂ ਕੌਂਸਲਰ ਰਾਣੀ ਕੌਰ ਦੇ ਪਤੀ ਤੇ ਸੀਨੀਅਰ ਕਾਂਗਰਸੀ ਆਗੂ ਜਸਮੇਲ ਸਿੰਘ ਡੇਅਰੀਵਾਲਾ ਮੈਦਾਨ ਵਿੱਚ ਨਿਤਰੇ, ਜਿਨ੍ਹਾਂ ਨੇ ਸਥਾਨਕ ਵੱਡੇ ਕਾਂਗਰਸੀ ਆਗੂਆਂ ਨੂੰ ਆਪਣੇ ਸੱਜੇ-ਖੱਬੇ ਖੜਾ ਕੇ ਇਹ ਟਰੈਫਿਕ ਲਾਈਟਾਂ ਨਗਰ ਕੌਂਸਲ ਦੇ ਫੰਡ ਵਿੱਚੋਂ ਮਨਜ਼ੂਰ ਕਰਵਾਉਣ ਸੰਬੰਧੀ ਆਪਣਾ ਦਾਅਵਾ ਠੋਕਿਆ। ਜਸਮੇਲ ਸਿੰਘ ਦਾ ਕਹਿਣਾ ਹੈ ਕਿ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਨਗਰ ਕੌਂਸਲ ਦੀ ਇੱਕ ਮੀਟਿੰਗ ਵਿੱਚ ਸਾਰੇ ਵਾਰਡਾਂ ਦੇ ਕੌਂਸਲਰਾਂ ਨੇ ਆਪੋ ਆਪਣੇ ਵਾਰਡਾਂ ‘ਚ ਹੋਣ ਵਾਲੇ ਕੰਮਾਂ ਦਾ ਵੇਰਵਾ ਦਿੱਤਾ ਅਤੇ ਉਨਾਂ ਨੂੰ ਪੂਰਾ ਕਰਨ ਦੀ ਮੰਗ ਕੀਤੀ ਪਰੰਤੂ ਉਹਨਾਂ ਦੀ ਪਤਨੀ ਰਾਣੀ ਕੌਰ ਨੇ ਪਹਿਲ ਦੇ ਅਧਾਰ ‘ਤੇ ਸੇਖਾ ਚੌਂਕ ਵਿੱਚ ਟਰੈਫਿਕ ਲਾਈਟਾਂ ਲਗਵਾਉਣ ਦੀ ਮੰਗ ਕੀਤੀ ਜਿਸ ਤੋਂ ਬਾਅਦ ਇਹ ਲਾਈਟਾਂ ਲਾਉਣ ਸਬੰਧੀ ਨਗਰ ਕੌਂਸਲ ਦੀ ਮੀਟਿੰਗ ਵਿੱਚ ਬਕਾਇਦਾ ਮਤਾ ਪਾਸ ਕੀਤਾ ਗਿਆ ਅਤੇ ਇਸ ਦਾ ਟੈਂਡਰ ਵੀ ਕਾਂਗਰਸ ਦੀ ਸਰਕਾਰ ਮੌਕੇ ਹੀ ਲੱਗ ਚੁੱਕਿਆ ਸੀ। ਉਹਨਾਂ ਕਿਹਾ ਕਿ ਉਸ ਵੇਲੇ ਤੋਂ ਲੈ ਕੇ ਹੁਣ ਤੱਕ ਇਹ ਮੁੱਦਾ ਨਗਰ ਕੌਂਸਲ ਵਿੱਚ ਦਬਾ ਕੇ ਰੱਖਿਆ ਹੋਇਆ ਪ੍ਰੰਤੂ ਇਸ ਸਬੰਧੀ ਦੁਆਰਾ ਪਹਿਲਕਦਮੀ ਕਰਦੇ ਹੋਏ ਉਹ ਕਾਂਗਰਸ ਦੇ ਸੀਨੀਅਰ ਆਗੂਆਂ ਅਤੇ ਕੌਂਸਲਰਾਂ ਨੂੰ ਲੈ ਕੇ ਜੁਲਾਈ ਦੇ ਦੂਜੇ ਹਫਤੇ ਈਓ ਨਗਰ ਕੌਂਸਲ ਨੂੰ ਮਿਲੇ ਅਤੇ ਇਹ ਲਾਈਟਾਂ ਜਲਦੀ ਲਗਵਾਉਣ ਦੀ ਮੰਗ ਕੀਤੀ। ਜਸਮੇਲ ਸਿੰਘ ਦਾ ਦਾਅਵਾ ਹੈ ਕਿ ਉਨਾਂ ਨੇ ਈਓ ਨਗਰ ਕੌਂਸਲ ਨੂੰ ਚੇਤਾਵਨੀ ਵੀ ਦਿੱਤੀ ਸੀ ਕਿ ਜੇਕਰ ਸੇਖਾ ਚੌਂਕ ਦੇ ਵਿੱਚ ਟਰੈਫਿਕ ਲਾਈਟਾਂ ਜਲਦੀ ਨਾ ਲੱਗੀਆਂ ਤਾਂ ਉਹ ਧਰਨਾ ਵੀ ਦੇਣਗੇ ਜਿਸ ਤੋਂ ਬਾਅਦ ਈਓ ਨੇ ਲਾਈਟਾਂ ਲਾਉਣ ਸਬੰਧੀ ਇੱਕ ਹਫਤੇ ਦਾ ਸਮਾਂ ਲਿਆ ਅਤੇ ਇੱਕ ਹਫਤੇ ਦੇ ਵਿੱਚ ਵਿੱਚ ਇਹ ਲਾਈਟਾਂ ਲੱਗ ਚੁੱਕੀਆਂ ਸਨ। ਦੂਜੇ ਪਾਸੇ ਕੌਂਸਲਰ ਜੀਵਨ ਕੁਮਾਰ ਨੇ ਜਸਮੇਲ ਸਿੰਘ ਦੇ ਦਾਅਵੇ ‘ਤੇ ਟਿੱਪਣੀ ਕਰਦੇ ਹੋਏ ਇਹ ਲਾਈਟਾਂ ਲਗਵਾਉਣ ਸਬੰਧੀ ਸੱਤਾਧਿਰ ਦੀ ਪਿੱਠ ਥਾਪੜੀ ਹੈ। ਜਸਮੇਲ ਸਿੰਘ ਦੀ ਇੱਕ ਪੋਸਟ ‘ਤੇ ਟਿੱਪਣੀ ਕਰਦੇ ਹੋਏ ਜੀਵਨ ਕੁਮਾਰ ਨੇ ਜਸਮੇਲ ਨੂੰ ਮੁਖਾਤਿਬ ਹੋ ਕੇ ਲਿਖਿਆ ਕਿ ਜੇਕਰ ਉਹਨਾਂ ਨੇ ਲਾਈਟਾਂ ਲਗਵਾਈਆਂ ਹਨ ਤਾਂ ਉਹ ਚਲਾ ਕੇ ਵੀ ਦਿਖਾਉਣ, ਜੀਵਨ ਕੁਮਾਰ ਨੇ ਲਾਈਟਾਂ ਲਗਵਾਉਣ ਸਬੰਧੀ ਜਸਮੇਲ ਨੂੰ ਟੈਂਡਰ ਦੀ ਕਾਪੀ ਦਿਖਾਉਣ ਲਈ ਵੀ ਚੈਲੰਜ ਕੀਤਾ। ਸੇਖਾ ਚੌਂਕ ‘ਚ ਟ੍ਰੈਫਿਕ ਲਾਈਟਾਂ ਲੱਗ ਤਾਂ ਚੁੱਕੀਆਂ ਹਨ ਪਰੰਤੂ ਇਹਨਾਂ ਨੂੰ ਚਾਲੂ ਕਰਨ ਦਾ ਮਾਮਲਾ ਸੱਤਾਧਿਰ ਤੇ ਕਾਂਗਰਸ ਦੇ ਦਾਅਵਿਆਂ ਦੇ ਵਿਚਕਾਰ ਫਸਦਾ ਨਜ਼ਰ ਆ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਸੇਖਾ ਚੌਂਕ ਇੱਕ ਤਰ੍ਹਾਂ ਨਾਲ ਐਕਸੀਡੈਂਟ ਚੌਂਕ ਹੀ ਬਣਿਆ ਹੋਇਆ ਹੈ ਕਿਉਂਕਿ ਇੱਥੇ ਐਕਸੀਡੈਂਟ ਬਹੁਤ ਜ਼ਿਆਦਾ ਹੁੰਦੇ ਹਨ ਅਤੇ ਕਈ ਵਾਰ ਤਾਂ 3-3,4-4 ਮੌਤਾਂ ਇਕੱਠੀਆਂ ਵੀ ਹੋ ਚੁੱਕੀਆਂ ਹਨ। ਹੁਣ ਇਹ ਲਾਈਟਾਂ ਲੱਗਣ ਤੋਂ ਬਾਅਦ ਚਾਲੂ ਕਰਵਾਉਣ ਦੀ ਬਜਾਏ ਆਗੂਆਂ ਵੱਲੋਂ ਬੱਲੇ ਬੱਲੇ ਕਰਵਾਉਣ ਦੀ ਹੋੜ ਲੱਗੀ ਹੋਈ ਹੈ ਬਜਾਏ ਇਸਦੇ ਕਿ ਇਹ ਲਾਈਟਾਂ ਚਾਲੂ ਕਰਵਾ ਕੇ ਕੀਮਤੀ ਜ਼ਿੰਦਗੀਆਂ ਬਚਾਉਣ ਵੱਲ ਕਦਮ ਪੁੱਟਿਆ ਜਾਵੇ। ਲੋਕ ਚਰਚਾ ਇਹ ਵੀ ਹੈ ਕਿ ਇਹ ਲਾਈਟਾਂ ਨੇਤਾ ਜੀ” ਵੱਲੋਂ ਬਟਨ ‘ਤੇ ਉਂਗਲ ਰੱਖਣ ਤੋਂ ਬਾਅਦ ਹੀ ਅੱਖ ਮਟੱਕਾ ਸ਼ੁਰੂ ਕਰਨਗੀਆਂ। ਚਲੋ ! ਕਿਵੇਂ ਵੀ ਹੋਵੇ ਇਹ ਲਾਈਟਾਂ ਚਾਲੂ ਹੋ ਜਾਣੀਆਂ ਚਾਹੀਦੀਆਂ ਹਨ ਕਿਉਂਕਿ ਲੋਕ ਸੇਖਾ ਚੌਂਕ ਵਿੱਚ ਟਰੈਫਿਕ ਲਾਈਟਾਂ ਲੱਗਣ ਦੇ ਕੰਮ ਦੀ ਸ਼ਲਾਘਾ ਕਰ ਰਹੇ ਹਨ। ਲੋਕਾਂ ਦੀ ਇਹੋ ਮੰਗ ਹੈ ਕਿ ਲਾਈਟਾਂ ਜਲਦੀ ਚਾਲੂ ਹੋਣੀਆਂ ਚਾਹੀਦੀਆਂ ਹਨ…ਦਾਅਵਿਆਂ ਦੀ ਲੋੜ ਨਹੀਂ ਕਿਉਂਕਿ ‘ਵੋਟਰ’ ਐਨੇ ਵੀ ‘ਕਮਲੇ’ ਨਹੀਂ ਜਿੰਨੇ ਸਮਝਿਆ ਜਾ ਰਿਹਾ ਹੈ।
ਫੋਟੋ ਕੈਪਸ਼ਨ-ਉਟਘਾਟਨ ਦੀ ਉਡੀਕ ਵਿੱਚ ਬਰਨਾਲਾ ਦੇ ਸੇਖਾ ਚੌਂਕ ‘ਚ ਲੱਗੀਆਂ ਟਰੈਫਿਕ ਲਾਈਟਾਂ ਦੀ ਤਸਵੀਰ
