ਚੰਡੀਗੜ੍ਹ, 13 ਅਗਸਤ, Gee98 news service
-ਪੰਜਾਬ ‘ਚ ਹੁਣ ਡਾਕਟਰ ਬਣਨਾ ਹੋਰ ਵੀ ਮਹਿੰਗਾ ਹੋ ਜਾਵੇਗਾ ਭਾਵ ਪੰਜਾਬ ਸਰਕਾਰ ਨੇ MBBS ਕੋਰਸ ਦੀ ਫੀਸ ਵਿੱਚ ਵਾਧਾ ਕਰ ਦਿੱਤਾ ਹੈ। ਇਸ ਸਬੰਧੀ ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਪੰਜਾਬ ਵੱਲੋਂ ਜਾਰੀ ਇੱਕ ਨੋਟੀਫਿਕੇਸ਼ਨ ਅਨੁਸਾਰ MBBS ਕੋਰਸ ਦੀਆਂ ਫੀਸਾਂ ਵਿੱਚ ਪੰਜ ਪ੍ਰਤੀਸ਼ਤ ਤੱਕ ਦਾ ਵਾਧਾ ਕੀਤਾ ਗਿਆ ਹੈ। ਨੋਟੀਫਿਕੇਸ਼ਨ ਅਨੁਸਾਰ ਅੰਮ੍ਰਿਤਸਰ, ਪਟਿਆਲਾ, ਫਰੀਦਕੋਟ ਅਤੇ ਮੁਹਾਲੀ ਦੇ ਚਾਰ ਸਰਕਾਰੀ ਮੈਡੀਕਲ ਕਾਲਜਾਂ ਵਿੱਚ MBBS ਕੋਰਸ ਦੀ ਪੂਰੀ ਫੀਸ 9.05 ਲੱਖ ਰੁਪਏ ਤੋਂ ਵਧਾ ਕੇ 9.50 ਲੱਖ ਰੁਪਏ ਕਰ ਦਿੱਤੀ ਗਈ ਹੈ। ਸਾਰੇ ਪ੍ਰਾਈਵੇਟ ਮੈਡੀਕਲ ਕਾਲਜਾਂ ਵਿੱਚ ਮੈਨੇਜਮੈਂਟ ਕੋਟੇ ਦੀਆਂ ਸੀਟਾਂ ਲਈ MBBS ਕੋਰਸ ਦੀ ਪੂਰੀ ਫੀਸ 55.25 ਲੱਖ ਰੁਪਏ ਤੋਂ ਵਧਾ ਕੇ 58.02 ਲੱਖ ਰੁਪਏ ਕਰ ਦਿੱਤੀ ਗਈ ਹੈ। ਪ੍ਰਾਈਵੇਟ ਕਾਲਜਾਂ ਵਿੱਚ ਸਰਕਾਰੀ ਕੋਟੇ ਦੀਆਂ ਸੀਟਾਂ ਦੀ ਫੀਸ 21.48 ਲੱਖ ਰੁਪਏ ਤੋਂ ਵਧਾ ਕੇ 22.54 ਲੱਖ ਰੁਪਏ ਕਰ ਦਿੱਤੀ ਗਈ ਹੈ। ਹਰ ਪ੍ਰਾਈਵੇਟ ਮੈਡੀਕਲ ਕਾਲਜ ਵਿੱਚ ਸਰਕਾਰੀ ਕੋਟੇ ਤਹਿਤ 50 ਫੀਸਦੀ ਸੀਟਾਂ ਰਾਖਵੀਆਂ ਹਨ। ਬਾਕੀ 50 ਫੀਸਦੀ ਸੀਟਾਂ ਵਿੱਚ 35 ਫੀਸਦੀ ਮੈਨੇਜਮੈਂਟ ਕੋਟਾ ਅਤੇ 15 ਫੀਸਦੀ ਐਨਆਰਆਈ ਕੋਟਾ ਸ਼ਾਮਲ ਹੈ। NRI ਕੋਟੇ ਦੀਆਂ ਸੀਟਾਂ ਲਈ ਫੀਸ ਢਾਂਚੇ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ, ਜੋ ਕਿ $1.10 ਲੱਖ ਹੈ। ਲੁਧਿਆਣਾ ਦੇ ਸੀਐਮਸੀ ਨੇ MBBS ਕੋਰਸ ਲਈ ਆਪਣੀ ਫੀਸ ਢਾਂਚੇ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ। ਨੋਟੀਫਿਕੇਸ਼ਨ ਦੇ ਅਨੁਸਾਰ, ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਿਜ਼ (BFUHS) 1,550 ਦਾਖਲੇ ਕਰਵਾਏਗੀ। ਇਨ੍ਹਾਂ ਸੀਟਾਂ ਵਿੱਚ ਰਾਜ ਦੇ ਚਾਰ ਸਰਕਾਰੀ ਮੈਡੀਕਲ ਕਾਲਜਾਂ ਵਿੱਚ 750 ਸੀਟਾਂ ਅਤੇ ਚਾਰ ਪ੍ਰਾਈਵੇਟ ਅਤੇ ਦੋ ਘੱਟ ਗਿਣਤੀ ਦਰਜੇ ਦੀਆਂ ਮੈਡੀਕਲ ਸੰਸਥਾਵਾਂ ਵਿੱਚ 800 ਸੀਟਾਂ ਸ਼ਾਮਲ ਹਨ।
Menu
