ਚੰਡੀਗੜ੍ਹ,4 ਸਤੰਬਰ, Gee98 news service
–ਵਿਦੇਸ਼ਾਂ ਵਿੱਚ ਬਣੇ ਭਾਰਤੀ ਦੂਤਾਵਾਸ ਅਤੇ ਕੌਂਸਲਖਾਨਿਆਂ ਵਿੱਚ ਪਾਸਪੋਰਟ ਬਣਾਉਣ ਲਈ ਦਿੱਤੀਆਂ ਜਾਣ ਵਾਲੀਆਂ ਅਰਜ਼ੀਆਂ ਸਬੰਧੀ ਭਾਰਤ ਸਰਕਾਰ ਨੇ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਹਨ। ਇਨਾਂ ਨਿਰਦੇਸ਼ਾਂ ਅਨੁਸਾਰ 1 ਸਤੰਬਰ 2025 ਤੋਂ, ਵਿਦੇਸ਼ਾਂ ਵਿੱਚ ਸਥਿਤ ਭਾਰਤੀ ਦੂਤਾਵਾਸ ਅਤੇ ਕੌਂਸਲਖਾਨਿਆਂ ਵਿੱਚ ਪਾਸਪੋਰਟ ਲਈ ਦਿੱਤੀਆਂ ਅਰਜ਼ੀਆਂ ਵਿੱਚ ਸਿਰਫ਼ ICAO (International Civil Aviation Organization) ਮਿਆਰਾਂ ਅਨੁਸਾਰ ਤਸਵੀਰਾਂ ਹੀ ਸਵੀਕਾਰ ਕੀਤੀਆਂ ਜਾਣਗੀਆਂ। ਇਹ ਮਿਆਰ ਅੰਤਰਰਾਸ਼ਟਰੀ ਯਾਤਰਾ ਦਸਤਾਵੇਜ਼ਾਂ ਦੀ ਸੁਰੱਖਿਆ ਅਤੇ ਬਾਇਓਮੈਟਰਿਕ ਪਛਾਣ ਵਿੱਚ ਇਕਰੂਪਤਾ ਲਿਆਉਣ ਲਈ ਲਾਗੂ ਕੀਤੇ ਗਏ ਹਨ। ਸਰਕਾਰ ਵੱਲੋਂ ਲੋਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਨਵਾਂ ਪਾਸਪੋਰਟ ਅਪਲਾਈ ਕਰਨ ਮੌਕੇ ਪਾਸਪੋਰਟ ਤੇ ਰੱਖਣ ਵਾਲੀ ਤਸਵੀਰ ਸਬੰਧੀ ਹਦਾਇਤਾਂ ਨੂੰ ਧਿਆਨ ਵਿੱਚ ਰੱਖਣ।
ਪਾਸਪੋਰਟ ਅਰਜ਼ੀਆਂ ਲਈ ICAO ਅਨੁਕੂਲ ਫੋਟੋਆਂ ਲਈ ਦਿਸ਼ਾ-ਨਿਰਦੇਸ਼:
-ਚਿਹਰੇ ਦਾ ਕਲੋਜ਼-ਅੱਪ ਅਤੇ ਮੋਢਿਆਂ ਦਾ ਉਪਰਲਾ ਹਿੱਸਾ, ਜਿਸ ਵਿੱਚ ਚਿਹਰਾ ਫੋਟੋ ਦਾ 80-85% ਹਿੱਸਾ ਹੋਵੇ।
– ਫੋਟੋ ਰੰਗੀਨ ਹੋਣੀ ਚਾਹੀਦੀ ਹੈ ਅਤੇ ਇਸਦਾ ਆਕਾਰ 630 ਗ 810 ਪਿਕਸਲ (2 ਇੰਚ ਗੁਣਾ 2 ਇੰਚ) ਹੋਣਾ ਚਾਹੀਦਾ ਹੈ।
– ਫੋਟੋਆਂ ਨੂੰ ਕੰਪਿਊਟਰ ਸੌਫਟਵੇਅਰ ਦੁਆਰਾ ਬਦਲਿਆ ਨਹੀਂ ਜਾਣਾ ਚਾਹੀਦਾ।
– ਫੋਟੋ ਦਾ ਬੈਕਗ੍ਰਾਊਂਡ ਚਿੱਟਾ ਹੋਣਾ ਚਾਹੀਦਾ ਹੈ।
– ਫੋਟੋਆਂ ਵਿੱਚ ਇਹ ਗੱਲਾਂ ਹੋਣੀਆਂ ਚਾਹੀਦੀਆਂ ਹਨ:P
– ਬਿਨੈਕਾਰ ਸਿੱਧਾ ਕੈਮਰੇ ਵੱਲ ਦੇਖ ਰਿਹਾ ਹੋਵੇ।
-ਚਮੜੀ ਦਾ ਰੰਗ ਕੁਦਰਤੀ ਲੱਗੇ।
-ਚਮਕ ਅਤੇ ਕੰਟਰਾਸਟ ਸਹੀ ਹੋਵੇ।
– ਬਿਨੈਕਾਰ ਦੀਆਂ ਅੱਖਾਂ ਖੁੱਲ੍ਹੀਆਂ ਅਤੇ ਸਾਫ਼ ਦਿਖਾਈ ਦੇਣ।
– ਅੱਖਾਂ ਉੱਤੇ ਵਾਲ ਨਾ ਹੋਣ।
– ਇਕਸਾਰ ਰੋਸ਼ਨੀ ਵਿੱਚ ਖਿੱਚੀ ਗਈ ਹੋਵੇ, ਚਿਹਰੇ ਉੱਤੇ ਕੋਈ ਪਰਛਾਵਾਂ ਜਾਂ ਫਲੈਸ਼ ਦੀ ਚਮਕ ਨਾ ਹੋਵੇ ਅਤੇ ਨਾ ਹੀ ਲਾਲ ਅੱਖਾਂ (red eye) ਹੋਵੇ।
-ਮੂੰਹ ਬੰਦ ਹੋਣਾ ਚਾਹੀਦਾ ਹੈ।
– ਕੈਮਰੇ ਤੋਂ 1.5 ਮੀਟਰ ਦੀ ਦੂਰੀ ਤੋਂ ਖਿੱਚੀ ਗਈ ਹੋਵੇ (ਬਹੁਤ ਜ਼ਿਆਦਾ ਨੇੜੇ ਨਾ ਹੋਵੇ)।
– ਫੋਟੋ ਧੁੰਦਲੀ (blurred) ਨਾ ਹੋਵੇ।
– ਪੂਰਾ ਚਿਹਰਾ, ਸਾਹਮਣਿਓਂ ਦਿਖਾਈ ਦੇਵੇ ਅਤੇ ਅੱਖਾਂ ਖੁੱਲ੍ਹੀਆਂ ਹੋਣ।\
– ਫੋਟੋ ਵਿੱਚ ਵਾਲਾਂ ਦੇ ਸਿਖਰ ਤੋਂ ਲੈ ਕੇ ਠੋਡੀ ਦੇ ਹੇਠਾਂ ਤੱਕ ਪੂਰਾ ਸਿਰ ਦਿਖਾਈ ਦੇਣਾ ਚਾਹੀਦਾ ਹੈ।
– ਸਿਰ ਫਰੇਮ ਦੇ ਵਿਚਕਾਰ ਹੋਣਾ ਚਾਹੀਦਾ ਹੈ (ਸਿਰ ਝੁਕਿਆ ਹੋਇਆ ਨਹੀਂ ਹੋਣਾ ਚਾਹੀਦਾ)।
– ਚਿਹਰੇ ਜਾਂ ਬੈਕਗ੍ਰਾਊਂਡ ਵਿੱਚ ਕੋਈ ਪਰਛਾਵਾਂ ਨਹੀਂ ਹੋਣਾ ਚਾਹੀਦਾ (ਚਸ਼ਮੇ ਦੀ ਕੋਈ ਚਮਕ ਨਹੀਂ ਹੋਣੀ ਚਾਹੀਦੀ; ਚਮਕ ਤੋਂ ਬਚਣ ਲਈ ਚਸ਼ਮਾ ਉਤਾਰਿਆ ਜਾਵੇ)।
– ਰੋਸ਼ਨੀ ਨਾਲ ਅੱਖਾਂ ਵਿੱਚ ਲਾਲ ਅੱਖਾਂ (red eye) ਦਾ ਪ੍ਰਭਾਵ ਜਾਂ ਕੋਈ ਹੋਰ ਅਜਿਹਾ ਪ੍ਰਭਾਵ ਨਹੀਂ ਹੋਣਾ ਚਾਹੀਦਾ ਜੋ ਅੱਖਾਂ ਦੀ ਦਿੱਖ ਨੂੰ ਘਟਾਵੇ।
– ਧਾਰਮਿਕ ਕਾਰਨਾਂ ਤੋਂ ਇਲਾਵਾ ਸਿਰ ਢੱਕਣ ਦੀ ਇਜਾਜ਼ਤ ਨਹੀਂ ਹੈ, ਪਰ ਠੋਡੀ ਦੇ ਹੇਠਾਂ ਤੋਂ ਮੱਥੇ ਦੇ ਸਿਖਰ ਤੱਕ ਅਤੇ ਚਿਹਰੇ ਦੇ ਦੋਵੇਂ ਕਿਨਾਰਿਆਂ ਤੱਕ ਚਿਹਰੇ ਦੀਆਂ ਵਿਸ਼ੇਸ਼ਤਾਵਾਂ ਸਾਫ਼ ਦਿਖਾਈ ਦੇਣੀਆਂ ਚਾਹੀਦੀਆਂ ਹਨ।
– ਚਿਹਰੇ ‘ਤੇ ਹਾਵ-ਭਾਵ ਕੁਦਰਤੀ ਲੱਗਣੇ ਚਾਹੀਦੇ ਹਨ।
