**ED ਦੀ ਗੱਲ ਛੱਡੋ…ਇਨਾਂ ਦੇ ਘਰਾਂ ‘ਚ ਸਾਰੀ ABCD ਆਵੇਗੀ…!
-ਅਕਸਰ ਪੰਜਾਬ ਦੇ ਮੰਤਰੀਆਂ ਅਤੇ ਵਿਧਾਇਕਾਂ, ਚੇਅਰਮੈਨਾਂ ਅਤੇ ਹੋਰ ਸੱਤਾਧਾਰੀ ਆਗੂਆਂ ਦੀ ਕੁਝ ਹੀ ਦਿਨਾਂ ਵਿੱਚ ਵਧੀ ਆਮਦਨ ਦੀ ਚਰਚਾ ਹੁੰਦੀ ਰਹਿੰਦੀ ਹੈ। ਇਹਨਾਂ ਆਗੂਆਂ ਦੀ ਪਾਰਟੀ ਦੇ ਸੱਤਾ ਵਿੱਚ ਆਉਣ ਤੋਂ ਪਹਿਲਾਂ ਜਿਨਾਂ ਕੋਲ ਆਪਣਾ ਮੋਟਰਸਾਈਕਲ ਵੀ ਨਹੀਂ ਹੁੰਦਾ ਉਹ ਸੱਤਾ ਦੇ ਪਹਿਲੇ ਸਾਲ ਮਹਿੰਗੀਆਂ ਗੱਡੀਆਂ ਅਤੇ ਕੀਮਤੀ ਚੀਜ਼ਾਂ ਦੇ ਮਾਲਕ ਬਣ ਜਾਂਦੇ ਹਨ ਅਤੇ ਉਹਨਾਂ ਦੀ ਜ਼ਿੰਦਗੀ ਰਾਜੇ ਮਹਾਰਾਜਿਆਂ ਵਾਲੀ ਬਣ ਜਾਂਦੀ ਹੈ। ਇਹ ਵਰਤਾਰਾ ਪੰਜਾਬ ਦੀ ਮੌਜੂਦਾ ਸੱਤਾਧਾਰੀ ਪਾਰਟੀ ਨਾਲ ਹੀ ਸੰਬੰਧਿਤ ਨਹੀਂ ਸਗੋਂ ਇਸ ਤੋਂ ਪਹਿਲੀਆਂ ਪਾਰਟੀਆਂ ਦੇ ਆਗੂਆਂ ‘ਤੇ ਵੀ ਲਾਗੂ ਹੁੰਦਾ ਹੈ। ਲੋਕਤੰਤਰ ਦਾ ਇਹ ਇੱਕ ਅਜਿਹਾ ਪੱਖ ਹੈ ਜਿਸ ‘ਤੇ ਚਰਚਾ ਤਾਂ ਹੁੰਦੀ ਹੈ ਪਰੰਤੂ ਇਸ ਨੂੰ ਰੋਕਣ ਸਬੰਧੀ ਕੋਈ ਠੋਸ ਕਦਮ ਨਹੀਂ ਚੁੱਕੇ ਜਾਂਦੇ ਕਿ ਲੋਕਾਂ ਦੀਆਂ ਵੋਟਾਂ ਲੈ ਕੇ ਲੋਕਾਂ ਦੀ ਹੀ ਦਿੱਤੀ ਤਾਕਤ ਦੇ ਨਾਲ ਇਹ ਸਿਆਸੀ ਲੋਕ ਠਾਠ ਬਾਠ ਦੀ ਜ਼ਿੰਦਗੀ ਜਿਉਂਦੇ ਹਨ। ਜੇਕਰ ਮੌਜੂਦਾ ਦੌਰ ਦੀ ਪੰਜਾਬ ਦੀ ਸੱਤਾ ‘ਤੇ ਕਾਬਜ਼ ਆਮ ਆਦਮੀ ਪਾਰਟੀ ਦੇ ਕੁਝ ਆਗੂਆਂ ਦੀ ਗੱਲ ਕੀਤੀ ਜਾਵੇ…ਤਾਂ ਇਹ ਆਗੂ ਪੰਜਾਬ ਦੀਆਂ ਰਵਾਇਤੀ ਸਿਆਸੀ ਪਾਰਟੀਆਂ ਦੇ ਆਗੂਆਂ ਤੋਂ ਵੀ ਕਿਤੇ ਅੱਗੇ ਨਿਕਲ ਗਏ ਹਨ। ਆਮ ਆਦਮੀ ਪਾਰਟੀ ਦੇ ਬਹੁਤੇ ਆਗੂ ਅਜਿਹੇ ਹਨ ਜਿਹੜੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸੱਚਮੁੱਚ ਹੀ “ਆਮ ਘਰਾਂ” ਦੇ ਕਾਕੇ ਸਨ…ਆਮ ਜ਼ਿੰਦਗੀ ਜਿਉਂਦੇ ਸਨ…ਆਮ ਜਿਹਾ ਉਹਨਾਂ ਦਾ ਰਹਿਣਾ ਸਹਿਣਾ ਸੀ ਪਰੰਤੂ ਜਿਵੇਂ ਹੀ ਲੋਕਾਂ ਨੇ ਉਹਨਾਂ ਨੂੰ ਵਿਧਾਇਕ ਬਣਾਇਆ ਤਾਂ ਕੁਝ ਹੀ ਸਮੇਂ ‘ਚ “ਜਨਾਬ” ਦੇ ਤੌਰ ਤਰੀਕੇ ਬਦਲ ਗਏ।
ਇਨਾਂ ਵਿਧਾਇਕਾਂ ਦੇ ਤੌਰ ਤਰੀਕਿਆਂ ‘ਤੇ ਟਿੱਪਣੀ ਲਿਖਦਾ ਹੋਇਆ ਮੈਂ ਇਥੇ ਇੱਕ ਗੱਲ ਦਾ ਜ਼ਿਕਰ ਜ਼ਰੂਰ ਕਰਨਾ ਚਾਹਾਂਗਾ ਕਿ ਕਿਸੇ ਵਿਧਾਇਕ ਦੀ ਐਨੀ ਤਨਖ਼ਾਹ ਵੀ ਨਹੀਂ ਹੁੰਦੀ ਕਿ ਉਹ 100 ਏਕੜ ਜ਼ਮੀਨ ਦੇ ਮਾਲਕ…ਕਿਸੇ ਵੱਡੀ ਫੈਕਟਰੀ ਦੇ ਮਾਲਕ ਜਾਂ ਹੋਰ ਕਿਸੇ ਵੱਡੇ ਜੱਦੀ ਪੁਸ਼ਤੀ ਕਾਰੋਬਾਰੀ ਵਰਗੀ ਐਸ਼ੋ ਆਰਾਮ ਵਾਲੀ ਜ਼ਿੰਦਗੀ ਦਾ ਮਾਲਕ ਬਣ ਜਾਵੇ। ਚਰਚਾ ਦੇ ਦੌਰਾਨ ਇਹ ਵੀ ਸਾਹਮਣੇ ਆ ਚੁੱਕਾ ਹੈ ਕਿ ਸੱਤਾਧਾਰੀ ਪਾਰਟੀ ਦੇ ਬਹੁਤੇ ਵਿਧਾਇਕਾਂ ਨੇ ਜਿਹੜੇ ਕੱਲ੍ਹ ਤੱਕ ਆਮ ਘਰਾਂ ਦੇ ਕਾਕੇ ਸਨ…ਹੁਣ ਖ਼ਾਸ ਬਣ ਕੇ ਆਪਣੇ ਸਕੇ ਸਬੰਧੀਆਂ ਦੇ ਨਾਮ ‘ਤੇ ਕਰੋੜਾਂ ਰੁਪਏ ਦੀ ਜਾਇਦਾਦ ਖਰੀਦ ਲਈ ਹੈ। ਭਾਵੇਂ ਸੱਤਾਧਾਰੀ ਪਾਰਟੀ ਦੇ ਆਗੂਆਂ ਦੀ ਗੱਲ ਕਰੀਏ ਜਾਂ ਫਿਰ ਵਿਰੋਧੀ ਪਾਰਟੀਆਂ ਦੇ ਰਾਜ ਸਮੇਂ ਦੀ ਗੱਲ ਕਰ ਲਈਏ ਜਿਹੜੇ ਆਗੂਆਂ ਦੀ ਸਵੇਰ ਦੀ ਸ਼ੁਰੂਆਤ ਗੁੜ ਦੀ ਚਾਹ ਨਾਲ ਹੁੰਦੀ ਸੀ ਉਹ ਹੁਣ ਕਿਸੇ ਸਿਹਤ ਮਾਹਿਰ ਦੀਆਂ ਹਦਾਇਤਾਂ ਦੇ ਅਨੁਸਾਰ ਆਪਣੀ ਸਵੇਰ ਦੀ ਸ਼ੁਰੂਆਤ ਸਪੈਸ਼ਲ ਜੂਸ ਨਾਲ ਕਰਦੇ ਹਨ….ਪਿੰਡ ‘ਚ ਕਰਿਆਨੇ ਦੀ ਦੁਕਾਨ ਤੋਂ ਸੌਦਾ ਪੱਤਾ ਖਰੀਦਣ ਵਾਲਿਆਂ ਦੀਆਂ ਸਰਕਾਰੀ ਗੱਡੀਆਂ ਸੁਪਰ ਸਟੋਰ ਤੋਂ ਭਰ ਕੇ ਆਉਂਦੀਆਂ ਹਨ….ਦੀਵਾਲੀ ਮੌਕੇ “ਮੋਰ ਛਾਪ” ਪਟਾਕੇ ਚਲਾਉਣ ਵਾਲਿਆਂ ਨੇ ਮਹਿੰਗੇ ਪਿਸਤੌਲਾਂ ਦੇ ਲਾਇਸੰਸ ਬਣਾ ਲਏ ਹਨ। ਹੋਰ ਤਾਂ ਹੋਰ ਵੇਖੋ…ਜਿਨਾਂ ਨੇ ਕਦੇ ਪਰਫਿਊਮ ਦੀ ਸ਼ੀਸ਼ੀ ਨੂੰ ਹੱਥ ਤੱਕ ਨਹੀਂ ਲਗਾਇਆ…ਉਹ ਹੁਣ ਮੀਆਂ ਜੀ ਦੇ ਸਪੈਸ਼ਲ ਤਿਆਰ ਕੀਤੇ ਇਤਰ ਫੁਲੇਲ ਦੀ ਖੁਸ਼ਬੂ ਬਿਖੇਰਦੇ ਫਿਰਦੇ ਹਨ।
ਉਦਾਹਰਨਾਂ ਤਾਂ ਹੋਰ ਵੀ ਬਹੁਤ ਸਾਰੀਆਂ ਦਿੱਤੀਆਂ ਜਾ ਸਕਦੀਆਂ ਹਨ ਪਰ ਦੇਣ ਦੀ ਲੋੜ ਨਹੀਂ…ਕਿਉਂਕਿ ਇਹ ਆਗੂ ਰੋਜ਼ਾਨਾ ਲੋਕਾਂ ਵਿੱਚ ਵਿਚਰਦੇ ਹਨ ਅਤੇ ਲੋਕ ਇਹਨਾਂ ਦੇ ਰਹਿਣ ਸਹਿਣ, ਖਾਣ ਪੀਣ, ਗੱਲਬਾਤ ਕਰਨ, ਪਹਿਨਣ ਅਤੇ ਬਦਲੇ ਹੋਏ ਤੌਰ ਤਰੀਕਿਆਂ ਨੂੰ ਨੇੜੇ ਤੋਂ ਵੇਖ ਰਹੇ ਹਨ ਅਤੇ ਹੈਰਾਨ ਵੀ ਹੋ ਰਹੇ ਹਨ ਕਿ ਕਿਸੇ ਵੀ ਪਾਰਟੀ ਦਾ ਕੋਈ ਆਗੂ ਸੱਤਾ ‘ਤੇ ਕਾਬਜ਼ ਹੋਣ ਤੋਂ ਬਾਅਦ ਐਨਾ ਅਮੀਰ ਕਿਵੇਂ ਹੋ ਜਾਂਦਾ ਹੈ, ਜਦ ਕਿ ਆਮ ਲੋਕ ਰੋਜ਼ਾਨਾ ਗੁਰਬਤ ਦੀ ਭੱਠੀ ਦੇ ਸੇਕ ਨਾਲ ਤੜਪ ਰਹੇ ਹਨ। ਉੰਝ ਤਾਂ ਭਾਵੇਂ ਰਵਾਇਤੀ ਪਾਰਟੀਆਂ ਦੇ ਆਗੂਆਂ ਦੇ ਘਰਾਂ ਵਿੱਚ ਵੀ ED ਗੇੜੇ ਲਗਾ ਰਹੀ ਹੈ ਪ੍ਰੰਤੂ ਪੰਜਾਬ ਦੀ ਮੌਜੂਦਾ ਸੱਤਾਧਾਰੀ ਪਾਰਟੀ ਦੇ ਕੁਝ ਆਮ ਕਾਕਿਆਂ ਨੇ ਪੈਸੇ ਇਕੱਠੇ ਕਰਨ ਲਈ ਜਿਸ ਤਰੀਕੇ ਨਾਲ ਤੰਗਲੀ ਆਪਣੇ ਹੱਥਾਂ ਵਿੱਚ ਫੜੀ ਹੋਈ ਹੈ ਅਤੇ ਜਿਸ ਤਰ੍ਹਾਂ ਦੀ ਲਗਜ਼ਰੀ ਜ਼ਿੰਦਗੀ ਥੋੜ੍ਹੇ ਸਮੇਂ ਵਿੱਚ ਬਣਾ ਲਈ ਹੈ ਉਸ ਨੂੰ ਦੇਖਦੇ ਹੋਏ ਕਿਹਾ ਜਾ ਸਕਦਾ ਹੈ ਕਿ ਇਹਨਾਂ ਕਾਕਿਆਂ ਦੇ ਘਰਾਂ ਵਿੱਚ ਸਿਰਫ਼…ED ਨਹੀਂ ਸਗੋਂ….ABCD ਜਾਂ A ਤੋਂ ਲੈ ਕੇ Z ਤੱਕ ਸਾਰੇ ਅੱਖਰ ਆ ਸਕਦੇ ਹਨ, ਬਸ਼ਰਤੇ ਕਿ ਇਹ ਚੋਣਾਂ ਦੇ ਸਮੇਂ ਸਿਆਸੀ ਟਪੂਸੀ ਮਾਰ ਕੇ ਆਪਣੀ ਮਾਂ ਪਾਰਟੀ ਨੂੰ ਬੇਦਾਵਾ ਦੇ ਕੇ ਸੱਤਾ ‘ਤੇ ਕਾਬਜ਼ ਹੋਣ ਵਾਲੀ ਕਿਸੇ ਪਾਰਟੀ ਵਿੱਚ ਸ਼ਾਮਿਲ ਨਾ ਹੋਣ ਕਿਉਂਕਿ ਅੱਜ ਕੱਲ੍ਹ ਦੇ ਆਗੂਆਂ ਦਾ ਦੀਨ ਈਮਾਨ ਇੰਨਾ ਕੁ ਖ਼ਤਮ ਹੋ ਚੁੱਕਾ ਹੈ ਕਿ ਇਹ ਸਵੇਰੇ ਚਾਹ ਦੀਆਂ ਚੁਸਕੀਆਂ ਤੋਂ ਲੈ ਕੇ ਰਾਤ ਦੇ ਖਾਣੇ ਦੀ ਬੁਰਕੀ ਤੱਕ ਜਿਹੜੀ ਪਾਰਟੀ ਨੂੰ ਸਿਆਸੀ ਗਾਲਾਂ ਕੱਢਦੇ ਹਨ, ਇਹਨਾਂ ਦਾ ਪਤਾ ਹੀ ਨਹੀਂ ਲੱਗਦਾ ਕਿ ਇਹ ਕਦੋਂ ਉਸੇ ਪਾਰਟੀ ਦੀ ਬੁੱਕਲ ਵਿੱਚ ਜਾ ਕੇ ਬੈਠ ਜਾਂਦੇ ਹਨ। ਸਿਆਸੀ ਟਪੂਸੀ ਮਾਰਨ ਮੌਕੇ ਇਹਨਾਂ ਨੇ ਸੌਦੇਬਾਜ਼ੀ ਦਾ ਭਾਵੇਂ ਟਿਕਟ ਦੀ ਕੀਤੀ ਹੁੰਦੀ ਹੈ ਉਪਰੰਤ ਅੰਦਰੂਨੀ ਸੌਦੇਬਾਜ਼ੀ ਇਹ ਵੀ ਹੁੰਦੀ ਹੈ ਕਿ ਇਹਨਾਂ ਦੇ ਘਰਾਂ ਵਿੱਚ….ED, CID, IB, CBI ਜਾਂ….ABCDEF ਨਾ ਆਵੇ। ਇਨਾਂ ਆਮ ਘਰਾਂ ਦੇ ਕਾਕਿਆਂ ਦੀ ਲਗਜ਼ਰੀ ਜ਼ਿੰਦਗੀ ਦਾ ਇਹ ਵਰਤਾਰਾ ਕਈ ਵਰ੍ਹਿਆਂ ਤੋਂ ਚੱਲਦਾ ਆ ਰਿਹਾ ਹੈ ਤੇ ਹੁਣ ਵੀ ਜਾਰੀ ਹੈ। ਲੋਕ ਇਸ ‘ਤੇ ਚਰਚਾ ਤਾਂ ਕਰਦੇ ਹਨ ਅਤੇ ਦੰਦੀਆਂ ਵੀ ਵੱਢਦੇ ਹਨ ਪਰੰਤੂ ਇਹ ਵਰਤਾਰਾ ਰੁਕ ਨਹੀਂ ਰਿਹਾ…ਅਸਲ ਵਿੱਚ ਜੇਕਰ ਲੋਕ ਇਹਨਾਂ ਲੋਕਾਂ ਨੂੰ ਚੋਣਾਂ ਸਮੇਂ ਪਿੰਡਾਂ ਦੀਆਂ ਸੱਥਾਂ ਵਿੱਚ ਪੰਜਾਬ ਅਤੇ ਲੋਕਾਂ ਦੇ ਮੁੱਦਿਆਂ ਨਾਲ ਸਬੰਧਿਤ ਸਵਾਲ ਕਰਦੇ ਸਮੇਂ ਇਹਨਾਂ ਦੀ ਬਦਲੀ ਹੋਈ ਲਗਜ਼ਰੀ ਜ਼ਿੰਦਗੀ ਸੰਬੰਧੀ ਵੀ ਸਵਾਲ ਕਰਨ ਅਤੇ ਅਜਿਹੇ ਆਗੂਆਂ ਤੋਂ ਉਹ ਪਾਵਰ ਖੋਹ ਲੈਣ ਜਿਸ ਪਾਵਰ ਦੇ ਅਧਾਰ ‘ਤੇ ਇਹ ਆਮ ਘਰਾਂ ਦੇ ਕਾਕੇ ਆਲੀਸ਼ਾਨ ਜ਼ਿੰਦਗੀ ਜਿਉਣੀ ਸ਼ੁਰੂ ਕਰਦੇ ਹਾਂ ਤਾਂ ਇਹ ਵਰਤਾਰਾ ਕੁਝ ਹੱਦ ਤੱਕ ਰੋਕਿਆ ਜਾ ਸਕਦਾ ਹੈ।
– ਨਿਰਮਲ ਸਿੰਘ ਪੰਡੋਰੀ, ਪੱਤਰਕਾਰ।
94170-33033.
