ਚੰਡੀਗੜ੍ਹ , 29 ਸਤੰਬਰ, Gee98 news service-
-ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਨਾਭਾ ਜੇਲ੍ਹ ਵਿੱਚ ਬੰਦ ਆਪਣੇ ਰਿਸ਼ਤੇਦਾਰ ਅਤੇ ਸੀਨੀਅਰ ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਨਾਲ ਕੀਤੀ ਮੁਲਾਕਾਤ ਚਰਚਾ ਵਿੱਚ ਹੈ। ਇਸ ਮੁਲਾਕਾਤ ਦੀ ਚਰਚਾ ਦੇ ਦੌਰਾਨ ਕਈ ਪੱਖ ਸਾਹਮਣੇ ਆ ਰਹੇ ਹਨ ਜਿਨਾਂ ਵਿੱਚੋਂ ਇੱਕ ਤਾਂ ਇਹ ਹੈ ਕਿ ਇਹ ਮੁਲਾਕਾਤ ਕਈ ਮਹੀਨਿਆਂ ਬਾਅਦ ਹੋਈ ਭਾਵ ਸੁਖਬੀਰ ਬਾਦਲ ਦੀ ਜੇਲ੍ਹ ਅੰਦਰ ਬਿਕਰਮ ਮਜੀਠੀਆ ਨਾਲ ਇਹ ਪਹਿਲੀ ਮੁਲਾਕਾਤ ਸੀ ਜਿਹੜੀ ਕਈ ਮਹੀਨਿਆਂ ਬਾਅਦ ਹੋਈ। ਦੂਜਾ ਅਹਿਮ ਪੱਖ ਇਹ ਵੀ ਸਾਹਮਣੇ ਆ ਰਿਹਾ ਕਿ ਇਹ ਮੁਲਾਕਾਤ ਡੇਰਾ ਬਿਆਸ ਮੁਖੀ ਦੀ ਬਿਕਰਮ ਮਜੀਠੀਆ ਨਾਲ ਮੁਲਾਕਾਤ ਤੋਂ ਤੁਰੰਤ ਬਾਅਦ ਹੋਈ। ਸੁਖਬੀਰ ਬਾਦਲ ਦੀ ਬਿਕਰਮ ਮਜੀਠੀਆ ਨਾਲ ਇਸ ਮੁਲਾਕਾਤ ਦਾ ਤੀਜਾ ਅਹਿਮ ਪੱਖ ਇਹ ਹੈ ਕਿ ਮੁਲਾਕਾਤ ਤੋਂ ਬਾਅਦ ਜੇਲ੍ਹ ਤੋਂ ਬਾਹਰ ਆ ਕੇ ਸੁਖਬੀਰ ਸਿੰਘ ਬਾਦਲ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਪਟਿਆਲਾ ਦੇ ਐਸਐਸਪੀ ਵਰੁਣ ਸ਼ਰਮਾ ਨੂੰ ਨਿਸ਼ਾਨੇ ‘ਤੇ ਲੈਂਦੇ ਹੋਏ ਤਿੱਖੇ ਸ਼ਬਦੀ ਹਮਲੇ ਕੀਤੇ।
ਸਵਾਲ ਇਹ ਉੱਠਦੇ ਨੇ ਕਿ ਸੁਖਬੀਰ ਸਿੰਘ ਬਾਦਲ ਨੇ ਖ਼ੁਦ ਮੁਲਾਕਾਤ ਕਰਨ ਤੋਂ ਬਾਅਦ ਹੀ ਐਸਐਸਪੀ ਨੂੰ ਨਿਸ਼ਾਨੇ ‘ਤੇ ਕਿਉਂ ਲਿਆ ਜਦ ਕਿ ਰੱਖੜੀ ਤਿਉਹਾਰ ਮੌਕੇ ਬੀਬਾ ਹਰਸਿਮਰਤ ਕੌਰ ਬਾਦਲ ਨੇ ਮਜੀਠੀਆ ਨਾਲ ਮੁਲਾਕਾਤ ਸਬੰਧੀ ਸਮੱਸਿਆਵਾਂ ਦਾ ਜ਼ਿਕਰ ਕੀਤਾ ਸੀ ਅਤੇ ਬੀਬੀ ਗਨੀਵ ਕੌਰ ਮਜੀਠੀਆ ਨੇ ਵੀ ਦੋਸ਼ ਲਗਾਏ ਸਨ ਕਿ ਉਹਨਾਂ ਦੀ ਮੁਲਾਕਾਤ ਸਮੇਂ ਪਰੇਸ਼ਾਨ ਕੀਤਾ ਜਾਂਦਾ ਹੈ। ਬੀਬਾ ਬਾਦਲ ਅਤੇ ਬੀਬੀ ਵੀ ਗਨੀਵ ਕੌਰ ਮਜੀਠੀਆ ਦੀ ਪਰੇਸ਼ਾਨੀ ਤੋਂ ਬਾਅਦ ਸੁਖਬੀਰ ਸਿੰਘ ਬਾਦਲ ਚੁੱਪ ਰਹੇ ਪ੍ਰੰਤੂ ਹੁਣ ਜਦੋਂ ਸੁਖਬੀਰ ਸਿੰਘ ਬਾਦਲ ਨੇ ਬਿਕਰਮ ਮਜੀਠੀਆ ਨਾਲ ਖੁਦ ਮੁਲਾਕਾਤ ਕੀਤੀ ਤਾਂ ਬਾਹਰ ਆ ਕੇ ਐਸਐਸਪੀ ਨੂੰ ਪਾਣੀ ਪੀ ਪੀ ਕੋਸਿਆ। ਕੀ ਜੇਲ੍ਹ ਦੇ ਅੰਦਰ ਬਿਕਰਮ ਮਜੀਠੀਆ ਨੇ ਕਿਸੇ ਪਰੇਸ਼ਾਨੀ ਦਾ ਜ਼ਿਕਰ ਕੀਤਾ ? ਕੀ ਬਿਕਰਮ ਮਜੀਠੀਆ ਨੇ ਸੁਖਬੀਰ ਬਾਦਲ ਕੋਲ ਕਿਸੇ ਅਜਿਹੀ ਗੱਲ ਦਾ ਜ਼ਿਕਰ ਕੀਤਾ ਜਿਸ ਤੋਂ ਸੁਖਬੀਰ ਬਾਦਲ ਦਾ ਪਾਰਾ ਚੜ ਗਿਆ ? ਸੂਤਰਾਂ ਅਨੁਸਾਰ ਬੈਰਕ ਵਿੱਚ ਬਿਕਰਮ ਮਜੀਠੀਆ ‘ਤੇ ਕੁਝ ਇਸ ਤਰੀਕੇ ਨਾਲ ਨਜ਼ਰ ਰੱਖੀ ਜਾ ਰਹੀ ਹੈ ਕਿ ਬੈਰਕ ਵਿੱਚ ਮਜੀਠੀਏ ਵੱਲੋਂ ਲਈ ਜਾਂਦੀ “ਅੰਗੜਾਈ” ਦੀ ਰਿਪੋਰਟ ਵੀ ਕੀਤੀ ਜਾਂਦੀ ਹੈ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਆਮ ਆਦਮੀ ਪਾਰਟੀ ਦੇ ਕੌਮੀ ਪੱਧਰ ਦੇ ਆਗੂਆਂ ਨੇ ਇਕ ਆਈਪੀਐਸ ਅਧਿਕਾਰੀ ਐਸਐਸਪੀ ਦੇ ਉੱਪਰ ਵੀ ਲਗਾਇਆ ਹੋਇਆ ਹੈ, ਜੋ ਬਿਕਰਮ ਮਜੀਠੀਆ ਦੀ ਜੇਲ੍ਹਬੰਦੀ ਦੀ ਪਲ ਪਲ ਦੀ ਰਿਪੋਰਟ ਲੈ ਰਿਹਾ ਹੈ।
ਭਾਵੇਂ ਕਿ ਜੇਲ੍ਹਾਂ ਦਾ ਇੱਕ ਵੱਖਰਾ ਆਪਣਾ ਵਿਭਾਗ ਹੈ ਪ੍ਰੰਤੂ ਜੇਲ੍ਹ ਵਿਭਾਗ ਦੇ ਅਧਿਕਾਰੀਆਂ ‘ਤੇ ਯਕੀਨ ਨਾ ਕਰਕੇ ਆਮ ਆਦਮੀ ਪਾਰਟੀ ਦੀ ਲੀਡਰਸ਼ਿਪ ਨੇ ਇਸ ਮਾਮਲੇ ‘ਤੇ ਆਪਣੇ ਖਾਸਮ ਖਾਸ ਆਈਪੀਐਸ ਅਧਿਕਾਰੀ ਨੂੰ “ਆਫ਼ ਦੀ ਰਿਕਾਰਡ” ਜ਼ਿੰਮੇਵਾਰੀ ਦਿੱਤੀ ਹੋਈ ਹੈ। ਚਰਚਾ ਤਾਂ ਇਹ ਵੀ ਹੋ ਰਹੀ ਹੈ ਕਿ ਬਿਕਰਮ ਮਜੀਠੀਆ ਦੀ ਜੇਲ੍ਹਬੰਦੀ ਆਮ ਆਦਮੀ ਪਾਰਟੀ ਦੀ 2027 ਦੀਆਂ ਵਿਧਾਨ ਸਭਾ ਚੋਣਾਂ ਦੀ ਰਣਨੀਤੀ ਦਾ ਇੱਕ ਹਿੱਸਾ ਹੀ ਹੈ। ਬਿਕਰਮ ਮਜੀਠੀਆ ਦੀ ਗ੍ਰਿਫਤਾਰੀ ਤੋਂ ਬਾਅਦ ਉਹਨਾਂ ਨੂੰ ਨਾਭਾ ਜੇਲ੍ਹ ਵਿੱਚ ਰੱਖਣਾ ਅਤੇ ਵਰੁਣ ਸ਼ਰਮਾ ਨੂੰ ਪਟਿਆਲੇ ਦਾ ਐਸਐਸਪੀ ਨਿਯੁਕਤ ਕਰਨਾ ਇੱਕ ਦੂਜੇ ਨਾਲ ਜੁੜੀਆਂ ਘਟਨਾਵਾਂ ਹਨ। ਆਪ ਦੀ ਕੌਮੀ ਲੀਡਰਸ਼ਿਪ ਹੀ ਨਹੀਂ ਸਗੋਂ ਮੁੱਖ ਮੰਤਰੀ ਭਗਵੰਤ ਮਾਨ ਵੀ ਮਜੀਠੀਆ ਦੇ ਮਾਮਲੇ ਸਬੰਧੀ ਪੂਰੇ ਗੰਭੀਰ ਹਨ ਅਤੇ ਉਹ ਪਟਿਆਲੇ ਬੈਠੇ ਆਪਣੇ ਇੱਕ ਖਾਸਮ ਖਾਸ ਰਾਹੀਂ ਮਜੀਠੀਆ ਦੇ ਮਾਮਲੇ ਸਬੰਧੀ ਪਲ ਪਲ ਰਿਪੋਰਟ ਲੈ ਰਹੇ ਹਨ। ਮਜੀਠੀਆ ਤੋਂ ਪਹਿਲਾਂ ਵੀ ਹੋਰ ਨੇਤਾਵਾਂ ‘ਤੇ ਆਮਦਨ ਤੋਂ ਵੱਧ ਜਾਇਦਾਦ ਬਣਾਉਣ ਸਬੰਧੀ ਮਾਮਲੇ ਦਰਜ ਹੋਏ ਹਨ ਪ੍ਰੰਤੂ ਜਿਸ ਤਰੀਕੇ ਨਾਲ ਮਜੀਠੀਆ ਦੇ ਮਾਮਲੇ ਨੂੰ “ਟਰੀਟ” ਕੀਤਾ ਜਾ ਰਿਹਾ ਹੈ, ਉਸ ਨੂੰ ਵੇਖਦੇ ਹੋ ਲੱਗਦਾ ਹੈ ਕਿ ਮਜੀਠੀਆ ਦਾ ਮਾਮਲਾ “ਕਾਨੂੰਨੀ” ਤੋਂ ਜਿਆਦਾ “ਸਿਆਸੀ” ਹੈ ਅਤੇ ਉਸਨੂੰ ਸਿਆਸਤ ਦੇ ਨਜ਼ਰੀਏ ਤੋਂ ਹੀ ਵੇਖਿਆ ਤੇ ਨਜਿੱਠਿਆ ਜਾ ਰਿਹਾ ਹੈ। ਸੁਖਬੀਰ ਸਿੰਘ ਬਾਦਲ ਵੱਲੋਂ ਮਜੀਠੀਆ ਨਾਲ ਮੁਲਾਕਾਤ ਕਰਨ ਤੋਂ ਬਾਅਦ ਜੇਲ੍ਹ ਦੇ ਬਾਹਰ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਵਰਤੀ ਸ਼ਬਦਾਵਲੀ ਅਤੇ ਕੱਢੀ ਗਈ ਭੜਾਸ ਇਸ ਸਬੰਧੀ ਸਾਰੀ ਕਹਾਣੀ ਨੂੰ ਸਪੱਸ਼ਟ ਕਰ ਰਹੀ ਹੈ।
