ਬਰਨਾਲਾ ,18 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ)-
– ਬਰਨਾਲਾ ‘ਚ ਸੱਤਾਧਾਰੀ ਪਾਰਟੀ ਦੇ ਵਿਰੋਧੀ ਕੌਂਸਲਰਾਂ ਦੇ ਨਾਲ ਸੰਬੰਧਿਤ ਵਾਰਡਾਂ ਵਿੱਚ ਬਹੁਤ ਸਾਰੇ ਵਿਕਾਸ ਕਾਰਜ ਅਜਿਹੇ ਹਨ ਜਿਹੜੇ ਚਿਰਾਂ ਤੋਂ ਲਟਕੇ ਹੋਏ ਹਨ ਅਤੇ ਜਿਨ੍ਹਾਂ ਦੇ ਅਧੂਰੇ ਹੋਣ ਕਾਰਨ ਆਮ ਲੋਕਾਂ ਨੂੰ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਵਿਰੋਧੀ ਕੌਂਸਲਰਾਂ ਦੇ ਵਾਰਡਾਂ ‘ਚ ਵਿਕਾਸ ਕੰਮਾਂ ਦੇ ਟੈਂਡਰ ਸਿਰਫ਼ ਇਸੇ ਕਰਕੇ ਨਹੀਂ ਲਗਾਏ ਜਾ ਰਹੇ ਜਾਂ ਫਿਰ ਲੰਮੇ ਸਮੇਂ ਤੋਂ ਲਗਾਏ ਗਏ ਟੈਂਡਰਾਂ ਦੇ ਵਰਕ ਆਰਡਰ ਨਹੀਂ ਦਿੱਤੇ ਜਾ ਰਹੇ ਕਿਉਂਕਿ ਉਹ ਸੱਤਾਧਾਰੀ ਪਾਰਟੀ ਦੇ ਵਿਰੋਧੀ ਖ਼ੇਮੇ ਵਿੱਚ ਹਨ। ਇਹ ਵੀ ਹੈਰਾਨੀਜਨਕ ਹੈ ਕਿ ਵਰਕ ਆਰਡਰ ਕੱਟੇ ਜਾਣ ਤੋਂ ਬਾਅਦ ਵੀ ਕੰਮ ਸ਼ੁਰੂ ਨਹੀਂ ਕੀਤਾ ਜਾ ਰਿਹਾ। ਅਜਿਹੀ ਇੱਕ ਸਮੱਸਿਆ ਨਾਲ ਲੱਖੀ ਕਾਲੋਨੀ ਵਾਰਡ ਨੰਬਰ 27 ਦੇ ਵਾਸੀਆਂ ਨੂੰ ਜੂਝਣਾ ਪੈ ਰਿਹਾ ਹੈ। ਲੱਖੀ ਕਲੋਨੀ ਦੀ ਮੇਨ ਗਲੀ ਨੰਬਰ 2 ਵਿੱਚੋਂ ਲੰਘਦੇ ਰਜਵਾਹੇ ਨੂੰ ਕੁਝ ਸਮਾਂ ਪਹਿਲਾਂ ਵੱਡੀਆਂ ਪਾਈਪਾਂ ਪਾ ਕੇ ਬੰਦ ਕਰ ਦਿੱਤਾ ਗਿਆ ਸੀ ਅਤੇ ਉੱਪਰ ਇੰਟਰਲਾਕ ਟਾਈਲਾਂ ਲਗਾ ਦਿੱਤੀਆਂ ਗਈਆਂ ਹਨ ਪ੍ਰੰਤੂ ਗਲੀ ਨੰਬਰ 2 ਦੇ ਬਿਲਕੁਲ ਵਿਚਕਾਰ ਰਜਵਾਹੇ ਦੀ ਪੁਲੀ ਉਸੇ ਸਮੇਂ ਤੋਂ ਜਿਉਂ ਦੀ ਤਿਉਂ ਟੁੱਟੀ ਹੋਈ ਛੱਡ ਦਿੱਤੀ ਗਈ ਜਿਸ ਉੱਪਰ ਨਾ ਤਾਂ ਪ੍ਰੀਮਿਕਸ ਪਾਈ ਜਾ ਰਹੀ ਹੈ ਤੇ ਨਾ ਹੀ ਇੰਟਰਲਾਕ ਟਾਈਲਾਂ ਲਗਾਈਆਂ ਜਾ ਰਹੀਆਂ ਹਨ। ਕਾਲੋਨੀ ਦੇ ਵਾਸੀਆਂ ਨੇ ਕਈ ਵਾਰ ਇਹ ਮਾਮਲਾ ਸੱਤਾਧਾਰੀ ਪਾਰਟੀਆਂ ਦੇ ਆਗੂਆਂ ਨੇ ਧਿਆਨ ਵਿੱਚ ਲਿਆਂਦਾ ਪ੍ਰੰਤੂ ਇਹ ਵਾਰਡ ਨੰਬਰ 27 ਵਿਰੋਧੀ ਖ਼ੇਮੇ ਦੇ ਕੌਂਸਲਰ ਨਾਲ ਸਬੰਧਤ ਹੋਣ ਕਰ ਰਹੇ ਨੇ ਇਸ ਦਾ ਬਦਲਾ ਕਲੋਨੀ ਵਾਸੀਆਂ ਤੋਂ ਲਿਆ ਜਾ ਰਿਹਾ ਹੈ। ਇਸ ਸਬੰਧੀ ਜਦ ਵਾਰਡ ਨੰਬਰ 27 ਤੋਂ ਕੌਂਸਲਰ ਸ੍ਰੀਮਤੀ ਮੀਨੂ ਬਾਂਸਲ ਦੇ ਪਤੀ ਮੰਗਤ ਬਾਂਸਲ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ ਇਸ ਰਜਵਾਹੇ ਤੋਂ ਨਾਨਕਸਰ ਠਾਠ ਵਾਲੇ ਪਾਸੇ ਮੇਨ ਰੋਡ ਤੱਕ ਸੜਕ ਬਣਨ ਲਈ ਕਰੀਬ ਡੇਢ ਸਾਲ ਪਹਿਲਾਂ ਟੈਂਡਰ ਪਾਸ ਹੋ ਚੁੱਕੇ ਹਨ ਪਰੰਤੂ ਬਦਲਾਖ਼ੋਰੀ ਕਾਰਨ ਕੰਮ ਸ਼ੁਰੂ ਨਹੀਂ ਕੀਤਾ ਜਾ ਰਿਹਾ। ਉਹਨਾਂ ਕਿਹਾ ਕਿ ਜਦ ਅਧਿਕਾਰੀਆਂ ਨੂੰ ਸਿਰਫ਼ ਰਜਵਾਹੇ ਦੀ ਕੱਚੀ ਪੁਲੀ ਪੱਕੇ ਕਰਨ ਖ਼ਾਤਰ ਕਹਿੰਦੇ ਹਾਂ ਤਾਂ ਅੱਗੋਂ ਜਵਾਬ ਮਿਲਦਾ ਹੈ ਕਿ “ਪੂਰੀ ਸੜਕ ਦਾ ਟੈਂਡਰ ਹੋ ਚੁੱਕਿਆ ਹੈ, ਸਾਰੀ ਸੜਕ ਦਾ ਕੰਮ ਹੀ ਹੋਵੇਗਾ”। ਹੁਣ ਇਹ ਕੋਈ ਨਹੀਂ ਦੱਸ ਰਿਹਾ ਕਿ ਸੜਕ ‘ਤੇ ਪ੍ਰੀਮਿਕਸ ਪੈਣ ਦਾ ਕੰਮ ਕਦੋਂ ਸ਼ੁਰੂ ਹੋਵੇਗਾ ਜਦ ਕਿ ਰਜਵਾਹੇ ਦੀ ਕੱਚੀ ਪੂਲੀ ਕਾਰਨ ਲੋਕਾਂ ਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਲੋਕਾਂ ਦੀ ਇਸ ਸਮੱਸਿਆ ਸਬੰਧੀ ਕਾਲੋਨੀ ਵਾਸੀਆਂ ਸ੍ਰੀ ਪੀਡੀ ਸ਼ਰਮਾ, ਜਗਰੂਪ ਰੂਪ ਟਾਇਰਾਂ ਵਾਲੇ, ਤਰਸੇਮ ਗਰਗ ਲੋਹਾਖੇੜਾ ਵਾਲੇ, ਡਾਕਟਰ ਅਸ਼ੋਕ ਗਰਗ, ਪ੍ਰੇਮ ਕੁਮਾਰ ਗੁਪਤਾ, ਪ੍ਰਮੋਦ ਕੁਮਾਰ, ਕੁਸ਼ਲ ਬਾਂਸਲ, ਰਕੇਸ਼ ਬੰਟੂ, ਰਮੇਸ਼ ਕੁਮਾਰ ਸਿੰਗਲਾ ਤੇ ਵਿਨੋਦ ਸਿੰਗਲਾ ਨੇ ਵੀ ਮੰਗ ਕੀਤੀ ਕਿ ਰਜਵਾਹੇ ਦੀ ਇਸ ਕੱਚੀ ਪੁਲੀ ਨੂੰ ਜਲਦੀ ਪੱਕਾ ਕੀਤਾ ਜਾਵੇ ਤਾਂ ਜੋ ਲੋਕਾਂ ਨੂੰ ਇਸ ਸਮੱਸਿਆ ਤੋਂ ਛੁਟਕਾਰਾ ਮਿਲੇ ਕਿਉਂਕਿ ਥੋੜੀ ਜਿਹੀ ਬਰਸਾਤ ਹੋਣ ਕਾਰਨ ਜਾਂ ਕਿਸੇ ਪਾਸੇ ਪਾਣੀ ਦੀ ਲੀਕੇਜ ਹੋਣ ਕਾਰਨ ਇਥੋਂ ਲੰਘਣਾ ਮੁਸ਼ਕਿਲ ਹੋ ਜਾਂਦਾ ਹੈ। ਇਸ ਸਬੰਧੀ ਜਦੋਂ ਨਗਰ ਕੌਂਸਲ ਦੇ ਪ੍ਰਧਾਨ ਗੁਰਜੀਤ ਸਿੰਘ ਰਾਮਣਵਾਸੀਆ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ ਲੱਖੀ ਕਾਲੋਨੀ ਦੀ ਗਲੀ ਨੰਬਰ 2 ਵਿੱਚ ਜਲਦੀ ਹੀ ਸੜਕ ਬਣਾਈ ਜਾਵੇਗੀ ਅਤੇ ਰਜਵਾਹੇ ਦੀ ਪੁਲੀ ਦੀ ਕੱਚੀ ਜਗ੍ਹਾ ਨੂੰ ਦੁਬਾਰਾ ਵੱਟੇ ਪਾ ਕੇ ਬਣਾਇਆ ਜਾਵੇਗਾ ਅਤੇ ਉਪਰ ਪ੍ਰੀਮਿਕਸ ਪਾ ਦਿੱਤੀ ਜਾਵੇਗੀ। ਉਹਨਾਂ ਕਿਹਾ ਕਿ ਲੋਕਾਂ ਦੀ ਇਹ ਸਮੱਸਿਆ ਜਲਦੀ ਹੀ ਹੱਲ ਕੀਤੀ ਜਾਵੇਗੀ।
ਫੋਟੋ ਕੈਪਸ਼ਨ-ਰਜਵਾਹੇ ਦੀ ਕੱਚੀ ਪੁਲੀ ਦੀ ਤਸਵੀਰ
