ਚੰਡੀਗੜ੍ਹ 6 ਫਰਵਰੀ 2026, Gee98 News service-
-ਪੰਜਾਬ ਪੁਲਿਸ ਅਕਸਰ ਲੋਕਾਂ ਨੂੰ ਇਹ ਹਦਾਇਤਾਂ ਜਾਰੀ ਕਰਦੀ ਹੈ ਕਿ ਨੌਕਰ ਰੱਖਣ ਤੋਂ ਪਹਿਲਾਂ ਉਸਦੀ ਪੂਰੀ ਵੈਰੀਫਿਕੇਸ਼ਨ ਕਰੋ ਅਤੇ ਉਸਦੀ ਰਿਹਾਇਸ਼ ਸੰਬੰਧੀ ਪੂਰੇ ਦਸਤਾਵੇਜ਼ ਲਵੋ ਪ੍ਰੰਤੂ ਲੋਕ ਫਿਰ ਵੀ ਲਾਪਰਵਾਹੀ ਕਰਦੇ ਹਨ ਅਤੇ ਕਈ ਵਾਰ ਇਸ ਲਾਪਰਵਾਹੀ ਦੇ ਨਤੀਜੇ ਬੜੇ ਖ਼ਤਰਨਾਕ ਨਿਕਲਦੇ ਹਨ। ਅਜਿਹਾ ਇੱਕ ਮਾਮਲਾ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੋਹਾਲੀ) ਤੋਂ ਸਾਹਮਣੇ ਆਇਆ ਹੈ। ਮੋਹਾਲੀ ਦੀ ਰਹਿਣ ਵਾਲੀ ਇੱਕ ਔਰਤ ਜਰਮਨੀ ਵਿੱਚ ਰਹਿ ਰਹੀ ਆਪਣੀ ਗਰਭਵਤੀ ਬੇਟੀ ਲਈ ਪੰਜੀਰੀ ਲੈ ਕੇ ਗਈ ਜਿਸ ਨੂੰ ਖਾ ਕੇ ਸਾਰਾ ਪਰਿਵਾਰ ਬਿਮਾਰ ਹੋ ਗਿਆ, ਜਿਸ ਬੇਟੀ ਲਈ ਪੰਜੀਰੀ ਬਣਾਈ ਗਈ ਸੀ ਉਸਦੀ ਹਾਲਤ ਨਾਜ਼ੁਕ ਹੈ ਅਤੇ ਉਹ ਵੈਂਟੀਲੇਟਰ ‘ਤੇ ਹੈ ਅਤੇ ਉਸਦੀ ਨਵਜੰਮੀ ਬੱਚੀ ਦੀ ਹਾਲਤ ਵੀ ਖ਼ਰਾਬ ਹੈ। ਸਾਰੇ ਪਰਿਵਾਰ ਦੇ ਮੈਂਬਰਾਂ ਦੇ ਇੱਕਦਮ ਬਿਮਾਰ ਹੋਣ ਤੋਂ ਬਾਅਦ ਮਾਮਲਾ ਜਰਮਨੀ ਪੁਲਿਸ ਤੱਕ ਪਹੁੰਚਿਆ ਅਤੇ ਜਦ ਜਰਮਨੀ ਪੁਲਿਸ ਨੇ ਜਾਂਚ ਕੀਤੀ ਤਾਂ ਪਤਾ ਚੱਲਿਆ ਕਿ ਪੰਜੀਰੀ ਵਿੱਚ ਥੈਲੀਅਮ ਨਾਮ ਦਾ ਜ਼ਹਿਰ ਸੀ ਜਿਸ ਨੂੰ ਅਕਸਰ ਚੂਹੇ ਮਾਰਨ ਵਾਲੀ ਦਵਾਈ ਅਤੇ ਕੀਟਨਾਸ਼ਕਾਂ ਵਿੱਚ ਇਸਤੇਮਾਲ ਕੀਤਾ ਜਾਂਦਾ ਹੈ। ਇਹ ਪੰਜੀਰੀ ਖਾਣ ਵਾਲੀਆਂ ਪਰਿਵਾਰਕ ਔਰਤਾਂ ਦੇ ਸਿਰ ਦੇ ਸਾਰੇ ਵਾਲ ਵੀ ਝੜ ਗਏ ਹਨ। ਮੋਹਾਲੀ ਦੀ ਔਰਤ ਨੇ ਇਸ ਮਾਮਲੇ ਵਿੱਚ ਆਪਣੇ ਇੱਕ ਨੌਕਰ ਦੇ ਖ਼ਿਲਾਫ਼ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਹੈ ਅਤੇ ਕਿਹਾ ਹੈ ਕਿ ਇਹ ਸਾਰੇ ਪਰਿਵਾਰ ਦੀ ਸਮੂਹਿਕ ਹੱਤਿਆ ਦੀ ਕੋਸ਼ਿਸ਼ ਹੈ, ਫਿਲਹਾਲ ਨੌਕਰ ਫਰਾਰ ਹੈ ਤੇ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਪ੍ਰਾਪਤ ਵੇਰਵੇ ਅਨੁਸਾਰ ਮੋਹਾਲੀ ਦੇ ਸੈਕਟਰ 117 ਲਈ ਰਹਿਣ ਵਾਲੀ ਰਚਨਾ ਕਪੂਰ (49) ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਕੁਝ ਸਾਲ ਪਹਿਲਾਂ ਉਸਦੇ ਪਤੀ ਦੀ ਮੌਤ ਹੋ ਚੁੱਕੀ ਹੈ। ਉਸ ਦੀ ਆਪਣੀ ਸੈਨੇਟਰੀ ਨੈਪਕਨ ਬਣਾਉਣ ਦੀ ਕੰਪਨੀ ਹੈ ਜੋ ਗੁਜਰਾਤ ਵਿੱਚ ਹੈ ਅਤੇ ਗਲੋਬਲ ਵੀਜ਼ਨ ਨੈੱਟਵਰਕ ਨਾਮ ਦੀ ਇੱਕ ਆਈਟੀ ਕੰਪਨੀ ਵੀ ਹੈ। ਉਸਨੇ ਦੱਸਿਆ ਕਿ ਉਸਦੀ ਬੇਟੀ ਐਡਵੋਕੇਟ ਰਣਜੀਤਾ ਬੱਤਰਾ ਵਿਆਹ ਤੋਂ ਬਾਅਦ ਜਰਮਨੀ ‘ਚ ਰਹਿ ਰਹੀ ਹੈ ਜਿਸ ਦੇ ਦੂਜਾ ਬੱਚਾ ਹੋਣ ਵਾਲਾ ਸੀ ਅਤੇ ਉਸਦੀ ਡਿਲੀਵਰੀ ਦੇ ਸਮੇਂ ਉਹ ਪੰਜਾਬ ਤੋਂ ਜਰਮਨ ਗਈ ਸੀ। ਔਰਤ ਨੇ ਦੱਸਿਆ ਕਿ 9 ਦਿਸੰਬਰ 2025 ਨੂੰ ਉਸ ਦੀ ਜਰਮਨੀ ਦੀ ਫਲਾਈਟ ਸੀ। ਉਸਨੇ 7 ਦਸੰਬਰ ਨੂੰ ਆਪਣੀ ਗਰਭਵਤੀ ਬੇਟੀ ਲਈ ਆਪਣੀ ਇੱਕ ਮਿੱਤਰ ਦੇ ਘਰ ਪੰਚਕੁਲਾ ਵਿੱਚ ਪੰਜੀਰੀ ਬਣਾਈ ਅਤੇ ਪੰਜੀਰੀ ਦੇ ਤਿੰਨ ਪੈਕੇਟ ਬਣਾ ਕੇ ਆਪਣੇ ਘਰ ਲਿਆ ਕੇ ਡਾਈਨਿੰਗ ਟੇਬਲ ‘ਤੇ ਰੱਖ ਦਿੱਤੇ। ਉਸਨੇ ਦੱਸਿਆ ਕਿ 8 ਦਸੰਬਰ ਨੂੰ ਉਸਨੇ ਸਮਾਨ ਪੈਕ ਕੀਤਾ 9 ਦਸੰਬਰ ਨੂੰ ਫਲਾਈਟ ਫੜੀ ਅਤੇ ਜਰਮਨ ਪਹੁੰਚ ਗਈ ਜਿੱਥੇ ਉਸਨੇ ਪੰਜੀਰੀ ਦਾ ਇੱਕ ਪੈਕੇਟ ਖੋਲ ਕੇ ਉਸਦੇ ਲੱਡੂ ਬਣਾ ਦਿੱਤੇ। ਇਹ ਲੱਡੂ ਉਸਦੀ ਬੇਟੀ ਨੇ ਅਤੇ ਉਸਨੇ ਵੀ ਖਾਧੇ। ਇਸ ਤੋਂ ਬਾਅਦ ਉਸਨੇ ਦੂਜੇ ਦੋ ਪੈਕੇਟਾਂ ਦੇ ਵੀ ਲੱਡੂ ਬਣਾ ਦਿੱਤੇ। ਰਚਨਾ ਕਪੂਰ ਨੇ ਦੱਸਿਆ ਕਿ 26 ਦਸੰਬਰ ਨੂੰ ਉਸਦੀ ਬੇਟੀ ਦੇ ਸਹੁਰੇ ਪਰਿਵਾਰ ਵਾਲੇ ਵੀ ਜਰਮਨੀ ਆਏ, 1 ਜਨਵਰੀ 2026 ਨੂੰ ਉਸਦੀ ਬੇਟੀ ਨੇ ਇੱਕ ਬੱਚੇ ਨੂੰ ਜਨਮ ਦਿੱਤਾ ਜੋ 2026 ‘ਚ ਪੈਦਾ ਹੋਣ ਵਾਲਾ ਏਰੀਏ ਦਾ ਪਹਿਲਾ ਬੱਚਾ ਸੀ ਜਿਸ ਕਰਕੇ ਬੱਚੇ ਦੀ ਫੋਟੋ ਜਰਮਨੀ ਦੇ ਮੀਡੀਆ ਨੇ ਵੱਖ ਵੱਖ ਅਖ਼ਬਾਰਾਂ ਵਿੱਚ ਛਾਪੀ। ਸਾਰਾ ਪਰਿਵਾਰ ਖੁਸ਼ ਸੀ ਕਿ ਉਹਨਾਂ ਦੀ ਬੱਚੀ ਜਨਮ ਲੈਂਦੇ ਹੀ ਸਟਾਰ ਬਣ ਗਈ। ਔਰਤ ਨੇ ਦੱਸਿਆ ਕਿ ਬੱਚੀ ਦੇ ਜਨਮ ਤੋਂ ਬਾਅਦ ਉਸਨੇ ਪੰਜੀਰੀ ਵਾਲੇ ਲੱਡੂਆਂ ਦਾ ਇੱਕ ਪੈਕੇਟ ਹਸਪਤਾਲ ਭੇਜ ਦਿੱਤਾ ਜਿਸ ਵਿੱਚੋ ਉਸਨੇ ਖ਼ੁਦ,ਉਸਦੀ ਬੇਟੀ ਨੇ ਅਤੇ ਬੇਟੀ ਦੀ ਸੱਸ ਨੇ ਵੀ ਲੱਡੂ ਖਾਧੇ। ਇਸ ਤੋਂ ਇਲਾਵਾ ਉਸਦੀ ਬੇਟੀ ਦੀ ਨਣਦ ਤੇ ਕੁਝ ਹੋਰ ਲੋਕਾਂ ਨੇ ਵੀ ਪੰਜੀਰੀ ਵਾਲੇ ਇਹ ਲੱਡੂ ਖਾਧੇ ਪਰੰਤੂ ਲੱਡੂ ਖਾਣ ਤੋਂ ਬਾਅਦ ਹੀ ਸਾਰਿਆਂ ਦੀ ਸਿਹਤ ਵਿਗੜ ਗਈ ਇਸ ਤੋਂ ਬਾਅਦ ਉਸਦੀ ਬੇਟੀ ਨੂੰ ਤੇ ਨਵਜਨਮੀ ਬੇਟੀ ਨੂੰ, ਬੇਟੀ ਦੀ ਸੱਸ ਨੂੰ, ਨਨਦ ਅਤੇ ਖੁਦ ਉਸ ਨੂੰ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ। ਕਿਸੇ ਨੂੰ ਕੁਝ ਸਮਝ ਨਹੀਂ ਆ ਰਿਹਾ ਸੀ ਕਿ ਅਚਾਨਕ ਕੀ ਹੋਇਆ। ਔਰਤ ਨੇ ਦੱਸਿਆ ਕਿ ਉਸ ਦੀ ਬੇਟੀ ਨੇ ਬੱਚੀ ਨੂੰ ਜਨਮ ਦੇਣ ਤੋਂ ਬਾਅਦ ਸਿਰਫ਼ ਇੱਕ ਦਿਨ ਹੀ ਆਪਣਾ ਦੁੱਧ ਪਿਲਾਇਆ ਸੀ ਜਿਸ ਤੋਂ ਬਾਅਦ ਨਵਜੰਮੀ ਬੱਚੀ ਦੀ ਹਾਲਤ ਵੀ ਖ਼ਰਾਬ ਹੋ ਗਈ। ਰਚਨਾ ਕਪੂਰ ਨੇ ਦੱਸਿਆ ਕਿ ਉਹ ਅਤੇ ਸਾਰੇ ਰਿਸ਼ਤੇਦਾਰ ਟੂਰਿਸਟ ਵੀਜ਼ੇ ‘ਤੇ ਹੀ ਜਰਮਨੀ ਗਏ ਸਨ ਇਸ ਲਈ ਬਿਮਾਰੀ ਦੀ ਹਾਲਤ ਵਿੱਚ ਸਾਰਿਆਂ ਨੂੰ ਏਅਰਲਿਫਟ ਕਰਕੇ ਭਾਰਤ ਭੇਜਿਆ ਗਿਆ ਜਿੱਥੇ ਉਸਦੀ ਬੇਟੀ ਦੀ ਸੱਸ ਨੂੰ ਦਿੱਲੀ ਦੇ ਇੱਕ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਅਤੇ ਉਹ ਖ਼ੁਦ ਮੋਹਾਲੀ ਦੇ ਹਸਪਤਾਲ ਵਿੱਚ ਦਾਖਲ ਹੋਈ। ਇਸ ਦੌਰਾਨ ਜਰਮਨੀ ਦੇ ਹਸਪਤਾਲ ਅਤੇ ਜਰਮਨੀ ਦੀ ਪੁਲਿਸ ਨੇ ਸਾਰੇ ਮਾਮਲੇ ਦੀ ਪੜ੍ਹਤਾਲ ਕੀਤੀ ਤਾਂ ਸਾਹਮਣੇ ਆਇਆ ਕਿ ਜੋ ਪੰਜੀਰੀ ਦੇ ਲੱਡੂ ਪਰਿਵਾਰਕ ਮੈਂਬਰਾਂ ਨੇ ਖਾਧੇ ਹਨ ਉਸ ਵਿੱਚ ਥੈਲਿਅਮ ਨਾਮ ਦਾ ਜ਼ਹਿਰ ਸੀ।
ਭਾਰਤ ਦੇ ਵੀ ਜਿਹੜੇ ਹਸਪਤਾਲਾਂ ਵਿੱਚ ਪਰਿਵਾਰਿਕ ਮੈਂਬਰ ਦਾਖਲ ਹਨ, ਉਸ ਹਸਪਤਾਲ ਦੇ ਡਾਕਟਰਾਂ ਨੇ ਵੀ ਪੰਜੀਰੀ ਵਿੱਚ ਥੈਲਿਆਮ ਦੀ ਮਾਤਰਾ ਦੀ ਪੁਸ਼ਟੀ ਕੀਤੀ ਹੈ। ਪੀੜ੍ਹਤ ਰਚਨਾ ਕਪੂਰ ਨੇ ਦੱਸਿਆ ਕਿ ਉਸਦੀ ਬੇਟੀ ਹੁਣ ਵੀ ਜਰਮਨੀ ਦੇ ਹੈਮਬਸਰਗ ਦੇ ICU ਵਿੱਚ ਜ਼ਿੰਦਗੀ ਤੇ ਮੌਤ ਦੀ ਲੜਾਈ ਲੜ ਰਹੀ ਹੈ। ਔਰਤ ਨੇ ਦੱਸਿਆ ਕਿ ਉਸਨੂੰ 3 ਫਰਵਰੀ ਨੂੰ ਮੋਹਾਲੀ ਦੇ ਹਸਪਤਾਲ ਤੋਂ ਛੁੱਟੀ ਮਿਲੀ ਹੈ। ਇਸ ਦੌਰਾਨ ਘਰ ਆ ਕੇ ਉਸਨੂੰ ਯਾਦ ਆਇਆ ਕਿ ਉਸਦੇ ਘਰ ਦਾ ਪੂਰਾ ਭੇਤੀ ਉਸ ਦਾ ਇੱਕ ਨੌਕਰ ਹੀ ਸੀ ਜਿਸ ਨੂੰ ਉਸਨੇ ਇੱਕ ਮਹੀਨਾ ਪਹਿਲਾਂ ਨੌਕਰੀ ਤੋਂ ਹਟਾ ਦਿੱਤਾ ਸੀ ਪਰੰਤੂ ਜਰਮਨੀ ਜਾਣ ਤੋਂ ਪਹਿਲਾਂ ਉਸਦੇ ਨੌਕਰ ਨੇ ਉਸ ਨੂੰ ਕਿਹਾ ਕਿ ਉਹ ਉਸਦੇ ਜਰਮਨੀ ਤੋਂ ਵਾਪਸ ਆਉਣ ਤੋਂ ਬਾਅਦ ਚਲਿਆ ਜਾਵੇਗਾ ਉਦੋਂ ਤੱਕ ਉਹ ਘਰ ਦੀ ਦੇਖਭਾਲ ਕਰੇਗਾ। ਔਰਤ ਨੇ ਦੱਸਿਆ ਕਿ ਉਹ ਨੌਕਰ ਦੀਆਂ ਗੱਲਾਂ ਵਿੱਚ ਆ ਗਈ ਅਤੇ ਉਸਦੇ ਸਹਾਰੇ ਘਰ ਛੱਡ ਕੇ ਚਲੀ ਗਈ। ਹੁਣ ਵਾਪਸ ਆ ਕੇ ਜਦ ਔਰਤ ਨੇ ਨੌਕਰ ਨੂੰ ਪੁੱਛਿਆ ਕਿ ‘ਪੰਜੀਰੀ ਵਿੱਚ ਜ਼ਹਿਰ ਉਸ ਨੇ ਤਾਂ ਨਹੀਂ ਮਿਲਾਇਆ’ ਤਾਂ ਉਹ ਕਹਿਣ ਲੱਗਿਆ ਕਿ “ਮੈਂ ਅਜਿਹਾ ਕਿਉਂ ਕਰੂੰਗਾ”। ਇਸ ਤੋਂ ਬਾਅਦ ਅਚਾਨਕ ਨੌਕਰ ਘਰ ਛੱਡ ਕੇ ਚਲਾ ਗਿਆ ਅਤੇ ਉਸਦੇ ਤਿੰਨੋ ਮੋਬਾਇਲ ਨੰਬਰ ਬੰਦ ਆ ਰਹੇ ਹਨ। ਇਸ ਮਾਮਲੇ ਸਬੰਧੀ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੋਹਾਲੀ) ਦੇ ਐਸਪੀ ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਸਾਰੇ ਮਾਮਲੇ ਦੀ ਪੂਰੀ ਗੰਭੀਰਤਾ ਨਾਲ ਜਾਂਚ ਕਰ ਰਹੀ ਹੈ। ਉਹਨਾਂ ਕਿਹਾ ਕਿ ‘ਅਸੀਂ ਸਾਰੇ ਤੱਥਾਂ ਤੇ ਮੈਡੀਕਲ ਰਿਪੋਰਟ ਦੀ ਜਾਂਚ ਕਰ ਰਹੇ ਹਾਂ, ਪੂਰੀ ਜਾਂਚ ਤੋਂ ਬਾਅਦ ਐਫਆਈਆਰ ਦਰਜ ਕੀਤੀ ਜਾਵੇਗੀ ਅਤੇ ਦੋਸ਼ੀ ਨੂੰ ਜਲਦੀ ਹੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ”। ਇਸ ਪੂਰੇ ਮਾਮਲੇ ਤੋਂ ਬਾਅਦ ਘਰਾਂ ਵਿੱਚ ਨੌਕਰ ਰੱਖਣ ਵਾਲੇ ਮਕਾਨ ਮਾਲਕਾਂ ਵਿੱਚ ਸਹਿਮ ਦਾ ਮਾਹੌਲ ਬਣਿਆ ਹੋਇਆ ਹੈ ਕਿ ਆਖ਼ਿਰ ਕਿਸੇ ‘ਤੇ ਯਕੀਨ ਕਿਵੇਂ ਕੀਤਾ ਜਾਵੇ।
ਫੋਟੋ ਕੈਪਸ਼ਨ- ਪੂਰੀ ਘਟਨਾ ਸਬੰਧੀ ਗੱਲਬਾਤ ਕਰਦੇ ਸਮੇਂ ਰਚਨਾ ਕਪੂਰ ਦੀ ਤਸਵੀਰ
