ਚੰਡੀਗੜ੍ਹ ,13 ਮਾਰਚ, Gee98 news service-
-ਪੰਜਾਬ ਸਰਕਾਰ ਵੱਲੋਂ 14 ਜਨਵਰੀ 2026 ਨੂੰ ਮਾਘੀ ਦੇ ਮੇਲੇ ਮੌਕੇ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਕਰਵਾਏ ਰਾਜ ਪੱਧਰੀ ਸਮਾਗਮ ‘ਚ ਪੰਜਾਬ ਦੇ ਖਜ਼ਾਨੇ ਵਿੱਚੋਂ ਕੀਤੇ ਖਰਚੇ ਸਬੰਧੀ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਪੱਤਰ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਪੱਤਰ ਦੇ ਅੰਕੜਿਆਂ ਅਨੁਸਾਰ ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ ਮਾਘੀ ਦੇ ਮੇਲੇ ‘ਤੇ ਸਰਕਾਰੀ ਖਜ਼ਾਨੇ ‘ਚੋਂ ਦਿਲ ਖੋਲ ਕੇ ਖਰਚਾ ਕੀਤਾ। ਪੰਜਾਬ ਸਰਕਾਰ ਦੇ ਇਸ ਰਾਜ ਪੱਧਰੀ ਸਮਾਗਮ ‘ਚ ਪੁੱਜੇ VVIP ਲਈ ਪਰੋਸੇ ਗਏ ਖਾਣੇ ਦੀ ਜੇਕਰ ਗੱਲ ਕੀਤੀ ਜਾਵੇ ਤਾਂ ਪ੍ਰਤੀ VVIP ਨੂੰ 2500 ਰੁਪਏ ਪ੍ਰਤੀ ਪਲੇਟ ਦੇ ਹਿਸਾਬ ਨਾਲ ਖਰਚਾ ਪਾਇਆ ਗਿਆ ਹੈ ਜਦਕਿ VIP ਨੂੰ ਦਿੱਤੇ ਗਏ ਖਾਣੇ ਦੀ ਪ੍ਰਤੀ ਪਲੇਟ 1500 ਦੇ ਹਿਸਾਬ ਨਾਲ ਖਰਚਾ ਹੈ। ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਵੱਲੋਂ ਡਿਪਟੀ ਕੰਟਰੋਲਰ (ਵਿੱਤ ਤੇ ਲੇਖਾ) ਸੂਚਨਾ ਤੇ ਲੋਕ ਸੰਪਰਕ ਵਿਭਾਗ ਪੰਜਾਬ ਚੰਡੀਗੜ੍ਹ ਨੂੰ 9 ਜਨਵਰੀ 2026 ਨੂੰ ਲਿਖੇ ਗਏ ਇਸ ਪੱਤਰ ਦੇ ਅੰਕੜਿਆਂ ਅਨੁਸਾਰ ਟੈਂਟ ਪੰਡਾਲ, ਡੈਕੋਰੇਸ਼ਨ, ਸਟੇਜ ਫਰਨੀਚਰ, ਬੈਰੀਕੇਡਿੰਗ, ਬਾਉਂਡਰੀ ਵਾਲ, ਕੁਰਸੀਆਂ, ਮੋਬਾਇਲ ਟਾਇਲਟਜ਼ ਦੀ ਸੁਵਿਧਾ ਅਤੇ ਕਾਰ ਪੇਂਟਿੰਗ ‘ਤੇ ਇੱਕ ਕਰੋੜ 50 ਲੱਖ ਦਾ ਬਜਟ ਰੱਖਿਆ ਗਿਆ ਸੀ। ਇਸੇ ਤਰ੍ਹਾਂ 300 VVIP ਲਈ ਖਾਣੇ ਦੇ ਪ੍ਰਬੰਧ ਵਜੋਂ 2500 ਪ੍ਰਤੀ ਵਿਅਕਤੀ ਦਾ 7,50,000 ਅਤੇ 800 VIP ਦੇ ਖਾਣੇ ਲਈ 1500 ਪ੍ਰਤੀ ਪਲੇਟ ਦੇ ਹਿਸਾਬ ਨਾਲ 12 ਲੱਖ ਰੁਪਏ ਬਜਟ ਦਿਖਾਇਆ ਗਿਆ ਹੈ। ਵੀਆਈਪੀ ਤੋਂ ਇਲਾਵਾ ਵੀ 40 ਹਜ਼ਾਰ ਵਿਅਕਤੀਆਂ ਦੇ ਖਾਣੇ ਲਈ 4 ਲੱਖ ਦਾ ਖਰਚਾ ਦਿਖਾਇਆ ਗਿਆ ਹੈ। ਸਭ ਤੋਂ ਵੱਡੀ ਹੈਰਾਨੀ ਦੀ ਗੱਲ ਹੈ ਕਿ ਪੰਡਾਲ ਵਿੱਚ ਲਾਈਆਂ 10 ਵੱਡੀਆਂ LED ਸਕਰੀਨਾਂ ਲਈ ਪ੍ਰਤੀ ਸਕਰੀਨ 23500 ਖਰਚ ਦਿਖਾਇਆ ਗਿਆ ਹੈ। ਇਸ ਮੌਕੇ ਵੀਆਈਪੀਜ਼ ਨੂੰ ਠੰਡ ਤੋਂ ਬਚਾਉਣ ਲਈ ਵਰਤੇ ਗਏ ਹੀਟਰ ਦਾ ਖਰਚਾ ਹੀ 3,80,000 ਪਾਇਆ ਗਿਆ ਹੈ ਅਤੇ ਜਨਰੇਟਰ ਸਮੇਤ ਡੀਜ਼ਲ 1,76000 ਦਾ ਬਜਟ ਰੱਖਿਆ ਗਿਆ ਸੀ। ਮਾਘੀ ਦੇ ਮੇਲੇ ਮੌਕੇ ਕਰਵਾਏ ਰਾਜ ਪੱਧਰੀ ਸਮਾਗਮ ਸਮੇਂ ਸੜਕਾਂ ਦੀ ਸਫਾਈ ਅਤੇ ਰੁੱਖਾਂ ਨੂੰ ਸੰਵਾਰਨ ਸਬੰਧੀ ਕੰਮ ‘ਤੇ ਹੀ 5 ਲੱਖ ਰੁਪਏ ਖਰਚ ਕੀਤੇ ਗਏ ਦਿਖਾਏ ਗਏ ਹਨ। ਇਸ ਤੋਂ ਇਲਾਵਾ ਕੰਪਿਊਟਰ ਸੈੱਟਅਪ ਅਤੇ ਇੰਟਰਨੈਟ ‘ਤੇ 4 ਲੱਖ 19,800 ਦਾ ਬਜਟ ਦਿਖਾਇਆ ਗਿਆ ਹੈ। ਇਸ ਰਾਜ ਪੱਧਰੀ ਸਮਾਗਮ ਵਿੱਚ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਨੂੰ ਲਿਆਉਣ ਵਾਲੀਆਂ 1640 ਬੱਸਾਂ ਦੀ ਪਾਰਕਿੰਗ ਲਈ 30 ਏਕੜ ਜ਼ਮੀਨ ਠੇਕੇ ‘ਤੇ ਲੈਣ ਸਬੰਧੀ 30 ਕਿੱਲੇ ਜ਼ਮੀਨ ਦੇ 55000 ਪ੍ਰਤੀ ਕਿੱਲੇ ਦੇ ਹਿਸਾਬ ਨਾਲ 16 ਲੱਖ 50000 ਖਰਚ ਪਾਇਆ ਗਿਆ ਹੈ, ਇਸੇ ਤਰ੍ਹਾਂ ਟੈਂਟ ਲਗਾਉਣ ਵਾਲੀ ਜਗ੍ਹਾ ‘ਤੇ 30 ਕਿੱਲੇ ਦਾ ਪ੍ਰਤੀ ਕਿੱਲਾ 55000 ਦੇ ਹਿਸਾਬ ਨਾਲ ਵੀ 16 ਲੱਖ 50000 ਦਾ ਖਰਚਾ ਪਾਇਆ ਗਿਆ ਹੈ।
ਇਸ ਰਾਜ ਪੱਧਰੀ ਸਮਾਗਮ ਵਿੱਚ ਵੱਡੇ ਹੋਰਡਿੰਗਜ, ਮੀਡੀਆ ਕਵਰੇਜ ਅਤੇ ਪੱਤਰਕਾਰਾਂ ਦੇ ਪ੍ਰਬੰਧ ਲਈ 8,60,000 ਦਾ ਖਰਚਾ ਦਿਖਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਆਰਜ਼ੀ ਟਾਇਲਟ ਅਤੇ ਸੀਵਰੇਜ ਸਫਾਈ ਦੇ ਪ੍ਰਬੰਧਾਂ ਵਜੋਂ 5,97,000 ਅਤੇ CCTV ਕੈਮਰੇ ਲਗਾਉਣ ਸਬੰਧੀ 11 ਲੱਖ ਰੁਪਏ ਦਾ ਖਰਚ ਇਸ ਪੱਤਰ ਵਿੱਚ ਦਿਖਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਫੁਟਕਲ ਖਰਚ ਵਜੋਂ ਵੀ ਲੱਗਭੱਗ 80 ਲੱਖ ਰੁਪਏ ਦਾ ਖਰਚਾ ਦਿਖਾਇਆ ਗਿਆ ਹੈ। ਇਸ ਤਰ੍ਹਾਂ ਪੰਜਾਬ ਸਰਕਾਰ ਵੱਲੋਂ 14 ਜਨਵਰੀ ਨੂੰ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਕਰਵਾਏ ਮਾਘੀ ਦੇ ਮੇਲੇ ਮੌਕੇ ਰਾਜ ਪੱਧਰੀ ਸਮਾਗਮ ਵਿੱਚ ਕੁੱਲ ਅਨੁਮਾਨਿਤ ਖਰਚਾ 3 ਕਰੋੜ 87 ਲੱਖ 67,800 ਦਿਖਾਇਆ ਗਿਆ ਹੈ। ਇਹ ਸਾਰਾ ਖਰਚਾ ਪੰਜਾਬ ਦੀ ਖਜ਼ਾਨੇ ਵਿੱਚੋਂ ਕੀਤਾ ਗਿਆ ਹੈ।
ਭਾਵੇਂ ਕਿ ਇਸ ਤਰ੍ਹਾਂ ਦੇ ਰਾਜ ਪੱਧਰੀ ਸਮਾਗਮਾਂ ‘ਤੇ ਪਹਿਲੀਆਂ ਸਰਕਾਰਾਂ ਮੌਕੇ ਵੀ ਖਰਚੇ ਸਰਕਾਰੀ ਖਜ਼ਾਨੇ ਵਿੱਚੋਂ ਹੀ ਹੁੰਦੇ ਆਏ ਹਨ ਪਰੰਤੂ ਪੰਜਾਬ ਦੇ ਮੌਜੂਦਾ ਸਰਕਾਰ ਵੱਲੋਂ ਰਾਜ ਪੱਧਰੀ ਸਮਾਗਮਾਂ ‘ਤੇ ਦਿਲ ਖੋਲ ਕੇ ਕੀਤੇ ਜਾ ਰਹੇ ਖਰਚੇ ਨੇ ਨਵੀਂ ਚਰਚਾ ਛੇੜ ਦਿੱਤੀ ਹੈ ਕਿ ਇਹਨਾਂ ਰਾਜ ਪੱਧਰੀ ਸਮਾਗਮਾਂ ਦਾ ਰਾਜ ਦੀ ਜਨਤਾ ਨੂੰ ਕੀ ਫਾਇਦਾ ਹੁੰਦਾ ਹੈ ਜਿਨਾਂ ਦੇ ਟੈਕਸਾਂ ਦੇ ਪੈਸੇ ਵਿੱਚੋਂ ਇਹਨਾਂ ਸਮਾਗਮਾਂ ‘ਤੇ ਦਿਲ ਖੋਲ੍ਹ ਕੇ ਸਰਕਾਰਾਂ ਵੱਲੋਂ ਖਰਚ ਕੀਤਾ ਜਾਂਦਾ ਹੈ। ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੇ ਇਹ ਅੰਕੜੇ ਆਪਣੀ ਹੱਡ ਭੰਨਵੀਂ ਕਮਾਈ ਵਿੱਚੋਂ ਸਰਕਾਰ ਨੂੰ ਟੈਕਸ ਦੇਣ ਵਾਲਿਆਂ ਨੂੰ ਤਕਲੀਫ਼ ਦੇਣ ਵਾਲੇ ਹਨ। ਮਾਘੀ ਦੇ ਮੇਲੇ ਮੌਕੇ ਰਾਜ ਪੱਧਰੀ ਸਮਾਗਮ ‘ਤੇ ਖਰਚੇ ਸਬੰਧੀ ਵਾਇਰਲ ਹੋ ਰਹੇ ਇਸ ਪੱਤਰ ਤੋਂ ਬਾਅਦ ਇਹ ਚਰਚਾ ਵੀ ਸ਼ੁਰੂ ਹੋ ਗਈ ਹੈ ਕਿ ਸਰਕਾਰਾਂ ਵੱਲੋਂ ਕਰਵਾਏ ਜਾਂਦੇ ਇਹਨਾਂ ਰਾਜ ਪੱਧਰੀ ਸਮਾਗਮਾਂ ਦੀ ਪਰਿਭਾਸ਼ਾ ਅਤੇ ਤੌਰ ਤਰੀਕੇ ਬਦਲੇ ਜਾਣੇ ਚਾਹੀਦੇ ਹਨ।
