ਬਰਨਾਲਾ,14 ਅਪ੍ਰੈਲ, Gee98 news service-
ਬੀਤੇ ਦਿਨ ਬਰਨਾਲਾ ਦੇ ਤਰਕਸ਼ੀਲ ਚੌਂਕ ਤੋਂ ਸੰਘੇੜਾ ਬਾਈਪਾਸ ‘ਤੇ ਪੱਤੀ ਸੇਖਵਾਂ ਚੌਂਕ ‘ਤੇ ਆਪਣੀ ਤੇਜ਼ ਰਫ਼ਤਾਰ ਥਾਰ ਗੱਡੀ ਹੇਠ ਇੱਕ ਗਰੀਬ ਬੰਦੇ ਨੂੰ ਕੁਚਲ ਕੇ ਫਰਾਰ ਹੋਣ ਵਾਲਾ ਸੱਤਾਧਾਰੀ ਆਮ ਆਦਮੀ ਪਾਰਟੀ ਦਾ ਇੱਕ ਸੀਨੀਅਰ ਆਗੂ ਹੀ ਨਿਕਲਿਆ। ਜ਼ਿਕਰਯੋਗ ਹੈ ਕਿ ਐਤਵਾਰ ਬਾਦ ਦੁਪਹਿਰ ਪੱਤੀ ਸੇਖਵਾਂ ਚੌਂਕ ਵਿੱਚ ਇੱਕ ਮੋਟਰਸਾਈਕਲ ਸਵਾਰ ਨੂੰ ਟੱਕਰ ਮਾਰ ਦਿੱਤੀ ਸੀ ਜਿਸ ਨਾਲ ਮੋਟਰਸਾਈਕਲ ਸਵਾਰ ਗੰਭੀਰ ਜ਼ਖਮੀ ਹੋ ਗਿਆ ਜਿਸ ਨੇ ਸਿਵਲ ਹਸਪਤਾਲ ਬਰਨਾਲਾ ਵਿਖੇ ਦਮ ਤੋੜ ਦਿੱਤਾ ਸੀ। ਇਸ ਹਾਦਸੇ ‘ਚ ਮਾਰੇ ਗਏ ਜਗਤਾਰ ਸਿੰਘ ਦੀ ਪਤਨੀ ਦੇ ਬਿਆਨਾਂ ਦੇ ਅਧਾਰ ਤੇ ਜਦ ਬਰਨਾਲਾ ਪੁਲਿਸ ਨੇ ਪੜਤਾਲ ਕੀਤੀ ਤਾਂ ਥਾਰ ਗੱਡੀ ਦਾ ਚਾਲਕ ਆਮ ਆਦਮੀ ਪਾਰਟੀ ਦੇ ਬਰਨਾਲਾ ਦੇ ਸਥਾਨਿਕ ਵੱਡੇ ਆਗੂਆਂ ਸਮੇਤ ਸੂਬਾ ਅਤੇ ਕੌਮੀ ਆਗੂਆਂ ਦਾ ਵੀ ਚਹੇਤਾ ਨਿਕਲਿਆ, ਜਿਸ ਦੀ ਤਸਦੀਕ ਉਸ ਦੀ ਫੇਸਬੁੱਕ ਪ੍ਰੋਫਾਈਲ ‘ਤੇ ਆਪ ਦੇ ਵੱਡੇ ਆਗੂਆਂ ਨਾਲ ਤਸਵੀਰਾਂ ਤੋਂ ਬਾਖ਼ੂਬੀ ਹੁੰਦੀ ਹੈ। ਇਸ ਭਿਆਨਕ ਹਾਦਸੇ ਮਾਰੇ ਜਗਤਾਰ ਸਿੰਘ ਦੀ ਪਤਨੀ ਨੇ ਪੁਲਿਸ ਕੋਲ ਬਿਆਨ ਦਰਜ ਕਰਵਾਏ ਹਨ ਕਿ ਉਸਦਾ ਪਤੀ ਤੇ ਉਹ ਘਰ ਤੋਂ ਬਜ਼ਾਰ ਵੱਲ ਜਾ ਰਹੇ ਸਨ ਤਾਂ ਪੱਤੀ ਸੇਖਵਾਂ ਵਾਲੇ ਚੌਂਕ ‘ਤੇ ਮੇਨ ਸੜਕ ‘ਤੇ ਟ੍ਰੈਫਿਕ ਜ਼ਿਆਦਾ ਹੋਣ ਕਰਕੇ ਉਸਦੇ ਪਤੀ ਨੇ ਆਪਣਾ ਮੋਟਰਸਾਈਕਲ ਰੋਕ ਲਿਆ, ਉਹ ਮੋਟਰਸਾਈਕਲ ਤੋਂ ਉਤਰ ਗਈ, ਇਸ ਦਰਮਿਆਨ ਤਰਕਸ਼ੀਲ ਚੌਂਕ ਵੱਲੋਂ ਆ ਰਹੀ ਕਾਲੇ ਰੰਗ ਦੀ ਤੇਜ਼ ਰਫ਼ਤਾਰ ਥਾਰ ਗੱਡੀ ਨੰਬਰ ਪੀ.ਬੀ 73 ਏ 3699 ਨੇ ਸੜਕ ਤੋਂ ਪਾਸੇ ਕੱਚੀ ਥਾਂ ‘ਤੇ ਮੋਟਰਸਾਈਕਲ ਰੋਕੀ ਖੜੇ ਉਸਦੇ ਪਤੀ ਜਗਤਾਰ ਸਿੰਘ ਨੂੰ ਮੋਟਰਸਾਈਕਲ ਸਮੇਤ ਟੱਕਰ ਮਾਰ ਦਿੱਤੀ ਅਤੇ ਕਾਫੀ ਦੂਰ ਤੱਕ ਘੜੀਸ ਕੇ ਲੈ ਗਈ। ਜਦੋਂ ਉੱਥੇ ਹਾਜ਼ਰ ਲੋਕਾਂ ਨੇ ਰੌਲਾ ਪਾਇਆ ਤਾਂ ਥਾਰ ਗੱਡੀ ਦਾ ਡਰਾਈਵਰ ਗੱਡੀ ਵਿੱਚੋਂ ਉਤਰਿਆ ਅਤੇ ਉਸਨੇ ਕਿਹਾ ਕਿ ” ਮੇਰਾ ਨਾਂ ਧਰਮਵੀਰ ਸਿੰਘ ਪੁੱਤਰ ਪਸ਼ਵਿੰਦਰ ਸਿੰਘ ਵਾਸੀ ਬੱਲੋਕੇ ਹਾਂ, ਅਸੀਂ ਪਿੰਡ ਦੇ ਸਰਪੰਚ ਹੁੰਦੇ ਆਂ, ਮੈਂ ਗੱਡੀ ਮੋੜਦਾ ਹਾਂ ਤੇ ਆਪਾਂ ਇਸ ਨੂੰ ਹਸਪਤਾਲ ਲੈ ਕੇ ਚੱਲਦੇ ਹਾਂ”। ਇਸ ਤੋਂ ਬਾਅਦ ਜਦ ਮ੍ਰਿਤਕ ਜਗਤਾਰ ਸਿੰਘ ਦੀ ਪਤਨੀ ਹੋਰ ਲੋਕਾਂ ਦੀ ਮਦਦ ਨਾਲ ਆਪਣੇ ਪਤੀ ਨੂੰ ਸੰਭਲਣ ਲੱਗੀ ਤਾਂ ਉਕਤ ਧਰਮਵੀਰ ਸਿੰਘ ਅੱਖ ਬਚਾ ਕੇ ਮੌਕੇ ਤੋਂ ਸਮੇਤ ਗੱਡੀ ਫਰਾਰ ਹੋ ਗਿਆ।
ਲੋਕਾਂ ਦੀ ਮਦਦ ਨਾਲ ਜ਼ਖਮੀ ਹੋਏ ਜਗਤਾਰ ਸਿੰਘ ਨੂੰ ਉਸਦੀ ਪਤਨੀ ਜਦ ਸਿਵਿਲ ਹਸਪਤਾਲ ਲੈ ਕੇ ਗਈ ਤਾਂ ਡਾਕਟਰਾਂ ਨੇ ਮ੍ਰਿਤਕ ਐਲਾਨ ਦਿੱਤਾ। ਦੂਜੇ ਪਾਸੇ ਦੋਸ਼ੀ ਥਾਰ ਚਾਲਕ ਦੀ ਸੱਤਾਧਾਰੀ ਪਾਰਟੀ ਦੇ ਆਗੂਆਂ ਨਾਲ ਚੰਗੀ ਨੇੜਤਾ ਹੋਣ ਕਰਕੇ ਪੁਲਿਸ ਨੇ ਸਮਝੌਤਾ ਕਰਵਾਉਣ ਦੀ ਨੀਤੀ ਅਪਣਾ ਲਈ ਤਾਂ ਮ੍ਰਿਤਕ ਦੇ ਪਰਿਵਾਰ ਅਤੇ ਮ੍ਰਿਤਕ ਜਗਤਾਰ ਸਿੰਘ ਦੇ ਸਾਥੀ ਡਰਾਈਵਰਾਂ ਵੱਲੋਂ ਐਫਆਈਆਰ ਦਰਜ ਹੋਣ ਤੱਕ ਪੋਸਟਮਾਰਟਮ ਨਾ ਕਰਵਾਉਣ ਦੀ ਗੱਲ ਕੀਤੀ ਗਈ ਤਾਂ ਕਿਤੇ ਜਾ ਕੇ ਪੁਲਿਸ ਨੇ ਥਾਣਾ ਸਿਟੀ ਵਿੱਚ ਜਗਤਾਰ ਸਿੰਘ ਦੀ ਪਤਨੀ ਦੇ ਬਿਆਨਾਂ ਦੇ ਅਧਾਰ ‘ਤੇ FIR ਨੰਬਰ 163, ਮਿਤੀ 13 ਅਪ੍ਰੈਲ 2026, BNS ਦੀਆਂ 106(1), 271, 324 ਆਦਿ ਧਰਾਵਾਂ ਤਹਿਤ ਮਾਮਲਾ ਤਾਂ ਦਰਜ ਕਰ ਦਿੱਤਾ ਪ੍ਰੰਤੂ ਐਕਸੀਡੈਂਟ ਕਰਨ ਵਾਲਾ ਨੌਜਵਾਨ ਸੱਤਾਧਾਰੀ ਪਾਰਟੀ ਦੇ ਸਰਪੰਚ ਦਾ ਪੁੱਤਰ ਹੋਣ ਅਤੇ ਸੱਤਾਧਾਰੀ ਵੱਡੇ ਆਗੂਆਂ ਦਾ ਚਹੇਤਾ ਹੋਣ ਕਰਕੇ ਪੁਲਿਸ ਨੇ ਇਸ ਮਾਮਲੇ ਨੂੰ “ਹਿੱਟ ਐਂਡ ਰਨ” ਦੀ ਸ਼੍ਰੇਣੀ ਵਿੱਚ ਨਹੀਂ ਲਿਆ। ਪੀੜ੍ਹਤ ਪਰਿਵਾਰ ਨੇ ਵੀ ਧਾਰਾਵਾਂ ਲਾਉਣ ਦੇ ਮਾਮਲੇ ਵਿੱਚ ਪੁਲਿਸ ‘ਤੇ ਪੱਖਪਾਤ ਦੇ ਦੋਸ਼ ਲਗਾਏ ਹਨ। ਦੋਸ਼ੀ ਥਾਰ ਚਾਲਕ ਦੀ ਸਿਆਸੀ ਪਹੁੰਚ ਇਸ ਗੱਲ ਤੋਂ ਵੀ ਝਲਕਦੀ ਹੈ ਕਿ ਉਸਨੇ ਆਪਣੀ ਹਾਦਸੇ ਵਾਲੀ ਥਾਰ ਗੱਡੀ ‘ਤੇ ਬਿਨਾਂ ਕਿਸੇ ਸੰਵਿਧਾਨਕ ਅਹੁਦੇ ਤੋਂ ਪੰਜਾਬ ਸਰਕਾਰ ਦੀ ਤਖ਼ਤੀ ਵੀ ਲਗਾਈ ਹੋਈ ਹੈ ਅਤੇ ਆਪ ਦੇ ਕੌਮੀ ਆਗੂ ਮਨੀਸ਼ ਸਿਸੋਦੀਆ ਮੈਂਬਰ ਪਾਰਲੀਮੈਂਟ ਮੀਤ ਹੇਅਰ, ਵਿਧਾਇਕ ਲਾਭ ਸਿੰਘ ਉਗੋਕੇ ਸਮੇਤ ਆਪ ਦੇ ਹੋਰ ਵੱਡੇ ਆਗੂਆਂ ਨਾਲ ਤਸਵੀਰਾਂ ਉਸਦੀਫੇਸਬੁੱਕ ਪ੍ਰੋਫਾਈਲ ਦਾ ਸ਼ਿੰਗਾਰ ਬਣੀਆਂ ਹੋਈਆਂ ਹਨ। ਜ਼ਿਕਰਯੋਗ ਹੈ ਮ੍ਰਿਤਕ ਜਗਤਾਰ ਸਿੰਘ ਦੇ ਦੋ ਬੇਟੀਆਂ ਅਤੇ ਇਕ ਅਪਾਹਜ ਬੇਟਾ ਹੈ। ਮ੍ਰਿਤਕ ਜਗਤਾਰ ਸਿੰਘ ਇਕ ਸਕੂਲ ਵੈਨ ਅਤੇ ਸ਼ਾਮ ਨੂੰ ਇੱਕ ਘਰ ਵਿੱਚ ਨੌਕਰੀ ਕਰਕੇ ਪਰਿਵਾਰ ਦਾ ਪਾਲਣ ਪੋਸ਼ਣ ਕਰਦਾ ਸੀ।
ਫੋਟੋ ਕੈਪਸ਼ਨ-ਮ੍ਰਿਤਕ ਜਗਤਾਰ ਸਿੰਘ ਦੀ ਫਾਈਲ ਫੋਟੋ ਹਾਦਸੇ ਵਾਲੇ ਵਹੀਕਲਾਂ ਦੀਆਂ ਤਸਵੀਰਾਂ
