-2731 ਕਰੋੜ ਦਾ ਘਾਟਾ ਰਾਤੋ-ਰਾਤ ਪੂਰਾ ਕਰਨਾ ਚਾਹੁਦੀਆਂ ਹਨ ਟੋਲ ਕੰਪਨੀਆਂ
ਬਰਨਾਲਾ, 16 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ) : ਖੇਤੀ ਕਾਨੂੰਨ ਰੱਦ ਕਰਵਾਉਣ ਤੋਂ ਬਾਅਦ ਸੰਯੁਕਤ ਕਿਸਾਨ ਮੋਰਚੇ ਵੱਲੋਂ ਪੰਜਾਬ ’ਚ ਟੋਲ ਪਲਾਜ਼ਿਆਂ ਨੂੰ ਛੱਡ ਕੇ ਬਾਕੀ ਥਾਵਾਂ ਤੋਂ ਧਰਨੇ ਚੁੱਕ ਦਿੱਤੇ ਹਨ ਪ੍ਰੰਤੂ ਟੋਲ ਪਲਾਜ਼ਿਆਂ ’ਤੇ ਕਿਸਾਨ ਜਥੇਬੰਦੀਆਂ ਨੇ ਡਟੇ ਰਹਿਣ ਦਾ ਐਲਾਨ ਕੀਤਾ ਹੈ। ਕਿਸਾਨ ਜਥੇਬੰਦੀਆਂ ਵੱਲੋਂ ਟੋਲ ਪਲਾਜ਼ੇ ਬੰਦ ਰੱਖਣ ਦਾ ਕਾਰਨ ਹੈ ਕਿ ਟੋਲ ਕੰਪਨੀਆਂ ਨੇ ਕਿਸਾਨ ਅੰਦੋਲਨ ਦੀ ਸਮਾਪਤੀ ਦੇ ਐਲਾਨ ਦੇ ਨਾਲ ਹੀ ਟੋਲ ਟੈਕਸ ਦਰਾਂ ਵਿੱਚ ਵਾਧਾ ਕਰ ਦਿੱਤਾ। ਕੁਝ ਕੁ ਥਾਵਾਂ ਉੱਪਰ ਤਾਂ ਇਹ ਵਾਧਾ 50 ਰੁਪਏ ਤੋਂ ਵਧਾ ਕੇ ਸਿੱਧਾ 90 ਰੁਪਏ ਤੱਕ ਕਰ ਦਿੱਤਾ ਗਿਆ ਹੈ ਜੋ ਆਮ ਲੋਕਾਂ ਨੂੰ ਰਾਸ ਨਹੀਂ ਆਇਆ। ਅਸਲ ਵਿੱਚ ਕਿਸਾਨ ਅੰਦੋਲਨ ਦੀ ਲੜਾਈ ਕਾਰਪੋਰੇਟ ਘਰਾਣਿਆਂ ਦੇ ਖ਼ਿਲਾਫ਼ ਹੀ ਸੀ ਅਤੇ ਟੋਲ ਕੰਪਨੀਆਂ ਨੇ ਵੀ ਕਾਰਪੋਰੇਟ ਸੋਚ ਦਾ ਹੀ ਮੁਜ਼ਾਹਰਾ ਕੀਤਾ ਜਿਸ ਕਾਰਨ ਆਮ ਲੋਕਾਂ ਵਿੱਚ ਰੋਸ ਦੇ ਨਾਲ-ਨਾਲ ਗੁੱਸੇ ਦੀ ਲਹਿਰ ਵੀ ਫੈਲੀ ਕਿਉਂਕਿ ਜਿਸ ਸੋਚ ਦੇ ਖ਼ਿਲਾਫ਼ ਆਮ ਲੋਕ ਇੱਕ ਸਾਲ ਤੱਕ ਲੜਾਈ ਲੜਦੇ ਰਹੇ ਉਸੇ ਸੋਚ ਨੇ ਅੰਦੋਲਨ ਸਮਾਪਤੀ ਦੇ ਐਲਾਨ ਦੇ ਤੁਰੰਤ ਬਾਅਦ ਹੀ ਫਿਰ ਸਿਰ ਚੁੱਕ ਲਿਆ।
ਬਾਕਸ ਆਈਟਮ
ਪੰਜਾਬ ’ਚ ਭਾਰਤੀ ਰਾਸ਼ਟਰੀ ਰਾਜ ਮਾਰਗ ਅਥਾਰਿਟੀ ਅਧੀਨ 25 ਟੋਲ ਪਲਾਜ਼ੇ ਹਨ । ਕੁਝ ਟੋਲ ਪਲਾਜ਼ਾ ਬੀ.ਓ.ਟੀ. ਸਕੀਮ ਤਹਿਤ ਵੀ ਹਨ ਜੋ ਨਿੱਜੀ ਕੰਪਨੀਆਂ ਵੱਲੋਂ ਚਲਾਏ ਜਾ ਰਹੇ ਹਨ। ਕਿਸਾਨ ਅੰਦੋਲਨ ਕਾਰਨ 65 ਟੋਲ ਪਲਾਜ਼ਾ ਬੰਦ ਹਨ। ਸਰਕਾਰੀ ਅੰਕੜਿਆਂ ਮੁਤਾਬਕ ਹੁਣ ਤੱਕ 2731 ਕਰੋੜ ਦਾ ਮਾਲੀ ਨੁਕਸਾਨ ਦੱਸਿਆ ਜਾ ਰਿਹਾ ਹੈ। ਹਰਿਆਣਾ ਵਿੱਚ ਸਭ ਤੋਂ ਵੱਧ 1381 ਕਰੋੜ ਦਾ ਨੁਕਸਾਨ, ਪੰਜਾਬ ’ਚ 1269 ਕਰੋੜ ਅਤੇ ਰਾਜਸਥਾਨ ਵਿੱਚ 142 ਕਰੋੜ ਦਾ ਨੁਕਸਾਨ ਦੱਸਿਆ ਜਾ ਰਿਹਾ ਹੈ। ਟੋਲ ਕੰਪਨੀਆਂ ਇਹ ਨੁਕਸਾਨ ਟੈਕਸ ਦਰਾਂ ਵਿੱਚ ਵਾਧਾ ਕਰਕੇ ਰਾਤੋ-ਰਾਤ ਪੂਰਾ ਕਰਨਾ ਚਾਹੁੰਦੀਆਂ ਹਨ ਪ੍ਰੰਤੂ ਕਿਸਾਨ ਜਥੇਬੰਦੀਆਂ ਨੇ ਟੋਲ ਕੰਪਨੀਆਂ ਦੀ ਇਸ ਨੀਤੀ ਉੱਪਰ ਪਾਣੀ ਫੇਰ ਦਿੱਤਾ ਹੈ।
Menu
