ਬਰਨਾਲਾ, 04 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਅਕਸਰ ਕਿਹਾ ਜਾਂਦਾ ਹੈ ਕਿ ਦੁਨੀਆਂ ਦੀ ਸਭ ਤੋਂ ਵੱਡੀ ਸ਼ੈਅ ਵਕਤ ਹੀ ਹੈ, ਵਕਤ ਕਦੋਂ ਕਿਸੇ ਦੀ ਤਕਦੀਰ ਬਦਲ ਦੇਵੇ, ਕੁਝ ਪਤਾ ਨਹੀ ਲੱਗਦਾ। ਇਹ ਵਕਤ ਹੀ ਹੈ ਜੋ ਫ਼ੱਕਰਾਂ ਨੂੰ ਰਾਜੇ ਅਤੇ ਰਾਜਿਆਂ ਨੂੰ ਫ਼ੱਕਰ ਬਣਾ ਦਿੰਦਾ ਹੈ। ਵਕਤ ਕਦੋਂ ਕਿਸੇ ਦਾ ਚੰਗਾ ਜਾਂ ਮਾੜਾ ਆੳਂੁਦਾ ਹੈ , ਕਿਸੇ ਨੂੰ ਕੁਝ ਪਤਾ ਨਹੀਂ ਲੱਗਦਾ। ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਅਤੇ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਇਸ ਦੀ ਵੱਡੀ ਮਿਸਾਲ ਹਨ। ਕੈਪਟਨ ਦੇ ਮੁੱਖ ਮੰਤਰੀ ਹੁੰਦੇ ਹੋਏ ਚੰਨੀ ਨੂੰ ਮੰਤਰੀਸ਼ਿਪ ਬਚਾਉਣ ਲਈ ਵੀ ਸੰਘਰਸ਼ ਕਰਨਾ ਪੈ ਰਿਹਾ ਸੀ ਪ੍ਰੰਤੂ ਵਕਤ ਨੇ ਅਜਿਹੀ ਖੇਡ ਖੇਡੀ ਕਿ ਉਹ ਮੁੱਖ ਮੰਤਰੀ ਬਣ ਗਏ । ਦੂਜੇ ਪਾਸੇ ਆਮ ਲੋਕਾਂ ਦੀ ਵੋਟ ਤਾਕਤ ਨਾਲ ਪੰਜਾਬ ਦੀ ਸੱਤਾ ’ਤੇ ਕਾਬਜ਼ ਹੋਣ ਵਾਲੇ ਕੈਪਟਨ ਅਮਰਿੰਦਰ ਸਿੰਘ ਵਕਤ ਨੂੰ ਆਪਣੀ ਮੁੱਠੀ ਵਿੱਚ ਸਮਝਦੇ ਰਹੇ ਅਤੇ ਪੂਰੇ ਪੰਜ ਸਾਲ ਸੂਬੇ ਦੀ ਜਨਤਾ ਨੂੰ ਮੂੰਹ ਨਹੀਂ ਦਿਖਾਇਆ। ਵਕਤ ਦਾ ਤਕਾਜ਼ਾ ਦੇਖੋ ਕਿ ਉਹੀ ਕੈਪਟਨ ਅਮਰਿੰਦਰ ਸਿੰਘ ਹੁਣ ਪੰਜਾਬ ’ਚ ਵਿਚਾਰਾ ਜਿਹਾ ਬਣਿਆ ਫਿਰਦਾ ਹੈ। ਮੁੱਖ ਮੰਤਰੀ ਹੁੰਦੇ ਹੋਏ ਜਿਹੜਾ ਕੈਪਟਨ ਅਮਰਿੰਦਰ ਸਿੰਘ ਆਪਣੇ ਆਲੀਸ਼ਾਨ ਮਹਿਲਾ ਤੋਂ ਬਾਹਰ ਨਹੀਂ ਨਿਕਲਦਾ ਸੀ ਉਹੀ ਕੈਪਟਨ ਅਮਰਿੰਦਰ ਸਿੰਘ ਦਾ ਵਕਤ ਅਜਿਹਾ ਬਦਲਿਆ ਕਿ ਉਹ ਸਿਸਵਾਂ ਫਾਰਮ/ਸ਼ਿਮਲੇ ਦੇ ਬਹੁ-ਕਰੋੜੀ ਹੋਟਲਾਂ ’ਚੋਂ ਢਾਬਿਆਂ ਤੱਕ ਆਣ ਪੁੱਜੇ। ਮੰਗਲਵਾਰ ਕੈਪਟਨ ਅਮਰਿੰਦਰ ਸਿੰਘ ਬਠਿੰਡਾ ਜਾਂਦੇ ਹੋਏ ਬਰਨਾਲਾ ਦੇ ਟਾਂਡੀਆਂ ਢਾਬੇ ’ਤੇ ਆਪਣੇ ਸਮਰਥਕਾਂ ਨੂੰ ਮਿਲਣ ਲਈ ਰੁਕੇ। ਸਮਰਥਕਾਂ ਨੇ ਭਾਵੇਂ ਕੈਪਟਨ ਦਾ ਕਈ ਘੰਟੇ ਇੰਤਜ਼ਾਰ ਕੀਤਾ ਪਰ ਉਹ ਗੱਡੀ ’ਚੋਂ ਬਾਹਰ ਨਿੱਕਲ ਕੇ ਚੰਗੀ ਤਰਾਂ ਆਪਣੇ ਸਮਰਥਕਾਂ ਨੂੰ ਮਿਲੇ ਤੱਕ ਵੀ ਨਹੀਂ, ਇੱਥੋ ਤੱਕ ਕਿ ਫੁੱਲਾਂ ਵਾਲੇ ਹਾਰ ਵੀ ਵਰਕਰਾਂ ਦੇ ਹੱਥਾਂ ਵਿੱਚ ਹੀ ਰਹਿ ਗਏ ਤੇ ਵਰਕਰਾਂ ਨੇ ਇਹ ਹਾਰ ਕੈਪਟਨ ਦੀ ਗੱਡੀ ਉੱਪਰ ਸੁੱਟ ਦਿੱਤੇ। ਇਸ ਮੌਕੇ ਕੈਪਟਨ ਦੇ ਚਿਹਰੇ ਦੇ ਹਾਵ ਭਾਵ ਦੇਖ ਕੇ ਮੌਕੇ ’ਤੇ ਹਾਜ਼ਰ ਉਮਰ ਕਰੀਬ 80 ਕੁ ਵਰਿਆਂ ਨੂੰ ਢੁਕੇ ਇੱਕ ਟਕਸਾਲੀ ਕਾਂਗਰਸੀ ਨੇ ਟਿੱਪਣੀ ਕੀਤੀ ਕਿ ‘‘ਵਕਤ ਬੰਦੇ ਨੂੰ ਅਰਸ਼ ਤੋਂ ਫਰਸ਼ ’ਤੇ ਲੈ ਆਉਂਦਾ ਹੈ, ਮਹਿਲਾਂ ਤੋਂ ਬਾਹਰ ਨਾ ਨਿੱਕਲਣ ਵਾਲਾ ਆਹ ਫਿਰਦਾ ਢਾਬਿਆਂ ’ਤੇ! ਸਿਆਣੇ ਕਹਿੰਦੇ ਨੇ ਕਿ ਬੰਦੇ ਨੂੰ ਵਕਤ ਦੀ ਕਦਰ ਕਰਨੀ ਚਾਹੀਦੀ ਹੈ ਨਹੀ ਤਾਂ ਵਕਤ ਬੰਦੇ ਦੀ ਕਦਰ ਘਟਾ ਦਿੰਦਾ ਹੈ।
Menu
