ਬਰਨਾਲਾ, 05 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ) : ਬਾਦਲ ਪਰਿਵਾਰ ਦਾ ਸਾਥ ਛੱਡ ਕੇ ਕਾਂਗਰਸ ’ਚ ਸ਼ਾਮਲ ਹੋਏ ਦਰਬਾਰਾ ਸਿੰਘ ਗੁਰੂ ਨੇ ਚਰਨਜੀਤ ਸਿੰਘ ਚੰਨੀ ਮੁੱਖ ਮੰਤਰੀ ਪੰਜਾਬ ਦੀਆਂ ਭਦੌੜ ਹਲਕੇ ’ਚ ਚੋਣ ਮੀਟਿੰਗਾਂ ਦੌਰਾਨ ਬਾਦਲ ਪਰਿਵਾਰ ਉੱਪਰ ਤਿੱਖੇ ਹਮਲੇ ਕੀਤੇ। ਅਕਾਲੀ ਦਲ ਛੱਡਣ ਦਾ ਕਾਰਨ ਦੱਸਦੇ ਹੋਏ ਗੁਰੂ ਨੇ ਮੰਨਿਆ ਕਿ ਵੱਡੇ ਬਾਦਲ ਨਾਲ ਉਨਾਂ ਦੀ ਨਿੱਜੀ ਨੇੜਤਾ ਸੀ ਅਤੇ ਵੱਡੇ ਬਾਦਲ ਸਾਬ ਉਨਾਂ ਦੀ ਗੱਲ ਵੀ ਸੁਣਦੇ ਸਨ ਪ੍ਰੰਤੂ ਛੋਟੇ ਬਾਦਲ ਨੂੰ ਪਤਾ ਨਹੀਂ ਕੀ ਸਮੱਸਿਆ ਸੀ ਕਿ ਉਨਾਂ ਨੇ ਨੇੜੇ ਨਹੀਂ ਲੱਗਣ ਦਿੱਤਾ। ਕਾਂਗਰਸ ’ਚ ਸ਼ਮੂਲੀਅਤ ਨੂੰ ਗੁਰੂ ਨੇ ਆਪਣੀ ਘਰ ਵਾਪਸੀ ਦੱਸਿਆ। ਉਨਾਂ ਕਿਹਾ ਕਿ ਸੁਖਬੀਰ ਸਿੰਘ ਬਾਦਲ ਨਾਲ ਨਾ ਤਾਂ ਮੇਰਾ ਸੁਭਾਅ ਮਿਲਿਆ ਅਤੇ ਨਾ ਹੀ ਮੇਰੀ ਮੱਤ ਮਿਲੀ, ਜਿਸ ਦਾ ਕਾਰਨ ਹੈ ਕਿ ਸੁਖਬੀਰ ਸਿੰਘ ਬਾਦਲ ਘੁਮੰਡੀ ਆਦਮੀ ਹੈ ਤੇ ਮੈਨੂੰ ਘੁਮੰਡ ਪਸੰਦ ਨਹੀਂ। ਗੁਰੂ ਨੇ ਕਿਹਾ ਕਿ ਸਿਆਸਤ ਵਿੱਚ ਘੁਮੰਡ ਤੇ ਹੁਕਮ ਨਹੀਂ ਚੱਲਦੇ, ਸਿਆਸਤ ਨਿਮਰਤਾ ਨਾਲ ਚੱਲਦੀ ਹੈ। ਦਰਬਾਰਾ ਸਿੰਘ ਗੁਰੂੁ ਨੇ ਖੇਤੀ ਕਾਨੂੰਨਾਂ ਦੇ ਮੁੱਦੇ ਉੱਪਰ ਬੀਬੀ ਹਰਸਿਮਰਤ ਕੌਰ ਬਾਦਲ ਦੀ ਭੂਮਿਕਾ ਦੀ ਨਿੰਦਾ ਕਰਦੇ ਹੋਏ ਕਿਹਾ ਕਿ ਅਕਾਲੀ ਦਲ ਨੇ ਖੇਤੀ ਕਾਨੂੰਨਾਂ ਦੇ ਮਾਮਲੇ ’ਚ ਲੋਕਾਂ ਨੂੰ ਬੁੱਧੂ ਬਣਾਇਆ। ਉਨਾਂ ਕਿਹਾ ਕਿ ਬੀਬੀ ਬਾਦਲ ਨੇ ਕੇਂਦਰੀ ਕੈਬਨਿਟ ਤੋਂ ਅਸਤੀਫ਼ਾ ਲੋਕਾਂ ਦਾ ਦਬਾਅ ਵਧ ਜਾਣ ਕਰਕੇ ਹੀ ਦਿੱਤਾ ਸੀ। ਨਸ਼ਾ ਤਸਕਰੀ ਦੇ ਮੁੱਦੇ ’ਤੇ ਬਿਕਰਮ ਸਿੰਘ ਮਜੀਠੀਆ ਨੂੰ ਘੇਰਦੇ ਹੋਏ ਗੁਰੂ ਨੇ ਕਿਹਾ ਕਿ ਪੁਲਿਸ ਅਫ਼ਸਰ ਹਰਪ੍ਰੀਤ ਸਿੰਘ ਸਿੱਧੂ ਦੀ ਅਗਵਾਈ ਹੇਠਲੀ ਐਸਟੀਐਫ ਦੀ ਰਿਪੋਰਟ ਅਨੁਸਾਰ ਮਜੀਠੀਆ ਕਸੂਰਵਾਰ ਹੈ। ਉਨਾਂ ਕਿਹਾ ਕਿ ਰਿਪੋਰਟ ਅਨੁਸਾਰ ਮਜੀਠੀਆ ਨੇ ਨਸ਼ਾ ਤਸਕਰਾਂ ਨੂੰ ਆਪਣੀਆਂ ਗੱਡੀਆਂ ਦਿੱਤੀਆਂ ਤੇ ਉਨਾਂ ਨਾਲ ਸਬੰਧ ਜ਼ਾਹਿਰ ਕਰਦੇ ਹੋਏ ਵਿਆਹ ’ਚ ਵੀ ਬੁਲਾਇਆ। ਉਨਾਂ ਕਿਹਾ ਕਿ ਅਦਾਲਤ ਨੇ ਮਜੀਠੀਆ ਨੂੰ ਲੋਕਤੰਤਰੀ ਕਦਰਾਂ ਕੀਮਤਾਂ ਦੇ ਮੱਦੇਨਜ਼ਰ ਸਿਰਫ਼ ਚੋਣਾਂ ਤੱਕ ਰਾਹਤ ਦਿੱਤੀ ਹੈ ਅਤੇ ਚੋਣਾਂ ਤੋਂ ਤੁਰੰਤ ਬਾਅਦ ਮਜੀਠੀਆ ਨੂੰ ਅਦਾਲਤ ’ਚ ਪੇਸ਼ ਹੋਣਾ ਪਵੇਗਾ, ਜਿੱਥੇ ਪੁਲਿਸ ਮਜੀਠੀਆ ਦਾ ਰਿਮਾਂਡ ਮੰਗੇਗੀ ਤੇ ਮਜੀਠੀਆ ਜ਼ਮਾਨਤ ਮੰਗੇਗਾ ਪੰ੍ਰਤੂ ਫ਼ੈਸਲਾ ਅਦਾਲਤ ਦੇ ਹੱਥ ਵਿੱਚ ਹੈ। ਗੁਰੂ ਨੇ ਖ਼ੁਲਾਸਾ ਕੀਤਾ ਕਿ ਮਜੀਠੀਆ ਦੇ ਮਾਮਲੇ ’ਚ ਮਾਨਯੋਗ ਸੈਸ਼ਨ ਕੋਰਟ ਦੇ ਜੱਜ ਦੀ ਲਿਖ਼ਤ ਰਾਏ ਹੈ ਕਿ ਇਹ ਕੇਸ ਗੁੰਝਲਦਾਰ ਹੋਣ ਕਰਕੇ ‘ਕਸਟੋਡੀਅਨ ਇਟੈਰੋਗੇਟ’ ਬਿਨਾਂ ਹੱਲ ਨਹੀਂ ਹੋ ਸਕਦਾ। ਗੁਰੂ ਨੇ ਕਿਹਾ ਕਿ ਬਾਦਲ ਪਰਿਵਾਰ ਤੇ ਮਜੀਠੀਆ ਪਰਿਵਾਰ ਨੂੰ ਸਿਆਸੀ ਬਦਲਾਖ਼ੋਰੀ ਦਾ ਰਾਗ ਛੱਡ ਕੇ ਐਸਟੀਐਫ ਦੀ ਰਿਪੋਰਟ ਅਨੁਸਾਰ ਮਜੀਠੀਆ ਖ਼ਿਲਾਫ਼ ਐਫਆਈਆਰ ਦੀਆਂ ਧਾਰਾਵਾਂ 25/27/29 ਦਾ ਜਵਾਬ ਦੇਣਾ ਚਾਹੀਦਾ ਹੈ। ਜ਼ਿਕਰਯੋਗ ਹੈ ਕਿ ਗੁਰੂ ਨੇ ਆਪਣੇ 15 ਕੁ ਮਿੰਟ ਦੇ ਭਾਸ਼ਣ ਦੌਰਾਨ ਬਾਦਲ ’ਤੇ ਮਜੀਠੀਆ ਪਰਿਵਾਰ ਨੂੰ ਜੰਮ ਕੇ ਰਗੜੇ ਲਾਏ ਅਤੇ ਭਾਸ਼ਣ ਦੌਰਾਨ ਮੰਗ ਕੇ ਪਾਣੀ ਵੀ ਪੀਤਾ।
