ਯੂਕਰੇਨ ਗਿਆ ਸੀ ਡਾਕਟਰ ਬਣਨ… ਪਰ ਲਾਸ਼ ਬਣ ਕੇ ਮੁੜ ਆਇਆ….!
ਬਰਨਾਲਾ 2 ਮਾਰਚ (ਨਿਰਮਲ ਸਿੰਘ ਪੰਡੋਰੀ)-ਯੂਕਰੇਨ ਡਾਕਟਰੀ ਦੀ ਪੜ੍ਹਾਈ ਕਰਨ ਗਏ ਬਰਨਾਲਾ ਸ਼ਹਿਰ ਦੇ ਨੌਜਵਾਨ ਚੰਦਨ ਜਿੰਦਲ ਦੀ ਯੂਕਰੇਨ ‘ਚ ਦੁਖਦ ਮੌਤ ਹੋਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਲਗਭਗ ਚਾਰ ਵਰ੍ਹੇ ਪਹਿਲਾਂ ਚੰਦਨ ਜਿੰਦਲ ਐੱਮਬੀਬੀਐੱਸ ਦੀ ਪੜ੍ਹਾਈ ਕਰਨ ਯੂਕਰੇਨ ਗਿਆ ਸੀ,ਜਿੱਥੇ ਕੁਝ ਸਮਾਂ ਪਹਿਲਾਂ ਉਹ ਸਖ਼ਤ ਬਿਮਾਰ ਹੋ ਗਿਆ ਜਿਸ ਤੋਂ ਬਾਅਦ ਡਾਕਟਰਾਂ ਨੇ ਪਿੱਛੇ ਉਸ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸੂਚਿਤ ਕੀਤਾ ਅਤੇ ਪਰਿਵਾਰਕ ਮੈਂਬਰਾਂ ਦੀ ਸਹਿਮਤੀ ਤੋਂ ਬਾਅਦ ਉਸ ਦੇ ਦਿਮਾਗ ਦਾ ਆਪਰੇਸ਼ਨ ਕੀਤਾ। ਚੰਦਨ ਜਿੰਦਲ ਦੇ ਆਪ੍ਰੇਸ਼ਨ ਤੋਂ ਬਾਅਦ ਉਸ ਦੇ ਪਿਤਾ ਸੀਸ਼ਨ ਕੁਮਾਰ ਅਤੇ ਚਾਚਾ ਗੋਪਾਲ ਕ੍ਰਿਸ਼ਨ ਯੂਕਰੇਨ ਦਾ ਵੀਜ਼ਾ ਲੈ ਕੇ ਉਸ ਦੀ ਦੇਖ ਭਾਲ ਲਈ ਯੂਕਰੇਨ ਗਏ ਤਾਂ ਅਚਾਨਕ ਰੂਸ ਵੱਲੋਂ ਕੀਤੇ ਹਮਲੇ ਕਾਰਨ ਯੂਕਰੇਨ ਦੇ ਹਾਲਾਤ ਵਿਗੜ ਗਏ ਜਿਸ ਤੋਂ ਬਾਅਦ ਚੰਦਨ ਜਿੰਦਲ ਦੇ ਇਲਾਜ ਵਿੱਚ ਵੀ ਵਿਘਨ ਪਿਆ ਅਤੇ ਯੂਕਰੇਨ ਵਿੱਚ ਯੁੱਧ ਕਾਰਨ ਪੈਦਾ ਹੋਏ ਹਾਲਾਤਾਂ ਦੀ ਬਦੌਲਤ ਕਰੀਬ 21-22 ਵਰ੍ਹਿਆਂ ਦਾ ਚੰਦਨ ਬੇਵਕਤ ਮੌਤ ਦੇ ਮੂੰਹ ਜਾ ਪਿਆ।
ਜ਼ਿਕਰਯੋਗ ਹੈ ਕਿ ਅਜੇ ਬੀਤੇ ਕੱਲ੍ਹ ਹੀ ਚੰਦਨ ਦਾ ਚਾਚਾ ਗੋਪਾਲ ਕ੍ਰਿਸ਼ਨ ਯੂਕਰੇਨ ਤੋਂ ਵਾਪਸ ਆਇਆ ਹੈ ਅਤੇ ਉਸ ਦਾ ਪਿਤਾ ਸੀਸ਼ਨ ਕੁਮਾਰ ਉਸ ਦੇ ਕੋਲ ਹੀ ਹੈ। ਬੁੱਧਵਾਰ 2 ਮਾਰਚ ਸਵੇਰੇ ਚੰਦਨ ਦੀ ਮੌਤ ਦੀ ਖਬਰ ਮਿਲਣ ਤੋਂ ਬਾਅਦ ਪਰਿਵਾਰ ਉੱਪਰ ਦੁੱਖਾਂ ਦਾ ਪਹਾੜ ਟੁੱਟ ਪਿਆ। ਪਰਿਵਾਰਕ ਮੈਂਬਰਾਂ ਨੇ ਚੰਦਨ ਜਿੰਦਲ ਦੀ ਮ੍ਰਿਤਕ ਦੇਹ ਵਾਪਸ ਭਾਰਤ ਲਿਆਉਣ ‘ਚ ਮਦਦ ਦੀ ਅਪੀਲ ਕੀਤੀ ਹੈ। ਐਮਬੀਬੀਐਸ ਦੀ ਪੜ੍ਹਾਈ ਕਰਕੇ ਡਾਕਟਰ ਬਣਨ ਵਿਦੇਸ਼ ਗਏ ਇੱਕ ਨੌਜਵਾਨ ਦਾ ਲਾਸ਼ ਦੇ ਰੂਪ ਵਿੱਚ ਵਾਪਸ ਮੁੜ ਕੇ ਆਉਣ ਦੇ ਸਦਮੇ ਨੇ ਸਮੁੱਚੇ ਸ਼ਹਿਰ ਵਾਸੀਆਂ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਚੰਦਨ ਆਪਣੇ ਮਾਪਿਆਂ ਦਾ ਇਕਲੌਤਾ ਪੁੱਤਰ ਸੀ ਅਤੇ ਉਸ ਦੀ ਇੱਕ ਭੈਣ ਸ਼ਾਦੀਸ਼ੁਦਾ ਹੈ,ਕਰੀਬ 16 ਕੁ ਵਰ੍ਹੇ ਪਹਿਲਾਂ ਚੰਦਨ ਦੇ ਦੂਜੇ ਭਰਾ ਦੀ ਵੀ ਮੌਤ ਹੋ ਗਈ ਸੀ । ਦੱਸਣਯੋਗ ਹੈ ਕਿ ਚੰਦਨ ਦੇ ਪਿਤਾ ਸ੍ਰੀ ਸ਼ੀਸ਼ਨ ਕੁਮਾਰ ਸਿਹਤ ਵਿਭਾਗ ਵਿੱਚ ਬਤੌਰ ਫਾਰਮਾਸਿਸਟ ਸੇਵਾਮੁਕਤ ਹੋਏ ਹਨ ਜਿਸ ਨੇ ਕਈ ਵਰ੍ਹੇ ਨੌਕਰੀ ਦੌਰਾਨ ਗੰਭੀਰ ਤੋਂ ਗੰਭੀਰ ਮਰੀਜ਼ਾਂ ਦੀ ਦੇਖਭਾਲ ਕੀਤੀ ਪਰੰਤੂ ਮਾੜੇ ਵਕਤ ਨੇ ਉਸ ਨੂੰ ਆਪਣੇ ਬੀਮਾਰ ਪੁੱਤਰ ਦੀ ਦੇਖਭਾਲ ਕਰਨ ਦਾ ਵਕਤ ਨਹੀਂ ਦਿੱਤਾ।
