ਬਰਨਾਲਾ 31 ਮਾਰਚ — ਥਾਣਾ ਮਹਿਲ ਕਲਾਂ ਅਧੀਨ ਪੈਂਦੇ ਪਿੰਡ ਨਿਹਾਲੂਵਾਲ ਵਿਖੇ ਬੁੱਧਵਾਰ ਸਥਿਤੀ ਉਸ ਵੇਲੇ ਅਜੀਬ ਜਿਹੀ ਪੈਦਾ ਹੋ ਗਈ ਜ਼ਿਆਦਾ ਹਲਕਾ ਵਿਧਾਇਕ ਨੂੰ ਪਾਣੀ ਵਾਲੀ ਟੈਂਕੀ ਉਪਰ ਚਡ਼੍ਹਨਾ ਪਿਆ। ਪ੍ਰਾਪਤ ਵੇਰਵੇ ਅਨੁਸਾਰ ਹਲਕਾ ਵਿਧਾਇਕ ਦੇ ਜੱਦੀ ਪਿੰਡ ਪੰਡੋਰੀ ਦਾ ਇੱਕ ਵਿਅਕਤੀ ਮਲਕੀਤ ਸਿੰਘ ਫ਼ੌਜੀ ਆਪਣੇ ਇੱਕ ਹੋਰ ਸਾਥੀ ਬਸੰਤ ਸਿੰਘ ਗੋਬਿੰਦਗਡ਼੍ਹ ਨੂੰ ਨਾਲ ਲੈ ਕੇ ਨੇੜਲੇ ਪਿੰਡ ਨਿਹਾਲੂਵਾਲ ਦੀ ਪਾਣੀ ਵਾਲੀ ਉੱਚੀ ਟੈਂਕੀ ਉੱਪਰ ਚੜ੍ਹ ਗਿਆ,ਜਦ ਇਸ ਦੀ ਖ਼ਬਰ ਪ੍ਰਸ਼ਾਸਨ ਨੂੰ ਲੱਗੀ ਤਾਂ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ ਜਿਸ ਤੋਂ ਬਾਅਦ ਪ੍ਰਸ਼ਾਸਨਿਕ ਅਤੇ ਪੁਲੀਸ ਅਧਿਕਾਰੀ ਮੌਕੇ ‘ਤੇ ਪੁੱਜੇ ਅਤੇ ਟੈਂਕੀ ਉਪਰ ਚੜ੍ਹੇ ਵਿਅਕਤੀਆਂ ਨੂੰ ਹੇਠਾਂ ਉਤਰਨ ਲਈ ਮਨਾਉਣ ਲੱਗੇ। ਪੁਲੀਸ ਥਾਣਾ ਮਹਿਲ ਕਲਾਂ ਦੇ ਐਸਐਚਓ ਗੁਰਮੇਲ ਸਿੰਘ ਖ਼ੁਦ ਪਾਣੀ ਵਾਲੀ ਟੈਂਕੀ ਉਪਰ ਚੜ੍ਹੇ ਅਤੇ ਦੋਵੇਂ ਵਿਅਕਤੀਆਂ ਨੂੰ ਹੇਠਾਂ ਉਤਰਨ ਲਈ ਮਨਾ ਲਿਆ ਪ੍ਰੰਤੂ ਇਸੇ ਦੌਰਾਨ ਹਲਕਾ ਵਿਧਾਇਕ ਵੀ ਮੌਕੇ ‘ਤੇ ਪੁੱਜੇ ਅਤੇ ਖੁਦ ਪਾਣੀ ਵਾਲੀ ਟੈਂਕੀ ਉਪਰ ਚੜ੍ਹ ਗਏ ਅਤੇ ਟੈਂਕੀ ਉਪਰ ਚੜ੍ਹੇ ਦੋਵੇਂ ਵਿਅਕਤੀਆਂ ਨਾਲ ਗੱਲਬਾਤ ਕਰਕੇ ਹੇਠਾਂ ਉਤਰ ਆਏ ਅਤੇ ਦੋਵੇਂ ਵਿਅਕਤੀ ਵੀ ਐਸਐਚਓ ਨਾਲ ਹੇਠਾਂ ਉਤਰ ਆਏ। ਜਾਣਕਾਰੀ ਅਨੁਸਾਰ ਟੈਂਕੀ ਉਪਰ ਚੜ੍ਹੇ ਮਲਕੀਤ ਸਿੰਘ ਵਾਸੀ ਪੰਡੋਰੀ ਅਤੇ ਬਸੰਤ ਸਿੰਘ ਵਾਸੀ ਗੋਬਿੰਦਗੜ੍ਹ ਦਾ ਪਿੰਡ ਨਿਹਾਲੂਵਾਲ ਦੇ ਕਿਸੇ ਵਿਅਕਤੀ ਨਾਲ ਪਿਛਲੇ ਛੇ ਸਾਲ ਤੋਂ ਪੈਸਿਆਂ ਦੇ ਲੈਣ ਦੇਣ ਦਾ ਵਿਵਾਦ ਚਲਿਆ ਆ ਰਿਹਾ ਹੈ ਪ੍ਰੰਤੂ ਪੈਸੇ ਦੇਣ ਵਾਲਾ ਲੰਮੇ ਸਮੇਂ ਤੋਂ ਆਨਾਕਾਨੀ ਕਰ ਰਿਹਾ ਸੀ ਜਿਸ ਨੂੰ ਲੈ ਕੇ ਦੋਵੇਂ ਵਿਅਕਤੀ ਰੋਸ ਵਜੋਂ ਟੈਂਕੀ ਉਪਰ ਚੜ੍ਹ ਗਏ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਦਖਲਅੰਦਾਜ਼ੀ ਕਰਕੇ ਪੈਸੇ ਦਿਵਾਉਣ ਦੀ ਮੰਗ ਕਰਨ ਲੱਗੇ।ਚਰਚਾ ਇਸ ਗੱਲ ਦੀ ਵੀ ਹੋ ਰਹੀ ਹੈ ਕਿ ਮਲਕੀਤ ਸਿੰਘ ਵਾਸੀ ਪੰਡੋਰੀ ਆਪਣੀ ਸਮੱਸਿਆ ਸਬੰਧੀ ਆਪਣੇ ਹੀ ਪਿੰਡ ਦੇ ਵਿਧਾਇਕ ਨੂੰ ਮਿਲਣ ਦੀ ਬਜਾਏ ਦੂਜੇ ਪਿੰਡ ਦੀ ਪਾਣੀ ਵਾਲੀ ਟੈਂਕੀ ਉਪਰ ਜਾ ਕੇ ਕਿਉਂ ਚੜ੍ਹਿਆ ?
Menu
