–ਸਾਬਕਾ ਕਾਨੂੰਗੋ ਦੀ ਜੇਬ ’ਚੋਂ ਕੱਢੇ ਰਿਸ਼ਵਤ ਦੇ ਪੈਸੇ
–ਕਾਨੂੰਗੋ ਤਾਂ ਸਾਬਕਾ ਹੈ ਪਰ ਬੈਠਣੀ ਉੱਠਣੀ ਤਹਿਸੀਲ ਦਫ਼ਤਰ ਵਿੱਚ ਹੀ ਹੈ
— ਪਹਿਲਾਂ ਵੀ ਦਰਜ ਹਨ ਇਸ ਸਾਬਕਾ ਕਾਨੂੰਗੋ ਉੱਪਰ ਰਿਸ਼ਵਤ ਸੰਬੰਧੀ ਕੇਸ
ਬਰਨਾਲਾ, 18 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) : ਸਥਾਨਕ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਵਿੱਚ ਤਹਿਸੀਲਦਾਰ ਦੇ ਦਫ਼ਤਰ ਸਾਹਮਣੇ ਉਸ ਵੇਲੇ ‘‘ਲਾ-ਲਾ’’ ਹੋ ਗਈ ਜਦ ਕੁਝ ਵਿਅਕਤੀਆਂ ਨੇ ਰੌਲਾ ਪਾ ਦਿੱਤਾ ਕਿ ਕਾਨੂੰਗੋ ਰਿਸ਼ਵਤ ਲੈਂਦਾ ਫੜਿਆ ਗਿਆ। ਜਿਸ ਤੋਂ ਬਾਅਦ ਆਮ ਲੋਕਾਂ ਦਾ ਇਕੱਠ ਵੀ ਹੋ ਗਿਆ। ਸਾਰੀ ਘਟਨਾ ਸੰਬੰਧੀ ਜਾਣਕਾਰੀ ਦਿੰਦੇ ਹੋਏ ਗੁਰਜੰਟ ਸਿੰਘ ਪੁੱਤਰ ਸੁਖਦੇਵ ਸਿੰਘ ਵਾਸੀ ਸੰਘੇੜਾ ਨੇ ਦੱਸਿਆ ਕਿ ਉਸ ਨੇ ਆਪਣੀ ਜ਼ਮੀਨ ਦੀ ਨਿਸ਼ਾਨਦੇਹੀ ਸੰਬੰਧੀ ਅਰਜ਼ੀ ਦਿੱਤੀ ਸੀ। ਜਿੱਥੇ ਉਸ ਨੂੰ ਆਪਣੇ ਆਪ ਨੂੰ ਕਾਨੂੰਗੋ ਦੱਸਦਾ ਇੱਕ ਵਿਅਕਤੀ ਮਿਲਿਆ ਅਤੇ ਕਹਿਣ ਲੱਗਾ ਕਿ ਮੈਂ ਤੇਰਾ ਨਿਸ਼ਾਨਦੇਹੀ ਦਾ ਕੰਮ ਛੇਤੀ ਕਰਵਾ ਦੇਵਾਂਗਾ ਜੇਕਰ ਤੂੰ ਮੇਰੇ ਨਾਲ ਪੈਸਿਆਂ ਦੀ ਗੱਲ ਕਰ ਲਵੇ। ਗੁਰਜੰਟ ਸਿੰਘ ਅਨੁਸਾਰ ਉਸ ਵਿਅਕਤੀ ਨੇ ਇਹ ਵੀ ਕਿਹਾ ਕਿ ਇਹ ਪੈਸੇ ਤਹਿਸੀਲ ਦਫ਼ਤਰ ਤੋਂ ਲੈ ਕੇ ਉੱਪਰ ਡੀਸੀ ਤੱਕ ਦਿੱਤੇ ਜਾਣੇ ਹਨ।
ਉਸ ਨੇ ਦੱਸਿਆ ਕਿ ਸਾਡੀ ਗੱਲ 80 ਹਜ਼ਾਰ ਰੁਪਏ ਵਿੱਚ ਤੈਅ ਹੋ ਗਈ ਜਿਸ ਦੇ ਕੁਝ ਪੈਸੇ ਪੇਸ਼ਗੀ ਵਜੋਂ 18 ਅਪ੍ਰੈਲ ਸੋਮਵਾਰ ਨੂੰ ਦਿੱਤੇ ਜਾਣੇ ਸਨ। ਇਸ ਸੰਬੰਧੀ ਉਕਤ ਵਿਅਕਤੀ ਨੇ ਗੁਰਜੰਟ ਸਿੰਘ ਨੂੰ ਕਈ ਵਾਰ ਫੋਨ ਵੀ ਕਰਿਆ ਜਿਸ ਦੀਆਂ ਰਿਕਾਰਡਿੰਗਜ਼ ਵੀ ਗੁਰਜੰਟ ਸਿੰਘ ਕੋਲ ਮੌਜੂਦ ਹਨ। ਸੋਮਵਾਰ ਦੁਪਹਿਰ ਬਾਅਦ ਜਦ ਤਹਿਸੀਦਾਰ ਦਫ਼ਤਰ ਦੇ ਸਾਹਮਣੇ ਇੱਕ ਪ੍ਰਾਈਵੇਟ ਖੋਖੇ ਵਿੱਚ ਉਕਤ ਕਾਨੂੰਗੋ ਵਿਅਕਤੀ ਗੁਰਜੰਟ ਸਿੰਘ ਤੋਂ ਪੈਸੇ ਲੈਣ ਆਇਆ ਤਾਂ ਗੁਰਜੰਟ ਸਿੰਘ ਦੇ ਨਾਲ ਆਏ ਸਾਥੀਆਂ ਨੇ ਮੌਕੇ ’ਤੇ ਹੀ ਰੰਗੇ ਹੱਥੀ ਦਬੋਚ ਲਿਆ ਅਤੇ ਗੁਰਜੰਟ ਸਿੰਘ ਵੱਲੋਂ ਉਕਤ ਕਥਿਤ ਕਾਨੂੰਗੋ ਨੂੰ ਦਿੱਤੇ ਲੱਗਭੱਗ 18500 ਰੁਪਏ ਉਸ ਦੀ ਪੈਂਟ ਦੀ ਜੇਬ ’ਚੋਂ ਕੱਢੇ । ਗੁਰਜੰਟ ਸਿੰਘ ਨੇ ਆਪਣੇ ਸਾਥੀਆਂ ਨੂੰ ਸਾਰੀ ਕਹਾਣੀ ਪਹਿਲਾਂ ਹੀ ਦੱਸ ਕੇ ਬੁਲਾਇਆ ਹੋਇਆ ਸੀ। ਇਸ ਤੋਂ ਬਾਅਦ ਉਕਤ ਕਥਿਤ ਕਾਨੂੰਗੋ ਨੇ ਮੌਕੇ ਤੋਂ ਭੱਜਣ ਦੀ ਕੋਸ਼ਿਸ਼ ਕੀਤੀ ਅਤੇ ਗੁਰਜੰਟ ਸਿੰਘ ਦੇ ਸਾਥੀ ਉਸ ਨੂੰ ਫੜ ਕੇ ਰੋਕਦੇ ਰਹੇ ਜਿਸ ਦੀ ਵੀਡੀਓ ਕਲਿੱਪ ਵੀ ਬਣੀ ਹੋਈ ਹੈ, ਫਿਰ ਵੀ ਕਥਿਤ ਕਾਨੂੰਗੋ ਆਪਣੀ ਸਕੂਟਰੀ ਚੁੱਕ ਕੇ ਮੀਡੀਆ ਕਰਮੀਆਂ ਦੇ ਪਹੁੰਚਣ ਤੋਂ ਪਹਿਲਾਂ-ਪਹਿਲਾਂ ਰਫੂਚੱਕਰ ਹੋ ਗਿਆ।
ਬਾਕਸ ਆਈਟਮ
ਇਹ ਹੈ ਉਕਤ ਰਿਸ਼ਵਤ ਕਾਂਡ ਦੀ ਅਸਲ ਕਹਾਣੀ
ਮੌਕੇ ’ਤੇ ਪੁੱਜ ਕੇ ਇਕੱਤਰ ਕੀਤੀ ਗਈ ਜਾਣਕਾਰੀ ਅਨੁਸਾਰ ਉਕਤ ਕਥਿਤ ਕਾਨੂੰਗੋ ਅਸਲ ਵਿੱਚ ਮਾਲ ਵਿਭਾਗ ਦਾ 2 ਸਾਲ ਪਹਿਲਾਂ ਸੇਵਾ ਮੁਕਤ ਹੋਇਆ ਕਾਨੂੰਗੋ ਹੈ, ਜਿਸ ਦਾ ਹੁਣ ਤਹਿਸੀਲ ਵਿੱਚ ਆਉਣਾ ਜਾਣਾ ਹੈ ਅਤੇ ਉਸ ਦੀ 2 ਨੰਬਰ ਦੇ ਕੰਮਾਂ ’ਚ ਪੂਰੀ ਤੂਤੀ ਬੋਲਦੀ ਹੈ। ਇਹ ਸੇਵਾ ਮੁਕਤ ਕਾਨੂੰਗੋ ਮਾਲ ਵਿਭਾਗ ਨਾਲ ਸੰਬੰਧਿਤ ਦਰਖ਼ਾਸਤਾਂ ਦੇਣ ਵਾਲਿਆਂ ਤੱਕ ਖ਼ੁਦ ਪਹੁੰਚ ਕਰਕੇ ਕੰਮ ਛੇਤੀ ਕਰਵਾਉਣ ਦਾ ਲਾਲਚ ਦੇ ਕੇ ‘‘ਲੈਣ- ਦੇਣ’’ ਤੈਅ ਕਰ ਲੈਂਦਾ ਹੈ। ਇਸ ਸੇਵਾ ਮੁਕਤ ਕਾਨੂੰਗੋ ਉੱਪਰ ਪਹਿਲਾਂ ਵੀ ਵਿਜੀਲੈਂਸ ਵੱਲੋਂ ਰਿਸ਼ਵਤ ਸੰਬੰਧੀ ਮਾਮਲੇ ਦਰਜ ਹਨ। ਇਹ ਸੇਵਾ ਮੁਕਤ ਕਾਨੂੰਗੋ ਤਹਿਸੀਲ ਦਫ਼ਤਰ ਵਿੱਚ ਨੌਕਰੀ ਕਰ ਰਹੇ ਮੁਲਾਜ਼ਮਾਂ ਦੇ ਕਮਰਿਆਂ ’ਚ ਅਕਸਰ ਹਾਜ਼ਰ ਮਿਲਦਾ ਹੈ ਜਿੱਥੋ ਇਸ ਨੂੰ ਭਿਣਕ ਲਗਦੀ ਹੈ ਕਿ ਕਿਸ ਵਿਅਕਤੀ ਨੇ ਕਿਹੜੇ ਕੰਮ ਲਈ ਦਰਖ਼ਾਸਤ ਦਿੱਤੀ ਹੈ। ਇਸ ਤਰਾਂ ਇਹ ਸੇਵਾ ਮੁਕਤ ਕਾਨੂੰਗੋ ਦਰਖ਼ਾਸਤ ਦੇਣ ਵਾਲੇ ਨਾਲ ਸੰਪਰਕ ਪੈਦਾ ਕਰਕੇ ਮੁਰਗੀ ਫਸਾ ਲੈਂਦਾ ਹੈ ਪ੍ਰੰਤੂ 18 ਅਪ੍ਰੈਲ ਇਹ ਸੇਵਾ ਮੁਕਤ ਕਾਨੂੰਗੋ ਖ਼ੁਦ ਮੁਰਗਾ ਬਣ ਗਿਆ। ਉਕਤ ਰਿਸ਼ਵਤ ਕਾਂਡ ਦਾ ਰੌਲਾ ਪੈਣ ਸਮੇਂ ਹਾਜ਼ਰ ਲੋਕ ਮੰਗ ਕਰ ਰਹੇ ਸਨ ਕਿ ਜਿਸ ਵਿਅਕਤੀ ਉੱਪਰ ਪਹਿਲਾਂ ਹੀ ਵਿਜੀਲੈਂਸ ਦੇ ਕਈ ਮੁਕੱਦਮੇ ਦਰਜ ਹੋਣ ਉਸ ਦੀ ਤਹਿਸੀਲ ਦੇ ਮੌਜੂਦਾ ਮੁਲਾਜ਼ਮਾਂ ਨਾਲ ਆਪਣੀ ਸੇਵਾ ਮੁਕਤੀ ਤੋਂ ਬਾਅਦ ਵੀ ਕਿਸ ਤਰਾਂ ਦੀ ਨੇੜਤਾ ਹੋ ਸਕਦੀ ਹੈ, ਜਿਸ ਦੀ ਜਾਂਚ ਹੋਣੀ ਚਾਹੀਦੀ ਹੈ। ਆਖਿਰ , ਇੱਕ ਸੇਵਾ ਮੁਕਤ ਕਾਨੂੰਗੋ ਆਪਣੇ ਪੱਧਰ ’ਤੇ ਹੀ ਰਿਸ਼ਵਤ ਲੈ ਕੇ ਤਕਸੀਮ, ਨਿਸ਼ਾਨਦੇਹੀ ਅਤੇ ਮਾਲ ਵਿਭਾਗ ਦੇ ਹੋਰ ਫਸੇ ਹੋਏ ਕੰਮ ਕਰਵਾਉਣ ਦੀ ਜ਼ਿੰਮੇਵਾਰੀ ਕਿਵੇਂ ਲੈ ਸਕਦਾ ਹੈ।
