-ਮਜ਼ਦੂਰ ਸ਼ੇ੍ਣੀ ਦੇ ਰੁਜ਼ਗਾਰ ’ਤੇ ਚੱਲੇਗੀ ਟ੍ਰੈਫਿਕ ਦੇ ਨਿਯਮਾਂ ਦੀ ਤਲਵਾਰ
ਬਰਨਾਲਾ, 22 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) : ਜੇਕਰ ਤੁਸੀ ਮੋਟਰਸਾਈਕਲ ਮਗਰ ਰੇਹੜੀ ਲਗਾ ਕੇ ਜਗਾੜੂ ਵਾਹਨ ਤਿਆਰ ਕੀਤਾ ਹੈ ਤਾਂ ਇਹ ਖ਼ਬਰ ਤੁਹਾਨੂੰ ਸੁਚੇਤ ਕਰਦੀ ਹੈ ਕਿ ਪੰਜਾਬ ਸਰਕਾਰ ਦੇ ਨਵੇਂ ਹੁਕਮ ਤੁਹਾਡੇ ਜਗਾੜੂ ਵਾਹਨ ਨੂੰ ਜ਼ਬਤ ਕਰ ਸਕਦੇ ਹਨ ਅਤੇ ਕਿਸੇ ਵੱਡੇ ਜੁਰਮਾਨੇ ਦੇ ਭਾਗੀ ਵੀ ਬਣ ਸਕਦੇ ਹੋ। ਸੂਬੇ ਦੇ ਏਡੀਜੀਪੀ ਟ੍ਰੈਫਿਕ ਵੱਲੋਂ ਪੁਲਿਸ ਕਮਿਸ਼ਨਰਾਂ ਤੇ ਜ਼ਿਲ੍ਹਾ ਪੁਲਿਸ ਮੁਖੀਆਂ ਨੂੰ ਉਕਤ ਮਾਮਲੇ ’ਚ ਇੱਕ ਪੱਤਰ ਜਾਰੀ ਕਰਕੇ ਸਾਰੇ ਜਗਾੜੂ ਵਾਹਨ ਬੰਦ ਕਰਨ ਦੇ ਸਖ਼ਤ ਹੁਕਮ ਦਿੱਤੇ ਹਨ। ਏਡੀਜੀਪੀ ਵੱਲੋਂ ਜਾਰੀ ਪੱਤਰ ’ਚ ਇਨ੍ਹਾਂ ਮੋਟਰਸਾਈਕਲ ਜਗਾੜੂ ਵਾਹਨਾਂ ਵਿੱਚ ਸਵਾਰੀਆਂ ਬਿਠਾਉਣ ਅਤੇ ਸੀਮਿੰਟ, ਰੇਤਾ ਬਜਰੀ, ਇੱਟਾਂ, ਸਰੀਆ ਤੇ ਹੋਰ ਸਮਾਨ ਲਿਜਾਣ ਕਰਕੇ ਸੜਕਾਂ ’ਤੇ ਹੁੰਦੇ ਹਾਦਸਿਆਂ ਦਾ ਜ਼ਿੰਮੇਵਾਰ ਦੱਸਿਆ ਗਿਆ ਹੈ। ਏਡੀਜੀਪੀ ਵੱਲੋਂ ਪੁਲਿਸ ਅਧਿਕਾਰੀਆਂ ਨੂੰ ਹਦਾਇਤ ਦਿੱਤੀ ਗਈ ਹੈ ਕਿ ਮੋਟਰਸਾਈਕਲ ਵਾਹਨਾਂ ਨੂੰ ਬੰਦ ਕਰਨ ਲਈ ਵਿਸ਼ੇਸ਼ ਮੁਹਿੰਮ ਚਲਾਈ ਜਾਵੇ ਅਤੇ ਇਹ ਮੁਹਿੰਮ ਨਿੰਰਾਤਰ ਜਾਰੀ ਰੱਖੀ ਜਾਵੇ। ਦੱਸਣਯੋਗ ਹੈ ਕਿ ਸੂਬੇ ’ਚ ਕਮਜ਼ੋਰ ਆਰਥਿਕ ਹਾਲਤ ਕਾਰਨ ਸਮਾਨ ਢੋਹਣ ਵਾਲਾ ਨਵਾਂ ਵਾਹਨ ਖਰੀਦਣ ਦੀ ਸਮਰੱਥਾ ਨਾ ਹੋਣ ਵਾਲੇ ਮਜ਼ਦੂਰ ਸ਼ੇਣੀ ਨਾਲ ਸੰਬੰਧਿਤ ਵਿਅਕਤੀ ਪੁਰਾਣਾ ਮੋਟਰਸਾਈਕਲ ਖ਼ਰੀਦ ਕੇ ਉਸ ਮਗਰ ਰੇਹੜੀ ਜੋੜ ਕੇ ਸਮਾਨ ਢੋਹਣ ਦਾ ਕੰਮ ਕਰਕੇ ਆਪਣਾ ਰੁਜ਼ਗਾਰ ਚਲਾ ਰਹੇ ਹਨ ਪ੍ਰੰਤੂ ਪੰਜਾਬ ਪੁਲਿਸ ਨੂੰ ਰੁਜ਼ਗਾਰ ਦਾ ਇਹ ਧੰਦਾ ਟ੍ਰੈਫ਼ਿਕ ਦੇ ਨਿਯਮਾਂ ਦੀ ਵੱਡੀ ਉਲੰਘਣਾ ਤੇ ਹਾਦਸਿਆਂ ਦਾ ਵੱਡਾ ਜ਼ਿੰਮੇਵਾਰ ਲਗਦਾ ਹੈ। ਜਿਸ ਕਰਕੇ ਹੁਣ ਰੁਜ਼ਗਾਰ ਦੇ ਇਸ ਧੰਦੇ ਉੱਪਰ ਟ੍ਰੈਫ਼ਿਕ ਦੇ ਨਿਯਮਾਂ ਦਾ ਕੁਹਾੜਾ ਚਲਾਇਆ ਜਾਵੇਗਾ। ਬਰਨਾਲਾ ਸ਼ਹਿਰ ਅੰਦਰ ਜੁਗਾੜੂ ਵਾਹਨਾਂ ਨਾਲ ਆਪਣੇ ਪਰਿਵਾਰਾਂ ਦਾ ਪੇਟ ਭਰ ਰਹੇ ਕੁਝ ਮਜ਼ਦੂਰ ਵਿਅਕਤੀਆਂ ਨਾਲ ਜਦੋਂ ਇਨ੍ਹਾਂ ਹੁਕਮਾਂ ਸੰਬੰਧੀ ਗੱਲ ਕੀਤੀ ਤਾਂ ਉਨ੍ਹਾਂ ਰੋਸ ਭਰੇ ਲਹਿਜ਼ੇ ਵਿੱਚ ਕਿਹਾ ਕਿ ਉਹ ਸ਼ਹਿਰ ਦੇ ਕੈਬਨਿਟ ਮੰਤਰੀ ਨੂੰ ਮਿਲ ਕੇ ਅਜਿਹੇ ਹੁਕਮ ਰੱਦ ਕਰਵਾਉਣ ਦੀ ਗੁਹਾਰ ਲਗਾਉਣਗੇ। ਉਨ੍ਹਾਂ ਕਿਹਾ ਕਿ ਉਹ ਇਨ੍ਹਾਂ ਜਗਾੜੂ ਵਾਹਨਾਂ ਨਾਲ ਸਿਰਫ਼ ਹਲਕਾ-ਫੁਲਕਾ ਸਮਾਨ ਸ਼ਹਿਰ/ਪਿੰਡ ਦੀਆਂ ਅਜਿਹੀਆਂ ਤੰਗ ਗਲੀਆਂ ਵਿੱਚ ਲੈ ਕੇ ਜਾਂਦੇ ਹਨ ਜਿੱਥੇ ਵੱਡੇ ਵਾਹਨ ਨਹੀਂ ਜਾ ਸਕਦੇ, ਜੋ ਆਮ ਲੋਕਾਂ ਲਈ ਇੱਕ ਸਹੂਲਤ ਹੀ ਹੈ। ਮੋਟਰਸਾਈਕਲ ਚਲਾਉਣ ਵਾਲੇ ਵਿਅਕਤੀਆਂ ਨੇ ਉਕਤ ਪੱਤਰ ਜਾਰੀ ਕਰਨ ਵਾਲੇ ਅਫ਼ਸਰ ਨੂੰ ਸਵਾਲ ਕੀਤਾ ਕਿ ਵੱਡੇ ਵਾਹਨਾਂ ਨਾਲ ਹੋਣ ਵਾਲੇ ਵੱਡੇ ਸੜਕ ਹਾਦਸਿਆਂ ਲਈ ਕੌਣ ਜ਼ਿੰਮੇਵਾਰ ਹੈ।
