-ਕਈ ਵਰੇ ਪਹਿਲਾਂ ਮਰ ਚੁੱਕੇ ਮਾਲਕਾਂ ਦੀ ਜਗਾ ਪੇਸ਼ ਹੋ ਕੇ ਕਰਵਾਈ ਰਜਿਸਟਰੀ
–– ਅਸਲ ਮਾਲਕਾਂ ਦੇ ਆਧਰ ਕਾਰਡ ਕਰਵਾਏ ਜਾਅਲੀ ਤਿਆਰ
ਬਰਨਾਲਾ, 23 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) : ਬਰਨਾਲਾ ਪੁਲਿਸ ਨੇ ਜਾਅਲੀ ਦਸਤਾਵੇਜ ਤਿਆਰ ਕਰਵਾ ਕੇ ਅਤੇ ਜ਼ਮੀਨ ਦੇ ਮਰ ਚੁੱਕੇ ਅਸਲ ਮਾਲਕਾਂ ਦੀ ਜਗਾ ਕਿਸੇ ਹੋਰ ਵਿਅਕਤੀਆਂ ਨੂੰ ਮਾਲਕ ਬਣਾ ਕੇ ਰਜਿਸਟਰੀ ਕਰਵਾਉਣ ਦੇ ਮਾਮਲੇ ’ਚ ਪਿੰਡ ਠੀਕਰੀਵਾਲਾ ਦੇ 4 ਵਿਅਕਤੀਆਂ ਅਤੇ ਇੱਕ ਔਰਤ ਸਮੇਤ ਬਰਨਾਲਾ ਦੇ ਇੱਕ ਅਤੇ ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਤੁੰਗਵਾਲੀ ਦੇ ਇੱਕ ਵਿਅਕਤੀ ਸਮੇਤ ਬਰਨਾਲਾ ਜ਼ਿਲ੍ਹਾ ਅਦਾਲਤਾਂ ਵਿੱਚ ਕੰਮ ਕਰ ਰਹੀ ਇੱਕ ਵਕੀਲ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕੀਤਾ ਹੈ। ਉਕਤ ਮਾਮਲੇ ਵਿੱਚ ਥਾਣਾ ਸਿਟੀ-1 ਵਿੱਚ ਦਰਜ ਐਫਆਈਆਰ ਨੰਬਰ 0154, ਮਿਤੀ 22/04/2022 ਅਨੁਸਾਰ ਹਰਵਿੰਦਰ ਸਿੰਘ ਪੁੱਤਰ ਬੰਤ ਸਿੰਘ, ਸੁਖਦੇਵ ਸਿੰਘ ਪੁੱਤਰ ਜੰਗ ਸਿੰਘ, ਹਰਦੇਵ ਸਿੰਘ ਪੁੱਤਰ ਜੰਗੀਰ ਸਿੰਘ, ਕੁਲਦੀਪ ਸਿੰਘ ਨੰਬਰਦਾਰ ਤੇ ਗੁਰਚਰਨ ਕੌਰ ਪਤਨੀ ਕੁਲਵਿੰਦਰ ਸਿੰਘ ਸਾਰੇ ਵਾਸੀਅਨ ਪਿੰਡ ਠੀਕਰੀਵਾਲਾ ਅਤੇ ਚਰਨਜੀਤ ਸਿੰਘ ਪੁੱਤਰ ਮੱਲ ਸਿੰਘ ਵਾਸੀ ਮਹਿਲ ਨਗਰ ਬਰਨਾਲਾ, ਸਿਮਰਜੀਤ ਸਿੰਘ ਪੁੱਤਰ ਕਾਕਾ ਸਿੰਘ ਵਾਸੀ ਤੁੰਗਵਾਲੀ ਜ਼ਿਲਾ ਬਠਿੰਡਾ ਅਤੇ ਵਕੀਲ ਰਜਨੀ ਕੌਰ ਦੇ ਖ਼ਿਲਾਫ਼ ਆਈਪੀਸੀ 1860 ਦੀਆਂ ਧਾਰਾਵਾਂ 419,420, 467, 468,471,120ਬੀ ਅਤੇ ਰਜਿਸਟ੍ਰੇਸ਼ਨ ਐਕਟ 1908 ਦੀ ਧਾਰਾ 82 ਅਨੁਸਾਰ ਮੁਕੱਦਮਾ ਦਰਜ ਕੀਤਾ ਹੈ। ਵੇਰਵੇ ਅਨੁਸਾਰ ਦੋਸ਼ੀ ਹਰਵਿੰਦਰ ਸਿੰਘ ਨੇ ਆਪਣੇ ਆਪ ਨੂੰ ਮਰ ਚੁੱਕੇ ਗੁਰਮੁਖ ਸਿੰਘ ਪੁੱਤਰ ਸੱਜਣ ਸਿੰਘ ਉਰਫ ਗੱਜਣ ਸਿੰਘ ਦੀ ਜਗ੍ਹਾ ਖੜ ਕੇ ਅਤੇ ਸੁਖਦੇਵ ਸਿੰਘ ਨੇ ਆਪਣੇ ਆਪ ਨੂੰ ਮਰ ਚੁੱਕੇ ਅਜੀਤ ਸਿੰਘ ਪੁੱਤਰ ਸੱਜਣ ਸਿੰਘ ਉਰਫ ਗੱਜਣ ਸਿੰਘ ਦੀ ਜਗ੍ਹਾ ਖੜ ਕੇ ਅਤੇ ਹਰਦੇਵ ਸਿੰਘ ਨੇ ਆਪਣੇ ਆਪ ਨੂੰ ਮਰ ਚੁੱਕੇ ਹਰੀ ਸਿੰਘ ਪੁੱਤਰ ਕਾਹਨ ਸਿੰਘ ਦੀ ਜਗ੍ਹਾ ਖੜ ਕੇ ਵਸੀਕਾ ਬੈਅ ਨੰਬਰ 86/1/5285 ਮਿਤੀ 28 ਫਰਵਰੀ 2022 ਅਤੇ ਵਸੀਕਾ ਤਬਾਦਲਾ ਨੰਬਰ 86/4/182 ਮਿਤੀ 28 ਫਰਵਰੀ 2022 ਤਸਦੀਕ ਕਰਵਾਇਆ ਅਤੇ ਇਨਾਂ ਦੋਨੋ ਵਸੀਕੀਆਂ ਦੀ ਸ਼ਨਾਖਤ ਕੁਲਦੀਪ ਸਿੰਘ ਨੰਬਰਦਾਰ ਠੀਕਰੀਵਾਲ ਅਤੇ ਗਵਾਹ ਚਰਨਜੀਤ ਸਿੰਘ ਬਰਨਾਲਾ ਨੇ ਕੀਤੀ। ਉਕਤ ਮਾਮਲੇ ਵਿੱਚ ਇਨਾਂ ਵਸੀਕੀਆਂ ਦੇ ਲਾਭਪਾਤਰ ਗੁਰਚਰਨ ਕੌਰ, ਕੁਲਵਿੰਦਰ ਸਿੰਘ ਅਤੇ ਇਨ੍ਹਾਂ ਦੇ ਨਜ਼ਦੀਕੀ ਰਿਸ਼ਤੇਦਾਰ ਸਿਮਰਜੀਤ ਸਿੰਘ ਨੂੰ ਵੀ ਮੁਕੱਦਮੇ ’ਚ ਸ਼ਾਮਲ ਕੀਤਾ ਗਿਆ ਹੈ। ਐਫਆਈਆਰ ਦੇ ਵੇਰਵੇ ਅਨੁਸਾਰ ਉਕਤ ਜਾਅਲੀ ਰਜਿਸਟਰੀ ਕਰਵਾਉਣ ਦੇ ਮਾਮਲੇ ’ਚ ਮਾਲ ਵਿਭਾਗ ਦੇ ਕੁਝ ਸੇਵਾ ਮੁਕਤ ਕਰਮਚਾਰੀਆਂ ਦੀ ਮਿਲੀ ਭੁਗਤ ਅਤੇ ਜਾਅਲੀ ਆਧਰ ਕਾਰਡ ਤਿਆਰ ਕਰਨ ਵਾਲਿਆ ਦੀ ਇਸ ਸਾਜਿਸ਼ ਵਿੱਚ ਸ਼ਮੂਲੀਅਤ ਪਾਈ ਗਈ ਹੈ ਜਿਨਾਂ ਖ਼ਿਲਾਫ਼ ਵੱਖਰੇ ਤੌਰ ’ਤੇ ਕਾਰਵਾਈ ਕੀਤੀ ਜਾ ਰਹੀ ਹੈ। ਉਕਤ ਜਾਅਲੀ ਰਜਿਸਟਰੀ ਮਾਮਲੇ ਦੀ ਸ਼ਿਕਾਇਤ ਰਣਜੀਤ ਸਿੰਘ ਪੁੱਤਰ ਗੋਬਿੰਦਰ ਸਿੰਘ ਵਾਸੀ ਪ੍ਰੇਮ ਬਸਤੀ ਸੰਗਰੂਰ ਵੱਲੋਂ ਕੀਤੀ ਗਈ ਸੀ।
