ਸੰਗਤ ਦਰਸ਼ਨ,ਕੌਫੀ ਵਿਦ ਕੈਪਟਨ ਅਤੇ ਹੁਣ ਜਨਤਾ ਦਰਬਾਰ .. ਡੀਸੀ ਤੇ ਐਸਐਸਪੀ ਰਹਿਣ ਤਿਆਰ
-ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਅਲੋਚਨਾ ਤੋਂ ਬਾਅਦ ਬਦਲਿਆ ਆਪਣਾ ਫ਼ੈਸਲਾ
ਬਰਨਾਲਾ, 19 ਮਈ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਸਰਕਾਰ ਵੱਲੋਂ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣਨ ਲਈ ‘‘ਜਨਤਾ ਦਰਬਾਰ’’ ਹੁਣ ਚੰਡੀਗੜ ਤੋਂ ਚੱਲ ਕੇ ਸੂਬੇ ਦੇ ਜ਼ਿਲ੍ਹਾ ਹੈੱਡਕੁਆਰਟਰਾਂ ’ਤੇ ਲੱਗੇਗਾ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਬੀਤੇ ਦਿਨੀ ਚੰਡੀਗੜ੍ਹ ਵਿਖੇ ਲਗਾਏ ਜਨਤਾ ਦਰਬਾਰ ਦੀ ਵਿਰੋਧੀਆਂ ਵੱਲੋਂ ਵੱਡੇ ਪੱਧਰ ’ਤੇ ਅਲੋਚਨਾ ਹੋਣ ਤੋਂ ਬਾਅਦ ਉਕਤ ਫ਼ੈਸਲਾ ਲਿਆ ਹੈ। ਚੰਡੀਗੜ੍ਹ ਵਾਲੇ ਦਰਬਾਰ ਵਿੱਚ ਪੁੱਜੇ ਲੋਕਾਂ ਨੂੰ ਕਾਫੀ ਔਕੜਾਂ ਦਾ ਸਾਹਮਣਾ ਕਰਨਾ ਪਿਆ ਸੀ, ਵੱਡੀ ਗਿਣਤੀ ਲੋਕ ਮੁੱਖ ਮੰਤਰੀ ਨੂੰ ਮਿਲੇ ਬਗੈਰ ਹੀ ਵਾਪਿਸ ਮੁੜੇ ਸਨ। ਜ਼ਿਲ੍ਹਾ ਹੈੱਡਕੁਆਰਟਰਾਂ ’ਤੇ ਲੱਗਣ ਵਾਲੇ ਜਨਤਾ ਦਰਬਾਰ ਵਿੱਚ ਸੂਬੇ ਦਾ ਕੋਈ ਇੱਕ ਕੈਬਨਿਟ ਮੰਤਰੀ ਹਾਜ਼ਰੀ ਭਰੇਗਾ ਅਤੇ ਡੀਸੀ, ਐਸਐਸਪੀ ਤੇ ਜ਼ਿਲ੍ਹੇ ਦੇ ਸਾਰੇ ਵਿਭਾਗਾਂ ਦੇ ਸਾਰੇ ਮੁਖੀ ਹਾਜ਼ਰ ਰਹਿਣਗੇ।
ਅਕਾਲੀ ਭਾਜਪਾ ਸਰਕਾਰ ਵੇਲੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ‘‘ਸੰਗਤ ਦਰਸ਼ਨ’’ ਅਤੇ ਕਾਂਗਰਸ ਦੀ ਸਰਕਾਰ ਵੇਲੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ‘‘ਕੌਫ਼ੀ ਵਿਦ ਕੈਪਟਨ’’ ਸਮਾਗਮਾਂ ਦੀ ਜੰਮ ਕੇ ਅਲੋਚਨਾ ਕਰਨ ਵਾਲੀ ਆਮ ਆਦਮੀ ਪਾਰਟੀ ਵੱਲੋਂ ਖ਼ੁਦ ਜਨਤਾ ਦਰਬਾਰ ਦਾ ਅਯੋਜਨ ਕਰਨਾ ਹੈਰਾਨੀਜਨਕ ਹੈ ਕਿਉਂਕਿ ਬਾਦਲ ਅਤੇ ਕੈਪਟਨ ਦੇ ਸਮਾਗਮਾਂ ਦਾ ਵਿਰੋਧ ਕਰਦੇ ਹੋਏ ‘ਆਪ’ ਆਗੂ ਤਰਕ ਦਿੰਦੇ ਸੀ ਕਿ ਇਨਾਂ ਸਮਾਗਮਾਂ ਕਾਰਨ ਸਾਰੀ ਅਫ਼ਸਰਸ਼ਾਹੀ ਇੱਕੋ ਜਗਾ ਰੁੱਝ ਜਾਂਦੀ ਹੈ ਤੇ ਲੋਕ ਸਰਕਾਰੀ ਦਫ਼ਤਰਾਂ ਵਿੱਚ ਧੱਕੇ ਖਾ ਕੇ ਮੁੜ ਜਾਂਦੇ ਹਨ। ਸੂਬੇ ਦੇ ਲੋਕ ਬਦਲਾਅ ਦੀ ਤਾਕ ’ਚ ਹਨ ਪ੍ਰੰਤੂ ਪਿਛਲੇ ਦਿਨਾਂ ਦੌਰਾਨ ਮਾਨ ਸਰਕਾਰ ਵੱਲੋਂ ਸਰਕਾਰੀ ਕੰਮਾਂ ਲਈ ਚੁੱਕਿਆ ਗਿਆ ਹਜ਼ਾਰਾਂ ਕਰੋੜ ਰੁਪਏ ਦਾ ਕਰਜ਼ਾ, ਸੇਵਾ ਮੁਕਤ ਪਟਵਾਰੀਆਂ ਦੀ ਭਰਤੀ ਅਤੇ ਹੁਣ ਜਨਤਾ ਦਰਬਾਰ ਵਰਗੇ ਫ਼ੈਸਲੇ ਆਮ ਆਦਮੀ ਪਾਰਟੀ ਨੂੰ ਰਵਾਇਤੀ ਪਾਰਟੀਆਂ ਦੇ ਰਾਹ ’ਤੇ ਤੁਰਦੇ ਦਿਖਾ ਰਹੇ ਹਨ। ਇੱਥੇ ਇਹ ਵੀ ਧਿਆਨਦੇਣ ਯੋਗ ਹੈ ਕਿ ਸਹੁੰ ਚੁੱਕਣ ਤੋਂ ਤੁਰੰਤ ਬਾਅਦ ਭਗਵੰਤ ਮਾਨ ਨੇ ਆਪਣੇ ਵਿਧਾਇਕਾਂ ਨੂੰ ਹੁਕਮ ਦਿੱਤਾ ਸੀ ਕਿ ਉਹ ਆਪਣੇ-ਆਪਣੇ ਹਲਕਿਆਂ ਵਿੱਚ ਰਹਿ ਕੇ ਲੋਕਾਂ ਵਿੱਚ ਵਿਚਰਨ ਤੇ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣਨ ਪ੍ਰੰਤੂ ਦੇਖਣ ਵਿੱਚ ਆਇਆ ਹੈ ਕਿ ਬਹੁਤੇ ‘ਆਪ’ ਵਿਧਾਇਕ ਹਫ਼ਤੇ ਦੇ ਜ਼ਿਆਦਾ ਦਿਨ ਚੰਡੀਗੜ੍ਹ ਹੀ ਬਿਤਾਉਦੇ ਹਨ ਇੱਥੋ ਤੱਕ ਕਿ ਕੁਝ ਵਿਧਾਇਕਾਂ ਨੇ ਤਾਂ ਆਪਣੇ ਜੱਦੀ ਪਿੰਡਾਂ ਤੋਂ ਆਪਣੇ ਪਰਿਵਾਰਾਂ ਨੂੰ ਵੀ ਚੰਡੀਗੜ੍ਹ ਸਿਫ਼ਟ ਕਰ ਲਿਆ ਹੈ।
