-9 ਵਿਧਾਨ ਸਭਾ ਹਲਕਿਆਂ ਚੋਂ 5 ਉੱਪਰ ਗੁਰਮੇਲ ਸਿੰਘ ਅਤੇ 4 ਉੱਪਰ ਸਿਮਰਨਜੀਤ ਮਾਨ ਨੂੰ ਮਿਲੀ ਲੀਡ
ਬਰਨਾਲਾ 26 ਜੂਨ (ਨਿਰਮਲ ਸਿੰਘ ਪੰਡੋਰੀ)-ਲੋਕ ਸਭਾ ਹਲਕਾ ਸੰਗਰੂਰ ਦੀ ਜ਼ਿਮਨੀ ਚੋਣ ਤੋਂ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਉਮੀਦਵਾਰ ਸਿਮਰਨਜੀਤ ਸਿੰਘ ਮਾਨ ਨੇ ਜਿੱਤ ਪ੍ਰਾਪਤ ਕਰਕੇ ਪੰਜਾਬ ਦੀ ਭਗਵੰਤ ਮਾਨ ਸਰਕਾਰ ਨੂੰ ਸਿਆਸੀ ਝਟਕਾ ਦਿੱਤਾ ਹੈ।ਸਰਦਾਰ ਮਾਨ ਨੇ ਆਪ ਦੇ ਉਮੀਦਵਾਰ ਸਰਪੰਚ ਗੁਰਮੇਲ ਸਿੰਘ ਤੋਂ 5822 ਵੋਟਾਂ ਨਾਲ ਇਹ ਚੋਣ ਜਿੱਤ ਲਈ ਹੈ। ਜੇਕਰ ਹਲਕਾਵਾਈਜ਼ ਗੱਲ ਕੀਤੀ ਜਾਵੇ ਤਾਂ ਲੋਕ ਸਭਾ ਸੰਗਰੂਰ ਤਹਿਤ ਪੈਂਦੇ 9 ਵਿਧਾਨ ਸਭਾ ਹਲਕਿਆਂ ਚੋਂ 5 ਉੱਪਰ ਆਮ ਆਦਮੀ ਪਾਰਟੀ ਅਤੇ 4 ਹਲਕਿਆਂ ਉਪਰ ਸਿਮਰਨਜੀਤ ਸਿੰਘ ਮਾਨ ਦੀ ਪਾਰਟੀ ਨੇ ਜਿੱਤ ਪ੍ਰਾਪਤ ਕੀਤੀ। ਮਾਨ ਸਰਕਾਰ ਦੇ ਦੋਵੇਂ ਮੰਤਰੀ ਹਰਪਾਲ ਸਿੰਘ ਚੀਮਾ ਅਤੇ ਗੁਰਮੀਤ ਸਿੰਘ ਮੀਤ ਹੇਅਰ ਦੇ ਹਲਕਿਆਂ ਵਿੱਚ ਵੀ ਸਿਮਰਨਜੀਤ ਸਿੰਘ ਮਾਨ ਨੇ ਜਿੱਤ ਪ੍ਰਾਪਤ ਕੀਤੀ। ਸੰਗਰੂਰ ਵਿਧਾਨ ਸਭਾ ਹਲਕੇ ਚੋਂ ਆਪ ਉਮੀਦਵਾਰ ਗੁਰਮੇਲ ਸਿੰਘ ਨੂੰ 30295 ਵੋਟਾਂ ਮਿਲੀਆਂ ਜਦਕਿ ਸਿਮਰਨਜੀਤ ਸਿੰਘ ਮਾਨ ਨੂੰ 27803 ਵੋਟਾਂ ਮਿਲੀਆਂ ਇਸੇ ਤਰ੍ਹਾਂ ਸੰਗਰੂਰ ਤੋਂ ਆਪ ਉਮੀਦਵਾਰ ਦੀ 2492 ਵੋਟਾਂ ਨਾਲ ਲੀਡ ਰਹੀ। ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਹਲਕੇ ਧੂਰੀ ਤੋਂ ਆਪ ਉਮੀਦਵਾਰ ਗੁਰਮੇਲ ਸਿੰਘ ਨੂੰ 33160 ਵੋਟਾਂ ਅਤੇ ਸਿਮਰਜੀਤ ਸਿੰਘ ਮਾਨ ਨੂੰ 21124 ਵੋਟਾਂ ਪੈਣ ਨਾਲ ਇੱਥੇ ਆਪ ਉਮੀਦਵਾਰ ਦੀ 12036 ਵੋਟਾਂ ਦੀ ਲੀਡ ਰਹੀ। ਆਮ ਆਦਮੀ ਪਾਰਟੀ ਦੇ ਤੇਜ਼ਤਰਾਰ ਵਿਧਾਇਕ ਅਮਨ ਅਰੋੜਾ ਦੇ ਹਲਕੇ ਸੁਨਾਮ ‘ਚ ਵੀ ਆਪ ਦੀ ਲੀਡ 1483 ਵੋਟਾਂ ਦੀ ਰਹੀ ਜਿਥੇ ਗੁਰਮੇਲ ਸਿੰਘ ਨੂੰ 36012 ਵੋਟਾਂ ਅਤੇ ਸਿਮਰਨਜੀਤ ਸਿੰਘ ਮਾਨ ਨੂੰ 34529 ਵੋਟਾਂ ਪਈਆਂ। ਹਲਕਾ ਲਹਿਰਾਗਾਗਾ ਤੋਂ ਵੀ ਆਪ ਉਮੀਦਵਾਰ ਦੀ 2790 ਵੋਟਾਂ ਦੀ ਲੀਡ ਰਹੀ ਜਿੱਥੇ ਸਰਪੰਚ ਗੁਰਮੇਲ ਸਿੰਘ ਨੂੰ 26139 ਵੋਟਾਂ ਅਤੇ ਸਿਮਰਨਜੀਤ ਸਿੰਘ ਮਾਨ ਨੂੰ ਵੋਟਾਂ 23349 ਵੋਟਾਂ ਪਈਆਂ । ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ‘ਚ ਆਮ ਆਦਮੀ ਪਾਰਟੀ ਨੂੰ ਬਹੁਤ ਘੱਟ ਲੀਡ ਪ੍ਰਾਪਤ ਹੋਈ ਜਿੱਥੇ ਆਪ ਉਮੀਦਵਾਰ ਸਿਰਫ 203 ਵੋਟਾਂ ਨਾਲ ਹੀ ਜੇਤੂ ਰਿਹਾ ਇੱਥੋਂ ਗੁਰਮੇਲ ਸਿੰਘ ਨੂੰ 25217 ਵੋਟਾਂ ਅਤੇ ਸਿਮਰਨਜੀਤ ਸਿੰਘ ਮਾਨ ਨੂੰ 25014 ਵੋਟਾਂ ਪਈਆਂ।
ਜਿਨ੍ਹਾਂ ਚਾਰ ਵਿਧਾਨ ਸਭਾ ਹਲਕਿਆਂ ਵਿੱਚ ਸਿਮਰਨਜੀਤ ਸਿੰਘ ਮਾਨ ਨੂੰ ਬੜ੍ਹਤ ਪ੍ਰਾਪਤ ਰਹੀ ਉਨ੍ਹਾਂ ਚੋਂ ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਦੇ ਦਿੜ੍ਹਬਾ ਹਲਕੇ ਤੋਂ ਸਰਦਾਰ ਮਾਨ ਨੂੰ 37226 ਵੋਟਾਂ ਅਤੇ ਗੁਰਮੇਲ ਸਿੰਘ ਨੂੰ 29673 ਵੋਟਾਂ ਪੈਣ ਨਾਲ ਇੱਥੇ ਮਾਨ ਦੀ 7553 ਵੋਟਾਂ ਦੀ ਲੀਡ ਰਹੀ।ਇਸੇ ਤਰ੍ਹਾਂ ਸਿੱਖਿਆ ਮੰਤਰੀ ਮੀਤ ਹੇਅਰ ਦੇ ਹਲਕੇ ਬਰਨਾਲਾ ਵਿੱਚ ਵੀ ਸਿਮਰਨਜੀਤ ਸਿੰਘ ਮਾਨ ਨੂੰ 25722 ਵੋਟਾਂ ਅਤੇ ਆਪ ਉਮੀਦਵਾਰ ਗੁਰਮੇਲ ਸਿੰਘ ਨੂੰ 23427 ਵੋਟਾਂ ਮਿਲੀਆਂ ਜਿੱਥੋਂ ਸਰਦਾਰ ਮਾਨ ਦੀ 2295 ਵੋਟਾਂ ਦੀ ਲੀਡ ਰਹੀ। ਪਿਛਲੀਆਂ ਵਿਧਾਨ ਸਭਾ ਚੋਣਾਂ ‘ਚ ਮੁੱਖ ਮੰਤਰੀ ਚੰਨੀ ਨੂੰ ਹਰਾ ਕੇ ਚਰਚਾ ਵਿੱਚ ਆਏ ਵਿਧਾਇਕ ਲਾਭ ਸਿੰਘ ਉਗੋਕੇ ਦੇ ਹਲਕੇ ਭਦੌੜ ਵਿੱਚ ਵੀ ਸਿਮਰਨਜੀਤ ਸਿੰਘ ਮਾਨ ਨੇ ਆਪਣਾ ਝੰਡਾ ਗੱਡਿਆ ਜਿੱਥੇ ਸਰਦਾਰ ਮਾਨ ਨੂੰ 27628 ਵੋਟਾਂ ਮਿਲੀਆਂ ਅਤੇ ਗੁਰਮੇਲ ਸਿੰਘ ਨੂੰ 20503 ਵੋਟਾਂ ਮਿਲੀਆਂ ਇਸ ਤਰ੍ਹਾਂ ਇੱਥੇ ਸਰਦਾਰ ਮਾਨ ਦੀ 7125 ਵੋਟਾਂ ਦੀ ਬੜ੍ਹਤ ਰਹੀ। ਮੁਸਲਿਮ ਬਹੁਗਿਣਤੀ ਵਾਲੇ ਹਲਕੇ ਮਲੇਰਕੋਟਲਾ ਵਿੱਚ ਵੀ ਸਰਦਾਰ ਸਿਮਰਨਜੀਤ ਸਿੰਘ ਮਾਨ ਨੂੰ 8101 ਵੋਟਾਂ ਦੀ ਲੀਡ ਮਿਲੀ ਜਿੱਥੋਂ ਸਰਦਾਰ ਮਾਨ 30503 ਨੂੰ ਵੋਟਾਂ ਅਤੇ ਆਪ ਦੇ ਗੁਰਮੇਲ ਸਿੰਘ ਨੂੰ 22402 ਵੋਟਾਂ ਪਈਆਂ। ਜ਼ਿਮਨੀ ਚੋਣ ਦੇ ਨਤੀਜੇ ਤੋਂ ਬਾਅਦ ਹੈਰਾਨੀ ਇਸ ਗੱਲ ਦੀ ਹੈ ਕਿ ਆਮ ਆਦਮੀ ਪਾਰਟੀ ਦੇ ਵਲੰਟੀਅਰ ਵੀ ਇਸ ਹਾਰ ਨੂੰ ਚੰਗੀ ਆਖ ਰਹੇ ਹਨ। ਸੋਸ਼ਲ ਮੀਡੀਆ ‘ਤੇ ਪੋਸਟਾਂ ਪਾ ਕੇ ਆਮ ਆਦਮੀ ਪਾਰਟੀ ਦੇ ਵਰਕਰ ਇਹ ਭੜਾਸ ਕੱਢ ਰਹੇ ਹਨ ਕਿ ਇਸ ਹਾਰ ਨਾਲ ਸਰਕਾਰ ਦੇ ਮੰਤਰੀਆਂ ਅਤੇ ਵਿਧਾਇਕਾਂ ਨੂੰ ਅਕਲ ਆ ਜਾਵੇਗੀ ਕਿਉਂਕਿ ਉਨ੍ਹਾਂ ਨੇ ਵਰਕਰਾਂ ਦੇ ਫੋਨ ਚੁੱਕਣੇ ਵੀ ਬੰਦ ਕਰ ਦਿੱਤੇ ਸਨ।
