-ਰਾਣੀ ਨੂੰ ਅੱਗਾ ਢਕਣ ਲਈ ਕਹਿਣ ਦੀ ਬਜਾਏ ਦਿੱਤੇ ਜਾ ਰਹੇ ਚਾਪਲੂਸੀ ਦੇ ਲੌਲੀਪੌਪ
ਬਰਨਾਲਾ, 29 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
ਪੰਜਾਬ ਦੇ ਬਦਲੇ ਹੋਏ ਰਾਜਨੀਤਿਕ ਹਾਲਾਤਾਂ ਵਿੱਚ ਮਾਸਟਰ ਤਾਰਾ ਸਿੰਘ ਅਤੇ ਬਾਬਾ ਖੜਕ ਸਿੰਘ ਦਾ ਲਗਾਇਆ ਹੋਇਆ ਸਿਆਸੀ ਬੂਟਾ ਸੋਕੇ ਦੀ ਮਾਰ ਝੱਲ ਰਿਹਾ ਹੈ। ਸਿਆਸੀ ਮਾਹਿਰਾਂ ਸਮੇਤ ਸਿਆਸਤ ਦੀ ਸੋਝੀ ਰੱਖਣ ਵਾਲਿਆਂ ਅਤੇ ਸ਼੍ਰੋਮਣੀ ਅਕਲੀ ਦਲ ਦੇ ਮੋਢੀ ਆਗੂਆਂ, ਵਰਕਰਾਂ ਨੇ ਕਦੇ ਸੁਪਨੇ ਵਿੱਚ ਨਹੀਂ ਸੋਚਿਆ ਹੋਣੈ ਕਿ ਸ਼ੋ੍ਮਣੀ ਅਕਾਲੀ ਦਲ ਅਜਿਹੀ ਹਾਲਤ ਵਿੱਚ ਹੋਵੇਗਾ ਜੋ ਵਿਧਾਨ ਸਭਾ ’ਚ ਸਿਰਫ਼ ਤਿੰਨ ਸੀਟਾਂ ਅਤੇ ਕਿਸੇ ਚੋਣ ਵਿੱਚ ਪੰਜਵੇਂ ਸਥਾਨ ’ਤੇ ਰਹਿਣ ਦਾ ਰਿਕਾਰਡ ਵੀ ਕਾਇਮ ਕਰੇਗਾ। ਲੋਕ ਸਭਾ ਹਲਕਾ ਸੰਗਰੂਰ ਦੀ ਜ਼ਿਮਨੀ ਚੋਣ ’ਚ ਸ਼੍ਰੋਮਣੀ ਅਕਾਲੀ ਦਲ, ਆਮ ਆਦਮੀ ਪਾਰਟੀ , ਸ਼ੋ੍ਮਣੀ ਅਕਾਲੀ ਦਲ (ਅ) , ਕਾਂਗਰਸ ਅਤੇ ਭਾਜਪਾ ਤੋਂ ਵੀ ਪਛੜ ਗਿਆ। ਇਸ ਜ਼ਿਮਨੀ ਚੋਣ ਦੇ ਨਤੀਜੇ ਨੇ ਦਲ ਦੇ ਆਗੂਆਂ ਵਿੱਚ ਚਿੰਤਾ ਦੀ ਲਹਿਰ ਪੈਦਾ ਤਾਂ ਜ਼ਰੂਰ ਕੀਤੀ ਹੈ ਪਰ ਕੋਈ ‘‘ਰਾਣੀ ਨੂੰ ਅੱਗਾ ਢਕਣ’’ ਲਈ ਕਹਿਣ ਦੀ ਹਿੰਮਤ ਨਹੀਂ ਕਰ ਰਿਹਾ ਸਗੋਂ ਚਾਪਲੂਸੀ ਦੀ ਹੱਦ ਟੱਪਦੇ ਹੋਏ ਦਲੀਲਾਂ ਦਿੱਤੀਆਂ ਜਾ ਰਹੀਆਂ ਹਨ ਕਿ ਜੰਗ ਦੌਰਾਨ ਜਰਨੈਲ ਨਹੀਂ ਬਦਲੇ ਜਾਂਦੇ। ਸ਼੍ਰੋਮਣੀ ਅਕਾਲੀ ਦਲ ਦੀ ਪੰਜਾਬ ’ਚ ਸਿਆਸੀ ਹਾਲਤ ਦਾ ਵਿਸਲੇਸ਼ਣ ਕਰਨ ਲਈ ਸੰਗਰੂਰ ਦੀ ਜ਼ਿਮਨੀ ਚੋਣ ਦੇ ਨਤੀਜਿਆਂ ’ਚ ਬਰਨਾਲਾ ਜ਼ਿਲ੍ਹੇ ਦੀ ਗੱਲ ਕਰਦੇ ਹਾਂ ।
ਜ਼ਿਲ੍ਹੇ ਦੇ ਹਲਕਾ ਮਹਿਲ ਕਲਾਂ ਵਿੱਚ ਕੁੱਲ 177 ਪੋਲਿੰਗ ਬੂਥਾਂ ਵਿੱਚੋਂ 18 ਪੋਲਿੰਗ ਬੂਥਾਂ ’ਤੇ ਸ਼ੋ੍ਮਣੀ ਅਕਲੀ ਦਲ ਨੂੰ 10 ਤੋਂ ਵੀ ਘੱਟ ਵੋਟਾਂ ਪਈਆਂ ਹਨ ਅਤੇ 125 ਪੋਲਿੰਗ ਬੂਥ ਅਜਿਹੇ ਹਨ ਜਿੱਥੇ ਦਲ ਨੂੰ 50 ਤੋਂ ਘੱਟ ਵੋਟਾਂ ਪਈਆਂ। ਹਲਕਾ ਮਹਿਲ ਕਲਾਂ ’ਚ ਸਿਰਫ਼ 6 ਪੋਲਿੰਗ ਬੂਥਾਂ ’ਤੇ ਸ਼੍ਰੋਮਣੀ ਅਕਾਲੀ ਦਲ ਨੇ 100 ਵੋਟਾਂ ਦਾ ਅੰਕੜਾ ਅਤੇ ਸਿਰਫ਼ ਇੱਕ ਪੋਲਿੰਗ ਬੂਥ ’ਤੇ 200 ਵੋਟਾਂ ਦਾ ਅੰਕੜਾ ਪਾਰ ਕੀਤਾ। ਹਲਕਾ ਬਰਨਾਲਾ ਦੇ ਕੁੱਲ 212 ਪੋਲਿੰਗ ਬੂਥਾਂ ’ਚੋਂ 51 ਬੂਥਾਂ ’ਤੇ 10 ਤੋਂ ਵੀ ਘੱਟ ਵੋਟਾਂ ਪਈਆਂ ਹਨ ਅਤੇ 144 ਬੂਥਾਂ ’ਤੇ 50 ਤੋਂ ਘੱਟ ਵੋਟਾਂ ਪਈਆਂ ਹਨ। ਪਾਰਟੀ ਆਗੂਆਂ ਲਈ ਅੱਖਾਂ ਖੋਲਣ ਵਾਲਾ ਸੰਕੇਤ ਹੈ ਕਿ ਬਰਨਾਲਾ ਹਲਕੇ ’ਚ ਸ਼੍ਰੋਮਣੀ ਅਕਾਲੀ ਦਲ ਨੇ ਸਿਰਫ਼ ਇੱਕ ਬੂਥ ’ਤੇ 100 ਵੋਟ ਦਾ ਅੰਕੜਾ ਛੁਹਿਆ ਹੈ। ਜੇਕਰ ਹਲਕਾ ਭਦੌੜ ਦੀ ਗੱਲ ਕਰੀਏ ਤਾਂ ਕੁੱਲ 159 ਪੋਲਿੰਗ ਬੂਥਾਂ ’ਚੋਂ 19 ਬੂਥਾਂ ’ਤੇ ਦਲ ਨੂੰ 10 ਤੋਂ ਵੀ ਘੱਟ ਵੋਟਾਂ ਮਿਲੀਆਂ ਹਨ ਤੇ 110 ਬੂਥਾਂ ’ਤੇ 50 ਤੋਂ ਘੱਟ ਵੋਟਾਂ ਪਈਆਂ ਹਨ। ਹਲਕਾ ਭਦੌੜ ’ਚ ਵੀ ਸ਼੍ਰੋਮਣੀ ਅਕਾਲੀ ਦਲ ਨੂੰ ਸਿਰਫ਼ 6 ਬੂਥਾਂ ’ਤੇ 100 ਦੇ ਅੰਕੜੇ ਤੱਕ ਪੁੱਜਣਾ ਨਸੀਬ ਹੋਇਆ ਹੈ। ਪੰਥਕ ਰਾਜਨੀਤੀ ਦੇ ਬਲਬੂਤੇ ’ਤੇ ਵਰਿਆਂ ਤੱਕ ਪੰਜਾਬ ਦੀ ਸੱਤਾ ’ਤੇ ਸਰਦਾਰੀ ਕਰਨ ਵਾਲੇ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਬੰਦੀ ਸਿੰਘਾਂ ਦੀ ਰਿਹਾਈ ਦਾ ਨਿਰੋਲ ਪੰਥਕ ਮੁੱਦਾ ਲੋਕਾਂ ਦੀ ਸੱਥ ’ਚ ਲੈ ਕੇ ਜਾਣ ਤੋਂ ਬਾਅਦ ਵੀ ਜੇਕਰ ਵੋਟਾਂ ਦੇ ਉਕਤ ਅੰਕੜੇ ਪੱਲੇ ਪੈਦੇ ਹਨ ਤਾਂ ਸ਼੍ਰੋਮਣੀ ਅਕਲੀ ਦਲ ਦੇ ਆਗੂਆਂ ਨੂੰ ਕੰਧ ’ਤੇ ਲਿਖਿਆ ਪੜ ਲੈਣਾ ਚਾਹੀਦਾ ਹੈ, ਨਹੀਂ ਤਾਂ ਕਿਤੇ ‘‘ਵਖ਼ਤੋਂ ਖੁੰਝੀ ਡੂਮਣੀ, ਦਰ-ਦਰ ਧੱਕੇ’’ ਵਾਲੀ ਗੱਲ ਨਾ ਹੋ ਜਾਵੇ।
