ਬਰਨਾਲਾ, 19 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਪੁਲਿਸ ਨੇ ਪੱਤਰਕਾਰੀ ਦੀ ਆੜ ਹੇਠ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਕਰਨ ਵਾਲੇ ਤਿੰਨ ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ, ਜੋ ਵਪਾਰੀਆਂ, ਕਾਰੋਬਾਰੀਆਂ ਦੀਆਂ ਮਨਘੜਤ ਖ਼ਬਰਾਂ ਲਗਾ ਕੇ ਪੈਸੇ ਵਸੂਲਣ ਦਾ ਕੰਮ ਕਰਦੇ ਸਨ। ਸੁਨਾਮ ਪੁਲਿਸ ਨੇ ਥਾਣਾ ਸਿਟੀ ’ਚ ਮੁਕੱਦਮਾ ਨੰਬਰ 174 ਦਰਜ ਕਰਕੇ ਰਾਕੇਸ ਕੁਮਾਰ, ਗੁਰਦੀਪ ਸਿੰਘ ਅਤੇ ਇੱਕ ਹੋਰ ਨਾਮਲੂਮ ਵਿਅਕਤੀ ਨੂੰ ਨਾਮਜ਼ਦ ਕੀਤਾ ਹੈ। ਪੁਲਿਸ ਸੂਤਰਾਂ ਅਨੁਸਾਰ ਇਹ ਵਿਅਕਤੀ ਕਿਸੇ ਵਪਾਰੀ ਦੇ ਕਾਰੋਬਾਰੀ ਸਥਾਨ ’ਤੇ ਜਾ ਕੇ ਵੀਡੀਓਗ੍ਰਾਫੀ ਕਰਦੇ ਸਨ ਅਤੇ ਫਿਰ ਖ਼ਬਰ ਲਗਾਉਣ ਦਾ ਡਰ ਦਿਖਾ ਕੇ ਪੈਸੇ ਵਸੂਲ ਕਰਦੇ ਸਨ ਪ੍ਰੰਤੂ ਆਖਿਰ ਕਾਬੂ ਕੀਤੇ ਇਹ ਵਿਅਕਤੀ ਸੁਨਾਮ ਦੇ ਇੱਕ ਪੈਟਰੋਲ ਪੰਪ ਦੇ ਮਾਲਕ ਜਗਦੇਵ ਸਿੰਘ ਨੂੰ ਬਲੈਕਮੇਲਿੰਗ ਕਰਨ ਦਾ ਤਾਣਾਬਾਣਾ ਬੁਣਦੇ ਖ਼ੁਦ ਪੁਲਿਸ ਦੇ ਜਾਲ ਵਿੱਚ ਫਸ ਗਏ। ਸੰਗਰੂਰ ਜ਼ਿਲ੍ਹੇ ਦੀ ਪੁਲਿਸ ਵੱਲੋਂ ਬਲੈਕਮੇਲਰਾਂ ਖਿਲਾਫ਼ ਕੀਤੀ ਇਸ ਕਾਰਵਾਈ ਦੀ ਚਰਚਾ ਗੁਆਂਢੀ ਜ਼ਿਲ੍ਹੇ ਬਰਨਾਲਾ ਵਿੱਚ ਖ਼ੂਬ ਹੋ ਰਹੀ ਹੈ ਕਿਉਂਕਿ ਬਰਨਾਲਾ ’ਚ ਵੀ ਅਖੌਤੀ ਪੱਤਰਕਾਰੀ ਦਾ ਰੋਹਬ ਦਿਖਾ ਕੇ ਵਪਾਰੀਆਂ ਦੇ ਕਾਰੋਬਾਰ ’ਚ ਪਾਰਟਨਰਸ਼ਿਪ ਪਾਉਣ ਦੀ ਸੋਚ ਰੱਖਣ ਵਾਲੇ ਅਨਸਰਾਂ ਨੇ ਵੀ ਵਪਾਰੀਆਂ/ਕਾਰੋਬਰੀਆਂ ਦੇ ਨੱਕ ’ਚ ਦਮ ਕੀਤਾ ਹੋਇਆ ਹੈ। ਸੰਗਰੂਰ ਪੁਲਿਸ ਨੇ ਤਾਂ ਅਜਿਹੇ ਅਨੁਸਰਾਂ ਨੂੰ ਨਕੇਲ ਕਸਣ ਦੀ ਜੁਰਅਤ ਕੀਤੀ ਪ੍ਰੰਤੂ ਬਰਨਾਲਾ ਪੁਲਿਸ ਸਭ ਕੁਝ ਜਾਣਦੇ ਹੋਏ ਵੀ ਪੱਤਰਕਾਰੀ ਦੀ ਆੜ ਹੇਠ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਕਰਨ ਵਾਲੇ ਕੁਝ ਅਨਸਰਾਂ ਖਿਲਾਫ਼ ਚੁੱਪ ਬੈਠੀ ਹੈ, ਸਗੋਂ ਕੁਝ ਪੁਲਿਸ ਅਫ਼ਸਰ ਤਾਂ ਅਜਿਹੇ ਅਨਸਰਾਂ ਦੀਆਂ ਯੋਜਨਾਬੱਧੀ ਸਟੋਰੀਆਂ ਨੂੰ ਲਾਈਕ ਕਰਦੇ ਹਨ ਕਿਉਂਕਿ ਇਹ ਅਨਸਰ ਕਈ ਅਫ਼ਸਰਾਂ/ਮੁਲਾਜ਼ਮਾਂ ਨੂੰ ਵੀ ਆਪਣੀ ਬਲੈਕਮੇਲਿੰਗ ਦੀ ਮੁਹਾਰਤ ਦਾ ਨਮੂਨਾ ਦਿਖਾ ਚੁੱਕੇ ਹਨ ।
