ਬਰਨਾਲਾ, 20 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਆਮ ਆਦਮੀ ਪਾਰਟੀ ਦੇ ਇੱਕ ਆਗੂ ਵੱਲੋਂ ਥਾਣੇ ’ਚੋਂ ਬੰਦਾ ਛੁਡਵਾਉਣ ਬਦਲੇ ਐਸਐਚਓ ਦੇ ਨਾਮ ’ਤੇ ਰਿਸ਼ਵਤ ਲੈਣ ਦਾ ਮਾਮਲਾ ਸਾਹਮਣੇ ਆਇਆ ਹੈ ਜਦਕਿ ਐਸਐਚਓ ਨੇ ਇਸ ਮਾਮਲੇ ’ਚ ਆਪਣੀ ਸ਼ਮੂਲੀਅਤ ਹੋਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਹੈ। ਵੇਰਵੇ ਅਨੁਸਾਰ ਬਰਨਾਲਾ ਦੇ ਗੁਆਂਢ ’ਚ ਪੁਲਿਸ ਥਾਣਾ ਦਿਆਲਪੁਰਾ ਐਟ ਭਗਤਾ ਭਾਈਕਾ ਦੀ ਪੁਲਿਸ ਸਤਨਾਮ ਸਿੰਘ ਭਗਤਾ ਭਾਈਕਾ ਨੂੰ ਮੋਟਰਸਾਈਕਲ ਚੋਰੀ ਦੇ ਇੱਕ ਮਾਮਲੇ ਵਿੱਚ ਪੁੱਛਗਿੱਛ ਲਈ ਥਾਣੇ ਲੈ ਕੇ ਗਈ ਸੀ, ਜਿਸ ਸੰਬੰਧੀ ਆਮ ਆਦਮੀ ਪਾਰਟੀ ਦੇ ਇੱਕ ਸਥਾਨਕ ਆਗੂ ਨੇ ਸਤਨਾਮ ਸਿੰਘ ਦੀ ਮਾਤਾ ਸ਼ੀਲਾ ਦੇਵੀ ਨੂੰ ਕਿਹਾ ਕਿ ‘‘ਮੇਰੀ ਐਸਐਚਓ ਨਾਲ ਗੱਲ ਹੋ ਗਈ, ਐਸਐਚਓ ਨੂੰ 40 ਹਜ਼ਾਰ ਰੁਪਏ ਦੇਣੇ ਹਨ ਅਤੇ ਉਹ ਸਤਨਾਮ ਸਿੰਘ ਨੂੰ ਛੱਡ ਦੇਵੇਗਾ’’। ਸਤਨਾਮ ਸਿੰਘ ਦੀ ਮਾਤਾ ਨੇ ‘ਆਪ’ ਆਗੂ ਨੂੰ 10 ਹਜ਼ਾਰ ਰੁਪਏ ਪੇਸ਼ਗੀ ਦੇ ਦਿੱਤੇ ਅਤੇ ਬਾਕੀ ਪੈਸੇ ਪੁਲਿਸ ਵੱਲੋਂ ਸਤਨਾਮ ਸਿੰਘ ਨੂੰ ਛੱਡਣ ਤੋਂ ਬਾਅਦ ਦੇਣ ਦੀ ਗੱਲ ਹੋਈ। ਜਦ ਇਸ ਗੱਲ ਦੀ ਭਿਣਕ ਸਤਨਾਮ ਸਿੰਘ ਦੇ ਪਿੱਛੇ ਗਏ ਪਿੰਡ ਦੇ ਮੋਹਤਬਰ ਵਿਅਕਤੀਆਂ ਨੂੰ ਲੱਗੀ ਤਾਂ ਉਨ੍ਹਾਂ ਐਸਐਚਓ ਦੇ ਧਿਆਨ ਵਿੱਚ ਲਿਆਂਦਾ ਪ੍ਰੰਤੂ ਐਸਐਚਓ ਨੇ ਸਾਫ਼ ਆਖ ਦਿੱਤਾ ਕਿ ਉਸ ਨੇ ਇਸ ਮਾਮਲੇ ’ਚ ਕਿਸੇ ਨਾਲ ਪੈਸਿਆਂ ਬਾਰੇ ਕੋਈ ਗੱਲਬਾਤ ਨਹੀਂ ਕੀਤੀ। ਐਸਐਚਓ ਨੇ ਇਹ ਵੀ ਕਿਹਾ ਕਿ ਪੁਲਿਸ ਦੇ ਨਾਮ ’ਤੇ ਪੈਸੇ ਵਸੂਲ ਕੇ ਪੁਲਿਸ ਦੀ ਛਵੀ ਖ਼ਰਾਬ ਕਰਨ ਵਾਲੇ ਵਿਅਕਤੀ ਖਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ।
