ਖੇਡਾਂ ਵਤਨ ਪੰਜਾਬ ਦੀਆਂ : ਖਿਡਾਰੀਆਂ ਨੂੰ ਦਿੱਤੀ ਗਈ ‘ਗੱਲਾਂ ਦੇ ਕੜਾਹ’ ਦੀ ਰਿਫਰੈਸ਼ਮੈਂਟ
-ਨਹੀਂ ਜਾਰੀ ਕੀਤਾ ਬੱਜਟ, ਪਿੰਡ ਵਾਲਿਆਂ ਨੇ ਤਿਆਰ ਕੀਤਾ ਲੰਗਰ
ਬਰਨਾਲਾ, 02 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) :
‘ਖੇਡਾਂ ਵਤਨ ਪੰਜਾਬ ਦੀਆਂ’ ਸ਼ੁਰੂ ਹੋ ਚੁੱਕੀਆਂ ਹਨ। ਪੰਜਾਬ ਸਰਕਾਰ ਦਾ ਇਨਾਂ ਖੇਡਾਂ ਨੂੰ ਸਫਲ ਬਣਾਉਣ ਲਈ ਅੱਡੀ ਚੋਟੀ ਦਾ ਜ਼ੋਰ ਲੱਗਿਆ ਹੋਇਆ ਹੈ। ਸਰਕਾਰ ਵੱਲੋਂ ਇਨਾਂ ਖੇਡਾਂ ਨਾਲ ਸਿੱਧੇ/ਅਸਿੱਧੇ ਢੰਗ ਨਾਲ ਜੁੜੇ ਹਰ ਅਫ਼ਸਰ/ਕਰਮਚਾਰੀ ਨੂੰ ਕਿਸੇ ਵੀ ਤਰਾਂ ਦੀ ‘ਲਾਪਰਵਾਹੀ ਬਰਦਾਸ਼ਤ ਨਹੀਂ’ ਵਰਗੇ ਹੁਕਮ ਜਾਰੀ ਕੀਤੇ ਹੋਏ ਹਨ। ਮੁੱਢਲੇ ਦੌਰ ’ਚ ਇਹ ਖੇਡਾਂ ਬਲਾਕ ਪੱਧਰ ਦੀਆ ਹੋ ਰਹੀਆਂ ਹਨ । ਸਰਕਾਰ ਵੱਲੋਂ ਇਨ੍ਹਾਂ ਖੇਡਾਂ ਲਈ ਕਰੋੜਾਂ ਰੁਪਏ ਦਾ ਬੱਜਟ ਰੱਖਿਆ ਗਿਆ ਹੈ। ਕੁਝ ਵੱਡੇ ਕਾਰਪੋਰੇਟ ਘਰਾਣਿਆਂ ਦੀਆਂ ‘ਮਾਲੀ ਸੇਵਾਵਾਂ’ ਵੀ ਸਰਕਾਰ ਲੈ ਰਹੀ ਹੈ ਪ੍ਰੰਤੂ ਇਸ ਦੇ ਬਾਵਜੂਦ ਇਨਾਂ ਖੇਡਾਂ ਵਿੱਚ ਭਾਗ ਲੈਣ ਵਾਲੇ ਖਿਡਾਰੀਆਂ ਨੂੰ ਰਿਫਰੈਸ਼ਮੈਂਟ ਦੇਣ ਦੀ ਗੱਲ ਕਰੀਏ ਤਾਂ ਇੱਥੇ ਦਾਲ ਵਿੱਚ ਕੁਝ ਕਾਲਾ ਨਹੀਂ ਸਗੋਂ ਸਾਰੀ ਦਾਲ ਹੀ ਕਾਲੀ ਜਾਪਦੀ ਹੈ। ਅਤਿ ਭਰੋਸੇਯੋਗ ਸੂਤਰਾਂ ਅਨੁਸਾਰ ਖਿਡਾਰੀਆਂ ਨੂੰ ਰਿਫਰੈਸ਼ਮੈਂਟ ਲਈ ਸਰਕਾਰ ਨੇ ਕੋਈ ਬੱਜਟ ਹੀ ਨਹੀਂ ਜਾਰੀ ਕੀਤਾ। ਬਲਾਕ ਮਹਿਲ ਕਲਾਂ ਦੇ ਪਿੰਡ ਦੀਵਾਨਾ ਵਿਖੇ ਖੇਡਾਂ ਵਤਨ ਪੰਜਾਬ ਦੀਆਂ ਦੇ ਐਥਲੈਟਿਕਸ ਮੁਕਾਬਲਿਆਂ ਵਿੱਚ ਭਾਗ ਲੈਣ ਵਾਲੇ ਖਿਡਾਰੀਆਂ ਨੂੰ ਸਿਰਫ਼ ਇੱਕ-ਇੱਕ ਕੇਲਾ ਖਾਣ ਲਈ ਦਿੱਤਾ ਗਿਆ। ਜੀ98 ਨਿਊਜ਼ ਸਰਵਿਸ ਨੇ ਇਸ ਦੀ ਪੁਸ਼ਟੀ ਖਿਡਾਰੀਆਂ ਤੋਂ ਵੀ ਕੀਤੀ ਜਿਸ ਦੇ ਸਬੂਤ ਮੌਜੂਦ ਹਨ। ਸਵੇਰ ਤੋਂ ਸ਼ਾਮ ਤੱਕ ਪੂਰਾ ਜ਼ੋਰ ਲਗਾ ਕੇ ਖੇਡਣ ਵਾਲੇ ਖਿਡਾਰੀਆਂ ਨੂੰ ਰਿਫਰੈਸ਼ਮੈਂਟ ਦੇਣ ਲਈ ਸਰਕਾਰ ਨੇ ਮੁੱਠੀ ਘੁੱਟ ਲਈ ਹੈ। ਇਹ ਵੀ ਪਤਾ ਲੱਗਾ ਹੈ ਕਿ ਪਿੰਡ ਦੀਵਾਨਾ ਦੇ ਲੋਕਾਂ ਨੇ ਆਪਣੇ ਪੱਧਰ ’ਤੇ ਖਿਡਾਰੀਆਂ ਲਈ ਲੰਗਰ ਦਾ ਪ੍ਰਬੰਧ ਕੀਤਾ। ਇਹ ਗੱਲ ਪਰਦੇ ਪਿਛਲੀ ਹੈ ਕਿ ਲੰਗਰ ਦਾ ਪ੍ਰਬੰਧ ਪਿੰਡ ਦੇ ਲੋਕਾਂ ਨੇ ਆਪਣੇ ਪੱਧਰ ’ਤੇ ਕੀਤਾ ਜਾਂ ਕਿਸੇ ਅਫ਼ਸਰ ਦੇ ਕਹਿਣ ’ਤੇ ਕੀਤਾ ਜਾਂ ਫਿਰ ਕਿਸੇ ਲੀਡਰ ਦੇ ਕਹਿਣ ’ਤੇ ਕੀਤਾ। ਸਵਾਲ ਇਹ ਉਠਦਾ ਹੈ ਕਿ ਸਰਕਾਰ ਕਰੋੜਾਂ ਰੁਪਏ ਦੇ ਬੱਜਟ ਵਿੱਚੋਂ ਚੰਗੀ ਰਿਫਰੈਸ਼ਮੈਂਟ ਦਾ ਬੱਜਟ ਜਾਰੀ ਕਿਉਂ ਨਹੀਂ ਕਰ ਰਹੀ। ਇਹ ਵੀ ਪਤਾ ਲੱਗਾ ਹੈ ਕਿ ਜਿਹੜੇ ਕੇਲੇ ਖਿਡਾਰੀਆਂ ਨੂੰ ਦਿੱਤੇ ਗਏ , ਉਹ ਵੀ ਅਫ਼ਸਰਾਂ ਨੇ ਆਪਣੀ ਜੇਬ ’ਚੋਂ ਪੇਸੇ ਖ਼ਰਚ ਕਰਕੇ ਖਰੀਦੇ। ਇਹ ਵੱਖਰੀ ਗੱਲ ਹੈ ਕਿ ਅਫ਼ਸਰ ਕੇਲਿਆਂ/ਰਿਫਰੈਸ਼ਮੈਂਟ ਦੇ ਖ਼ਰਚਾ ਬਿੱਲ ਤਿਆਰ ਕਰਨਗੇ ਅਤੇ ਪੈਸੇ ਅਫ਼ਸਰਾਂ ਨੂੰ ਮਿਲ ਜਾਣਗੇ ਪ੍ਰੰਤੂ ਇਸ ਗੱਲ ਦਾ ਜਵਾਬ ਕਿਸ ਕੋਲ ਹੈ ਕਿ ਸਰਕਾਰ ਨੇ ਸੰਬੰਧਿਤ ਅਫ਼ਸਰਾਂ ਨੂੰ ਰਿਫਰੈਸ਼ਮੈਂਟ ਲਈ ਖੇਡਾਂ ਸ਼ੁਰੂ ਹੋਣ ਤੋਂ ਪਹਿਲਾਂ ਬੱਜਟ ਜਾਰੀ ਕਿਉਂ ਨਹੀਂ ਕੀਤਾ। ਦੋ ਵੱਡੇ ਅਫ਼ਸਰਾਂ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਬੇਨਤੀ ’ਤੇ ਸਿਰਫ਼ ਐਨਾ ਹੀ ਕਿਹਾ ਕਿ ‘‘ਛੱਡੋ ਜੀ, ਚੁੱਪ ਹੀ ਭਲੀ ਹੈ’’।
