ਬਰਨਾਲਾ, 09 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) :
ਜਦ ਸਰਕਾਰੀ ਅਧਿਕਾਰੀਆਂ ਨੇ ਇੱਕ ਬਜ਼ੁਰਗ ਨੂੰ ਕਾਗਜਾਂ ਵਿੱਚ ਮਿ੍ਤਕ ਕਰਾਰ ਦੇ ਕੇ ਉਸ ਦੀ ਬੁਢਾਪਾ ਪੈਨਸ਼ਨ ਬੰਦ ਕਰ ਦਿੱਤੀ ਤਾਂ 102 ਸਾਲ ਦੀ ਉਮਰ ਦੇ ਇਸ ਬਜ਼ੁਰਗ ਨੇ ਅਨੋਖੇ ਤਰੀਕੇ ਨਾਲ ਆਪਣੇ ਜ਼ਿੰਦਾ ਹੋਣ ਦਾ ਸਬੂਤ ਦਿੱਤਾ। ਇਹ ਦਿਲਚਸਪ ਮਾਮਲਾ ਗੁਆਂਢੀ ਸੂਬੇ ਹਰਿਆਣਾ ਨਾਲ ਸੰਬੰਧਿਤ ਹੈ ਜਿੱਥੇ ਰੋਹਤਕ ਜ਼ਿਲ੍ਹੇ ਦੇ ਗੰਧਾਰਾ ਪਿੰਡ ਦੇ ਇੱਕ ਬਜ਼ੁਰਗ ਦੁਨੀਚੰਦ ਦੀ ਮੌਤ ਦੇ ਆਧਾਰ ’ਤੇ ਵਿਭਾਗ ਨੇ ਉਸ ਦੀ ਪੈਨਸ਼ਨ ਮਾਰਚ ਮਹੀਨੇ ਵਿੱਚ ਬੰਦ ਕਰ ਦਿੱਤੀ। ਪੈਨਸ਼ਨ ਬੰਦ ਹੋਣ ਤੋਂ ਬਾਅਦ ਦੁਨੀਚੰਦ ਨੂੰ ਪਤਾ ਲੱਗਿਆ ਕਿ ਕਾਗਜ਼ਾਂ ਵਿੱਚ ਵਿਭਾਗ ਦੇ ਅਧਿਕਾਰੀਆਂ ਨੇ ਉਸ ਨੂੰ ‘ਮਰਿਆ’ ਮੰਨ ਕੇ ਉਸ ਦੀ ਪੈਨਸ਼ਨ ਬੰਦ ਕਰ ਦਿੱਤੀ ਹੈ। ਫਿਰ ਦੁਨੀਚੰਦ ਨੇ ਪੂਰਾ ਸਜ-ਧਜ ਕੇ ਗਲ ਵਿੱਚ ਨੋਟਾਂ ਦਾ ਹਾਰ ਪਾ ਕੇ ਫੁੱਲਾਂ ਨਾਲ ਸਜੇ ਹੋਏ ਰੱਥ ’ਤੇ ਸਵਾਰ ਹੋ ਕੇ ਬੈਂਡ ਵਾਜਿਆਂ ਨਾਲ ਆਪਣੀ ਬਾਰਾਤ ਕੱਢੀ ਅਤੇ ਸੰਬੰਧਿਤ ਦਫ਼ਤਰ ਜਾ ਕੇ ਆਪਣੇ ਜ਼ਿੰਦਾ ਹੋਣ ਦਾ ਸਬੂਤ ਦਿੱਤਾ। ਦੁਨੀਚੰਦ ਦੀ ਬਾਰਾਤ ਨਾਲ ਭਰਵੀਂ ਗਿਣਤੀ ਵਿੱਚ ਲੋਕ ਵੀ ਸ਼ਾਮਲ ਸਨ। ਦੁਨੀਚੰਦ ਦੇ ਰੱਥ ਉੱਪਰ ਅਤੇ ਕੁਝ ਲੋਕਾਂ ਨੇ ਆਪਣੇ ਹੱਥਾਂ ਵਿੱਚ ਬੈਨਰ ਚੁੱਕੇ ਹੋਏ ਸਨ ਜਿਨਾਂ ਉੱਤੇ ਲਿਖਿਆ ਹੋਇਆ ਸੀ ਕਿ ‘‘ਤੁਹਾਡਾ ਫੁੱਫੜ ਅਜੇ ਜਿਉਂਦਾ ਹੈ’’।
