ਵਿਧਾਨ ਸਭਾ ਦੇ ਅੰਦਰ ਵਿਰੋਧ ਪਰ ਬਾਹਰ ਕੇਂਦਰ ਦੇ ਨਕਸ਼ੇ ਕਦਮਾਂ ’ਤੇ ਪੰਜਾਬ ਦੀ ਮਾਨ ਸਰਕਾਰ
ਚੰਡੀਗੜ, 15 ਸਤੰਬਰ (ਜੀ98 ਨਿਊਜ਼ ਸਰਵਿਸ) :
ਪੰਜਾਬ ਵਿਧਾਨ ਸਭਾ ਵਿੱਚ ਕੇਂਦਰ ਸਰਕਾਰ ਦੀ ਕਿਸੇ ਸਕੀਮ ਜਾਂ ਫੈਸਲੇ ਦੇ ਖਿਲਾਫ਼ ਮਤਾ ਪਾਸ ਕਰਨ ਤੋਂ ਬਾਅਦ ਵੀ ਪੰਜਾਬ ਸਰਕਾਰ ਉਸੇ ਸਕੀਮ ਦੇ ਹੱਕ ਵਿੱਚ ਖੜ ਗਈ ਹੈ। ਧਿਆਨ ਰਹੇ ਕਿ ਫੌਜ ਵਿੱਚ ਭਰਤੀ ਸੰਬੰਧੀ ਅਗਨੀਵੀਰ ਸਕੀਮ ਸ਼ੁਰੂ ਹੋਣ ’ਤੇ ਦੇਸ਼ ਦੇ ਕਈ ਰਾਜਾਂ ਵਿੱਚ ਵਿਰੋਧ ਪ੍ਰਦਰਸ਼ਨ ਹੋਇਆ ਸੀ। ਪੰਜਾਬ ਨੇ ਵੀ ਅਗਨੀਵੀਰ ਸਕੀਮ ਦਾ ਡੱਟ ਕੇ ਵਿਰੋਧ ਕੀਤਾ ਸੀ। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸੂਬੇ ’ਚ ਆਪਣੀਆਂ ਵੱਖ-ਵੱਖ ਸਟੇਜਾਂ ’ਤੇ ਕੇਂਦਰ ਦੀ ਅਗਨੀਵੀਰ ਸਕੀਮ ਸੰਬੰਧੀ ਸਖ਼ਤ ਟਿੱਪਣੀਆਂ ਕੀਤੀਆਂ ਸਨ ਅਤੇ ਇਹ ਸਕੀਮ ਵਾਪਸ ਲੈਣ ਦੀ ਮੰਗ ਕੀਤੀ ਸੀ। ਹੁਣ ਪੰਜਾਬ ਸਰਕਾਰ ਨੇ ਅਗਨੀਵੀਰ ਸਕੀਮ ਦੇ ਹੱਕ ’ਚ ਕੰਮ ਕਰਨਾ ਸ਼ੁਰੂ ਕੀਤਾ ਹੈ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸੂਬੇ ਦੇ ਡਿਪਟੀ ਕਮਿਸ਼ਨਰਾਂ ਨੂੰ ਅਗਨੀਵੀਰ ਬਣਨ ਲਈ ਨੌਜਵਾਨਾਂ ਨੂੰ ਉਤਸਾਹਿਤ ਕਰਨ ਲਈ ਪ੍ਰਚਾਰ ਕਰਨ ਲਈ ਕਿਹਾ ਕਿ ਅਤੇ ਅਗਨੀਵੀਰ ਭਰਤੀ ਰੈਲੀਆਂ ਵਿੱਚ ਸਹਿਯੋਗ ਦੇ ਹੁਕਮ ਦਿੱਤੇ ਹਨ । ਪੰਜਾਬ ਦੇ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੋਇਆ ਹੈ ਕਿ ਵਿਧਾਨ ਸਭਾ ’ਚ ਮਤਾ ਪਾਸ ਕਰਨ ਤੋਂ ਬਾਅਦ ਸਰਕਾਰ ਫਿਰ ਉਸੇ ਮਤੇ ਦੇ ਹੱਕ ਵਿੱਚ ਖੜ ਗਈ ਹੋਵੇ। ਅਗਨੀਵੀਰ ਸਕੀਮ ਸ਼ੁਰੂ ਹੋਣ ਵੇਲੇ ਆਮ ਆਦਮੀ ਪਾਰਟੀ, ਕਾਂਗਰਸ, ਅਕਾਲੀ ਦਲ ਅਤੇ ਭਾਜਪਾ ਵਿਰੋਧੀ ਹੋਰ ਪਾਰਟੀਆਂ ਨੇ ਨੌਜਵਾਨਾਂ ਨੂੰ ਇਸ ਸਕੀਮ ਦੇ ਖਿਲਾਫ਼ ਸੰਘਰਸ਼ ਕਰਨ ਲਈ ਉਕਸਾਇਆ ਪ੍ਰੰਤੂ ਹੁਣ ਸਾਰੀਆਂ ਪਾਰਟੀਆਂ ਨੇ ਚੁੱਪ ਵੱਟੀ ਹੋਈ ਹੈ ਅਤੇ ਪੰਜਾਬ ਸਰਕਾਰ ਨੇ ਤਾਂ ਸਾਰਿਆਂ ਤੋਂ ਦੋ ਕਦਮ ਅੱਗੇ ਲੰਘਦੇ ਹੋਏ ਅਗਨੀਵੀਰ ਸਕੀਮ ਦੇ ਹੱਕ ’ਚ ਖੁੱਲ ਕੇ ਸਟੈਂਡ ਲੈ ਲਿਆ ਹੈ। ਪੰਜਾਬ ਸਰਕਾਰ ਦਾ ਅਗਨੀਵੀਰ ਸਕੀਮ ਪ੍ਰਤੀ ਬਦਲਿਆ ਹੋਇਆ ਰਵੱਈਆ ਪੰਜਾਬ ਦਾ ਕੇਂਦਰ ਅੱਗੇ ਗੋਡੇ ਟੇਕਣਾ ਹੀ ਮੰਨਿਆ ਜਾ ਸਕਦਾ ਹੈ। ਕਿਉਂਕਿ ਕਈ ਵਰਿਆਂ ਤੋਂ ਰੁਜ਼ਗਾਰ ਪੱਖੀ ਨੀਤੀਆਂ ਨਾ ਬਨਣ ਕਾਰਨ ਬੇਰੁਜ਼ਗਾਰਾਂ ਦੀ ਫੌਜ ਤਿਆਰ ਹੋ ਰਹੀ ਹੈ ਅਤੇ ਬੇਰੁਜ਼ਗਾਰਾਂ ਦੀ ਇਸ ਫੌਜ ਦੇ ਕਿਸੇ ਸੰਭਾਵੀ ਅੰਦੋਲਨ ਤੋਂ ਡਰਦੇ ਹੋਏ ਜਾਂ ਬਚਾਅ ਕਰਦੇ ਹੋਏ ਪੰਜਾਬ ਸਰਕਾਰ ਨੇ ਅਗਨੀਵੀਰ ਸਕੀਮ ਪੱਖੀ ਸਟੈਂਡ ਲੈਣਾ ਹੀ ਬਿਹਤਰ ਸਮਝਿਆ। ਪੰਜਾਬ ਦੀ ‘ਆਪ’ ਸਰਕਾਰ ਦੇ ਅਗਨੀਵੀਰ ਸਕੀਮ ਪ੍ਰਤੀ ਅਪਣਾਏ ਨਵੇ ਸਟੈਂਡ ਨੂੰ ਹਵਾ ਦੇ ਰੁੱਖ ਅਨੁਸਾਰ ਚੱਲਣਾ ਵੀ ਕਿਹਾ ਜਾ ਸਕਦਾ ਹੈ। ਕਿਉਂਕਿ ਸੂਬੇ ’ਚ ਨੌਜਵਾਨ ਅਗਨੀਵੀਰ ਭਰਤੀ ਰੈਲੀਆਂ ’ਚ ਦਿਲਚਸਪੀ ਲੈ ਰਹੇ ਹਨ।
