ਚੰਡੀਗੜ, 27 ਅਕਤੂਬਰ (ਜੀ98 ਨਿਊਜ ਸਰਵਿਸ) –
ਵਿਸ਼ਵ ਦੇ ਸਭ ਤੋਂ ਗੰਦੇ ਵਿਅਕਤੀ ਮੰਨੇ ਜਾਣ ਵਾਲੇ ਅਮੌ ਹਾਜੀ ਦੀ 94 ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ ਹੈ। ਅਮੌ ਹਾਜੀ ਈਰਾਨ ਦੇ ਰਹਿਣ ਵਾਲਾ ਸੀ। ਉਂਝ ਤਾਂ ਭਾਵੇਂ ਦੁਨੀਆਂ ਦਾ ਸਭ ਤੋਂ ਗੰਦਾ ਵਿਅਕਤੀ ਹੋਣ ਦਾ ਉਸ ਦੇ ਨਾਮ ਕੋਈ ਲਿਖਤੀ ਰਿਕਾਰਡ ਨਹੀਂ ਹੈ ਪ੍ਰੰਤੂ ਉਸ ਦੇ ਆਸ-ਪਾਸ ਰਹਿਣ ਵਾਲੇ ਲੋਕਾਂ ਦੇ ਅਨੁਸਾਰ ਉਹ ਪਿਛਲੇ 50 ਸਾਲਾਂ ਤੋਂ ਨਹਾਇਆ ਨਹੀਂ ਸੀ। ਉਸ ਦੀ ਚਮੜੀ ਦਾ ਰੰਗ ਕਾਲਾ ਹੋ ਚੁੱਕਿਆ ਸੀ। ਅਮੌ ਹਾਜੀ ਨੂੰ ਡਰ ਸੀ ਕਿ ਜੇਕਰ ਉਹ ਨਹਾ ਲਵੇਗਾ ਤਾਂ ਉਹ ਬਿਮਾਰ ਹੋ ਜਾਵੇਗਾ। ਜਾਣਕਾਰੀ ਅਨੁਸਾਰ ਅਜੇ ਕੁਝ ਮਹੀਨੇ ਪਹਿਲਾਂ ਹੀ ਸਥਾਨਕ ਲੋਕਾਂ ਨੇ ਉਸ ਨੂੰ ਧੱਕੇ ਨਾਲ ਨਹਾ ਦਿੱਤਾ ਸੀ। ਇਹ ਅਮੌ ਹਾਜੀ ਦੇ ਡਰ ਅਨੁਸਾਰ ਇਤਫ਼ਾਕ ਹੀ ਮੰਨਿਆ ਜਾਵੇਗਾ ਕਿ ਨਹਾਉਣ ਤੋਂ ਬਾਅਦ ਉਹ ਬਿਮਾਰ ਹੋ ਗਿਆ ਅਤੇ ਪਿਛਲੇ ਐਤਵਾਰ ਉਸ ਦੀ ਮੌਤ ਹੋ ਗਈ। ਅਮੌ ਹਾਜੀ ਇੱਕ ਗੰਦੇ ਸਥਾਨ ’ਤੇ ਇਕਾਂਤ ਵਿੱਚ ਰਹਿੰਦਾ ਸੀ ਅਤੇ ਉਸ ਦਾ ਖਾਣਾ-ਪੀਣਾ ਵੀ ਬਹੁਤਾ ਚੰਗਾ ਨਹੀਂ ਸੀ। ਉਸ ਨੇ ਆਪਣੀ ਸਾਰੀ ਜ਼ਿੰਦਗੀ ’ਚ ਕਦੇ ਸਾਫ਼ ਕੱਪੜੇ ਨਹੀਂ ਪਹਿਨੇ ਸਨ। ਲੋਕਾਂ ਅਨੁਸਾਰ ਉਸ ਨੇ ਜ਼ਿੰਦਗੀ ਵਿੱਚ ਕਾਮਯਾਬ ਹੋਣ ਲਈ ਬਹੁਤ ਕੋਸ਼ਿਸ਼ਾਂ ਕੀਤੀਆਂ ਪਰ ਉਹ ਹਰ ਵਾਰ ਨਾਕਾਮਯਾਬ ਰਿਹਾ ਜਿਸ ਕਾਰਨ ਉਸ ਨੇ ਇਵੇਂ ਜਿਵੇਂ ਹੀ ਰਹਿਣ ਦਾ ਫ਼ੈਸਲਾ ਕੀਤਾ । ਹੈਰਾਨੀ ਦੀ ਗੱਲ ਹੈ ਕਿ ਸਿਹਤ ਮਾਹਿਰਾਂ ਨੇ ਉਸ ਦੀ ਸਿਹਤ ਦੀ ਕਈ ਵਾਰ ਜਾਂਚ ਕੀਤੀ ਤਾਂ ਪਤਾ ਲੱਗਿਆ ਕਿ ਉਸ ਨੂੰ ਕੋਈ ਬਿਮਾਰੀ ਨਹੀਂ ਲੱਗੀ ਹੋਈ ਸੀ। ਅਮੌ ਹਾਜੀ ਨੇ ਆਪਣੀ ਝੌਂਪੜੀ ’ਚ ਇੱਕ ਸ਼ੀਸ਼ਾ ਰੱਖਿਆ ਹੋਇਆ ਸੀ ਅਤੇ ਉਹ ਸਰਦੀ ਤੋਂ ਬਚਣ ਲਈ ਹੈਲਮੈਟ ਦੀ ਵਰਤੋਂ ਵੀ ਕਰਦਾ ਸੀ।
