–-ਪ੍ਰਸਾਸਨ, ਪੁਲਿਸ ਨੂੰ ਸਮਾਂ ਬੱਧ ਤਰੀਕੇ ਨਾਲ ਸ਼ਿਕਾਇਤਾਂ ਦਾ ਨਿਪਟਾਰਾ ਕਰਨ ਦੇ ਆਦੇਸ਼
ਬਰਨਾਲਾ, 25 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ) :
ਮੈੰਬਰ ਅਨਸੂਚਿਤ ਜਾਤੀ ਕਮਿਸ਼ਨ ਪੰਜਾਬ ਸ੍ਰੀ ਰਾਜ ਕੁਮਾਰ ਹੰਸ ਅਤੇ ਸ੍ਰੀਮਤੀ ਪੂਨਮ ਕਾਂਗੜਾ ਅਨਸੂਚਿਤ ਜਾਤੀ ਭਾਈਚਾਰੇ ਦੀਆਂ ਸ਼ਿਕਾਇਤਾਂ ਸੁਣਨ ਲਈ ਬਰਨਾਲਾ ਪੁੱਜੇ। ਐੱਸ.ਸੀ. ਵਰਗ ਨਾਲ ਸਬੰਧਿਤ ਮਜ਼ਦੂਰ ਵਾਸੀ ਪਿੰਡ ਰਾਜਗੜ ਜ਼ਿਲ੍ਹਾ ਬਰਨਾਲਾ ‘ਤੇ ਕਥਿਤ ਤੌਰ ਕੁੱਟਮਾਰ ਅਤੇ ਜਾਤੀ ਸੂਚਕ ਸਬਦ ਬੋਲਣ ਦੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਮੈਡਮ ਪੂਨਮ ਕਾਂਗੜਾ ਮੈਂਬਰ ਪੰਜਾਬ ਰਾਜ ਅਨਸੂਚਿਤ ਕਮਿਸਨ ਪੀੜਤ ਮਜ਼ਦੂਰ ਦੇ ਘਰ ਪਹੁੰਚੇ। ਉਸ ਤੋਂ ਬਾਅਦ ਉਨ੍ਹਾਂ ਸਥਾਨਕ ਰੈਸਟ ਹਾਊਸ ਵਿਖੇ ਮਜ਼ਦੂਰ ਦੀ ਫਰਿਆਦ ਸੁਣੀ। ਮੈਡਮ ਪੂਨਮ ਕਾਂਗੜਾ ਅਤੇ ਸ੍ਰੀ ਰਾਜ ਕੁਮਾਰ ਹੰਸ ਨੇ ਸਖ਼ਤ ਸਬਦਾਂ ਵਿੱਚ ਕਿਹਾ ਕਿ ਐੱਸਸੀ ਵਰਗ ਦੇ ਲੋਕਾਂ ‘ਤੇ ਜੁਲਮ ਕਰਨ ਵਾਲਿਆਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ । ਇਸ ਤੋਂ ਬਾਅਦ ਸ਼੍ਰੀਮਤੀ ਪੂਨਮ ਕਾਂਗੜਾ ਨੇੜਲੇ ਪਿੰਡ ਛੀਨੀਵਾਲ ਕਲਾਂ ਵਿਖੇ ਦਲਿਤ ਅਪਾਹਜ ਮਹਿਲਾ ਦੇ ਘਰ ਅੱਗੇ ਕਥਿਤ ਤੌਰ ਉੱਤੇ ਨਜਾਇਜ ਕਬਜ਼ਾ ਕਰਨ ਅਤੇ ਉਸ ਨਾਲ ਪੰਚਾਇਤ ਵੱਲੋਂ ਕੀਤੇ ਭੇਦ-ਭਾਵ ਦੇ ਚਲਦਿਆਂ ਦੌਰਾ ਕਰਕੇ ਮੌਕਾ ਦੇਖਿਆ। ਸ਼ਿਕਾਇਤ ਕਰਤਾ ਨੇ ਦੱਸਿਆ ਕਿ ਉਹ ਇੱਕ ਵਿਧਵਾ ਔਰਤ ਹੈ ਅਤੇ 100 ਪ੍ਰਤੀਸ਼ਤ ਅਪਾਹਜ ਹਨ। ਉਨ੍ਹਾਂ ਦੇ ਘਰ ਅੱਗੇ ਇੱਕ ਵਿਅਕਤੀ ਨੇ ਦੇਹਲੀ ਬਣਵਾ ਕਿ ਨਜਾਇਜ਼ ਕਬਜ਼ਾ ਕੀਤਾ ਹੋਇਆ ਹੈ ਜਿਸ ਕਾਰਨ ਉਨ੍ਹਾਂ ਦੀ ਟ੍ਰਾਈ ਸਾਈਕਲ ਵੀ ਨਹੀਂ ਨਿਕਲਦੀ। ਮੈਡਮ ਪੂਨਮ ਕਾਂਗੜਾ ਨੇ ਬੀ ਡੀ ਪੀ ਓ ਨੂੰ ਹਦਾਇਤ ਕੀਤੀ ਕਿ ਸ਼ਿਕਾਇਤ ਕਰਤਾ ਦੀ ਸਿਕਾਇਤ ਦੁਰ ਕਰਕੇ ਇਸ ਦੀ ਰਿਪੋਰਟ ਮਿਤੀ 7 ਦਸੰਬਰ ਨੂੰ ਕਮਿਸ਼ਨ ਦੇ ਦਫ਼ਤਰ ਸਿਵਲ ਸਕੱਤਰੇਤ ਚੰਡੀਗੜ ਵਿਖੇ ਖ਼ੁਦ ਹਾਜ਼ਰ ਹੋ ਕੇ ਪੇਸ਼ ਕਰਨ ਦੇ ਹੁਕਮ ਦਿੱਤੇ । ਇਸ ਤੋਂ ਇਲਾਵਾ ਇਕ ਹੋਰ ਮਾਮਲੇ ਚ ਮੈਡਮ ਪੂਨਮ ਕਾਂਗੜਾ ਨੇ ਬੀਡੀਪੀਓ ਨੂੰ ਹਦਾਇਤ ਕੀਤੀ ਕਿ ਐਸ ਸੀ ਘਰਾਂ ਅੱਗੇ ਖਸਤਾ ਹਾਲਤ ਗਲੀਆਂ ਨੂੰ ਪਹਿਲ ਦੇ ਆਧਾਰ ਤੇ ਬਣਾਇਆ ਜਾਵੇ। ਇਸ ਮੌਕੇ ਐੱਸਡੀਐਮ ਸ. ਗੋਪਾਲ ਸਿੰਘ, ਤਹਿਸੀਲਦਾਰ ਦਿਵਿਆ ਸਿੰਗਲਾ, ਤਹਿਸੀਲ ਭਲਾਈ ਅਫ਼ਸਰ ਸੁਨੀਤਾ ਰਾਣੀ, ਡੀ ਪੀ ਆਰ ਓ ਮੇਘਾ ਮਾਨ, ਬੀਡੀਪੀਓ ਮਹਿਲ ਕਲਾਂ, ਡੀਐਸਪੀ ਮਹਿਲਕਲਾਂ, ਤਹਿਸੀਲ ਭਲਾਈ ਅਫਸਰ , ਐਸ ਐਚ ਓ ਮਹਿਲਕਲਾਂ ਆਦਿ ਹਾਜ਼ਰ ਸਨ।
