ਅਸਤੀਫ਼ਾ : ਈਜੀਐਸ ਵਲੰਟੀਅਰ ਦੀ ਭਗਵੰਤ ਮਾਨ ‘ਤੇ ਕਰਾਰੀ ਚੋਟ
ਬਰਨਾਲਾ 5 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਪੰਜਾਬ ਦੇ ਮੁੱਖ ਮੰਤਰੀ ਦੇ ਵਿਧਾਨ ਸਭਾ ਹਲਕਾ ਧੂਰੀ ਨਾਲ ਸਬੰਧਤ ਅਧਿਆਪਕਾ (ਈਜੀਐਸ ਵਲੰਟੀਅਰ) ਨੇ ਆਪਣੀ ਨੌਕਰੀ ਤੋਂ ਅਸਤੀਫਾ ਦਿੰਦੇ ਹੋਏ ਅਸਤੀਫੇ ਵਿੱਚ ਲਿਖੀ ਸ਼ਬਦਾਵਲੀ ਨਾਲ ਸਰਕਾਰ ਦੀਆਂ ਕੱਚੇ ਮੁਲਾਜ਼ਮਾਂ ਸਬੰਧੀ ਡੰਗ-ਟਪਾਊ ਨੀਤੀਆਂ ਉਪਰ ਕਰਾਰੀ ਚੋਟ ਕੀਤੀ ਹੈ । ਹਲਕਾ ਧੂਰੀ ਨਾਲ ਸਬੰਧਤ ਪਿੰਡ ਦੋਹਲਾ ਦੇ ਸਕੂਲ ਵਿਚ ਈਜੀਐਸ ਵਲੰਟੀਅਰ ਵਜੋਂ ਨੌਕਰੀ ਕਰ ਰਹੀ ਬਲਜਿੰਦਰ ਕੌਰ ਨੇ ਅਸਤੀਫੇ ਵਿਚ ਲਿਖਿਆ ਹੈ ਕਿ ਉਹ ਪਿਛਲੇ 18 ਸਾਲਾਂ ਤੋਂ ਨੌਕਰੀ ਕਰ ਰਹੀ ਹੈ ਅਤੇ ਉਸਦੀ ਤਨਖਾਹ ਸਿਰਫ ਛੇ ਹਜ਼ਾਰ ਹੈ ਜਿਸ ਨਾਲ ਘਰ ਦਾ ਗੁਜਾਰਾ ਬਹੁਤ ਮੁਸ਼ਕਲ ਹੈ। ਉਸ ਨੇ ਲਿਖਿਆ ਕਿ ਏਨੀ ਘੱਟ ਤਨਖਾਹ ਨਾਲ ਦੋ ਵਕਤ ਦੀ ਰੋਟੀ ਵੀ ਨਹੀ ਪੱਕਦੀ ਅਤੇ ਉਹ ਮਾਨਸਿਕ ਤੌਰ ‘ਤੇ ਪਰੇਸ਼ਾਨ ਹੈ। ਬਲਜਿੰਦਰ ਕੌਰ ਨੇ ਆਪਣੇ ਅਸਤੀਫੇ ਵਿਚ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਗੁਜਰਾਤ ਦੌਰੇ ਉੱਪਰ ਕਰਾਰੀ ਟਿੱਪਣੀ ਕਰਦੇ ਹੋਏ ਲਿਖਿਆ ਕਿ ਉਸ ਦੀ ਨਾਮਾਤਰ ਤਨਖਾਹ ਗੁਜਰਾਤ ਦੌਰੇ ‘ਤੇ ਖਰਚ ਕਰ ਲਈ ਜਾਵੇ। ਉੰਝ ਭਾਵੇਂ ਨੌਕਰੀ ਤੋਂ ਅਸਤੀਫ਼ਾ ਦੇਣਾ ਕਿਸੇ ਮੁਲਾਜ਼ਮ ਦਾ ਆਪਣਾ ਫੈਸਲਾ ਹੋ ਸਕਦਾ ਹੈ ਪ੍ਰੰਤੂ ਜੇਕਰ ਕੋਈ ਮੁਲਾਜ਼ਮ ਘੱਟ ਤਨਖਾਹ ਤੋਂ ਦੁਖੀ ਹੋ ਕੇ ਅਸਤੀਫਾ ਦੇਣ ਦੀ ਗੱਲ ਕਰੇ ਤਾਂ ਇਸ ਨਾਲ ਸਰਕਾਰ ‘ਤੇ ਸਵਾਲ ਉਠਦੇ ਹਨ। ਬਲਜਿੰਦਰ ਕੌਰ ਵੱਲੋਂ ਮੁੱਖ ਮੰਤਰੀ ਦੇ ਗੁਜਰਾਤ ਦੌਰੇ ‘ਤੇ ਟਿੱਪਣੀ ਕੀਤੇ ਜਾਣਾ ਵੀ ਸਰਕਾਰ ਨੂੰ ਸਵਾਲਾਂ ਦੇ ਘੇਰੇ ਵਿੱਚ ਖੜ੍ਹਾ ਕਰਦਾ ਹੈ ਕਿਉਂਕਿ ਵਿਰੋਧੀ ਪਾਰਟੀਆਂ ਪਹਿਲਾਂ ਹੀ ਪੰਜਾਬ ਦੇ ਖਜ਼ਾਨੇ ਵਿਚੋਂ ਆਮ ਆਦਮੀ ਪਾਰਟੀ ਦੀਆਂ ਸਰਗਰਮੀਆਂ ਉਪਰ ਨਾਜਾਇਜ਼ ਖਰਚ ਕੀਤੇ ਜਾਣ ਦੇ ਇਲਜ਼ਾਮ ਲਗਾ ਰਹੀਆਂ ਹਨ।
