ਪਤੀ-ਪਤਨੀ ਨੇ ਬਣਾਇਆ ਹੋਇਆ ਸੀ ਹਨੀਟ੍ਰੈਪ ਗਿਰੋਹ
ਚੰਡੀਗੜ੍ਹ 14 ਮਾਰਚ ( ਜੀ98 ਨਿਊਜ਼ ਸਰਵਿਸ)-ਖਰੜ ਪੁਲੀਸ ਨੇ ਹਨੀਟ੍ਰੈਪ ਦਾ ਧੰਦਾ ਕਰਨ ਵਾਲੀ ਇਕ ਔਰਤ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਜਿਹੜੀ ਸੋਸ਼ਲ ਮੀਡੀਆ ਰਾਹੀਂ ਮੁੰਡਿਆਂ ਨੂੰ ਆਪਣੇ ਜਾਲ ਵਿੱਚ ਫਸਾ ਕੇ ਆਪਣੇ ਘਰ ਬੁਲਾਉਂਦੀ ਸੀ ਅਤੇ ਫਿਰ ਕੋਡਵਰਡ ਰਾਹੀਂ ਆਪਣੇ ਪਤੀ ਅਤੇ ਉਸ ਦੇ ਦੋਸਤ ਨੂੰ ਬੁਲਾ ਲੈਂਦੀ ਸੀ, ਜਿਸ ਤੋਂ ਬਾਅਦ ਇਹ ਸਾਰੇ ਜਾਣੇ ਆਪਣੇ ਜਾਲ ਵਿਚ ਫਸੇ ਹੋਏ ਸ਼ਿਕਾਰ ਤੋਂ ਬਲੈਕ ਮੇਲ ਕਰਕੇ ਲੱਖਾਂ ਰੁਪਏ ਬਟੋਰੇ ਸਨ । ਹਨੀਟ੍ਰੈਪ ਗਿਰੋਹ ਦੇ ਇਨ੍ਹਾਂ ਮੈਂਬਰਾਂ ਦੀ ਪਹਿਚਾਣ ਛਾਇਆ ਉਰਫ ਪੂਜਾ ਪਤਨੀ ਕਮਲਜੀਤ ਸਿੰਘ, ਕਮਲਜੀਤ ਸਿੰਘ ਉਰਫ ਵਿੱਕੀ ਅਤੇ ਉਨ੍ਹਾਂ ਦੇ ਇਕ ਸਾਥੀ ਸੁੰਦਰ ਕੁਮਾਰ ਵਜੋਂ ਹੋਈ ਹੈ । ਖਰੜ ਦੀ ਡੀਐਸਪੀ ਰੁਪਿੰਦਰਜੀਤ ਕੌਰ ਸੋਹੀ ਵੱਲੋਂ ਦਿੱਤੇ ਵੇਰਵੇ ਅਨੁਸਾਰ ਮੁੱਖ ਦੋਸ਼ੀ ਪੂਜਾ ਇੰਸਟਾਗ੍ਰਾਮ ‘ਤੇ ਮੁੰਡਿਆਂ ਨਾਲ ਦੋਸਤੀ ਕਰ ਕੇ ਉਨ੍ਹਾਂ ਨੂੰ ਆਪਣੇ ਜਾਲ ਵਿਚ ਫਸਾ ਕੇ ਆਪਣੇ ਘਰ ਬੁਲਾਉਂਦੀ ਸੀ। ਜਦੋਂ ਕੋਈ ਵਿਅਕਤੀ ਉਸ ਦੇ ਘਰ ਆ ਜਾਂਦਾ ਤਾਂ ਉਹ ਉਸ ਵਿਅਕਤੀ ਦੇ ਸਾਹਮਣੇ ਆਪਣੇ ਪਤੀ ਨੂੰ ਕੋਡਵਰਡ ਦੀ ਵਰਤੋਂ ਕਰਕੇ ਫੋਨ ਕਰਦੀ ਸੀ ਕਿ “ਜੇਕਰ ਤੁਸੀਂ ਬਾਹਰ ਹੋ ਤਾਂ ਖਾਣਾ ਬਾਹਰ ਹੀ ਖਾ ਆਇਓ” ਇਸ ਤੋਂ ਭਾਵ ਹੁੰਦਾ ਸੀ ਕਿ (ਸ਼ਿਕਾਰ) ਬੰਦਾ ਘਰ ਆ ਕੇ ਬੈਠ ਚੁੱਕਾ ਹੈ, ਤੁਸੀਂ ਆਪਣੇ ਸਾਥੀ ਨੂੰ ਲੈ ਕੇ ਆ ਜਾਵੋ । ਇਸ ਦੌਰਾਨ ਬਣਾਈ ਯੋਜਨਾ ਅਨੁਸਾਰ ਪੂਜਾ ਘਰ ਆਏ ਬੰਦੇ ਨਾਲ ਰੋਮਾਂਟਿਕ ਸਥਿਤੀ ਵਿੱਚ ਹੁੰਦੀ ਸੀ ਜਿਸ ਤੋਂ ਬਾਅਦ ਪੂਜਾ ਦਾ ਪਤੀ ਕਮਲਜੀਤ ਸਿੰਘ ਆਪਣੇ ਸਾਥੀ ਸੁੰਦਰ ਕੁਮਾਰ ਨੂੰ ਲੈ ਕੇ ਮੌਕੇ ‘ਤੇ ਘਰ ਪਹੁੰਚਦਾ ਸੀ ਅਤੇ ਫੇਰ ਤਿੰਨੇ ਜਣੇ ਰਲ ਮਿਲ ਕੇ ਘਰ ਆਏ ਬੰਦੇ ਦੀ ਕੁੱਟਮਾਰ ਕਰਦੇ ਸਨ ਅਤੇ ਉਸ ਨੂੰ ਬਲੈਕਮੇਲ ਕਰਕੇ ਜਬਰ-ਜ਼ਨਾਹ ਦਾ ਮਕੱਦਮਾ ਦਰਜ ਕਰਾਉਣ ਦਾ ਡਰਾਵਾ ਦੇ ਕੇ ਪੈਸੇ ਵਸੂਲਦੇ ਸਨ । ਇਸ ਗਿਰੋਹ ਦਾ ਭੇਤ ਓਸ ਵੇਲੇ ਖੁੱਲ੍ਹਿਆ ਜਦ ਕਰਨਾਲ (ਹਰਿਆਣਾ) ਦਾ ਵਾਸੀ ਪ੍ਰਤੀਕ ਸਿੰਗਲਾ ਪੂਜਾ ਨਾਲ ਦੋਸਤੀ ਹੋਣ ਤੋਂ ਬਾਅਦ ਪੂਜਾ ਨੂੰ ਮਿਲਣ ਉਸਦੇ ਘਰ ਪੁੱਜ ਗਿਆ। ਉਪਰ ਦੱਸੀ ਯੋਜਨਾ ਮੁਤਾਬਕ ਪ੍ਰਤੀਕ ਸਿੰਗਲਾ ਨੂੰ ਅਗ਼ਵਾ ਕਰ ਕੇ ਤਿੰਨ ਜਣਿਆਂ ਨੇ ਉਸ ਦੀ ਕੁੱਟਮਾਰ ਕੀਤੀ ਅਤੇ ਜਬਰ ਜਿਨਾਹ ਦਾ ਮੁਕੱਦਮਾ ਦਰਜ ਕਰਵਾਉਣ ਦੀ ਧਮਕੀ ਦੇ ਕੇ 20 ਲੱਖ ਰੁਪਏ ਦੀ ਮੰਗ ਕੀਤੀ । ਜਦ ਪ੍ਰਤੀਕ ਸਿੰਗਲਾ ਨੇ ਆਪਣੇ ਘਰ ਵਾਲਿਆਂ ਨੂੰ ਫੋਨ ‘ਤੇ ਦੱਸਿਆ ਕਿ ਉਸ ਨੂੰ ਅਗਵਾ ਕਰ ਲਿਆ ਗਿਆ ਹੈ ਅਤੇ ਅਗਵਾਕਾਰ 20 ਲੱਖ ਮੰਗਦੇ ਹਨ, ਤੁਸੀਂ 20 ਲੱਖ ਰੁਪਏ ਲੈ ਕੇ ਪੁੱਜੋ ਤਾਂ ਪ੍ਰਤੀਕ ਸਿੰਗਲਾ ਦੇ ਘਰ ਵਾਲਿਆਂ ਨੂੰ ਕੁਝ ਸ਼ੱਕ ਹੋਇਆ ਜਿਸ ਤੋਂ ਬਾਅਦ ਉਨ੍ਹਾਂ ਪੁਲਿਸ ਤੱਕ ਪਹੁੰਚ ਕੀਤੀ । ਜਿਸ ਤੋਂ ਬਾਅਦ ਪੁਲਿਸ ਨੇ ਇਕ ਜਾਂਚ ਟੀਮ ਗਠਿਤ ਕਰਕੇ ਫੋਨ ਟਰੇਸ ਕਰ ਕੇ ਤਕਨੀਕੀ ਜਾਂਚ ਦੇ ਆਧਾਰ ‘ਤੇ ਪੂਜਾ ਦੇ ਘਰ ਰੇਡ ਕੀਤੀ ਜਿੱਥੋਂ ਪ੍ਰਦੀਪ ਸਿੰਗਲਾ ਨੂੰ ਆਜ਼ਾਦ ਕਰਵਾਇਆ ਤਾਂ ਅਤੇ ਉਕਤ ਗਿਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕਰਕੇ ਮੁਕੱਦਮਾ ਦਰਜ ਕੀਤਾ ਤਾਂ ਪੜਤਾਲ ਦੌਰਾਨ ਹਨੀਟ੍ਰੈਪ ਦਾ ਮਾਮਲਾ ਸਾਹਮਣੇ ਆਇਆ। ਪੁਲਿਸ ਅਨੁਸਾਰ ਗਿਰੋਹ ਦੇ ਮੈਂਬਰਾਂ ਨੇ ਮੰਨਿਆ ਕਿ ਉਹ ਇਸ ਤੋਂ ਪਹਿਲਾਂ ਵੀ ਹਰਿਆਣਾ ਦੇ ਇਕ ਵਿਅਕਤੀ ਤੋ 75000 ਅਤੇ ਇਕ ਸੋਨੇ ਦੀ ਚੈਨ ਅਤੇ ਇਕ ਹੋਰ ਵਿਅਕਤੀ ਤੋਂ 14 ਲੱਖ ਰੁਪਏ ਵਸੂਲ ਚੁੱਕੇ ਹਨ ।
